RAM PAWN CHANCHIN THAR

Al-Qaida hruaitu, Ayman al-Zawahiri-a chuan Egypt ram chu Israel nena muanna thu an thlun sut tur leh, Islam rorelna ram din turin a phut a, a thuchah hi Pathianni khan tihchhuah a ni. Zawahiri-a hi Egypt mi a ni a, hetianga a phut chhan hi Israel sorkarin Jerusalem chu Juda-te khawpuia a siam lohna tur niin a sawi a, Al Qaeda hotu a nih atanga thuchah a tihchhuah 10-na a ni. A thuchah, minit 47 chhung awh hi mi firfiak pawl website hrang hrangah tarlan a ni a, Egypt President hlui, Anwar Sadat-a pawh phatsantu-ah puhin, Israel sorkar nen he thuthlung hi an lo siam avangin Juda ho hian pawi an khawih zui zel niin a sawi. Kum 1979 khan Egypt leh Israel hian he thuthlung hi an lo siam a,  Jerusalem khawpui chungchang hi Israel leh Palestinian ho inbiaknaah pawh thu harsa leh an mutan a ni reng a ni. Israel chuan Jerusalem khawpui pumpui hi a hauh a, Palestinian ho-in khawpui chhak lama an hmun thianghlim awmna hmunte an hauh ve bawk si a, tuna Jerusalam khawpui chhak lam hi an puala ram an neih huna an khawpui atan an hual a ni.  Ayman al-Zawahri-a chuan Pakistan pawh na taka demin, Bin Laden-a in chu nawr chhe lo a, hmun thianghlima siam zawk tur niin a sawi a, he in nawr chhiat a nih avang hian America ho-in Bin Laden-a hi a dam lai chauh ni lo, a thih hnuah pawh an la hlau zui zel tih a chiang hle niin a sawi. Hengte bakah hian Zawahiri-a chuan February thlaa Afghanistan rama US air base-a Muslim lehkhabu thianghlim, Quran hal a nih avanga phuba la turin Muslim mite chu a fuih bawk a, America mite chu Muslim ho runtu, an ram luah luihsaka an hausakna te chhuhsaktu leh an hmun thianghlim tibawrhbangtu-ah a puh bawk a ni.

Egypt rama Muslim Brotherhood pawl chuan tuna thuneihna chelh lai, sipai lalten thuneihna pumhmawm tum ang ziazanga thil an tih chu ram pumah dodal an tum a, puan tawh angin, kar kal ta tawpah khan sipaite hian thupek chhuahin, Parliament an thiah bakah dan siamna lama thuneihna zawng zawng an inpe bawk a ni. Hetih lai hian President thlanna-a vote tlate chu chhiar zawh titih a ni tawh a, mak angreng takin candidate pahnihin chak zawkah an inngai ve ve a, Muslim Brotherhood hnuaia Freedom and Justice Party hruaitu,  Mohammed Mursi chuan vote zaa 52 hmuin a insawi a, a khingpui, kum 70 mi, fighter pilot hlui, Ahmed Shafiq pawhin chak zawkah a inchhal ve bawk a ni. A tawpah erawh chuan Mursi hi vote za zela 3 vela a chak rin a ni a, inthlan result hi dan ang takin Ningani khian puan a nih beisei a ni.  Tuna rorel lai, Supreme Council of the Armed Forces pawh hian Mursi hi a tling dawn niin an ngai niin BBC chuan a sawi a, President thuneihna titlem a, sipai thuneihna belh chhah zel turin thupek chi hrang hrang an chhuah tawh a ni. Vawiinah pawh khan Cairo-a Parliament kawtah sipai tam tak dah an ni a, MP-ten Parliament-ah luh luih an tum tih thawm a awm avangin an veng nasa hle a ni.
—————-

Burma rama eptu hruaitu, Aung San Suu Kyi chuan Britain ram a tlawh tan ta a, London-a a cham chhungin Parliament-ah thu a sawi bakah, lal chhungkua a kawm ang. Vawiin hi Suu Kyi pian champhaphak, a kum 67 tlin ni a ni a, London School of Economics leh BBC Burmese Service Radio station a tlawh ang. Suu Kyi hian a haw dawn hnaih lamah Prince of Wales leh Duchess of Cornwall a kawm dawn a ni. Suu Kyi hian tukin khan London a thleng a, naktukah a zirna hlui leh a pasal sun tawh thawhna thin, Oxford University tlawhin honorary doctorate degree a dawng ang a, Oxford University-ah hian a pasal leh an fate nen kum engemawzat an khawsak tawh angin Suu Kyi tan hian a lunglenthlak hle dawn a ni. Suu Kyi hian Ningani khan British Parliament in hnih member thu khawmte hmaah thu a sawi ang a, PM, David Cameron leh Foreign Secretary William Hague pawh a kawm dawn a ni.
————–

Mexico rama thu khawm mek, G-20 ram hruaitute chuan sum leh pai harsatna leh leiba nasa takin Europe khawmualpuia ram engemawzat a chim buai mek dan chu ngaihmawhawm an tih thu an sawi a, hei hi khawvelin harsatna a tawh hautak ber pawlah ngaiin, a sut kian dan tur leh, tun hnua a thlen tawh loh dan tur an ngaihtuah a ni. European Commission President, Jose Manuel Barroso chuan he harsatna hi Europe chauh ni lo, ram dangte pawhin an tawk nasa hle tih a sawi a,  World Bank President, Robert Zoellick pawhin he harsatna chungchangah hian thil tih dan tur kawhhmuh turin Europe ram hruaitute thuchhuak an ngaichang mek niin a sawi.
————-

Pathianni kal taa France ram Parliament inthlanpuiah  President thar, Francois Hollande-a kaihhruai, Socialist Party an chak hle a, he result avang hian ram sum leh pai enkawlna kawnga Hollande-a thuneihna pawh a nghet sawt dawn a ni. President hlui, Nicolas Sarkozy-a kaihhruai, National Assembly liam taa member ngah zawk, Conservative ho chu an che tha vak lo a, Pathianni-a France leh Greece inthlanna hian Europe khawmualpui hmabak pawh a hril thui hle dawna ngaih a ni. Tuna a lan danah chuan France rama Socialist mite hian an Parliament, National Assembly-a seat awm zawng zawng, 577-ah 308 atanga 320 vel an chang phak dawn a, chak tura an seat mamawh, 289 chu an khum hneh hle dawn avangin mi dang puihna tel lovin tha an tih angin ro an rel thei dawn a ni.
————-

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken