www.zonet.in

RAM PAWN CHANCHIN THAR

Pakistan PM, Yusuf Raza Gilani chuan tunlaia an rama tuilian rapthlak tak chu mi mtd.20 velin an tuar tawh niin a sawi a, hei hi UN-in he tuilian tuar zat a sawi, mtd.14 ai chuan an tam zawk hle a ni. Gilani hian he thu hi an ram zalenna kum 63 tlinna puala mipuite hnena a thuchahah a sawi a,  tunah hian chenna tur in nei lo, mi mtd. 20 vel an awm tih sawiin, him nana mahni in chhuahsan leh tuilianin an chenna in a laksak zat chiah erawh chu a la sawi theih loh niin a sawi. UN chuan Pakistan tuilian hi he rama kum 80 chhunga tui lian rapthlak ber niin a sawi a, mi 1,600 vel an thih bakah mi mtd. 14 velin an tuar niin a sawi. Tuilian tuarte zingah hian tuihri pawh a leng mek nia sawi a ni a, kawthalo ringawt pawh mi 36,000 vel an awm a, mi tam takin an thihpui ang tih a hlauhawm hlea ngaih a ni. President Asif Ali Zardari chuan an rama tui lian avang hian an ram zalenna champha, naktuka lo thleng tur lawmna pawh thulh a ni tih a puang a,  sorkar buatsaih intihhlimna lam chi reng reng a awm dawn lo a, sipai lam leh he ni lawma kal khawmna engmah a awm dawn lo a ni.

US President, Barack Obama leh Afghanistan President, Hamid Karzai-a’n Taliban mi firfiakte beihnaah thawh dun zel an remti. Ram pahnih hruaitute hi video conference hmangin darkar khat chuang an inkawm a, hemi hnu hian US sawrkar chuan, Afghanistan mipuite ven him kawngah-te, sawrkar ngelnghet an neih theih nana hnathawh-ah leh an ram chhunga mi firfiakte beih kawngah hruaitu pahnihte hi an inlungrual hle niin a sawi. Ram hruaitute inbiaknaah hian Kabul-a US palai, Karl Eikenberry leh Afghanistan-a US sipai hotu, General David Petraeus pawh an tel ve a ni. Afghanistan President, Hamid Karzai hian an rama Taliban mi firfiakte beihnaa khawthlang ram sipaite chet dan chu nasa takin a lo sawisel tawh a, hei bakah hian Taliban-te nena inbiakna hmanga inremna siam mai a tum thin chu US leh ram dangin an sawiselsak bawk a, hetianga an insawisel tawn reng hnuah mi firfiakte beih kawnga thawh dun chungchang hi President Barack Obama nen an sawi leh ta a ni.
———–

China ram hmar thlang lam, Gansu Province-a zirlaite chu tui lian-in a tihbuai nasat avangin, an exam hun sawn a ni. An ram Education Department chuan, tui lian avang hian zirna in tam tak a chhiat avang leh zirlaite pawhin an zirlaibu tam tak an hloh avangin, naktuka exam tan tura lo tih tawh chu tun thla ni 30-ah sawn hlat lailawk a ni tih a sawi a, hei hi thil awm dan a zirin tihdanglam leh pawh a la tul mai thei tih a sawi bawk. Puan tawh angin, China ram hmar thlang lam, Gansu Province-a  tui lian leh lei min avang hian mi 1,156 an thi tawh a, tun thlengin mi 588, chin hriat loha an la awm bakah chenna in nei loin pawh tam tak an la awm a, an vanduaina tawh avang hian zirlai tam takin harsatna an tawh phah ngei dawn niin a lang a ni.
————-

US President, Barack Obama-a’n mi firfiakte beih vanga chhe ta, New York khawpuia World Trade Centre dinna bul hnaia Muslim biak in sak tum mek, sawisel hlawh tak chu sawisel leh ngaih huat tur a ni lo tih a sawi. Muslim sakhaw betuten thla serh an hman mek, Ramadan puala White House-a sawrkar mi pawimawhte nena chaw hlui an kilhonaah sawiin, President Obama chuan,  World Trade Centre dinna hmun, Ground Zero-a Muslim biak in sak tum chu mi thenkhatin sawisel mah se, Muslim sakhaw betute hian mi dang ang bawkin zalenna an nei a ni, a ti a, America sorkarin sakhaw tih bik a nei tur a ni lo, a ti bawk. World Trade Centre dinna thin atanga feet engemawzatah hian chhawng 13-a sang, Islamic Cultural Centre leh mosque sak tum mek a ni a, Republican politician te chuan an duh lo hle a, WTC beihnaa thi ta chhungte pawhin, an ram beitute sakhaw hmun pawimawh, he hmun khera din chu tul an tih loh thu an sawi hlawm a ni.
———–

Iran ram Atomic Energy hotu, Ali Akbar Salehi-a’n an ramin Nuclear chakna hmanga kawlphetha siamna a neih hmasak ber chu kar leh khian an hawng dawn niin a sawi. Ali Akbar Salehi chuan, Bushehr khuaa Nuclear chakna hmanga kawlphetha siamna hmun an neih hi ni ruk chhung vel an buaipui leh hnuah hman theih a ni tawh dawn niin a sawi a,  kawlphetha siamna hmun dinna kawnga Iran sawrkar puitu, Russia pawhin tun thla ni 21 khian he hmun hi an hawng thei dawn niin a sawi bawk.
————-

United States-a Judge pakhat chuan lawng lian pil ta, RMS Titanic keh chhe chhunga thil hlu leh mihring kutchhuak thil dangte la chhuak a, pho langtu, US exhibition company, RMS Titanic Incorporated chu lawmman, US dollar mtd. 110 pekna tur thupek a siam a, he company hian a thil lak chhuah leh pho lante hlutna hu lawmman a dawng tur niin a sawi. Court chuan he company hi a thil lak chhuah zawng zawng neitu nihna pek tur nge, a hralhna man zawng zawng chantir vek tur tih a la puang lova, Premier Exhibitions Incorporated hnuaia RMS Titanic Incorporated hian Canada rama Newfoundland tuipui kam atanga mel 400 a hla,  tuipui hnuai km 4 a thuka awm, Titanic lawng chungchang hi hun rei tak chhung an lo zir chiang tawh a, Titanic lawng chhunga tlereuh leh thil chi hrang hrang 5,500 vel an la chhuak tawh a ni.  He lawng lar tak hi Southampton atanga New York a panna kawngah 1912, April thla khan vur tlang a sut avangin a pil a, mi 1,500 an thi a ni. He lawng keh hi 1985 khan Dr Robert Ballard-a kaihhruai mi thiamten an hmu chhuak a,  US court chuan he lawng chhung dap phalna hi 1994 khan a pe a, lawng keh leh a chhunga awmte neitu nihna erawh chu he company hi a pe tel lo a ni.
————

Britain rama mei zu mi dam rei ber, Winnie Langley chu kum 103 mi niin a thi a, a dam chhungin mei zial tlawn 1,70,000 chuang a zu hman nia chhinchhiah a ni. Langley hian kum 95 vel chhung mei a zu a, kum 90 vel mi a nihin cancer a vei tih hriat chhuah a ni a, kum 103 a pumhlum hma hretin a thi ta a ni. Langley hian indopui 1-na intan hnu khan, kum 7 vel mi a nihin mei a zu tan a, mahse nawalh a hman theih tak loh avangin nikum khan a nghei ta a ni.  Pi Langley-i hi kum 1907 khan Croydon-ah a piang a ni.
———–