www.zonet.in

TUALCHHUNG CHANCHIN THAR

Mizorama tuialhthei lama harsatna chuan vawiin thleng khan ziaawm lam a pan thei chuang lo. Hei hi Badarpur leh Harangajau inkara rel kawng chhiat vang a ni a, Silchar bul, Ramnagar-a tuialhthei dah khawm hman zawh a nih tawh avangin Guwahati atanga lak a ngai a, a kawng a hlat tham avangin Oil Tanker-te chuan Mizoram chawm khawp an phur thleng thei lo a ni. Food, Civil Supplies and Consumer Affairs Department sawi danin vawiin chawhnu thlenga Aizawla Petrol Pump hrang hrangte tuialhthei neih dan chu Mizofed-in petrol litre 3,000, diesel litre 4,500, Zangena Petrol Pump-in petrol litre 2,800, diesel 1,600, Lalsangliana Petrol Pump-in petrol litre 6,000 leh diesel litre 4,000 an nei a, amaherawhchu an diesel pek chhuahna khawl a tha lo a ni. Hrangbana Petrol Pump-in petrol litre 3,000 a nei a, amaherawhchu a pek chhuahna khawl a chhia a, Hauva Petrol Pump-in petrol litre 2,000, diesel 2500, Lengpui Petrol Pump-in petrol litre 1,700 leh diesel 2,000 a nei a, Phunchawnga Lalthanzauva Petrol Pump-in petrol litre 2,500, diesel 3,000, K. Lalnghakliana Petrol Pump-in diesel litre 5,000 a nei a ni. Puan tawh thin angin inven nan sorkar chuan Petrol Pump hrang hrangte chu litre 3,000 reserve turin a hrilh a ni.

Hetih lai hian Badarpur leh Harangajau inkara rel kawng chhia chu siam that a nih hnuah vawiin khan bungraw phur rel 3 tlantir a ni a, hengte hian Tripura-ah ni tin khawsakna mamawh a phur lut a ni. Indian Railway Service Officer Pension tawh, Pu RK Thanga’n Badarpur-a Area Manager, Pu Mishra hnen atanga vawiin tlaia thu a dawn danin heng Rel-te hi Lumding atanga rawn chhuahtir an ni a, naktukah Ramnagar-a IOC Petrol Depot-a dah tur tuialhthei a rawn phur dawn a ni. Hemi bakah hian rel dangin Mizoram buhfai tur pawh Bairabi-ah a rawn phurh beisei a ni a, rel service hi tluang taka chhunzawm theih a nih chuan harsatna lian tham thleng tawh lo tura beisei a ni. Tun tuma harsatna belh chhahtu, North Cachar Hills-a Dimasa bandh chu nimin tlai dar 5 khan tihtawp a ni a, North Cachar Hills District-ah hian nunphung engkim a pangngai leh vek tawh a ni.
———-

MNF President hlui leh Mizoram state CM hmasa ber, Pu Laldenga chu vawiin, a thih champha vawi 20-na-ah khan an party miten zahna leh chawimawina an hlan a, tukin dar 7 khan Treasury Square-a a thlanah inkhawm buatsaih a ni. He inkhawm hi an party Vice President, Pu R. Tlanghmingthanga’n a kaihruai a, Pu Laldenga nupui, Pi Lalbiakdiki’n thu sawiin, a pasal hma chhawp tipuitling tura Pu Zoramthanga leh a thawhpuiten MNF party an hruai dan chu lawmawm a tih thu leh, Mizoram leh hnam hmasawn zelna atan thuneihna an chan leh ngei pawh a beisei thu a sawi a ni. MNF Senior Vice President, Pu Tawnluia pawhin Pu Laldenga chu Mizo zalenna leh din chhuahna atana indonaah pawh hruaitu tling leh ropui, remna atan pawh hruaitu tling leh zahawm a ni a ti a, India sorkar nena inremna thuthlung chu Mizo fate tawp hlenna tur a nih loh thu leh, hma lam pan zelna atana rahbi hmasa mai a ni tih chu Pu Laldenga thuchah a ni tih a sawi bawk. Pu Laldenga thlanah hian MNF President, Pu Zoramthanga, Pi Lalbiakdiki, Pu Tawnluia leh Party hruaitu dangten pangpar an dah a ni. Pu Laldenga hi kum 1927 June ni 11-ah  Lunglei bula Pukpui khuaah a piang a, kum 1960 kum tirah Mizo National Famine Front a din a, kum 1961 October ni 22-ah MNFF chu Mizo National Front-a leh a ni. Kum 1966 March ni 1-ah Pu Laldenga kaihhruai MNF chuan Mizoram zalenna an puang a, Mizoram chu kum 20 zet a buai hnuah kum 1986 June ni 30 khan India sawrkar nen remna an ziak a, kum 1986 September ni 21-ah Interim sawrkarah Chief Minister-a lak luh a ni a, kum 1987 February thla khan Mizoram state Chief Minister hmasa ber atan lak luh a ni bawk. Pu Laldenga hi kum 1990 July ni 7 khan New York-a damdawi in liana a inenkawl haw lam, London-a Heathrow airport-ah a thi a, July ni 13-ah Aizawlah vui a ni.
———-

Tukin khawvar hma, dar 3 vel khan Muallungthu leh Tachhip inkar, Mualungthu dai-ah 207 truck, MZ-03 2763 chu kawng thlangah a tlan liam a, he motor-a chuang, Mani Singh, kum 36, Panchi Singh-a fapa, Silchar chu a hmunah a thi a, mi dang pathum pawh an hliam nat deuh avangin Aizawl Civil Hospital-ah dah an ni. He 207 truck hi Aizawl lam pan a ni a, mi pakua an chuan bakah buhfai bag sarih a phur a, an chetsualna lai hi kawng tluang pangngai a nih avangin driver hi a muthlu nia rin a ni a, motor hi kawng thlang-ah metre 200 vel a lum a ni. He chetsualna a thileh hliamte hi Muallungthu khawtlangin la chhuakin an buaipui a ni.
———–

Taxi leh man chawia mihring chuanna lirthei dang, sawrkar bithliah aia man tova chuan man lak ching hria apiang chu sawrkarah thlen ngei turin State Transport Authority (STA)-in a ngen. Zonet Corr-in STA atanga thu a dawn danin, Taxi Driver leh man chawia chuanna chi lirthei dang Driver thenkhatin, zanah emaw hun harsa bikahte sawrkar bithliah aia sangin motor chuan man lak an ching a, heng mite thil tih dan hi a tuartuten sawrkarah an report thin loh vangin, an chungah dan angin hremna lek ngaihna a awm thin lova, tun hnuah chuan, hetianga mi hlemhlete avanga harsatna tawk apiangin STA Secretary hnenah thlen se an duh tih thuneitute chuan an sawi a, hemi rual hian, hetiang lirthei chi reng renga sawrkar phal loh thil phur thin hriate pawhin, STA hotute hriattir se an duh thu sawiin, hetiang thil diklo titute chu, an permit cancell thlenga hrem theih an ni tih an sawi. STA hotute chuan, MVI Enforcement Staff -te emaw, lirthei enfiahtu dangte laka pawisa chawitu lirthei khalhtuten receipt la zel se an duh thu an sawi bawk.
———

Eptu Party pathum, MNF, MPC leh BJP-te chuan ni tin mamawh, buhfai, ei rawngbawlna gas leh tuialhthei man sang chak lutuk leh vang lutuk chu sorkar chak loh avangah an puh. Vawiina Mizo Hnam Run-a Joint Meeting an neihah party pathum hruaitute chuan ni tin mamawh thil man sang chak lutuk leh vang lutuk chungchang an sawi ho a, buhfai, ei rawngbawlna gas leh tuialhthei-a mipuiten harsatna an tawh leh tuialhthei-a sorkar-in chhiah lak belh a tum leh zel chu pawi an tih thu sawiin, mipuite thlavang hauh chu tih makmawh ni-a an hriat thu an sawi a, mipui thlavang an hauh dan tur chu kokim zawka la sawiho leh ni se an ti a ni.
————-

Mizo Zirlai Pawl (MZP) kum 75 tlin, Platinum Jubilee hriatreng nana monument siam chu vawiin khan MZP Pisa-ah MZP President hlui, Pu J.Malsawma’n a hawng. Platinum Jubilee monument hawnna inkhawm hi MZP Vice President, S.Lalrinawma’n a kaihruai a, Pu J.Malsawma chuan MZP-te chu ram leh hnam tana hna an thawh thin chhunzawm a, thil dik lo ni-a an hriat chu huaisen taka hai lang zel turin a chah a ni. MZP kum 75 tlin hi kawng hrang hranga lawm a ni a, thla hlui ni 22 khan a lawmna hawn nan New Capital Complex-ah thing tiak eng emaw zat an phun a, October ni 27-ah Zawlnuam-ah Platinum Jubilee lawmna pui ber hi neih an tum a ni. Platinum Jubilee lawm nan hian thisen pek an tum bakah zirlaite tan quiz leh thil hrang hranga inelna buatsaih an tum bawk.
————-

Mizoram Civil Service (MCS) post 10 ruak hnawh khat tura MPSC-in exam a buatsaih chu vawiin khan tan a ni a, Aizawl-a Centre 3 bakah Lunglei, Saiha, Champhai leh Serchhip Centre-ah mi 810 an exam a ni. Tun tum MCS Exam hi MPSC-in MCS Exam a buatsaih tum 5-na a ni a, Aizawl-a centre pathum atangin candidate 682 an awm a, Lunglei-ah 64, Saiha-ah 35, Champhai-ah 35, Serchhip-ah 12 an awm a, Exam tuma form theh lut chu mi 3,000 chuang an ni. MCS Exam-ah hian an Exam-na District-a DC-te chu Observer an ni a, vawiin khan General English leh General Essay an exam a, naktuk-ah General Studies I leh II an exam ang a, Optional paper chu ni 9 atanga ni 22 inkarah an exam dawn a, Optional paper hi 29 a awm a ni. Vawiina MCS Exam hi Serchhip centre-ah chuan Exam hmasak ber a ni.
————

Adolescence Education Programme (AEP) hnuaia State Core Committee chu vawiin khan Education Secretary, Pu K. Riachho hovin a pisa-ah an thukhawm. Sorkar thu chhuah tarlan danin Adolescence Education Programme (AEP) hi sorkar laipuia Human Resources Development Ministry leh National AIDS Control Organization (NACO) tangkawpin kum 2005-a an duan a ni a, AEP hi Educational Programme hrang hlak anga bul tan a ni lova, Education Programme awm sate, huam zau zawka kalpuina leh changtlung zawka khai khawmna tura duan a ni a, High School leh Higher Secondary School naupang zawng zawng huap vek tura duan a ni. Mizoramah pawh AEP, SCERT leh MSACS tangrualin High School leh Higher Secondary School 535-ah kum 2006 atang khan hma a la tan tawh a, heng school-ahte hian Nodal teacher pahnih, mipa leh hmeichhia leh Peer Educator 2 theuhin an bawhzui a ni. Tleirawlte tan bika buatsaih zirlaibu hi Human Resources Development Ministry leh National AIDS Control Organisation (NACO) te duan a ni a, a tum ber chu tleirawlte thil tha lo laka inven thiam tir, HIV darh zau zel tur ven, ruihhlo hman sual loh nan leh tleirawlten nun kawng tha an zawh theihna tur kawh hmuh a ni a, naupangte’n an taksa pianphung leh a lo danglam chhoh dan, a enkawl dan, natna leh hri tha lo laka inven thiam dan an thiam theih nana buatsaih a ni.
————-

Mizoram sorkar-in a hnathawk, aikal la tawh lo tura a tih, tun thlenga la la luite chu vawiin khan a ko khawm a, aikal an lak chhan a zawtfiah. Department of Personel & Administrative Reforms atanga thu dawn danin, tun thlenga aikal la la chu department 15 atangin mi 62 an ni a, heng mite hi vawiin khan DP&AR Addl. Secretary, Pu Lalthansanga pisa-ah kovin an harsatna an zawt a, heng mite hi natna khirh tak tak nei, aikal la lo thei lo, Doctor-te enkawl lai mekte nia thu dawn a ni. DP&AR-in aikal la an koh zingah hian mi 45 an inlan a, mahse heng mite pawh hi anmahni kal lovin an aiah an chhungte an inlan a, invalid pension ngai khawpa natna khirh tuarte an ni hlawm a, sorkarin tha a tih angin a la ngaihtuah dawn nia hriat a ni. Zawhna chhangin DP&AR hotute chuan natna khirhkhan nei lo, aikal la satliah ringawt chu an record neihah chuan an awm tawh lo niin an sawi a, mahse hei hi department zawng zawngin report an thehluh atanga an hriat a ni a, a takah erawh chuan an awm lo takzet tih an sawi thei lo tih an sawi bawk.
————-

Kau-Tlabung leh Tuipanglui Mini Hydel Project hnathawh dan chhuina chungchanga an lungawi loh avangin PRISM chuan High Court-a PIL file dan a zawng dawn. Hemi chungchanga vawiina an thuchhuah tarlan danin, kum 2008 October thla khan Kau-Tlabung leh Tuipanglui Mini Hydel Project-a hnathawh dana sum hman dana thil rinhlelhawm chhui a nih theih nan ACB-ah FIR thehlutin ACB chuan Vigilance Department-ah a chhuina report a thehlut tawh niin an sawi a, amaherawhchu sorkar chuan he case hi criminal case anga kalpui lova Departmental inquiry-a kalpui turin ACB chu July ni 2 khan a hriattir niin an sawi a, hei hi dikna rah behnaah ngaiin PRISM Executive Committee, vawiina thukhawm chuan High Court-a PIL file dan ngaihtuah ni se tiin an rel a ni.
———-

Mizoram Cultivator and Labour Union (MICLUN) chuan Mizoram Chief Information Commissioner hmun ruak hnawh khat thuai turin sorkar an ngen. Hemi chungchanga an thuchhuahah MICLUN chuan Chief Information Commissioner, Pu Robert Hrangdawla, kumin February ni 1-a a pension hnuah tun thlengin he post hi hnawh khah lohvin a la awm niin an sawi a, he post pawimawh tak hi hnawh khat thuai turin sorkar an ngen a ni. Health Care Scheme sorkarin tan mai tur anga a sawi tawh, tun thlenga tan a la ni lo chu tipuitling thuai turin sorkar an ngen a, Congress sorkarin a manifesto-a a telh angin kut hnathawktuten harsatna an tawha an thlavang hauh theitu tur Farmer Commission din thuai turin sorkar an ngen bawk a ni.
———

Greater Aizawl Water Supply Scheme Phase-II zawh felna tura hna kal lai chu furpuiin a nan tak avangin chawlhsan rih a ni a, amaherawhchu tun dinhmunah tui sem darhna tura hnathawh theih awm chhun, Aizawl chhim lam Melthum, South Hlimen leh Lungleng thlenga pipe phum hna chu thawh zui zel a ni. Hetih lai hian Aizawl hmar lam veng hrang hrang – Durtlang leh Sihphir tela tui pekna tur pawh buaipui mek a ni a, Durtlangah hian tui pump chhoh a ngaih avangin Bawngkawn Booster Pump bunna hmun tur tunlai hian siam mek a ni. PHE Department hotute hnen atanga kan Corr. thu dawn danin, Phase-II-in tui Tlawng lui atanga a dawtna tur, Intake Jack Well siam hna leh Serlui kanna tur lei dawh hna chu fur laia thawh chi a nih loh avangin chawlhsan rih a ni a, heng hnate hi ruahtui tlem veleh thawh chhunzawm leh a ni ang. Hetih lai hian Greater Aizawl Water Supply Scheme Phase-II hian Phase-I tui dawh khawl sa a la ring zui zel a ni. Puan tawh thin angin Greater Aizawl Water Supply Scheme Phase-II-a contractor, Johnson Eastern Power Ltd. chu chawlhtir a ni a, hemi hnu hian sorkar chuan Departmental Work-in PHE Department chu he hna hi a chhuzawmtir a, PHE Minister, Pu S. Hiato-a sawi danin Greater Aizawl Water Supply Scheme Phase-II zawh felna tura sum mamawh belh hi cheng vaibelchhe 64 a ni a, hei hi a remchan dan ang angin sorkar chuan a dap mek a ni.
——-

Tanhril Joint Action Committee chuan an veng VC Member, Lalpiangliana thihna chungchanga mawhphurtu nia hriat Police 4 leh he tualthahna-a inhnamhnawih nia hriat civil mite, man loh leh thubuai siamsak loha tun thlenga an la awm chu hriatthiam har an tih thu thuchhuah siamin an tarlang a, Police 4-te Anticipatory Bail dilna pawh hnawlsak ngei turin roreltute an phut a ni. An thuchhuahah Tanhril Joint Action Committee chuan mipuite venghimtu tura ngaih, Police-te kutah ram leh hnam a him zo ta lo nia an ngaih thu sawiin, dikna hai langa he thubuai hi chinfel thuai a nih loh chuan lungawi lohna a thleng thei dawn niin an sawi bawk a ni.
———–

Mizoram Municipal Steering Committee chuan Aizawl Municipal Council inthlanna atana inbuatsaih zel a ni chu lawmawm an tih thu an sawi. Hemi chungchanga thuchhuah an siamah Municipal Steering Committee chuan Municipal Council Electoral Roll-ah ram dang mi thun loh ngei an nih theih nan, dik tak leh chak taka hma la turin sorkar an ngen a, Vital Statistics of Immigrant Control dan siam thuai turin sorkar ngen bawk.
———

Champhai DC, Pu Vijay Kumar Bhiduri chu Champhai Unit MUP-in vawiin khan a chawimawi a, thangchhuah diar khimtirin, tawlhloh puan an bahtir a ni. Hemi puala inkhawm tawi te, DC Office-a neihah hian Champhai Unit MUP President, Pu Rolura Sailo chuan thu sawiin Champhai DC, Pu Vijay Kumar Bhiduri chu dikna tana huaisen taka hnathawk, Mizote zinga tlangnel taka khawsa-a Mizo tawng pawh hun rei lote chhunga thiam a ni tih sawiin, hmasawnna atana mi thahnemngai mi, dan leh thupek ken kawhna lama huaisen taka tan latu a ni tih a sawi a, hun lokal zel turah pawh chhuanawm taka hna a thawh a beisei thu a sawi bawk. Pu Bhiduri pawhin thu sawiin MUP-in chawimawina an pek chu a phu lo tih a sawi a, amaherawhchu chawimawina an pek chu chu a kawl that tur leh  a hriat reng tur a ni tih a sawi bawk.
———-

Nu leh pa, naupang leh zirtirtute tana nun kaihruaitu tura buatsaih “Dimte in aw” tih lehkhabu, Pi Zozikpuii ziah chu vawiin khan Rempham Ly Studio, Ramhlun North-ah Parliamentary Secretary, Pu Chawngtinthanga’n a tlangzarh. Pu Chawngtinthanga chuan khawvela hnam changkangte chu thu leh hla lamah an san avangin khawvelin a ngaisang thin a ni a ti a, Mizote pawh hnam hausa leh changkang ni tur chuan thu leh hla lama hmasawn tura a tha zawnga intlansiak a tul tih a sawi.  Lehkhabu tlangzarh inkhawm hi Vanglaini Editor, Pu K. Sapdanga’n a kaihruai a, lehkhabu ziaktu Pi Zozikpuii chuan a lehkhabu ziah chu nu leh pa, naupang, zirtirtuten tangkai taka an chhawr beisei thu a sawi.
———

Mizoram Amateur Taekwondo Association (MATA) buatsaih, Mizoram Official Taekwondo Championship vawi 13-na chu vawiin khan Sports Minister, Pu Zodintluanga’n Electric Veng YMA Hall-ah a hawng. He Championship hawnna inkhawm hi MATA Sr. Vice President, Pu VL Sawma’n a kaihruai a, Minister chuan MATA hruaitute’n fel fai taka thil an kalpui thin chu lawmawm a tih thu a sawi a, sorkar ruahmanna, catch them young pawh an kalpui tha hle tih sawiin, taekwondo player la naupang tak takte chuan kum 4 kum 5 hnu-ah Mizoram tihmingtha a, medal an hawn ngei a beisei thu a sawi. He Championship-ah hian District 7 atanga Club 24 atangin Taekwondo player 280 an tel a, category 18-ah an inel dawn a ni. Championship hawn zawh hian Minister hian World Taekwondo Federation pawmpuia siam, infiamna bungrua, cheng nuai 3 chuang man chu MATA hnenah hian a hlan a ni.
————-

Vawiin khan Aizawlah khaw lum lai berin Celsius Degree 28.1 a ni a, a vawh lai berin degree 20.5 a ni. Hemi chhung hian ruah millimetre 1 sur a ni. Boruak hnawn zawng hi a ro lai berin za zela 61 a ni a, a hnawn lai berin za zela 95 a ni. Naktuk, Ningani-ah chuan Aizawl-ah ruah a sur rin a ni a. Khua pawh a lum lai berin Celsius degree 25 vel, a vawh lai berin degree 22 vel a nih rin a ni. Zing dar 4:37-ah Ni a chhuak ang a, tlai dar 6:10-ah a tla leh ang. Ni rei zawng hi darkar 13 a ni ang a, zan rei zawng chu darkar 11 a ni ang.