www.zonet.in

TUALCHHUNG CHANCHIN THAR

Mizoram Electoral Roll ennawn lehna, tun hnaia zawh fel takah kumina Mizorama vote nei thei zawng zawng chu 6,33,455 an ni a, nikum aia kumina vote nei punna hi 4,002 a ni a, hei hi za zela 0.63 a ni. Vote nei thei zingah hian mipa aiin hmeichhia an tam a, hmeichhe vote nei zawng zawng hi 3,20,207 an nih laiin mipa vote nei chu nuai 3 sing 1 sang 3 leh 248 an ni a, hmeichhe tam zawkna hi 6,959 a ni.  Mizorama Assembly bial awm zawng zawng, bial 40-a Election Commission thupek anga Electoral Roll Summary Revision neih zawh takah hian bial thenkhatah vote nei thei 500 chuang thlenga an pun laiin bial thenkhatah chuan 500 chuangin an tla hniam bawk a, an pun tamna ber, Aizawl West III-ah chuan 545-in an pung a, a dawttu Lawngtlai West-ah 505-in an pung a, Aizawl North III-ah pawh 424-in an pung a ni. District hrang hranga vote nei thei pundan hi Lawngtlai District-ah 2,347, Aizawl District-ah 2,221, Mamit District-ah 952, Kolasib District-ah 616 a ni a,hetih lai hian Saiha District-ah chuan vote nei thei zat hi 814-in an tla hniam a, Lunglei District-ah 570, Champhai District-ah 559 leh Serchhip District-ah 222-in an tla hniam bawk a ni.  Vote neite thlalak chuanna Identity card, Electors Photo Identity Card siam belh hna pawh chhunzawm zel a ni a, a pumpuia chawh rualin za zela 96 leh 97 inkar vel an zo tawh niin Election Department chuan an sawi a, Bru Voter tamna, Mamit District leh Kolasib District-ah erawh chuan Electors Photo Identity Card siam theih hi District dang aiin a tlem a ni.

Food, Civil Supplies and Consumer Affairs Minister, Pu H. Rohluna chuan vawiin khan Zuangtuia Muanna Kudam a tlawh. A tlawh lai hian Kudam-ah buhfai thahem tak a awm a, an sem chhuah dante a en nghal a ni. Hemi bakah hian Zuangtui Industrial Area-a Flour Mill-te tlawhin an hnathawh dan a en nghal bawk. Hetih lai hian Bairabi-ah Rel-a Mizoram mamawh buhfai rawn phurh luh chhunzawm zel a ni a, tukin khan Rel Wagon 22 a thlen bakah vawiin chawhnu khan Rel Wagon 22 dang a thleng leh a, nimin khan Wagon 20 phur a thleng bawk a ni. Bairabi kawng that tawk loh vang leh Bairabi bula thir lei pakhat chak tawk loh avangin buhfai phurh chhuah kawngah Carrying Contractor-te chuan harsatna engemaw chen an la tawk zui zel a, an phurh theih tawk a tlem avangin hlawk tawk lo-ah an ngai a ni. Hetih lai hian Supreme Court chuan National Highway-a Truck-in buhfai a phurh theih chin a bithliah thar bawk a, tun hma lama phurh theih chin aia quintal 90-a tihhniam a nih tak avangin Highway-a phurtute pawhin a hlawk lo niin a sawi. Ei rawngbawlna gas pawh vawiin khan Trip 11 a lo thleng bawk. Hetih lai hian buhfai leh gas hralh ruk dap chhuak tur leh thil dik lo titute man chhuak turin Supply Department-a hnathawkte leh veng hrang hranga an Agent-te chuan tan an la chhunzawm zel bawk nia thu dawn a ni.
————-

Tanhril VC member, Pu Lalpiangliana’n a puzawn, MB Rai a thah avanga a thubuai chhuitu, VL Ramhluna chu Court-in thla khat atan interim bail-in a chhuah. VL Ramhluna hian Court-ah hian lung ina tang turin a chak tawk lo tih ziahna, Doctor lehkha a nei a, hei vang hian Chief Judicial Magistrate, Pi R.Vanlalchami chuan kar kal ta Ningani-a Police dang chungchanga a lo rel tawh angin thla khat atan interim bail-in a chhuah a ni. Chief Judicial Magistrate chuan, doctor a nih ve loh avangin VL Ramhluna dam lohna lehkha chu a dik leh dik loh a hre lo tih sawiin, lehkha petu chu Civil Hospital Doctor a nih avangin a lehkha chu Civil Hospital Medical Board-in thla khat chhungin lo endik nawn leh se, damlo tak tak a nih chuan interim bail chu bail puitlingah chantir a ni ang a, a damlohna finfiah a nih loh chuan lung inah khung a ni ang, a ti a, heta thla khat a tih hi kar kal ta Ningani-a Police dangte lehkha, thla khat chhunga Civil Hospital Medical Board enfiah atana a lo tih tawh nen khan a kal kawp dawn a ni. Chief Judicial Magistrate chuan thubuai dangah chuan Doctor-in an damlo tih ziahna lehkha an pek chuan interim bail pe lovin bail pangngai an pe mai tih a sawi a, mahse tuna mite hi chu an thubuai a danglam avang leh a hma lawk pawha Police hrisel tha pangngai an nih avangin Medical Board ennawn kher a phut tih a sawi. Puan tawh angin VL Ramhluna hian Zirtawpni khan Chief Judicial Magistrate Court-ah hian bail hi a dil a, mahse a dil tlai avangin hemi ni hian ngaihtuah hman a ni ta lova, hemi zan atang hian District Jail-ah dah a ni. Hemi hma, Ningani khan Police dang 6-te chu an Doctor lehkha neihte chu Medical Board endik leh turin a lo ti tawh a, heng mite pawh hi thla khat atan interim bail-in a chhuah a ni.
————–

Bawngkawn SBI hnuaia Ramhlun Industry peng bula pawisa lak chhuahna khawl, Automated Teller machine (ATM) khawl chu Zirtawp zanlai pelh hnu, Inrinni zing khawvar hma khan mi pakhatin a rawk a, mahse pawisa bo a awm lo. ATM-a Close Circuit Television (CCTV) atanga a lan danin, ATM rawk tumtu hian a tirah a hmai a tuam a, a hnu-a pawisa lek leh a tum chuan a hmai a tuam tawh lova, khawl khuhna a kar chhe nual tih loh chu khawih chhiat dang emaw, pawisa lak chhuah emaw a nei lo a ni. Thu dawn danin ATM hi rawk a har hle a, bomb chhiat a nih ngawt loh chuan pawisa lak a har hle a ni. He ATM rawkna-a CCTV thlalak hi Bawngkawn Police Station-in an thil chhui lai a tihbuai theih avanga chhuah lo tura ZONET a ngen avangin chhuah loh a ni.
————-

BJP Mizoram Pradesh chuan UPA sorkar hnuaia petrol, diesel, gas leh buhfai man sang an duh loh entirna atana Mizorama hming ziak (signature) sing 2 vel an lak khawm chu President, Pi Pratibha Devi Singh Patil hnenah an thehlut dawn. Heng signature lak khawmte hi Mizoram BJP President, Pu H. Lalhluna chuan vawiin khan New Delhi a panpui a ni. Hemi chungchanga BJP thuchhuah tarlan danin BJP National Executive Meeting chu tun thla ni 29, Ningani khian New Delhi-ah neih a ni dawn a, hetah hian state hrang hranga BJP miten thil man sang duh loh entirna signature an lak khawm chu an Party hruaitute hnenah thehluh a ni ang a, hei hi BJP National President, Pu Nitin-a Gadkari hovin President hnenah thehluh a ni ang.
———-

Fisheries Department Officer-te chuan an Minister, Pu H. Liansailova hovin an hnathawh dan vawiin khan a thlir let. Minister Office-a an \hutkhawmnaah hian kum hmasa lama sangha chi sem chu a thih tam avangin sem tur dah khawmna tha zawk, Oxygen Pack Fry sem tawh ni se an ti a, kumin sorkar kum hian sangha chi tam zawk ICAR leh ICAR Mumbai leh CIFE duh dan anga sangha chi lian zawk, thahnem tak sem an tum a ni. He inkhawmah hian Mizorama sangha chi siam chhuahna hmun hrang hrang – Lengpui, Tamdil, Zobawk leh Ngengpui Farm-a sangha chi tur thar chhuah dan thlir let tel a ni a, sangha khawituten sangha chaw tha chi za zela 75 subsidy-a an hmuh theih dan turte, FFDA hnuaia sangha khawitute tanpui dan tur chungchangte, Serlui B Hydel Project tuikhuaha sangha khawi dan tur chungchangte an sawi tel bawk.
———–

Aizawl Civil Hospital Compound-a Dawrpui Multipurpose Centre sak thuai a nih theih nan Medical Department Quarters 3 luahtute chu insawn chhuak turin Multipurpose Centre sak dan tur ngaihtuahtu Committee-in a ngen. He Committee, LAD Secretary, Pu Rohmingliana kaihhruai hian Aizawl Civil Hospital-a Emergency Duty-a awm thin, he quarters luahtute chu a tul dan azira zan tin motor-a thiar mai a rawt a, NRHM hnuaia Medical Quarters sak mek chu sak zawh thuaia, heng mite sawn chhuah nan hian hman tha-in a hre bawk a ni. Helai hmuna Dawrpui Multipurpose Centre sak nan hian LAD chuan kumin budget-ah Token Provision, cheng nuai 25 a lo dah tawh a ni. Hei hi Aizawl Civil Hospital-a Emergency duty thinte chuan harsatna engemaw chen an tawh phah dawn niin a lang a, Aizawl Civil Hospital-ah hian nau nei engemawzat awm thin bakah zan tin, damlo leh chetsualna tawk mi 40 leh 50 inkar vel enkawl thin an ni.
——–

Border Security Force, Sector HQ Aizawl leh National Medical Organization, Guwahati Branch tangkawpin vawiin khan an hmunpui, Durtlang-ah a thlawna inentirna an buatsaih a, natna hrang hrang nei mi 200 vel, Doctor panga in an en a, damlote tan damdawi, cheng nuai khat man vel an sem bawk a ni. BSF hotute chuan a thlawna inentirna an buatsaih chhan chu Civic Action Programme hnuaia mi harsa zual leh mi chanhaite tan a nih thu an sawi a, khawtlang tana thil tangkai tih zel an tum tih an sawi bawk. BSF hian kum 2008-ah cheng nuai 100 leh 2009-10 ah cheng nuai 25 vel hmangin Civic Action Programme hnuaiah Mizoram tan thil tangkai tam tak an lo ti tawh a,Study Tour buatsaih, YMA library-te tana lehkhabu pek, Blind School leh Nau hnuchham enkawlna In tanpui leh Community Center sakna tura tanpui pekte pawh an hnathawh zingah a tel a ni.
—————

Lunglei Dist. High Powered Committee chu vawiin khan Vice Chairman, Pu Joseph Lalhimpuia hoin an thukhawm a, kum 2010-2011 chhunga Lunglei District tana hnathawh turte, District Head of Department-te nen an sawiho a ni. Kum 2009-2010-a hnathawh dante thlir tel chungin kum 2010-2011 chhunga hnathawh dan tur hi ruahman a ni a, an ruahmanna siamte chu a tul anga lo bawhzui turin Department te an hriattir bawk. An thil ruahmante chu kumin December thla hma ngeiin thawh theih beisei a ni a, Department hotute thahnemngaihna leh thawhho na atangin bawhzui zel an tum a ni.
—————

Vawiin chawhma dar 11 leh chhun 12 inkar vel khan Upper Khatla-a JL Cinema Hall hlui bul, kawngpui sirah Gypsy pakhat chu lirthei dang tlanna tur tibuai khawpa dah a ni a, he Gypsy hian darkar chanve dawn lai, lirthei tam tak a dang buai a ni. He Gypsy hi MZ 01 A 8508 niin VIP light a invuah a, Gypsy hmaah hian Secretary, Govt. of Mizoram tih a intar bawk a. A dinna lai hi motor kawngpui zimna lai a nih avangin motor dang tan tlan ngaihna a awm tawh lova, hemi avang hian hun rei tak chung traffic a jam a, hetianga lirthei dang tam tak a dan buai avang hian lirthei neitu leh kal tlang duh mi thahnem tak lungawi lo chuan Gypsy hi a kawng sira nam thluk an duh hman hial niin ZONET thu dawn chuan a sawi. Traffic Police-te an thlen hnuah thil duhawm lo thleng lovin lirthei hi a pangngaiin a tlan leh thei a, Traffic Police-ten he Gypsy hi an man nghal bawk a ni.
————

Zoram Nationalist Party chuan Aizawl Municipal Council inthlanna tur chungchanga thuneihna, Unit leh Block hnenah a lo pek tawh chu a hnuk kir a, he thuneihna hi an Party Political Affairs Committee kutah a dah nghal a ni. Hemi chungchanga thutlukna hi ZNP Office Bearer leh National Executive Memberte, vawiina thukhawmin an siam a ni a, he thut khawmna hi an Party President, Pu Lalduhoma’n a kaihruai a ni. Hetah hian Mizoram sorkar ding lai chu mirethei chawi kan kawngahte, corruption do kawngahte, ei leh bar lamahte Mizo mipuite beiseina phak tawh lo nia an hriat thute, sorkar kal tawh pawh mipui beiseina leh duh dan phak lo lutuk nia an hriat thute member-te chuan an tarlang a, ZNP chu mipuite beiseina innghahna awm chhun niin an sawi bawk.
———

Vawiin chawhnu dar 2:45 vel khan phai lam atanga Mizoramin kawlphetha a lakna, Loktak-Jiribum Line a chhiat avangin Mizoramin phai lam atanga eng a lakna a buai a,  Badarpur leh Kumarghat lam atanga chawk luh dan tur ngaihtuah mek a ni. Hetih lai hian Mizorama Hydel Project hrang hrang atanga kawlphetha hmuh theih tur chu megawatt 5 vel a ni a, Bairabi Thermal Plant pawh kawlphetha megawatt 5 pe chhuak thei tura tihnun tum a ni. Power Department hotute hnen atanga thudawn danin, phai lam atang hian kawlphetha megawatt 30 vel tal chu hmuh theih a nih beisei a ni a, amaherawhchu a inchhawka eng pek a ngai mai thei niin an sawi.
———-

Mizoram Range Assam Rifles leh Central YMA tangkawpin September thla tir-ah cheng sing khat hlawh theihna tur intlansiak “Jubilee Marathon” an buatsaih dawn. Mizoram Range Assam Rifles-in ram tana kum 50 chhung zet hna an thawh champha, Sepember ni 10-a lo thleng tur leh Central YMA-in Mizoram tana rawng an bawl kum 75-na puala buatsaih tur, he intlansiak hi chhawng hniha buatsaih a ni dawn a, District hrang hranga intihsiak hnu-ahSeptember chawlhkar hmasa berah Aizawlah buatsaih a ni ang. Intlansiak thupui atan hian mei zuk leh vaihlo lam chi that lohzia, mipuite hnena theh darhna turin “Say no to tobacco” tih hman a ni dawn a ni. Assam Rifles hotute chuan he intlansiaka tel duhte tan mahni veng YMA hotute biak tur a nih thu an sawi a, Intlansiaka pakhatna-in tangkafai Rs. 10,000 a dawng ang a, a tlan chak zual dangte pawh lawmman tha tak tak pek an tum a ni.
————–

Vawiin khan Aizawlah khaw lum lai berin Celsius Degree 29.2 a ni a, a vawh lai berin degree 20.7 a ni. Hemi chhung hian ruah millimetre 15.5 a sur a ni. Boruak hnawn zawng hi a ro lai berin za zela 62.3 a ni a, a hnawn lai berin za zela 97.1 a ni. Naktuk, Thawhlehni-ah chuan Aizawl-ah ruah a sur rin a ni a. Khua pawh a lum lai berin Celsius degree 27 vel, a vawh lai berin degree 24 vel a nih rin a ni. Zing dar 4:46-ah ni a chhuak ang a, tlai dar 6:04-ah a tla leh ang. Ni rei zawng hi darkar 13 a ni ang a, zan rei zawng chu darkar 11 a ni ang.