TUALCHHUNG CHANCHIN THAR

Sorkar laipui, Health & Family Welfare Ministry-a AYUSH Department leh Mizoram sorkar, Health Services Department hnuaia AYUSH Dept. tangkawp buatsaih, AROGYA MELA chu vawiin khan Aizawl Lammual-ah Larsap, Lt.Gen. MM Lakhera-a’n a hawng. Hawnna thu sawiin Larsap chuan, thingtlang leh hmun kilkhawr zawkah Doctor leh damdawi lam thiamte an indaih lohna avang leh, damdawi man a san tial tial avangin AYUSH leh ram hmul damdawi chu damlo harsa zawkte tan thil tangkai tak a nih a beisei thu a sawi. Larsap chuan Mizo pipute atanga ram hmul damdawi an hman thinte chu zir chian a, uar leh zuala hman tangkai leh humhalh pawimawh a tih thu a sawi. Sorkar laipuia AYUSH Deparment Secretary, Pi S.Salaja-i pawhin Mizoram Ayush leh ram hmul damdawi hmang tangkai lehzual tura tan an rawn lak zel tur thu leh Mizoram chhunga District 10-ah AYUSH Clinic hawn tawh chu thuam that chho zel a, a dang pawh hawn belh tum a nih thu a sawi.  Chief Secretary, Arogya Mela Organising Committe Chairman ni bawk, Pu Vanhela Pachuau chuan Mizoram sorkarin AYUSH Department leh Medicinal Plant Board-te chu tihchangtlun a tum mek thu leh Mizo ram hmul damdawi siam lamah tan lak a nih tur thu a sawi a, NRHM-ah Mizoram chu a titha ber dawttu a nih thu a sawi bawk. Arogya Mela-ah hian Health & Family Welfare, Horticulture leh Agriculture Department ten stall hrang hrang hawngin mipuite hriat atana thil pawimawhte an hrilhfiah thin ang a, Mizoram AYUSH Doctor-te pawhin he Arogya Mela chhung hian a thlawna inentirna an hawng reng dawn a ni. Ni thum chhung awh tur, Arogya mela hi Mizorama buatsaih vawi khatna a ni.

AYUSH leh Ram hmul damdawi tihhmasawnna kawnga tan lak zel dan tur hi nimin khan Secretariat Conference Hall-ah Chief Secretary Pu Vanhela Pachuau-hoin mi pawimawhten an sawiho va, sorkar laipui atanga lo kal, Pi Jalaja-i chuan AYUSH leh ram hmul damdawi siam chhuah kawnga Mizoram tih thanharh leh tihhmasawn dan tur ngaihtuaha lo kal an nih thu a sawi a, khawsak danphung inher danglam zelin natna benvawn chi hrang hrang a thlente chu AYUSH hmanga enkawl theih a nih thu a sawi. Chief Secretary pawhin hemi kawngah hian Mizoram sorkarin a tih ve theih ang ang te lo bawhzui a inpeih thu a sawi a, State Medicinal Plant Board pawh tihchak thar leh a tul thu a sawi bawk. Mizoram khaw hrang hrangah tunah hian Primary Health Centre 153-ah Homeopathic Doctor 10 an awm a ni.
———–

4th IR Battalion driver, R. Pazawna chuan nimin khan West Kawnpuiah hnam dang mi pakhat a chil hlum. Hemi hnu hian R. Pazawna hi Kawnpuia Tripura Police Outpost-ah a inpe nghal a ni. Hemi chungchanga MZP thuchhuah tarlan danin, R. Pazawna hi Tripura Police-te chuan kut an thlak bakah mipuite kutthlak theih turin Police Outpost atangin an hruai chhuak niin an sawi a, he vanduaina thleng chungchanga Tripura Police-te thildan dan chu demin he chetsualna thlenna hmun hi Mizoram chhung a nih avangin 4th IR Battalion driver, R. Pazawna hi Tripura Police kut atanga la let thuai turin Mizoram Police-te an ngen a ni.
———

Mizo Zirlai Pawl (MZP) chuan Vairengte-a MZP rama Zo Run a lo sak tawhna hmun, hnam dangte’n an lo hung chu inhmuhsitna leh intham lohna lian takah an ngai tih an sawi. Vawiina thuchhuah an siamah MZP chuan kum 2007-a Zo Run a lo sak tawhna, Vairengte daia mi chu tun thla ni 10 khan hnam dangte’n an ram ang hrima chei bawlin balhla te an phun a, hei hi Vairengte-a MZP Sub-Hqrs-in a hriat veleh a en zui nghal a, sorkar-a thlen a nih hnuah tun thla ni 12 khan Mizoram Police-te’n a hmunah en in a hungnate an thiat chu a lawmawmin Mizoram Police-te chet dan chu a thlamuanthlak hle tih an sawi.
————–

Centre of Indian Trade Unions Mizoram chuan Mizorama private company chi hrang hrangten hnathawktu an rawih engemawzat hlawh an pe thei lo nia sawiin, hei hi dan kalha chetna niin an sawi a, an hlawh an batsak pe thuai turin Private Company-te chu a ngen a ni. Hemi bakah hian PWD hnuaia MR-a thawkte thiamna mila an dinhmun tihhniamsak an ni leh, an zinga mi thenkhat ban an ni chu tha lo an tih thu sawiin, sorkar kum liam ta-a PWD Division-II hnuaia cheng nuai 33 chuang, hman hman lohva liam ta chu pawi an tih thu an sawi bawk.
———-

Home Minister Pu R.Lalzirliana chuan ni 2 thanga Lunglei tlawh turin vawiin chawhnu khan Lunglei a thleng. Lungleia a cham chhung hian khawtlang hruaitute leh Party hruaitute a kawm bakah naktuk chawhnuah Lunglei District-a mipa naupang huaisen, Joseph Vanlalhruaia, kum 12 mi, hmeichhe naupang tui tla chhanchhuaktu chawimawina, Jeevan Raksha Padak a hlan ang a, Lungleia District Police Office leh 2nd Battalion Hqrs, Luangmual-a mite a tlawh dawn a ni. Rural Development Minister ni bawk, Pu R.Lalzirliana hian Rural Development Office pawh naktukah vek a tlawh ang a, hna thawh dan a en dawn a ni.
————

Mau tam tuarte tanpuina tura tih, BAFFACOS sum, cheng nuai 50 chuang chu Delhi-a Republic Day lawmna-a Mizoram Tableau siamna atan pawh pen a ni. Comptroller & Auditor General of India report, 2009, tun thla ni 5-a Assembly House-a pharh taka a lan danin kum 2005 leh 2006 khan BAFFACOS sum, cheng nuai 21 leh sing 6 chu Information & Public Relations Department hian Delhi-a Republic Day lawmna-a Mizoram Tableau siamna atan an hmang tih a tarlang a, hei bakah hian BAFFACOS sum tho, cheng 5,43,000 chu Delhi-a kalna senso leh State sorkar-in Chapchar kut lawmna-a state danga atanga thuthar lakhawmtute lo mikhual nan leh kum 2005-06-a Aizawl-a National Editors Conference on Infrastructural Development a thlenna atan hman a nih thu a tarlang bawk. CAG report chuan Information & Public Relations Department hian kum 2004 atanga 2006 inkar khan mau tam tuarte tanpuina sum, cheng nuai 27 leh sang 3 chu thil dang atan a pawt peng leh tih a tarlang a, mahse Department lam chuan mau tam lam hawia thil zirna atan hman a nih thu tarlang mah se, CAG report chuan Delhi-a Mizoram Tableau thlalaka a lan danin, an thil tih hian mau tam tuarte tanpuina lam a hawi lo tih a tarlang bawk.
————–

Nakt<k, Nilaini hi ram danpui duangtu hotu, Dr.BR Ambedkar-a pian champha a nih avangin Mizoram sorkarin chawlhah a puang a, sorkar office leh zirna inte khar a ni ang. Sorkar laipui pawhin he ni hi chawlhah a puang a ni.
———–

Kum hlui, 2009 chhung khan Mizoram pumah nau piang 29,174 an awm a, mi 6,001 an thi. Economics & Statistics Department atanga thu dawn danin, nau piang hi Aizawl District-ah an tam ber a, mi 10,029 an piang a, Champhai District-in dawtin nau 6,890 an piang a, Lunglei District-ah 3,394, Lawngtlai District-ah 3,315, Kolasib District-ah 1,883, Saiha District-ah 1,463, Serchhip-ah 1,104 leh Mamit-ah 1,096 an piang a, a vaiin Mizoram puma nau piang hi 29,174 an ni. Kum 2009 chhunga mitthi 6,001 zingah hian Aizawl District an tam ber a, mi 2,743 an thi a, Lunglei District-in dawtin mitthi 873 an awm a, Champhai District-ah 576, Lawngtlai District-ah 471, Saiha District-ah 442, Kolasib District-ah 330, Serchhip District-ah 301 thiin Mamit District-ah mitthi hi an tlem ber a, mi 275 an thi a ni. Hetih lai hian Economics & Statistics Department chuan nau piang leh mitthi hi a pung thei tih an sawi a, District hrang hrang leh khaw hrang hrang atangin report hi a luh belh thei tih an sawi a ni.

Economics & Statistics Department chuan nau piang reng reng, an pian atanga ni 21 chhungin an pianna khua emaw, damdawi in registrar hnenah emaw in-report ngei ngei tur a nih thu leh, naute hming chu sak a la nih loh pawhin in report tho tur a nih thu an sawi a, pian emaw thih emaw atanga ni 30 hnu leh kum khat inkar-ah birth certificate emaw, death certificate emaw la duhte chuan Addl. Chief registrar phalna leh hriatpuina-in, mahni veng emaw khua emaw-a registrar of Births & Deaths hnenah registration tih tur a ni tih an sawi. Economics & Statistics Department chuan kum 1985 July hnu lama piang leh thi reng rengte chuan Birth &  Death Certificate hi an nei vek tur a ni an ti a, rokhawlhna emaw, hriat loh vang emaw-a an nei lo a nih chuan Economics & Statistics Department-a RBD Cell-ah non-availability certificate dilin a lak theih tih an sawi a, certificate nei tawh, tibo emaw tichhia emaw chuan Delay Registration permission form la buai lovin Directorate of Economics & Statistics-a RBD cell-a hai chhuaha lak tur tih an sawi bawk.
—————

Assembly Deputy Speaker, Pu John Rotluangliana chuan vawiin khan Mamit-ah Mamit Sub-Hqrs MUP Conference a hmanpui. Mamit Chhim veng YMA hall-a inkhawmah thu sawiin Pu John Rotluangliana chuan  upate chu chhungkuaah VIP an ni a, khawtlangah thalaite kaihruaitu leh thurawn petu an ni a ti a, Upa-te chu thil tam takah dai hriat ngah leh thil thlir zau an nih avangin thil tihsual palh a awm loh nan berawn thin turin a chah a ni. Mamit District hmasawnna tura hnathawh dan leh ruahmanna siamte sawiin Deputy Speaker chuan sorkar hmachhawpte chu bawhzui a ni dawn tih mipuite a hrilh a, DTO office hmun tur leh polytechnic hmun atana khawtlang hruaitute ruahmanna lo siam tawh chu enpui a tum thu a hrilh bawk. Mamit Sub Hqrs. MUP Conference hi an President, Pu R. Zahlira’n a kaihruai a, Deputy Speaker hian Mamit Sub Hqrs. MUP tanpui nan cheng sing 2 a pe a ni. Deputy Speaker hian naktukah khaw dang tlawh kualin Chilui thleng kal a tum a ni.
————

Saiha District MNF hruaitute chuan an President, Pu HC Lalmalsawma Zasai hovin nimin khan Saiha-a supply kudam an tlawh a, buhfai dinhmun an enfiah a ni. Hemi hnua an hruaitute hnen atanga kan Corr. thu dawn danin Saiha Kudam-ah hian buhfai chhek khawl a tlem hle a, Supply a tam tawk loh avangin kar hmasa pawh khan Saiha khawpui chhunga chengte chuan buhfai quota chanve-in an la a, tun karah pawh hian buhfai quota chanve, puitling kar 1 quota atan kg 1 leh naupang tan kg chanvein an sem leh dawn niin an sawi a ni. Hetih lai hian Saiha-a kan Corr. chuan thingtlang kudam-ahte chuan tun dinhmunah buhfai pek chhuah tur tam tawk a la awm niin a sawi a ni.
———–

MNF Party chuan rorel lai pawl Congress Minister leh MLA-te chu tun hnaia zawh tak Assembly session-ah opposition member-te ang maia che-ah leh session chu politics-a inpuhmawhna a hmangah an puh a, zawhna chhangtu tur Minister-te an awm reng laia Minister-te zawhna chhanpui thinah Chief Minister leh Home Minister an puh bawk.
————-

Ram hrang hranga sorkar laipui palai lo ni tawh, Pu L.T. Pudaite-a kutchhuak lehkhabu pahnih chu vawiin khan Larsapin a tlangzarh takte hi saptawnga ziah, “Mizoram and Look East Policy” tih leh Mizo tawnga ziah, “Mizo Tlangval India Palai” tih a ni a,  I&PR Auditorium-a a tlangzarhna inkhawm hi Chief Secy hlui leh Pu LT Pudaite-a thian hnai,  Pu Lalfak Zuala’n a kaihruai a ni. Larsap chuan he lehkhabu-ah hian Mizoram leh a thenawm ramte inlaichin dan te, Mizoram nunphung leh hmasawn chhohna atana hma thlirte tarlan a ni tih a sawi a, lehkhabu tha leh ro tling tak tak tlangzarh theiha buatsaih a ni chu lawmawm a tih thu a sawi. Chief Minister, Pu Lal Thanhawla pawhin heng lehkhabu ziaktu Pu LT Pudaite chu a thian tha tak, kawng hrang hranga mi ngaihsanawm, a awmna hmun apianga mi tlangnel tak leh Mizo nihna vawng tlat thintu a nih thu a sawi. Heng lehkhabu tlangzarh tak-a thu chuangte hi Prof.Lianzela leh Pu Vanneihtluanga’n an sawi hawng a,  Art & Culture Minister Pu PC Zoramsangliana, Parliamentary Secretary Pu Lal Thanzara, MLA – Pu K.Lalrinthanga leh Pu Lalthansanga, State Planning Board Vice Chairman, Pu Lalkhama, Member Secretary, Pu PL Thanga leh mi pawimawh dang thahnem tak an tel a ni.
————

Aizawl District Sub Divisional Magistrate chuan Aizawl khawpui hman tura Tuirial kama ek paihna, Oxidation Pond-a ek paih vek turin ek paihtute a hriattir. Hemi chungchanga thuchhuah a siamah tunlai hian Aizawl khawpui atanga ek paihtu thenkhatin ek paihna hmun tur, Tuirial bula siamah paih lovin hmun dang thenkhatah paih an ching niin a sawi a, Cr. PC Section 144-na tlawh chhanin ek paihna hmun tur siam nilo hmun danga ek paih chu khap a ni tih sawiin, hmun danga paihte chu dan anga hrem an nih tur thu, a thupekah chuan a sawi a ni.
————

United Pentecostal Church (NEI) hruaituten vawiin khan Aizawl Press Club-ah thuthar lakhawmtute kawmin tun kar Ningani zan atanga Pathianni zan thlenga Aizawl Lammuala an Kohhran General Conference vawi 42-na leh Diamond Jubilee lawmna programme an hman dan tur chungchang thuthar lakhawmtute an hrilh a, General Superintendent, Rev. R. Lalrinsanga chuan he inkhawmpui hmanpui tur hian a duh apiang an sawm thu leh, UPC kohhran atanga chhuak tawhte pawh neitu chan changa UPC kohhrana lut leh turin an sawm tih a sawi. Rev. R. Lalrinsanga chuan an khawmpui hmanpui tur hian khawvel huapa an Kohhran hruaitu 10 vel an lo kal dawn tih a sawi a, Missions General Director, Rev. Bruce A. Howell chu Speaker a ni ang a, thupui atan “Zalenna thu puang rawh u” tih hman a ni ang, a ti bawk. UPC NEI hian ram hrang hrangah Missionary 100 vel an tir chhuak mek a, ram hrang hrang 192-ah rawng an bawl a ni.
————-

Champhai District Volleyball Association buatsaihin nimin atang khan office hrang hranga thawkte tan volleyball tournament, Kahrawt veng field-ah neih a ni a, hetah hian Department hrang hrang atangin Team 24 an chhuak a ni. He Inter-Office Volleyball tournament hi Champhai DC, Pu Vijay Kumar Bidhuri-a’n nimin khan a hawng a, thu sawiin he infiamna hian thawhhona leh inpumkhatna sorkar hnathawk zingah a siam a beisei tih a sawi a ni.
————

Zuangtui Games & Sports Association buatsaih, Aizawl East-1 huam chhung tana Volleyball Tournament chu vawiin khan Law Commission Chairman, Pu R. Lalrinawma ‘n a hawng. He Tournament hi Power & Electricity Deparment hnuaia Metre & Relay Testing Division ten sponsor-in Mipa Team 16 leh Hmeichhe Team 5 an tel a, Champion Team-in Dekchi lian leh Rs 3,500/- an dawng dawn a ni. Tournament hi tun thla ni 17 khian zawh fel theih beisei a ni.
———–

Vawiin khan Aizawlah khaw lum lai berin Celsius degree 31.2 a ni a, a vawh lai berin degree 20.2 a ni.  Naktuk-ah chuan Aizawl-ah chhum a tam ang a, zanah ruah tlem a tlak rin a ni. Khua pawh a lum lai berin Celsius degree 31 vel, a vawh lai berin degree 22 vel a nih rin a ni.

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken