TUALCHHUNG CHANCHIN THAR

Kumin April thla tawp lama Mumbaia Mizo hmeichhe pali hralhtua puh, Zodingliani leh a hmeichhe hruai zinga 2 chu vawiin khan Mizoram rawn thlenpui an ni. Zodingliani hian heng hmeichhiate hi Mumbai-a hna thawh tur hmuhsak thei anga insawia a hruai thlak hnuah, a ruka inzawrhna hmunah a hralh nia puh a ni a, CID (Crime) SP, Pu Joseph Lalchhuana’n vawiina Lengpui Airport-a thuthar la khawmtute a hrilh danin, Zodingliani hi kum 27 mi, Tedingi tih leh Rosy-i tia koh thin a ni a, Vairengte khua niin a insawi a, Mumbai-ah Massage Parlour leh Beauty Parlour-a hna thawh tur hmuhsak nia insawiin Mizo nula pali a hruai thla a, mahse heng nula palite hi a ruka inzawrhna hmunah a hralh ta zawk a ni. An zinga pakhat hian engtin tin emaw an chhungte be pawpin thil awm dan leh chhanchhuah an ngaih thu a hrilh a, hetiang a nih tak avang hian Vairengte Joint MHIP chuan he thil thleng hi Salvation Army rawngbawlna peng pakhat CHAN-ah an thlen ta a, CHAN programme Co-ordinator, Pu Jimmy Laltlanmawia chuan tun thla ni 4 khan Vairengte Thana-ah FIR a theh lut ta a ni. Vairengte Thana-ah hian thubuai ziah luh a nih hnuah he thil hi a hmanhmawhthlak hle tih sorkarin a hria a, Rescue Team siamin Pu Joseph Lalchhuana ho hian Police officer pahnih leh Vairengte SDPO, Pu Lalrinpuia Varte chuan tun thla ni 19 khan Mumbai an thleng thla a,  tun kar Thawhtanni, ni 20 zan dar 11:30 vel khan Mumbai-a Jung Santa Cruz hmun Mizo nula pahnih chu an chhanchhuak ta a ni. He thila mawhphurtu, Zodingliani leh a pasal, Shodit Hasta Thapa, kum 28 Mumbai-a mite pawh an man nghal a, Thawhlehni, ni 21 khan CHAN programme coordinator, Pu Jimmy Laltlanmawia chu chah thla-in, heng an mi chhanchhuah pahnih hi a kutah an hlan a, CHAN hian heng mi pahnihte hi haw man zawng zawng tumsakin, court thupek angin Protective Home-ah dah nghal an nih tur thu a sawi bawk. Zawhna chhangin CID (Crime) SP chuan pali zinga an hruai haw ve loh pahnihte pawh an biak pawh thu leh,  anni chuan an awm dana an lungawi thu an sawi avang te, an chhungte phalna-a awm an nih thu an sawi avangte-in an hruai haw ve ta lo niin a sawi a, he thila inhnamhnawih mi pahnihte hi Vairengte Thana panpui nghal an nih tur thu a sawi bawk. Zonet thu dawn danin, heng vanduaina tawkte hian tihluihna leh kut pawh an tuar nasa hle a ni.   

Mizoram Pradesh Mahila Congress Committee chuan Mizoram Police-ten Mizo nula, Mumbaia buma awmte tun hnaia an chhanchhuak chu lawmawm an tih thu thuchhuah siamin an sawi a, heng mite chhanchhuaktu, Police Team, SP Crime, Pu Joseph Lalchhuana hote thil tih dan chu fakin Chief Minister Pu Lal Thanhawla leh Home Minister Pu R. Lalzirliana-te ruahmanna fel tak hnuaia thil tih dan chu lawmawm leh chhuanawm an tih thu an sawi. Hemi bakah hian ABCI Manager 2, Assam a Bru misual pawlin an ruk bo, tlan chhuahna sum an phut pek ngai lova Police-te’n an chhanchhuak chu lawmawm an tih thu an sawi bawk a ni. Aizawl District Congress Committee pawhin tlanna sum phuttu hel pawlte kut atanga an mi ruk bo Police-te’n an chhanchhuak leh, Mizo nula bum 4, nawhchi zawrhtir tuma Mumbaia thawnte, Mizoram Police-te’n an chhanchhuak chu lawmawm an tih thu sawiin hei hian Police-te hnungkhirh sorkar tharah phelh a nihzia a tarlang niin an sawi a, he sorkar tharah hian hel training-na hmun, a ruka siamsak, silai tawlh ruk, Discretionary Fund hmanga hel vulhte a awm tawh lohzia leh Police-te’n huaisen takin an hna an thawk thei ta tih a tarlang niin Aizawl District Congress Committee chuan a sawi.
———-

Mizo Zirlai Pawl chuan Technical Entrance Exam result chungchanga zirlai thenkhat chhanna, RTI dan hmanga MBSE an dil chu MBSE-in a tihhlawhtlin sak duh lo niin an sawi. Vawiina Aizawl Press Club-a thuthar la khawmtute an kawmna-ah MZP President, VL Krosshnehzova chuan, Technical Entrance Exam result chungchangah zirlai 20 velin an mark hmuh danah thil fel lo a awm ni-a an hriat avangin MZP-ah an zualko tih a sawi a, MZP chuan hei hi bawhzuiin MBSE-ah hian RTI dan hmangin an chhanna en a dil a, mahse hei hi MBSE lam chuan an danin a phal loh avanga an pek theih loh thu-in an chhang ta niin a sawi. MZP hruaitute chuan, Mizoram State Chief Information Commissioner meuhin MBSE chu he thil pe chhuak tura a tih hnu-ah pawh vawiin thleng hian an la dawng lo niin an sawi a, MBSE hian thil thup an nei em ni tih thlenga rinhlelh theih nia an ngaih thu an sawi bawk.  MZP President chuan, kumin Technical Entrance Exam hi Higher & Technical Education Department-a Technical Wing chuan MBSE kutah a dah tih sawiin, thla hlui ni 6 khan Exam result hi a chhuak tih a sawi a, result-ah hian zirlai tam tak chuan an beisei aia mark an hmuh that loh avangin an chhanna en an duh a, zirlai 20 vel chu MZP-ah hian an zualko a, MZP chuan thla hlui ni 10 khan RTI dan hmangin Higher & Technical Education Department-a Technical Wing SPIO-ah hian heng zirlaite chhanna en hi a dil a, mahse Technical Wing SPIO chuan an thil duh chu MBSE SPIO-ah a thawn a, mahse thla hlui ni 16 khan MBSE SPIO chuan MZP thil duh hi an danin a phal loh avangin an pe thei lo tih a hrilh niin a sawi bawk. VL Krosshnehzova sawi dan chuan, MBSE SPIO-in an thil dil a pe chhuak thei lo tih a hrilh ni hian Chief Information Commissioner-ah an zualko nghal  a, CIC chuan tun thla ni 6 khan MBSE SPIO chu lehkha thawnin, MZP-te thil dil chu kar khat ral hma ngeia lo enpui turin a ti a, tun thla ni 13-a MBSE Office-a an len chuan CIC ngenna hi MBSE chuan an tihhlawhtlin theih loh thu leh High Court-ah khin let an tum thu MBSE hotute hian an lo hrilh ta a ni. Hemi hnu hian MZP chu CIC-ah hian kal lehin thil awm dan an hrilh a, tun thla ni 14 khan CIC chuan a thupek hmasa ang khan MBSE chu lehkha thawn lehin ni 10 ral hma-a MZP-te thil duh chu pe turin a ti leh a, CIC thupek hi naktuk thleng a ni a, mahse vawiin thlengin MBSE atang hian engmah an la hmu lo a ni. MZP President chuan, tukin khan MBSE pisa-ah hian an leng tih a sawi a, mahse MBSE hotute chu High Court-ah kalin CIC thupek hi an khing let tih an lo hrilh niin a sawi a, MBSE-in Parliament dan siam, RTI dan an zah lo chu na an tih thu leh MBSE hian ziaka engmah MZP an hriattir ngai lo chu pawi an tih thu te, MBSE hian nakin zela buai an peih loh avangin an thil duh hi an pe thei lo ni-a an ngaih thute a sawi bawk.
————-

Kumin sorkar kum chhunga Mizorama SSA Mission tihhlawhtlin dan tur chungchang, vawiin khan District Project Co-ordinator te leh Intervention Co-ordinator te sawipuia hrilhfiah an ni. He inkhawm, School Education Dept. Conference Hall-a neiha fuihna thusawitu, Education Secy. Pi Esther Lalruatkimi chuan DPC leh Intervention Co-ordinator te chu anmahni hna chanpual theuh hria a, thiam taka thawk turin a hrilh a, ram hmasawnna atana hnathawk tur chuan anmahni hna ah inpek zawh a tul thu te, rinawm tak leh taima taka hnathawh a tul thu te leh tih lawk theih awm ang angte tih lawk ching turin a chah a ni. He meeting-ah hian Mizoram Education Mission Society-a Officer on Special Duty, Pu Lalhmachhuana chuan kumin sorkar kum chhung atana Mizoram pum huapa SSA hnathawh dan tur siam Project Approval Board-in a pawmpui tawh hmanga hnathawh dan tur a hrilhfiah a, Finance & Accounts Officer, Pu Lalliansanga pawhin sum vawn dan leh hman dan chungchanga an thil hriat tur te a hrilhfiah a ni. He meeting hi SSA State Project Director, Pu T. Rohmingliana’n a kaihruai a ni.
———-

Congress party chuan SSA Mission Mizorama hman tan a nih kum, 2001-2002 atanga kum 2010-2011 thlenga state sorkarin Matching Share a pek theih loh avanga kum tina sum hmuh tlem dan a tarlang. MNF party-in state sorkar sum tum ve tur pek theih loh avangin Congress sorkarin kum 2 kal ta chhung khan SSA sum a hmu tlem nia a sawi chu chhangin Congress party chuan, kum 2001-2002 a sum hmuh tlemna chu Rs 76,33,000/-, 2002-2003-ah Rs 2,24,81,000/-, 2003-2004-ah Rs 4,64,32,000/-, 2004-2005-ah Rs 7,54,27,000/-, 2005-2006-ah Rs 6,19,24,000/-, 2006-2007-ah Rs 4,62,45,000/-, 2007-2008-ah Rs 1,69,24,000/-, 2008-2009-ah Rs 1,01,17,000/- leh 2010-2011-ah Rs 2,08,06,000/- niin a tarlang a, hetianga a tarlanna chhan hi hemi hma lama MNF party thuchhuahin mipui a hruai sual palh an hlauh vang niin Congress party chuan a sawi a ni.
———

‘Establishment & Administration’ tih thupuia hmangin vawiin khan Agriculture Department-a Officer-te training pek an ni. He training hi Agriculture Dept. leh ATI tangkawpin Agriculture Dept. Conference Hall-ah an buatsaih a, training hawngtu, Joint Director, Pu C. Lalniliana chuan dan hnuaia dan hria a hnathawh chu an tan a that thu leh a him ber tih sawiin technical mite pawhin dan an hriat a tul thu a sawi. Hawnna inkhawm hi Joint Director, Pu Lalrinliana’n a kaihruai a, he training, naktuk thleng awh turah hian Right to Information Act leh sorkar office-a dan hrang hrang hmante, Administrative Training Institute leh DP & AR-a officer-ten an zirtir a ni.
———–

India rama khaw fai thlan chhuahte hnena pek thin, Nirmal Gram Puraskar Award chu vawiin khan CM, Pu Lal Thanhawla’n khaw fai 5 thlan chhuahte a hlan. Khaw fai lawmman dawngtu khuate hi Bawngthah, Hliappui, Lallen, Phulmawi leh Zawlnuam Thuampui te an ni a, PHE Department bul tuma khaw fai lawmman semna inkhawm, Vanapa Hall-a buatsaihah CM chuan, khaw fai lawmman dawngtute chu fakawm a tih thu sawiin chawimawina an dawn chu anmahni tiphurtu leh titangtu, a la dawng ve lo khuate tan pawh dawn ve ngei duhna thinlung cho chhuaktu a nih a beisei thu a sawi. CM chuan Mizoramin faina kawnga hma a sawn theih nana tan latu, PHE Department leh UD &PA Department tan lakna te chu fakawm a tih thu leh zir tur erawh chu,  mipuiten an la ngah thu uar takin a sawi a ni. PHE changtu, Parliamentary Secretary, Pu H. Zothangliana pawhin PHE Department hnathawh kawng hrang hrang a tarlang a, he Dept.-in kawng hrang hrang hna a thawh dan tarlanna, Documentary Film a tlangzarh nghal bawk.

Nirmal Gram Puraskar (NGP) Award hi Total Sanitation Campaign hnuaia hnathawh dan teh nan te, faina lama khaw hrang hrangten tan an lakna atana inelna atan kum 2005 atang khan President-in kum tin lawmman a hlan thin a. mi 1,000 aia tlemna khua-ah – Rs 50,000/-,  1,000-1,999 inkarah – Rs 1,00,000/-,  2,000-4,999 inkar chennaah – Rs 2,00,000/- mi 5,000-9,999 inkar chennaah – Rs 4,00,000/-, mi 10,000 chung lam chenna khuaah – Rs 5,00,000/-
an pe thin a ni. He chawimawina dawng thei tur hian khuaa in zawng zawngin inthiarna tha – ek in leh zun in an neih vek a ngai a, Zirna in – School leh Anganwadi-ah te inthiarna tha a awm vek a ngai bawk a, Vantlang hmunah inthiarna tha a awm bakah khawlai leh daiah ek a awm lo tur a ni a, khawtlang chu en mai pawhin a faiin a thianghlim tur a ni a, hetiang khuate tan he lawmman, Nirmal Gram Puraskar Award hi dawn theih a ni. Award semna inkhawm hi PHE Special Secretary, Dr. Dilraj Kaur-i’n a kaihruai a ni.
———–

Mizoram Bru Coordination Committee chuan Tripura Bru camp-a Mizoram Bru awmte hruai kir hna chhunzawn leh thuai turin Mizoram sorkar a ngen. Hemi chungchangah hian Bru Coordination Committee chuan Mizoram sorkar hnenah ngenna a thlen tawh a, Central sorkar pawh a hriattir tawh a ni. Vawiina thuchhuah an siamah Bru Coordination Committee chuan, Sakhan tlang dung atanga Mizo chhungkaw engemawzat tlan chhuakte chhawmdawlna pawh Central sorkarin pe ve ngei se a duh thu sawiin, he thil hi Bru camp atanga Mizoram Bru lak let hna kal mek chawlhsanna atana hman a ni chu vanduaithlak an tih thu an sawi a ni. Bru Coordination Committee chuan misual pawl thenkhatin thil sual an tih apianga Bru mipuite, hnam pumpuia huatna emaw, hmuhsitna tawngkam emaw awm thin chu pawi an tih thu sawiin, misualte thil tih leh Bru mipuite inkungkaihna nei anga sawi thin chu thil tih awm loh niin an sawi bawk.
———-

Central YMA chuan kumin atana YMA kum puan, ‘Khawtlang nun siam that’ bawhzui nan tun thla ni 27, kar leh Thawhtanni atanga July ni 10 thleng khian ruihhlo ngai, zuar leh hmeichhe rahbi tleute tan Chanchin tha Camping a buatsaih dawn a, he Camping hi Krista Hnungzuitute |awngtai Bethel Camping Centre, Chawnpuiah neih a ni ang a, mi 500 vel luh theihna turin hmun buatsaih a ni ang. Hemi chungchanga Central YMA hriattirna chhuah tarlan danin, he Camping-ah hian Son of God Ministry-a mi, Pu Lalsanglura Ralte chu Speaker a ni ang a, he Camp-a lutten Pathian chhanchhuahna an chan theih nana tawngtaipui turin mimal, chhungkua leh Kohhran hrang hrangte Central YMA chuan a ngen a, mi thahnemngai leh inphal, tanpuina pe duh tan Tuikhuahtlanga Central YMA Office-ah pek theih reng a ni tih a sawi tel bawk a ni.
———–

Mission Veng YMA North Branch chuan tun thla ni 30, Remna Ni lawm nan hian Sikulpuikawn-ah Peace Concert leh a ruala tingtang perh tam bera Mizoram record “Largest Guitar Ensemble Record for Mizoram” buatsaih an tum tih an sawi. Vawiina Aizawl Press Club-a thuthar la khawmtute an kawmna-ah Mission Veng YMA North Branch hruaitute chuan, thalaite tan hetiang hun remchang siam hi tha-a an hriat avangin tun thla ni 30, Remna Ni lawm nan Peace Concert leh tingtang perh tam ber record hi siam an tum niin an sawi a, he Concert chhim tur leh record an siamna-a tel ve turin mi tin an sawm bawk.  Mission Veng YMA North Branch hruaitute chuan, a ruala tingtang perh tam ber record siam an tumah hian Zirsangzela Hnamte hla, “Ka perhkhuang zai tin thiam” tih chu D key-a a ruala tum an tum tih an sawi a, he record siam an tumna-a tel tur hian mi 700 chuang an in-report tawh te, mi 400 chuangin form an lak chhuah tawh thu te, mi 200 chuangin tel an tum thu an tihchian tawh thute an sawi bawk. Mission Veng YMA North Branch hruaitute chuan, record an siam zawh hian concert ropui taka chhunzawm an tum thu pawh an sawi a ni.
————–

MNF President, Pu Zoramthanga chuan MNF sorkar chhung khan sum leh pai enkawl dan, Financial Management a tha a, an sorkar tawp dawn lamah khan K. Deposit NIL-ah an dah niin a sawi. Tuna Congress sorkar, Pu Lal Thanhawla kaihhruai hian K. Deposit tam tak siam lehin kih hnawk tam tak a nei nia sawiin MNF President chuan, kum 14 chhung Chief Minister lo ni tawh, Finance Commission Member pawh lo ni tawh, Pu Lal Thanhawla hian a hun takah Budget tur sum a chin fel loh thin avangin a sorkar chhungin Vote on Account-in a kal ngar ngar a, a tla chawpa engkim kalpui te, hna la thawh si loh, hnathawh tawh anga bill lem siama Bank atanga sum la chhuak a, K. Deposit a dah teuh teuhte hi sorkar chak lo entirna a ni a ti bawk. Congress thuchhuah chhanna, vawiina a siamah an Party President, Pu Zoramthanga chuan an sorkar chhung khan Annual Plan sum tur chu kum tin, January thla hma in an ruahman fel vek thin avangin a hun takah budget a pharh theih niin a sawi a, nikum sorkar kum tawpah khan sorkar sum hman hman loha liam a awm lo na a, kum tawp dawn, March thla tawp lamah khan sorkar sum la chhuak lawkin K. Deposit-ah Rs 2,00,00,00,000/- dawn vel lai a awm niin a sawi a, he sum hmanna tur hi a hma lama ruahmanna a awm si loh avangin hei hian sorkar hnathawkte nasa takin a tibuai a, hei hi sorkar chak lo leh Financial Management thiam lo entirna a ni a ti bawk.
————

Higher & Technical Education Director, Dr. H. L. Malsawma leh Higher & Technical Dept.-a mi thiamte chuan vawiin khan Bawngkawn-Lunglei road-a Pi Sangthuami Building-a mimal din, Institute of Laboratory Sciences an en fiah. He private institute hi Laboratory Technology Diploma Course zir theihna atana hawn a ni a, an enfiahna chhan hi Mizoram State Technical Education hnuaia ziah luh theih a ni dawn em tih hriatna tur a ni.
———–

Nimin khan PHE Minister, Pu S.Hiato-a’n Chhuarlungah Rs. 2,19,62,000/-senga siam, CHHUARLUNG (AUGMENTATION) WATER SUPPLY SCHEME a hawng. He tui pekna thar hawnna inkhawm, Chhuarlung Centenary Hall-a buatsaih hi PHE SE, Pu H.C. Lalnunzira’n a kaihruai a, Minister chuan, a pianna khua, Chhuarlung khua chu tui harsa tak thin khua a nih thu sawiin, tuna kawt kai maia tui herh haw theih a ni ta chu thil lawmawm leh chhinchhiahtlak tak a nih thu a sawi. Saiha WATSAN Division EE,  Pu H. Lallianmawia Report atanga a lan danin,  Chhuarlung (Augmentation) Water Supply Scheme hi nikum September ni 1 atanga thawh tan a ni a. Tui hi Siata ram, km 22-a hla atanga lak a ni a, tuizem, litre 70,000 dawnga dah khawl a ni.
———-

Mizoram Apex Sericulture Cooperative Society (MASCOS) Ltd. chuan vawiin khan Mizoram State Archives Hall-ah General Conference vawi-13 na an hmang a, Cooperation  Minister, Pu J H Rothuama leh Sericulture Minister, Pu Nihar Kanti Chakma-a’n an hmanpui a ni. Pu J H Rothuama chuan Mizoram-a corporation thenkhatin hlawkna an neih loh laia Co operative federation hrang hrang, thawktu nei tlem siin hlawkna an nei thei chu  entawntlak a tih thu a sawi a, Pu N K Chakma pawhin NLUP kal tlangin kum nga chhungin pangang khawitu chhungkaw 8,500 vel tanpuina pek an nih tur thu a sawi a ni. MASCOS hi kum 1999 khan din a ni a, a hnuaiah sericulture society 34 an awm a, sericulture-a eizawngtu chhungkaw 1,000 vel an enkawl mek a ni.
———-

|hiak Branch YMA chuan vawiin khan Aizawl Civil Hospital-a hman atan thisen unit 40 an pe a, thisen petute hi mipa 34 leh hmeichhia 6 an ni a, an thisen hi Civil Hospital Blood Bank-a kalin an pe a ni.
————-

Aizawl Sub Divisional Magistrate chuan Aizawl Sadar Sub Division huam chhungah Tiranga leh Gutkha atanga thil siam chi hrang hrang kawl, zawrh leh hman a khap. Gutkha atanga thil siam khap te chu  Five Thousand, Tulsi, Talab, Sikhar, Pan Masala, Bahar, Chandragupt, Manili 100, Sheetal, Soni 1000 leh a dangte a ni a,  khapna thupek Cr. P.C Section 144 tlawh chhana nimina a chhuah hi thla 2 chhung hman a ni ang.
———–

AH & Veterinary Dept. chuan May thla chhung khan ran chi hrang hrang dam lo 14,709 a enkawl a, heng zinga 9,759 chu hri danna pek an ni a, 1,967  te chu zai an ni. Hemi chhung hian bawngpui kah rai 247 leh vawkpui kah rai 217 an awm bawk a ni. May thla chhunga sorkar sum zema sum a chhun luh zat chu Rs 2,27,695/- a ni.
———–

Aizawl Forest Division chuan Green Mizoram programme hman chhoh mekah naktuk, Zirtawpni zing dar 7 atangin thing phun duhte phun tur thing tiak, Aizawl City Park-ah a sem chhuak dawn a, thing tiak phun tur mamawhte tan a thlawnin a lak theih ang a, amaherawhchu mi pakhatin thing tiak 10 aia tam a lak theih dawn loh a ni.
———–

Mizoram UPC rorelna sang ber, Executive Committee meeting, an Hqrs.-a nimina tan chu vawiin khan chhunzawm a ni a, hetah hian missionary tang lai 2 Pastor puitlingah hlan kai an remtih bakah Hqrs. Office-a hnathawk tur mi 2 dang lak belh remtih a ni bawk. He meeting hian Mission Dept. kaihhruaina leh hmeichhe pawl ‘Ladies Auxilliary Dept.’ inkaihhruaina dan siam chu a pawm a, Pastor bial khat dang hawn belh rawtna pawh ngaihtuahin, General Assembly-a put luh turin a pawm bawk a ni. Vawiina rorel inkhawm hi Executive Chairman, Upa H. Zosangliana’n a kaihruai a ni.
———-

International Olympic Committee ruahman angin tukin khan Aizawlah pawh Olympic Day Run neih a ni. Hetah hian infiamna chi hrang hranga member thahnem tak an tel a, Vaivakawn, Sikulpuikawn leh Chanmari atanga tlan tanin Lammualah an intawk khawm a ni. Hetah hian Chief Minister, Pu Lal Thanhawla, Mizoram Olympic Association President ni bawk chuan thusawiin he ni hi infiam mi, upa tawhte tan pawh intuai thar lehna ni a ni, a ti a, Mizoram Olympic Association chu chak takin a thang chho zel tih sawiin, Mizo thalai infiam miten ram pum huap leh khawvel huapa infiamna-a hnehna an chang thin chu chhuanawm a tih thu a sawi bawk. He Olympic Day Run-ah hian sports association hrang hrang 17 atangin mi 2,335 an tel a ni. Heta sports association tel zawng zawngte hian lawmman, tangkafai leh certificate an dawng vek a, infiam mi tel tamna ber, Mizoram Amateur Taekwando Association chuan mi 624 a thawh a, lawmmanah certificate bakah Rs 6,000/- a dawng a ni. Olympic Day Run hi kum 1987 atang khan kum tin June ni 23-ah neih thin a ni.
———–

Vawiin khan Aizawlah khaw lum lai berin Celsius Degree 27.4 a ni a, a vawh lai berin degree 20.4 a ni. Hemi chhung hian ruah millimetre 2.8 a sur a ni. Boruak hi a ro lai berin za zela 70.4 a ni a, a hnawn lai berin za zela 95.6 a ni.
——–

Naktuk, Zirtawpni-ah chuan ruah a sur rin a ni , khaw lum lai berin Celsius degree 25 vel, a vawh lai berin degree 23 vel a nih rin a ni. Zing dar 4:33-ah ni a chhuak ang a, tlai dar 6.09-ah a tla leh ang. Ni rei zawng chu darkar 13, zan rei zawng chu darkar 11 a ni ang.
———-

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken