TUALCHHUNG CHANCHIN THAR

Mizorama sorkar hnathawk zinga tam ber, Ministerial Service Association leh Mizoram Secretariat Service Association chuan an thil phut nawr nan Thawhtanni atang khian tiam chin awm lovin a huhovin chawlh an la dawn. Hemi chungchang hi vawiin khan Mizoram Ministerial Service Association leh Mizoram Secretariat Service Association Executive Committee, a huhova Aizawla thukhawmte rel thluk a ni a, hemi hnua an pawl hruaitute hnen atanga Zonet thudawn danin, he Joint Executive Committee Meeting-ah hian an thil phut, an tana duty post siamsak ve te, District thar leh Sub Division thar siam a niha District danga mite sawn kual lova hna thar siam tura sorkar an ngennate sawiho a ni a, hemi chungchanga Chief Minister an hmuh thu leh Chief Minister-in an thil phut tihhlawhtlin sak thuai a lo tiam chungchangte, amaherawhchu tun dinhmunah tihkhawtlai ni leh ta nia an hriat thute sawihovin an lungawi lohna entir nan a huhova Casual Leave lak an tum ta a ni.

Lok Sabha MP Pu Vanlalzawma chuan Ningani khan Hliappui Area MUP Conference Changzawl khua-ah a hman pui. He MUP Conference-ah hian Changzawl bakah Pawlrang, Hliappui leh Saichal atangin palai thahnem tak an tel a ni. Thu sawiin Pu Vanlalzawma chuan MUP memberte chu tawn hriat ngah tak tak, kawng engkima thalaite aia thil hria leh hmathlir pawh thui zawk an ni tih hre renga thalaite kawng dik a kaihhruai kawnga tan la turin a chah a ni. Hliappui Area MUP Conference hi mipui, VC, thalai leh School naupangten an tawiawm tha hle a, hei hi Pu Vanlalzawma chuan thil entawn tlak, hmun danga awmte pawhin an hriat ve tur thil pawimawh a ni tih a sawi. He inkhawmah hian Pu Vanlalzawma chuan kum 80 chin chung lam mi 5 hnenah leh mi huaisen midang chhantu mi 2 hnenah chawimawina a hlan bawk. Hemi hma lama Pu Vanlalzawma’n Changzawl khua a thlen hian pangpar thi awrhtirin a khaw nawtin an lo lawm a ni. Nimin khan Sihfa-ah Saitual Block MHIP Conference a hmanpui bawk a, thu sawiin Pu Vanlalzawma chuan, khawtlang thilah leh hmeichhiate hamthatna ngaihtuaha MHIP hruaitute nasa taka an inhmang chu lawmawm a tih thu a hrilh a, India Look East Policy tih puitlinna chi khat atana Kaladan Multi-Modal Project chanchin leh Mizorama tuialhthei zawn hna tunlaia thawh mek a nih dan a hrilh bawk a ni.
———

Aizawl South Baptist Kohhran bial khawmpui chu nimin atang khan Shalom Baptist Kohhran Biak-Inah neih a ni a, naktuk, Pathianni thleng a awh ang. Khawmpui thupui atan hian ‘I ram lo thleng rawh se’ tih hman a ni a, he chang tlawhchhan hian Aizawl Area Baptist Church of Mizoram Executive Secretary Rev. H. Lianngaia’n Pathian thuchah a sawi thin a ni. Vawiin khan rorel inkhawm, Rev. VL Zawnga kaihruaina-in neih a ni a, nakkuma Aizawl South Baptist Kohhran Bial Chairman atan Upa JC Japanruna thlan a ni a, kum 2009 budget atan cheng nuai 56 sing 3 sang 1 ruahman a ni bawk. Aizawl South Pastor Bial huam chhungah hian Kohhran 12 a ding tawh a, member 3805 an awm a, kum 2009 chhung hian Kohhran dang 2 an ding leh dawn a ni.
————-

Mizoram Industries Association chuan nimin khan Khawzawla DC Rest House-ah General Assembly an nei. Hetah hian Champhai DC, Pu TV Fambawl chu khuallian a ni a, Mizorama thil siamtute chu tih tak takna rilru pua rim taka thawka hlawhtlin ngei tum turin a chah a ni. He Assembly, an pawl President, Pu ZD Vanlalfinga kaihhruaiah hian hun hmasa lamah an pawl member leh hruaitu hlui thi ta, Pu Biakchunga leh Pu Ellis Saidenga te sunna hun hman a ni a, resolution an pass-te zingah Industry Department-in thil siamtute tanpuina, Grant-in-Aid atana sum a dahte, thil danga hmang lova dik taka hmang tura sorkar phutna leh heta tan hian sum tam zawk dah ni se tih te, thil siamtuten State Incentive Subsidy an hmuh theih nan budget-ah sum tam zawk dah ni rawh se tih te a tel a ni.
————

Tlabung District Demand Committee chuan Tlabung Sub Division pum huapa District thar siam turin Mizoram sorkar a nawr chho zel a, hemi chungchangah hian Chief Minister hnenah dilna an thehluh bakah an dilna copy chu Home Minister, Pu Tawnluia, Health Minister, Pu R.Tlanghmingthanga, Minister dang leh Opposition leader-te an pe tawh a, District Demand Committee Secretary, Pu Hmingthansanga Ralte chuan Tlabung chu Sap hovin India ram an awp lai, 1872 daih tawh atang khan Chitagong Hill Tract Hqrs. atan lo siam a ni tawh a, India ramin zalenna a hmun hnuah pawh kum 1959 atang khan ADC thuthmun atana siam a nih bakah kum 1961 atanga 1975 thleng khan Assistant Commissioner thuthmun atan hman a ni a, he Sub Division chhungah hian khaw 130 chuang a awm a ni tih a sawi.
———

Cheng nuai 324 chuang senga sak, Chhinga Veng Presbyterian Kohhran Biak In thar chu vawiin khan Aizawl Presbytery Moderator, Upa Chhunkhuma’n a hawng. Biak In hawn prog. hi Biak In tual-ah hman a ni a, Moderator chuan Pathian lehkhabu chhiarin Biak In chu Pathianin a awmpui ngei a beisei thu a sawi a ni. Moderator-in Biak In a hawn zawh hian Pathian Biak Inkhawm neih chhunzawm nghal a ni a, hei hi Chhinga Veng Bialtu, Pastor Lalbiakvulmawia’n kaihruaiin Biak In thar chu Pathian hnen-ah a hlan a, Kohhran Zaipawl-te’n Rokunga hla “Aw Jaa” tih thiam takin an sa a, Moderator, Upa Chhunkhuma’n Pathian thuchah a sawi a ni. He Biak In thar hawn tak hi Chhinga Veng Kohhran a din hnu-a an Biak In 3-na a ni a, hawnna inkhawm-ah hian Kohhran mipui an tel thahnem hle a, tlai-ah a lawm nan ruai an theh nghal a ni. Chhinga Veng Kohhran Biak In thar hi a dung ft 90 leh inchi 10, a vang ft 52 leh inchi 10-a zau niin kum 2002 April ni 11-a sak tan an ni a, a sak nan hian cheng nuai 324,92,962 hman a ni a, mi 793 lenna a ni. Chhinga Veng Kohhran hi Dawrpui Kohhran atangin kum 1962 khan a in dang a, tunah hian member 2,182 zingah dan zawh kim 1,580 an awm a ni.
———-

Chhandamna Sipai Pawl, Central Division Young People (YP) Council huam chhunga YP Corps pualin vawiin khan Booth Mansion-ah Tirhkohte Thiltih Bu pumpui atangin Quiz Competition buatsaih a ni a, hetah hian CO bial 10 atangin naupang 20 an tel a ni. He Quiz Competition-a tel tur thlan nan hian CO Bial tin an intihsiak hmasa a, heta a titha mi 2 zel chu Bial aiawhin an tel a ni. He intihsiakah hian Bethlehem CO bial chu pakhatna an ni a, lawmman cheng 2,000 leh Certificate an dawng a, pahnihna, Zemabawk CO bialin cheng 1,400 leh certificate an dawng a, 3-na, Salem CO bialin cheng 1,000 leh certificate an dawng a, a bak zawng hian consolation prize, cheng 200 leh certificate an dawng a ni.
———

Peace Home pakhat, Ferrando Integrated Women Development Centre (FIWDC) chuan vawiin khan Aizawl Tourist Lodge-ah HIV/Aids leh ruihhlo chungchang sawihona an buatsaih. He Workshop-ah hian Lunglei Bawrhsap Pi M.Zohmingthangi, MSACS Project Director Dr.K.Ropari, FIWDC Director Sister Rose Paite, Mizoram University Professor, Pi Margareth Ch Zama-te’n thil pawimawhte an zirtir a ni. He Workshop-ah hian Mizoram hmun hrang hrang atangin mi 100 chuang an tel a, HIV/Aids leh damdawi hman sual chungchang bakah hruaitu nihphung leh chhungkua, Kohhran leh khawtlanga nu mawhphurhna hrang hrangte an zir a ni.
———-

Hlawh chungchanga lungawi lo, Service Association hrang hrang 9 aiawh ten nizan zan rei tawh takah khan Chief Minister, a Office-ah an hmu. Hemi hma lam hian Chief Minister, Ngopa zin lo haw tur chu heng Service Association Member-te hian a Office bulah zan rei tak thleng an lo nghak a, Chief Minister zin lo haw hi a Office-a zui lut nghalin an hlawh chungchanga an thil phut an hrilh a ni. Heng Service Association hrang hrangte hi Mizoram ICDS Circle Officers Assn, Mizoram Economics and Statistical Service Association, Veterinary Diploma Association, Health Multipurpose Service Association, Mizoram Soil and Water Conservation Service Association, Youth Service Association, Mizoram Prison Officers Association, Mizoram Jail Employees Association leh Mizoram Microscopist Association-te an ni a, tun hma lama an tlukpui thinte hlawh ang phak lova an hlawh siamsak a ni chu ennawn thuai tur leh, Mizoram Assembly Inthlanna puan a nih hma ngeia an hlawh chinfel sak turin in Chief Minister hi an ngen a ni. Hetih lai hian an hlawh chungchang enfiah saktu tura Chief Minister-in Expert Sub Committee on Pay a din chuan nizan khan DP&AR Minister, Pu Tawnluia hnenah an report an thehlut a, Service Association hrang  hrang lungawi lote chuan he Committee report hi rang taka en zui turin DP&AR Minister, Pu Tawnluia chu vawiin khan an ngen a ni.
————–

Champhai District-a Vaphai thlanga Saikhum phaia cheng, mipa ho chu tunlai hian Burma sipai hrang hlauvin an insaseng mek. Hemi chungchanga kan Correspondent thudawn danin, tun hnai khan |iau lui kam ramri hrulah Burma sipai pakhat thah a ni a, he tualthahna thlengah hian Saikhum phaia cheng mi 1 leh hmun danga cheng Myanmar mite rinhlelh an ni a, Burma sipaite chuan an mi rinhlelh, Saikhum phai mi chu man tumin an bei a, hetiang boruak karah hian Saikhum phaia mipa hote chu an insaseng nia sawi a ni. Hetih lai hian he thil thleng hi Champhai DC pawh hriattir a ni tawh a, SP pawhin thil awm dan hre chiang turin vawiin khan Zokhawthar a pan a, hetih lai hian Khawbunga Assam Rifle awmte pawh mipuite thlamuan turin an inbuatsaih mek nia thu dawn a ni bawk.
———–

Muallungthu Branch YMA chuan vawiin khan an khua chu zu awm lohna hmun, Dry Area a ni ta tih an puang. An khua, zu awm lohna khua a ni ta tih puanna inkhawm hi an Veng Community Hall-ah neih a ni a, hetah hian an khaw VCP Pu K.Lalrodina chuan, tun hma lama zu tamna khua ni thin, Muallungthu chu zu awm lohna khua a ni ta tih a puang a, hemi rual hian hmun dang atanga Muallungthu-a kalte pawh zu keng lut lo turin a ngen a ni. He inkhawmah hian Excise Deputy Commissioner, Pu Lalhmunsanga, Kulikawn OC, Pu Lalsanglura, Central YMA-a SRS hruaitute leh Joint YMA hruaitute pawh an tel a ni. Muallungthu hi In 200 chuang, tun hma lama zu tamna a ni thin a, zu tirem tur hian YMA leh khawtlang hruaituten nasa takin tan an la a, tun hnai khan vantlang inkhawm chuan an veng Dry Area-a puan hi an remti ta a ni.
————

MJA Executive Committee-in tun hnaia MJA member thar atana a lakte chu vawiin khan Aizawl Press Club-ah MJA President, Pu K.Sapdanga’n a lawm lut. He lawm luhna inkhawm hi MJA Vice President, Pu Lalthanzama’n a kaihruai a, MJA President chuan chanchinbu mi tan tha taka leh inpe taka hnathawk tur chuan Kohhran leh khawtlang-ah inhman tam hman a ni meuh lo tih a sawi a, hei hi Kohhran leh khawtlang pawhin an hriatthiam thu leh mipui tana rawngbawl chu tihtak zeta thawh a ngaih thu a sawi a ni. MJA member thar atana lak luhte hi DDK News Stringer, Pu Jerome Malsawmzuala Vanchhawng, Hnehtu Managing Editor, Pu Vanlaldiki, Mizo Arsi Managing Editor Pu Lalchhanhima Zadeng, Zoram Today Editor-in-Chief Pu H. Laldinmawia, Thupuan Jt.Editor Pu T.Lalengmawia, Kawnpuia Chhuahtlang Editor Pu H.Lalmuanpuia, LDF Cable News Chief Editor Pu P.C. Lalduhthlanga, Lunglei ELDO ZENITH LINK News Editor Pu FC Laldinpuia, Kolasib DDK News Stringer Pu  Johan C.Lalhmunmawia leh Lunglei Sunday Digest Editor, Pu F.Lalchhuanawma-te an ni. He hunah hian MJA President hlui, Pu DR Zirliana’n member tharte fuihna hun a sawi a, anni nen hian MJA-ah hian member 199 an awm ta a ni.
————–

Mizoram Football chanchina lawmman tamna ber, BSNL Cup chu vawiin khan khelh chhunzawm a ni a, hetah hian 1st Batallion MAP leh Luangmual FC-te’n an khingpuite an hneh ve ve a ni. Inkhel hmasa zawk-ah 1st Batallion MAP-in goal 2 goal 1-in College Veng Fc an hneh a, inkhel hnuhnung zawk, ram pawn player tamna ve ve-ah Luangmual FC-in goal 2 goal 1 tho-in FC Kulikawn an hneh a ni. heti hian Group B-a Team 4-te hian vawi 2 theuh an khel a, 1st Batallion MAP-in point 6 an hmu a, Luangmual FC-in point 3, FC Kulikawn leh College Veng FC-te’n point 1 ve ve an hmu a ni. BSNL Cup hi Thawhtanni-ah khelh chhunzawm a ni ang.
————-

Vawiin khan Aizawl khawpui chu a lum lai berin celsius degree 25.9 a ni a, a vawh lai berin degree 19.2 a ni. Hemi chhunga ruah sur zat report hi dawn a ni lo.
————-

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken