RAM CHHUNG CHANCHIN THAR

PM-in ram sum leh pai dinhmun siam tha turin thil tih nuam lo deuhte pawh tih a ngai dawn tih a sawi a, thil man tihhniam nana subsidy pek chin tawk neih te leh sum indaih lohna tihziaawmna atana tih tulte chu sorkarin a tih a ngai dawn tih sawiin, ram sum dinhmuin thanna chu kum khatah zaa 8 emaw, 9 emaw vel a nih theih nan heng thilte hi tih a ngai dawn niin a sawi. India ram dinhmunin beisei anga hma a sawn chak lo chu ramin a ngaimawh tih sawiin, hemi kawngah hian sorkarin a tih tur a ti mek niin a sawi bawk. Heng thute hi PM hian Mexico-a G20 ram hruaitute thut khawm vawi 7-na, Plenary Session-ah a sawi a, kum 2008 hnu lamah khan phurna siamtu atan ram dang ang bawkin India ram chuan sum indaih lohna a nasat zual deuh pawhin pawi tih loh chin a nei tih sawiin, tunah erawh chuan hemi letling zawng hian kal a ngaih dawn tak avangin thil tih nuam lo deuhte pawh tih a ngai dawn ta niin a sawi. Sorkar kum kal mekah chuan sum indaih lohna hi GDP za zela 5.1 velah awmtir a tum a, mahse subsidy tam lutuk leh chhiah lut tlem chuan nikumah pawh khan sorkar chu a beisei ang dinhmunah a dintir thei lo tawh a, nikuma sorkar beisei chu zaa 4.6 a nih laiin a takah chuan sum indaih lohna hi zaa 5.8 lai a ni.

Bihar CM, Nitish Kumar-a’n kum 2014 Parliament inthlanpui neih hma daih hian BJP chu PM atana a mi hual tifel turin a phut a, PM atan hian sakhaw tih bik nei lo ngei hual turin a ti bawk a, hei hi Gujarat CM, Narendra Modi a pawm loh tur thu tihchianna-ah ngaih a ni. Nitish Kumar-a chuan NDA atanga PM atana beisei chu mipui rorelna pawm thlap mi, India ram hi sakhaw hrang hrang biate leh tawng hrang hrang hmang, chi leh hnam tam tak awm khawmna a ni tih pawm mi a ni tur a ni, a ti a,  sakhaw tih bik nei chi chu pawm theih a nih loh thu a sawi. Bihar CM hian Pu Modi-a hi hming hmerhin sawi lo mah se, NDA-in Gujarat CM hi PM atana a sawi rik vaih chuan a kaihhruai, JD(U) chuan NDA a chhuahsan nghal dawn tih a sawi lawkah ngaih a ni a,  Bihar BJP nen tha takin an thawk ho mek nia sawiin, pawn lam miten hei hi an tihchhiatsak a nih chuan, a tan tihngaihna a awm loh tur thu pawh a sawi a ni. Nitish Kumar-a leh Narendra Modi-a hi NDA-a tel pawl hruaitu ve ve ni mah se, mimal taka an intih thiam lohna hi a rei tawh a,  kum 2005-a Bihar Assembly inthlanah daih tawh khan BJP hruaitute chu Bihar-a campaign tura Modi-a tir lo turin a lo ti tawh a ni. Kum 2010 inthlan hnua Nitish Kumar-a a lal nawn leh dawn pawh khan Modi-a hian a campaign pui lo bawk a, tunah hian BJP leh NDA atanga PM atana beisei thin, LK Advani chu a lo upat ve tak avangin, NDA hian PM tura beisei, mi langsar sa an nei lo hle a, Modi-a hming hi a rik tan deuh avangin Nitish Kumar-a hian a lo ral beih nghal nia ngaih a ni.
————

Madhya Pradesh, Betul district-a naute, taksa inzawma piang, Aradhana leh Stuti te chu naktukah zai then tuma beih an ni dawn a, heng naute lainatawm tak takte hi thla 11 mi an ni a, an pian hlim atangin Padhar damdawi inah an la awm ta reng a ni. Heng naute pahnih zai then tur hian India leh Australia doctor 23 leh nurse 11-in an bei dawn a,  darkar 10 vel an zai dawn a ni. He mite zai then an nih theih nana senso hi NDTV chuan a khawn a, cheng nuai 10 chuang an khawn ngah thei a ni. Doctor-te chuan, naute pahnih hi an thin a inzawm a, an lung pawh an intawm titih bawk a,  hemi zai then hi a hautak hle dawn a ni. Aradhana leh Stuti hi an pian hnu lawkah an nu leh paten enkawl thei lo turah inngaiin an pianna damdawi inah hian an kalsan a, an nu leh pate hi lo neitu rethei tak an nih avangin an fate, awma inzawm tlatte enkawl hi tlin lovah an inngai a ni.
————–

BJP hruaitu pakhat, Maneka Gandhi chuan nimin khan President candidate, Pranab Mukherjee a kawm a, Pu Mukherjee-a chu President atana mi tha tak a nih thu sawiin, candidate dang awm lova pawm tlan theih ni se a duh thu a sawi. Union Minister hlui lerh Pi Sonia Gandhi-i mo-pui nu, Maneka Gandhi chuan President thlanna hi inchuh ngai lovin, pawl hrang hrangten Pu Mukherjee-a hi pawm tlang thei se a duh thu a sawi a, BJP erawh chuan President thlanna turah hian a ngaihdan a la sawi chiang lo a ni. Kar hmasa pawh khan  Maneka hian India ramin President atan Pranab Mukherjee hi a mamawh tih a lo sawi tawh a, kum 30 chhung an inhmelhriat tawh thu sawiin, President awmze nei, ram tana mi chhuanawm a nih ngei tur thu a lo sawi tawh a ni. President thlanna tur hi President hlui, APJ Abdul Kalam-a’n chuh a tum loh thu a sawi hnuah BJP chuan PA Sangma thlawp an rilruk nia sawi a ni a, NDA-a tel pawl thenkhat, UPA candidate thlawp tum,  JD(U) leh Shiv Sena te pawh an thu sut tur leh,  ngaihdan hran nei lo turin a thlem mek nia hriat a ni.
————-

Congress party chuan an hruaitu pakhat, Digvijaya Singh chu an khak a, General Secretary ni mah se, party thupuangtu a nih loh avangin party aiawha thusawi tur a nih loh thu a sawi. AICC thuchhuah sawi danin, Digvijay Singh-a hi party aiawha thusawi thei tura thuneihna pek a ni lo a,  tun hnai lawk khan TV hmaah Digvijay Singh-a hian an thawhpui, Trinamool Congress hotunu, Mamata Banerjee-i chu mi rintlak loh leh puitling tawk lo niin a sawi a,  Congress President, Sonia Gandhi leh PM, Manmohan Singh pawh tiluhaitu-ah a puh a ni. Hemi hnu, nimin lawkah khan Digvijay Singh-a bawk hian Vice-President, Hamid Ansari chu a hna ngai, kum nga dang chelh zui turin Congress-in a ngaihtuah thei ang, tih a sawi leh bawk a, Vice President thlan tur chungchangah party-in ngaihdan engmah a siam hmaa he thu a sawi mai pawh hi Congress hruaitute chuan tha an ti lo hle a ni. Digvijay Singh-a hi tawng duh ve tak, a ngaihdan chu khawiah pawh sawi mai chi a ni a,  Union Home Minister, P Chidambaram-a pawh Naxalite ho chungchanga sorkar policy chungchangah a bei chiam tawh a, Anna Hazare-a leh a pawlte chet nasat deuh lai pawh khan party hriatpui lohvin a lo vir vel chiam tawh bawk a ni.
———–

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken