TUALCHHUNG CHANCHIN THAR

Young Mizo Association (YMA) kum 75 tlin, Platinum Jubilee lawmna pualin Central YMA hruaitu hluite chawimawi an ni. He Jubilee lawmna pual inkhawm hi vawiin khan Vanapa Hall-ah neih a ni a, hetah hian thusawiin Central YMA President, Pu Lal Chungnunga chuan, Mizote zingah Kristian dik nia inchhal, piangthara inchhal bawk tam tak an awm a, mahse a taka rah chhuah hmuh tur erawh chu duhthusamin a tam lo a ni a ti a, nun kawng dik zawh a pawimawhzia leh Kristian nun dan dik zawm a pawimawhzia hre chiang ber tur, Mizo-te zingah tunlai khawvel sualna kawngah chak taka pen an tam tual tual a, hei hi tu leh faten ngaihsak an hlawh tawk loh rah chhuah niin a lang a ti a, Aizawl bikah phei chuan, naupang lamah ruihhlo tih ching an pung hle a, nu leh paten an fate dinhmun an hriat chian duh loh avangin, ruihhlo bawihah naupang te te an tang mek a ni, a ti bawk. Pu Lal Chungnunga chuan, nun kawng dik lo zawhte siam thaa, nun kawng dika hruai turin YMA hian theihtawp a chhuah a ngai a, awmhmunah arbawm a tah mai mai thiang lo a ni a ti a, kal hmasaten huaisen taka an lo chhawm nun, Zo nun mawi leh dikna chu chawi nun thar a pawimawh tih a sawi bawk. Jubilee lawmna inkhawmah hian, Platinum Jubilee Souvenir, “Zawlbuk” tia vuah chu Central YMA President hlui la dam zinga upa ber, Pu C Rokhuma’n a tlangzarh a, Central YMA Office Bearer hluite chawimawina thil pek hlan an ni. Kum puan thupui hmangin, Central YMA Vice President Pu JH Zoremthanga’n thu a sawi bawk. He inkhawmah hian Branch YMA zaipawl leh mal zai-te ngaihthlak a nih bakah lemchan hmuhnawm tak entir a ni a, Central YMA hruaitu hluite leh mi pawimawh dangten thu an sawi bawk. General Secretary, Pu Lalbiakzuala report-a a lan dan chuan,  YMA hian Group 46 leh Branch 777 nei mek a, heng zinga Branch 51 chu Mizoram pawna awm an ni. Tunah hian YMA hian member 3,53,494 a nei a, heng zinga mi 2,12,874 chu mipa an ni a, a dang mi 1,40,620-te chu hmeichhia an ni a, an zingah hian Life member 8,157 an awm bawk. Kumina YMA kum 75-na, Platinum Jubilee pual hian damlo-te tana thisen pe Branch 70 an awm a, an thisen pek tling khawm chu Unit 1,691 a ni a, Branch hrang hrangten, tanpui ngai chhungkaw 611, an mamawhna anga an puih bakah, hmeithai chenna in thawm that leh sak that 97 a awm bawk a ni. Platinum Jubilee lawmna inkhawm hi Mizoram Kohhran Hruaitute Committee Chairman, Rev C. Chawngliana’n Pathian hnenah a hlan a, Zonunsangi Fanai, Zonet leh H Vanlalrawna CEC Member-ten an kaihruai a ni.

Naktuka Independence Day lawm turin inbuatsaihna engkim peih fel a ni.A lawmna inkhawm lian ber, Aizawl Assam Lammuala neih tur chu zing dar 7:30 ah tan a ni ang a, hetah hian Chief Minister Pu Lal Thanhawla’n hnam puanzar pawt pharhin Parade chibai a chhang let ang a, Parade endikin mipuite hnena thuchah a sawi bawk ang. Independence Day lawmna Parade-ah hian silai keng chi Contingent 5, NCC Contingent 5, Scouts and Guides contingent 4, School Contingent 11 leh Band Party 4 nen an vaiin Contingent 98 an lam dawn a ni.

District Hqrs hrang hrangah pawh inbuatsaihna zawh fel a ni tawh a, puan tawh angin,  Saiha-ah chuan he ni hi Health Minister Pu Lalrinliana Sailo-in a hmanpui ang a, Lawngtlaiah LAD Minister, Pu PC Lalthanliana, Lungleiah Assembly Deputy Speaker, Pu John Rotluangliana, Serchhip-ah Supply Minister, Pu H. Rohluna, Champhaiah Education Minister, Pu Lalsawta, Kolasib-ah Revenue Minister, Pu JH Rothuama, Mamit-ah Sports Minister, Pu Zodintluanga’n an hmanpui dawn a, heng mi pawimawhte hian Aizawl an chhuahsan tawh a ni. Tun hnaia ruahsur nasa avanga lei minin Tlabung kawng, Hauruang bula a hnawh pin chu then fai tuma ngawrh taka hna thawh a ni a, zanin hian thenfai hman beisei a ni a, then fai a nih loh chuan Tlabung Sub-Divisional Hqrs a Independence Day lawmna-a khuallian tur, Pu Lalrobiaka MLA chu a kal thei dawn lo a ni.  Mamit kawng pawh tun hnaia ruahsur nasa avanga lei minin hmun tam taka a hnawh pin, motor te chi kal theiha nimina siam leh tak a nih avang leh a kawng chhuk chho a chhiat avangin Car tan chuan kal a harsa hle a ni.
———

Aizawl SP, Pu Lalbiakthanga Khiangte chuan naktuka ram zalenna ni lawmna pui ber, Lammual-a neih turah ven himna uluk taka tih a nih thu a sawi. Kan Corr. zawhna chhangin SP chuan he ni lawmna tihbuai tum emaw, fimkhur tul lehzualna tur thil report a awm lo niin a sawi a, Ningani-a rinhlelh pakhat an man tih loh kha chu tumah rinhleh man an nei lova, venhimna pawh uluk taka tih a nih thu a sawi a ni.
————-

New Vervek khaw mi, Pu Lalhunpuia, kum 50 vel mi chu New Vervek leh Lungsum inkarah Ninga zan khan Sabereka khuangkaihin a la. An veng VC member, Pu P.C Vanlalthlana hnen atanga kan Corr. thu dawn danin, Pu Lalhunpuia taksa them thenkhat leh a bag chu kawngpui atanga metre 500 vela hlaah chhar a ni a, hei hi vawiin khan mitthi vui dan pangngaiin vuia phum a ni. Hetih lai hian a ruang dang chu Sabereka khuangkaihna kawr dungah hian la zawn zui zel a ni a, Mizo danin ni 7 chhung zawn a ni ang. Pu Lalhunpuia leh a thiante hi Ningani khan Ratu-ah an kal a, heta tanga an khaw pana an haw leh chu an chuanna motor, Lungsum leh New Vervek inkara lei minin a dan avangin Pu Lalhunpuia hi zan dar 10 leh 11 inkar velah New Vervek panin ke-in amahin a kal a, hetah hian sabereka khuangkaihin a la ta nia hriat a ni. A taksa them hmuhte hi New Vervek Police leh Sakawrdai SDO Civil-inen dikin, dan anga an tih turte an tifel a ni. A ruang zawngtute thingpui in nan Sinlung Hills Development Council chuan Rs.2,000/- a pe a, Sakawrdai SDO Civil pawhin Rs.1,000/- a pe a ni.
———-

Bangladesh hel pawl pakhat, Muslim Liberation Tiger Force leh hel pawl hrang hranga inhnamhnawih thin nia hriat, Samsul Haque,kum 45, Kathalkali, Patharkandhi District chu Aizawl Police-ten tun hnai khan an man. Samsul Haque hi SIB Delhi, SIB Guwahati, Special Director, Shillong, BSF leh Aizawl Police ten vawi engemawzat man tumin an lo zawng tawh a, Aizawlah Police-ten Khatla-ah an man ta a ni. Samsul Haque hian Aizawl a Independence day lawmna, Aizawl Lammuala hman tur chu tihbuai a tum leh tum loh hriat a la ni lo a, Bangladesh hel pawl lian, HUJI leh Muslim Liberation Tiger Force-te chu Bangladesh-a Igah Doruislam Madrassa, Chattagram District-ah hmun hranga Indenpendence day lawmna tihbuai dan tur an rel nia hriat a ni a, Samsul Haque hi Aizawl-a Indenpendence day lawmna tibuai tur a nih leh nih loh zawh fiah mek a ni.
————

Serchhip-a Excise & Narcotics Enforcement Staff leh Chhiahtlang VDP-te chuan ramhnuai hla taka Ganja chin ruk, nimin khan an sam. Kan Corr. thu dawn danin, ganja chin rukna hi Mat lui hnar lama Sialsuk khaw chhuah lam, Tlangtla lui hnara Tualleng tlangah a ni a, a chingtute hian a panna kawng pawh siam lovin ramhnuaiah kalin buh karah an ching a, hei hi hmu chhuakin Excise leh Chhiahtlang VDP-te chuan an sam a, an hal ral vek a, Magistrate entir atan a kung leh hnah tlem te erawh chu an hawn a ni. He ganja ching rutute hi Chhiahtlang Kawn venga Khualdawngliana leh Ricky Lalhriatpuia nia hriat an ni a, Excise & Narcotics Enforcement Staff-te chuan manin thubuai an siamsak a ni.
———

Chief Secretary, Pu Vanhela Pachuau chuan taihmakna leh tumruhna nena thiltih chuan hlawhtlinna a awm thin a ni a ti. He thu hi Chhingchhip Citizens Welfare Committee-in Chhingchhip khaw chhuak, MLA, officer leh mipui tana mi pawimawhte chawimawina, nimina an buatsaihah sawiin Chief Secretary chuan Chhingchhipa zirna in tha tak an nei chu mi tam tak tan hlawhtlinna siamtu a ni a ti bawk. He inkhawmah hian MLA 1, IAS leh Officer dangte bakah Pastor, Father, Brother leh Salvation Officer 13-te chawimawi an ni a, chawimawina thuziakte chu khuallian hian a sem a ni.
———-

Lunglei District All Vehicle Organisation Joint Action Committee (AVOJAC) chuan, Lunglei MJA chunga an lungawi lohna lantir nan chanchinbu leh Cable TV Programme Disc, hmun dang atanga Lunglei District-a lut thin reng reng, thu leh awm hma chu phur tawh lo turin lirthei khalhtute an ngen. Hetianga Lunglei MJA chunga AVOJAC lungawi loh chhan hi Aizawl -Thenzawl -Lunglei World Bank kawngpui siam meka Tlawng lei, Batling zel lungrem leh hna dang thenkhat tha tawk lo ni-a AVOJAC-in a sawi, Lunglei MJA-in tha tawk nia an chanchinbu-a an chhuah avanga inhnialna kal zelah, MJA lam chuan AVOJAC hma lakna reng reng, chanchinbua chhuah rih loh an tura an tih vang niin AVOJAC thuchhuah chuan a sawi.
————–

MNF Party chuan, VC thenkhat thiah leh siksawi chungchanga High Court-a sawrkar a khinna-ah hnehna a chang tih thuchhuah siamin a tarlang. Hemi chungchanga vawiina thuchhuah a siamah MNF Party chuan, an Party VC siamna, Aizawl District-a Zuangtui leh Lunglei District-a Thlêngang VC-te chu, Sawrkarin chhuanlam dawrawm tak hmangin a thiat nia sawiin, heng VC thiah dan dik lo hi High Court-ah an khing a, High Court-in thiam a chantir hnuah, heng khaw hnihah hian tun thla ni 7 khan VC thlan that a ni a, an Party-in hnehna a chang leh tho tih a sawi. Thuchhuah chuan, The  Lushai Hills District(Village Council) Act 1953 Section 4, Clause (d) kalhin sawrkarin Phairuangkai VC Member ni lai, Pu Laldinpuia chu VC Electoral Roll-a a hming chuan lohna, tun hnaia VC thar pek, Rotlang West VC member nihna a chelh chhunzawm tir nia sawiin, hetiang bawk hian, Puankhai khaw VC member ni lai, Pu Dulal chandra leh Pu Surjiyo Lal-te pawh VC pek thar Malsury khuaa cheng an nih avangin, thlan loha he khaw VC Member ni nghal turin sawrkarin thupek a siam bawk a, hei bakah, Pu Rolianpuia Kolasib II Venglai VC member pawh VC pek thar, Kolasib Project venga VC member nih zui tir a ni bawk tih thuchhuah chuan a tarlang a, sawrkar thil tih dana an lungawi loh vang hian, MPC Party aiawhte nen pawh LAD Minister an lo hmu tawh tih sawiin, sawrkarin a thil tih tawh sut a tum loh vangin, High Court-ah an zualko ta a, tun thla ni 6 khan High Court chuan thutlukna siamin, VC member ruat chungchanga sawrkar thupek siam tawh chu a hnawlsak a,  Malsury-a VC seat 3 leh Kolasib Project veng-a seat 4 inthlanna buatsaih turin sorkar a hriattir nghal a,  Rotlang West VC member atana thlan lohva ruat,  he khaw VC Roll-a a hming chuang lo, Pu Laldinpuia erawh chu ama thua a inhnuhdawh hman avangin, High Court chuan Rotlang West VC seat khat chu, seat ruakah a puang ta bawk niin MNF thuchhuah chuan a sawi a ni.
————-

Tuikual South VC, YMA, MHIP, MUP leh veng chhunga School hrang hrang zirtirtute chuan Tuikual South huam chhungah Tiranga zawrh an khap. Hemi chungchanga resolution hi vawiina a huhova inkhawm neihah pass a ni a, heng pawl hrang hrang hruaitute hian vawiin khan an veng chhunga dawr hrang hrang fangin Tiranga zuar lo turin dawrkaite an ngen bawk a ni.
———-

Maubawk Branch YMA chuan YMA Platinum Jubilee lawm nan vawiin khan Aizawl Civil Hospital tan thisen unit 50 an pe a, thisen petute hi mipa 44 leh hmeichhia 6 an ni a, an thisen hi Civil Hospital Blood Bank-a thawkte’n an Veng Primary School I-ah an laksak a ni.
————-

Naktuk, Pathianni hian Salvation Army, Aizawl Temple Corps-ah Thianghlimna Inkhawm neih a ni dawn a, hetah hian Sweden khawpui, Stockholm-a tun hnaia World Youth Convention neih taka kalte lawmna inkhawm neih nghal a ni ang. He inkhawm hi Chief Secretary, Lt. Col, Lalngaihawmi’n a kaihruai ang a, Territorial Commander, Col. Samuel Charan-a’n Pathian thuchah a sawi dawn a ni. World Youth Convention-a kalten report an pe ang a,  Bethlehem Corps-a YP Congress, tun hnaia neih report ngaihthlak a ni bawk ang.
———-

BCM rawngbawlna hnuaiah Pathianni kal ta khan Kamalanagar (Chawngte ‘C’)-ah Chakma ring thar 69-in a rualin Baptisma an chang. Chakma ring tharte hi BCM Pastor pathum – Ram chhung Mission Director, Rev. R. Lalrintluanga, Lungrang Bialtu Pastor, Rev. K. Vanlalmuana leh Chawngte Bialtu Pastor, Rev. H. Lalremtluanga’n Baptisma an chantir a ni. Ring tharte hi Sumsilui, Rualalung, Thanzamasora leh Chawngte ‘C’ a mite an ni a, an zingah hian hman kum lawka Baptist Boarding School hâltu zinga mi pawh a tel nghe nghe a ni.
———-

Bethlehem Venglai Branch KTP chuan an kum 38 tlin lawmna atan Presbyterian Hospital, Durtlang-a hman atan vawiin khan thisen unit 78 an pe a, thisen petute hi mipa 63, hmeichhia, 15 an ni. Bethlehem Venglai Branch KTP member-te thisen hi an Kohhran Hall-ah Blood Bank-a thawkten an laksak a, he Branch-ah hian KTP member 908 vel an awm a, Aizawl Civil Hospital tan leh Presbyterian Hospital, Durtlang tan thisen, vawi engemawzat an lo pe tawh a ni.
———-

Mizoram Youth Club buatsaih, National Integration Volleyball Tournament chu Sport & Youth Services Director Pu Zoliana Royte-in vawiin khan a hawng.  Mizoram Youth Club hian Volleyball Tournament hi vawi thum an buatsaihna a ni a, mihring nih hlut ziate, mihring nihna inzah sak tawnna te, hnam hrang hrangte inngeih tlang taka awm a pawimawhzia lantirna atante an buatsaih thin a ni. Intihsiakna-ah hian team 16 an tel a, tun thla ni 21-ah zawh hman tum a ni.
————–

Vawiin khan Aizawlah khaw lum lai berin Celsius Degree 27.7 a ni a, a vawh lai berin degree 20.3 a ni. Hemi chhung hian ruah millimetre 4.3 a sur a ni. Boruak hnawn zawng hi a ro lai berin za zela 75.8 a ni a, a hnawn lai berin za zela 99.4 a ni.
———

Naktuk, Pathianni-ah chuan Aizawl-ah ruah a sur rin a ni a, khua pawh a lum lai berin Celsius Degree 27 vel, a vawh lai berin degree 24 vel anih rin a ni. Zing dar 4:54-ah ni a chhuak ang a, tlai dar 5:52-ah a tla leh ang. Ni rei zawng hi darkar 13 a ni ang a, zan rei zawng chu darkar 11 a ni ang.

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken