www.zonet.in

RAM PAWN CHANCHIN THAR

Israel sorkarin Palestinian tanpuina tur phurtu lawng Flotilla beih chungchangah ngaihdam dilna chhan tur a nei lo niin a sawi. Israel Foreign Minister, Avigdor Lieberman chuan Finland khawpui, Helsinki-ah he thu hi sawiin, kumin May ni 31-a thil thleng kha sawi thar fo tawh loh tha a tih thu a sawi a, kha thil thleng avanga ngaihdam dil phuta, an ram nena an inkungkaihna chhut chaha vautu Turkey ram nen chuan inkungkaihna tha tak an la nei reng tih sawiin, thian inkarah pawh inhmuh thiam loh chang chu a awm thei ve tho niin a sawi bawk. Lieberman hian Iran nuclear ralthuam chungchang pawh sawi langin, Iran-in nuclear ralthuam a neih chuan Middle East ram hrang hrangah ralthuama intlansiakna nasa tak a thleng dawn niin a sawi a, hei hi ram hrang hrang tana pawi thei a nih avangin, Iran ram nuclear ralthuam chungchang hi ngaihtuah zui tlak pawh a ni lo tih a sawi. Puan tawh angin, Palestinian-te tanpuina tur phurtu lawng, Flotilla beih a nih chungchangah hian Turkey sorkar chuan Israel hi thupha chawia ngaihdam dil ngei turin na takin a phut a, hei hi a duh loh chuan, Israel nena an inzawmna zawng zawng chhut chah vek an tum tih Turkey Foreign Minister, Ahmet Davutoglu chuan a sawi a ni.  Turkey ram hi Muslim ramte zinga Israel thian tha bera ngaih a ni a, tun hnaiah Israel rama a palai a koh kir bakah thupha chawi turin Israel hi a phut a, Israel sipaite kut tuara thite chhungte, zangnadawmna pe ngei turin Israel sorkar chu a phut bawk a ni.

British sipaiten Afghanistan ram, Helmand province-a Sangin biala an awm hmun khuarna chu chhuahsanin, US sipai kuta hlan an tum niin BBC-in a sawi. Sangin bialah hian kum 2001 atang khan  mi firfiak kut tuarin British sipai 99 an thi tawh a, tun hnaia pawi khawihna hrang hrang avanga an sipaite an thih leh avangin, British sawrkar chuan an hmunpui pakhat hi US kuta dah mai an duh ta nia hriat  a ni a, British Defence Secretary, Liam Fox chuan kumin chhung ngeia helai hmun an chhuahsan theih nan an ram thuneitute hnenah rawtna a thlen dawn niin BBC chuan a sawi. He ruahmanna hi, he hmuna an chhungte chan tawhte chuan an duh a rinawm lo hle niin BBC chuan a sawi a, an chhungten theihtawp chhuaha remna a awm theih nana an beihna hmun, tlawmsan tih hriat taka America sipaite kuta hlan tumna chu an helh viau a rinawm niin a sawi.
—————

Hetih lai hian Afghanistan ramah hian Nato sipaiten Afghanistan sawrkar sipai 5 an kap hlum a, Afghanistan sipai hotu, Gen Mohammad Zahir chuan, Nato sipaite hian an ram khaw chhak lam, Ghazni province-a mi firfiakte laka beihpui thlak nan indo thlawhna an hmang tih a sawi a, he hmunah tho hian an ram sipaite pawh an awm tih sawiin, an ram sipaiten tukina mi firfiakte an lambun laiin, Nato sipaite hian thlawhna atangin an lo kap niin a sawi. He thil thlengah hian sipai 2 pawh na takin an hliam tih sawiin, hetiang hi a thlen fo avangin Nato sipaite chu fimkhur lehzual se an duh tih a sawi bawk. Nato sipai thupuangtu Josef Blotz pawhin, he thil thleng hi tihpalh liau liau a ni tih sawiin, he thil thlen dan hi chhui chian a ni dawn tih a sawi.
——————

Kumpinu, Queen Elizabeth II-in mi firfiakte beih kawngah ram hrang hrang thawh ho tul a tih thu a sawi. New York khawpuia UN General Assembly thukhawm hmaah he thu hi sawiin Kumpinu chuan, khawvel sik leh sa danglam chak lutuk veng tur pawhin ram hrang hrangten thawk ho-a tan an lak a ngai tih a sawi a, UN General Assembly-a a thusawi hnuhnun ber chu kum 53 kal ta, 1957 daih tawh kha a ni tih sawiin, khang hun laia an thu khel leh tun laia an buaipui chu a inang tawh lo hle tih a sawi a, thil thenkhat chu a tha zawnga inher danglam awm mah se, thil tam tak chu a tha lo zawnga thleng a awm tih sawiin, ram hrang hrang-te chu a hma aia thil tha lo zawk thleng thei ven kawnga an thawhho tul a tih thu a sawi bawk.  UN General Assembly-a thu a sawi zawh hnu hian Kumpinuhian World Trade Centre beihnaa thi-te sun nan a hmunah kalin pangpang a dah a, an ram mi, mi firfiakte pawi khawihnaa thi mi 67-te hriatrengna hmun, Hanover Square-a British Garden of Remembrance pawh a tlawh bawk.
—————-

China rama Chongqing khuaa Municipal Judicial Bureau Director hlui, Wen Qiang chu eiruk thubuai avangin vawiin khan khaihlum a ni. Wen Qiang hi thamna sum la-ah leh, mi pawngsuala puh a nih bakah misual pawl nena inzawmna neia puh a ni a, an khuaa Communist Party hruaitu, Bo Xilai-a kaihhruaina hnuaia eiru-te laka beihpui thlak mekah sawrkara  mi langsar tam tak pawh Wen Qiang-a rual hian eiruk thubuai siamsak an ni tawh a ni.
————-

Colombia rama hel pawl lian ber, Revolutionary Armed Forces of Colombia (Farc) mi 13, thlawhna atanga kah hlum an ni. Farc hel ho hian, Venezuela a awm mek, an pawl hruaitu pakhat, Ivan Marquez-a thupek bawhzuiin,  Caribbean tuipui kama Bolivar Province-a Montes de Maria-a an awm hmun khuarna thin chu sipai-te hnen atangin lak kir leh tumin an bei a, hei hi sipaiten an lo hriat lawk avangin, thlawhna atangin sipaite hian hel ho hi an bei a ni. Colombia President, Alvaro Uribe chuan, hel ho hruaitu leh pawi khawih tura thu petu, Ivan Marquez chu a awmna an hria nia sawiin, a hote laka sipaite thil tih hi a thu thawnah ngaiin, pawi khawih tuma che tawh lo tura hriattirna angah ngai se a duh tih a sawi.
—————-

Film chang thiam, Lindsay Lohan chu, kum 2007-a ruihhlo avanga man a nih hnua Court hmaa a thutiama hlen loh avangin ni 90 chhung tang turin Court-in a chungthu a relsak. Kum 24 mi, Lindsay Lohan hi, kum 2007 khan zu rui chunga lirthei khalh thubuai 2 leh fimkhur lo taka lirthei khalh thubuai 1 siamsak a nih bakah, ruihhlo chi khat, Cocaine a lo kawl avangin man a ni a, minute 84 chhung tantir a nih hnuah, zu that lohzia inzirtirna hmuna kal thin tura a intiam avangin chhuah leh a ni a, he hmunah hian a kal that peih loh avangin California Court chuan tun thla ni 20 atanga ni 90 chhung tang turin a ti ta a ni.
————–

Russia mi, Piano tum thiam, Mikhail Pletnev chu mipa naupang kum tling lo khuaikhem chinga puh a nih avangin Thailand-ah man a ni. Music leh Solfa a thiam avanga chawimawina sang, Grammy Award pawh lo dawng tawh, kum 53 mi, Mikhail Pletnev hi Russian National Orchestra (RNO)-a Director ni lai a ni a, Thailand-ah hian chawlh hmangin a kal a, naupang kum 15 mi khuaikhem thina puh a nih avanga man a nih hnu hian, Pattaya thliarkara a chenna in pawh police-te hian an dap a, a laka thubuai thehluttu-te hian finfiahna tha tak nei niin insawi mah se, Police kut atang hian chhuah lailawk a ni.
—————-

Ni zung chakna hmang tura siam, thlawhna chu darkar 24 chhung thlawh chhintir a ni dawn. Andre Borschberg leh Bertrand Piccard-ten kum 7 chhung an lo buaipui tawh, he thlawhna hi vawiin khan Switzerland-a Payerne khua atang thlawh chhuahtir a ni a, Andre Borschberg-a’n khalhin feet 27,900 chung lamah thlawh chhintir a ni a, chhuna ni zung chakna thahrui a khawl sa chu zan lamah a hman chhunzawm theih dawn em tih en chhin a ni dawn a ni. He thlawhna hi kumin April ni 7 khan thlawhtir a lo ni tawh a, zana thlawk thei tura an en chhinna hi a hlawhtlin theih chuan kum 2013 hmaa tuifinriat thlawh khum thei tura siam leh an tum dawn a ni.