www.zonet.in

TUALCHHUNG CHANCHIN THAR

A ruala cheraw kan tam ber, khawvel record thar, Mizoramin vawiin khan a siam. Kawng hrang hranga khawvela a ber ziah khawmna, khawvelin a pawm, Guinness Book of Records-a lang tura khawvel record thar siam tur hian Aizawl lammual bakah Sikulpuikawn leh Chanmari inkar kawngpui dung tluanin mi 10,736-in cheraw bu 671, vawiin chawhnu dar 2 leh dar 2 leh minute 20 inkar chhung khan an kan a, hemi hnu hian a endiktu leh Guinness Book of Records-a thun theitu, London atanga lo kal, Adjudicator, Pi Lucia Sinigagliesi chuan Lammuala dawhsanah thu sawiin, a huhova mi tam takin a ruala cheraw an kan endiktu a ni thei chu nihlawh a intih thu te, cheraw kantute chu lam thiam a tih thu leh an cheraw kan chu ropui a tih thute sawiin, Chief Minister, Pu Lal Thanhawla, Art and Culture Minister, Pu PC Zoramsangliana leh Art and Culture Director, Pi Boichhingpuii-te chungah lawmthu a sawi hmasa a, hemi hnu hian result puangin Mizoram chu tum khata Cheraw kan tamna ber  ‘Khawvel Record’ siamtu a ni tih a puang a ni. Hemi hnu hian khawvel record nihna Certificate pawh Art and Culture Minister, Pu PC Zoramsangliana hnenah a hlan nghal a ni. Hemi hnu hian Art and Culture Minister, Pu PC Zoramsangliana chuan cheraw kana Mizoramin khawvel Record  a siam ta chu Pathian vang a ni tih sawiin, Lalpa chu ropui ber rawh se tiin a auva, mipuiin ‘Halleluiah’ tiin an chhawn a, hemi hnu hian world record Mizoramin a siam lawm nan hnehna hlado chham thiamin a chham a, hemi hnu hian silai kapin tlang tlir zui a ni.

Hemi hma lam hian khawvel Record siam tura Aizawl khawpui chhung hmun hrang hrang atanga lo thawk chhuak, YMA member-te chuan vawiin chhun dar 12:20 atang khan Sikulpuikawn leh Chanmari inkar kawngpui dunga cheraw an kanna tur hmun theuhvah Lammuala cheraw bu 156 kantute nen a ruala an kan theih nan hun rei vak lo chhung an zir hmasa a, kawngpui dung tluana au rinna thlun atanga Darbu tum ri chhuak milin rual tha takin cheraw an kan a, hemi hnu chawhnu dar 2 atanga dar 2:20 thleng , Guinness Book of Records-a hming lang tura khawvel record siam tur hian hlim leh phur takin cheraw an kan leh a ni.

Kan corr. sawi danin, Lammuala cheraw kanna hmunah leh Sikulpuikawn leh Chanmari inkar kawngpui dung tluanin cheraw kan entu mipui an thahnem hle a, hmun tinah mihring awm theihna hmun zawng zawng an luah khat vek a ni. Lammualah pawh cheraw kan lai entute chu an thahnem hle a, mihring awm theihna hmun zawng zawng an luah khat vek a, Lammuala mipui pung khawm tam ber tum a tling hiala rin a ni.
——-

Larsap, Lt.Gen. MM Lakhera chuan Mizo-te’n Cheraw-a khawvel record an siam chu ropui a tih thu leh chhuanawm a tih thu a sawi. Vawiina tlaia Raj Bhavan atanga thu chhuah a siamah Larsap chuan he record siam mi, March ni 12 chu Mizoram tan ni chhinchhiahthlak a ni a, ram chhunga state te ve takin khawvel hriata an hnam lam an pho chhuak leh Guinness Book of Records-a lang tura thalai 10,736-in an hming an tarlang chu chhuanawm a tih thu a sawi a, Mizo mipuite chu thinlung taka a lawmpui thu a sawi. Larsap chuan he record hian Mizoram leh a chhunga mipuite chu tanrualna thar pe se a duh thu a sawi rualin, hun lo kal leh zel tura hmasawnna thar an neih ngei theih nan duhsakna a hlan a ni.
————-

Guinness Book of Records Adjudicator, Lucia Sinigagliesi chuan Mizo-te’n Cheraw kanah khawvel record an siam tih a sawi nawn. Vawiina I&PR Auditorium-a thuthar lakhawmtute a kawmna-ah Lucia Sinigagliesi chuan Bamboo Dance-ah hian khawvel record awm sa a awm lova, tunah hian Mizote chuan record an siam thar ta a, hei hi a chhuanawmin mi dang tan pawha khum harsa khawpin record hi a chungnung a ni, a ti a, Bamboo Dance chu India hmarchhak-ah chauh ni lo,  Asia chhim chhak ramah an uar ve thu te, he lam hi Mizo-te chin chhuah ni hiala a rin thute a sawi a ni. Guiness Book of Records Adjudicator chuan khawvel record thar siam tura Mizo thalaite inbuatsaihna chu ropui a tih thu a sawi a, tun hi India hmarchhak biala a lo kal vawi khatna a nih thute, Mizoram a lo thlen tirha hmun hrang hrang a fan kualna-ah pawh he record thar siam tur hian mi zawng zawng an inbuatsaih ni hiala a hriat thute a sawi a, Lammual bakah km  3-a thui, he lam hi entir a ni chu khawvel record thar a nih thu a sawi. Zawhna chhangin Guinness Book of Records Edition thar chu kum 2011 hian a chhuak dawn a, tuna record siam thar hi Editorial Board-te a hrilh ang a, lehkhabu-ah chuan a lang ngei dawn tih sawi thei lo mah se, a lan ngei a beisei thu a sawi bawk.
—————

Cheraw kana khawvel record thar siam ni hian Aizawl-ah nunphung pangngai a buai nasa hle a, sorkar office pawh a mumal thei lova, Political Party pisa zawng zawngte pawh khar an ni. Kan corr., vawiina Political Party pisa hrang hrang tlawh kualtu chuan Political Party pisa hawn a awm lo tih a sawi.
—————-

Chapchar Kut hmang tur leh Cheraw kan-a khawvel record siamna chhim tura Mizorama lo kal, ram chhung hmun danga thuthar lakhawmtute chuan vawiin khan Chief Minister Pu Lal Thanhawla chu a Bangla-ah an hmu a, International Border Trade leh Kaladan Multi Model Transport Project chungchangte an sawipui a ni. Heng thuthar lakhawmtute hian Aizawl chu nuam an tih thu Chief Minister chu an hrilh a, thenkhat chuan vawi hnih thum lai an lo kal tawh thu an hrilh a ni.
————–

Champhai SDO Civil, Pu James Lalnunmawia leh mi pawimawh dangte chuan vawiin khan Tuipui khawtlang hruaitute kawmin, Tuipuia buhfai thiar kaina rate tihniam turin an ngen. Hemi chungchanga kan corr. thu dawn danin Tuipui lei chak tawk loh avanga buhfai phur motor-te buhfai phurh hlan thlak chu Tuipui khaw mite hian chhipa phurin an thiar kai thin a, Kg 50 bag pakhat thiar kai nan cheng 10 an chhiar chu buhfai phurtute hian tam lutuk nia hriain tihniama rate bithliah turin sorkar an ngen a, an ngenna bawhzui hian Champhai SDO Civil, Police Officer leh mi pawimawh dangte chuan vawiin khan Tuipui khawtlang hruaitute hi an dawr a ni. Puan tawh angin Mizoram Truck Owners Association leh Truck Drivers Association-te chuan Tuipui lei chhuata thir phah khauh tawk lo chu thlak thuai turin BRTF hotute an ngen a, BRTF hotute chuan lei chhuata phah tur thir chak chi, Kolkata atanga an chah chu tun thla tawp lam hian hmuh hmana ni hnih ni thum chhunga phah zawh hman an inrin avangin buhfai phurtu Association-te hian nuar rih lova BRTF-te lei siam that hun nghah an remti a ni.
————-

Zoram Nationalist Party (ZNP) |halai Hqrs chuan Zuangtuia Muanna Kudam-ah buhfai sem chhuah tur tih tham a awm lo niin an sawi. Muanna Kudam hi vawiin khan ZNP |halai hruaitute chuan an tlawh a, Mizoram sorkar-in ration dawr atanga buhfai a sem thin chu hun eng emaw atang khan a thleng tha tawk lo hle nia sawiin, Mizoram fairel bel, Muanna Kudam-ah hian chawlhkar daih mipui mamawh, quintal 15,000 chuang chu tunah hian a awm tling lo niin an sawi a, tuna buhfai awm chu retailer-te hnenah pekc hhuah ngaihna a awm lo niin an sawi. ZNP thalai hruaitute chuan Mizoram sorkar-in ropui taka stadium lungphum lawm nana ruai buatsaih nante, Chapchar kut leh cheraw kana khawvel record siam buaipui nana cheng nuai tam tak a sen ral laia Mizoram fairel bel ber a ruak huai mai chu thil inhmeh lo tak ni-a an ngaih thu an sawi. ZNP thalaite chuan sorkar chu nuam leh hlimhlawp ringawt ngaihtuah lova, mipui mamawh ngaihtuah turin an phut tih an sawi a, kar lovah furpui a thlen dawn avangin tun atanga sorkar-in buhfai chhek khawl a tum lo a nih chuan Mizoram hmun kilkhawr zawka mite chuan tampui an hmachhawn ngei dawn ni-a an hriat thu leh chutiang a thlen loh nan a rang thei ang bera a tih tur ti nghal turin sorkar an phut tih an sawi.
—————-

Mara Autonomous District Council Chief Executive Member, Pu S. Khipo chuan Mizoram sorkarin District Council 3-te leiba rulh nan sum thahnem tak a ruahmansak niin a sawi. He thu hi Saiha-a vawiina amah kawmtu, Saiha District MJA member-te a hrilh a, kum 2009-2010 chhunga leiba rulhna tura Mara Autonomous District Council (MADC) tana sum pek chu cheng nuai 130 a ni a, Lai Autonomous District Council leiba rulh nan nuai 117 leh Chakma Autonomous District Council leiba rulh nan nuai 55 a pe bawk niin a sawi. Hemi bakah hian SSA hnuaiah School Building sak nan Mara Autonomous District Council chu cheng nuai 84 pek a ni a ti a, Finance Commission 13-na-in tualchhung roreltuten kum 5 chhunga hmasawnna ruhrel an siam nan cheng vaibelchhe 710 ruahman a ni a, hetah hian District Council 3-te chan tur pawh a tel ve a, MADC-in cheng nuai 980, LADC-in 790 leh Chakma Autonomous District Council-in cheng nuai 1,300 a hmu dawn niin a sawi bawk. Pu Khipo chuan kum 2010-2011 atana District Council-te Plan sum hmuh tur, Planning Commission nena sawi fel turin District Council Chief Executive Member 3-te chuan tun thla ni 19 khian Delhi an pan dawn niin a sawi bawk.
————-

Serchhip-ah Mizo-te kut ropui leh pipute hman uar ber thin, Chapchar Kut vawiin khan ropui taka hman a ni. Serchhip Field No-II-a a lawmna inkhawmah Dist. Bawrhsap, Pu H. Darzika, Kut Pa chuan Chapchar Kut hi a hawng a, Mizo Kristian-te nun dan nena inhmeha kut her rem theih a ni leh hman leh theih a ni chu lawmawm a tih thu sawiin, Mizo hnam nun leh ze mawite humhima vawng nung zel turin mipuite chu a chah a ni. Sorkar atanga kut hmanna tur sum a awm lo chung pawha Serchhip YMA Sub Hqrs. leh MSACS tangkawpin Chapchar Kut hmang theia mipuite an siam chu lawmawm a tih thu a sawi bawk. He kut hmanna-ah hian District Chief Medical Officer, Dr. Malsawma pawhin thu sawiin, mipuite, a bikin thalaite chu hri hlauhawm, a damdawi la hmuh chhuah loh HIV/AIDS lakah fihlim tum turin a fuih a, he natna pumpelh theihna kawng awm chhun chu nun fimkhur a ni a ti bawk. He inkhawmah hian YMA Sub Hqrs. President, Pu Lalzuiliana pawhin thu a sawi a ni. Hemi hnu hian hnam lam chi hrang hrang entir a nih bakah Mizo nun dan leh khawsak dan danglam leh changkang chho zel entirna Costume Parade neih a ni a, he Kut hmanna-ah hian Red Ribbon Youth Icon top 3 leh Serchhip Red Ribbon Icon top 3-te an zai a, HIV/AIDS laka fimkhur a tul thu mipuite an hrilh bawk a ni.
———

Kut hnathawktute hmunphiah keh khawm leh thar chhuah, man man zawk leh mumal zawka Mizoram pawna hralh theih nan Mizoram Broom Grass Cultivator-cum-Trader Association (MIBCULTA) din a ni. He Association-ah hian Dr. H. Lallungmuana, MP hlui chu President a ni a, Vice President-ah Pu Rualzakhuma leh General Secretary-ah Pu C. Rohnuna-te dah an ni bawk. Hemi chungchanga an thu chhuah tarlan danin Mizorama hmunphiah chingtu leh thar chhuaktu Association chuan hmunphiah hmun siamtuten eizawnna ngelnghet an neih theih dan tur leh Mizoram thing leh mau ti chereu lo zawnga tan lak an tum thu pawh an sawi tel a ni.
————-

Aizawl Zarkawt Veng Joint Action Committee chuan Zarkawt Veng chhunga Bus leh Sumo zan riak thinte chu tun thla ni 15 atang hian an veng chhungah zan riak tawh lo turin an hriattir a, hemi bakah hian an veng atanga Sumo leh Bus chhuak turte chu zing dar 5 leh dar 7 inkara chhuak fel vek turin an ngen. Hemi chungchanga thuchhuah an siamah Zarkawt JAC chuan, Pathianni-ah chuan Sumo-te chu zing dar 6-a chhuak fel vek turin an hriattir a,  zing dar 5 hmaa Sumo, an veng chhunga tlan luta ding thinte chu dar 5 hmaa an venga lut tawh lo turin a hriattir bawk. Hei hi Zarkawt Veng him nan leh thianghlimna atana tih a ni tih an sawi bawk a ni.
———-

Assembly Deputy Speaker, Pu John Rotluangliana chuan Nilaini leh nimin khan a bial, Mamit bial a fang a, Nilaini khan Rajiv Nagar-ah Community Hall thar a hawng. Border Area Development Project sum hmanga sak, Rajiv Nagar Community Hall hi he khaw hall neih hmasak ber a ni a, Rajiv Nagar khaw mipuite chuan an lawmzia entir nan Dy Speaker hi ruai an lo buatsaih sak a ni. Community Hall hawnna inkhawmah hian Pu John Rotluangliana chuan inthlan hma-a a thusawi, Rajiv Nagar thar kan siam ang a tih chu a taka bawhzui chhoh zel a nih thu a sawi a,  Mizoram sorkarin an hmakhua ngaihtuah zel a tum thu sawiin, chumi atan erawh chuan sorkar chu mipuiin an tawiawm a tul ve thung dawn tih a sawi. Dy Speaker hian Tuipuibari leh Khantlanga community hall sakna tur hmun te pawh a tlawh nghal a ni. March ni 11 khan Deputy Speaker hian Damparengpui a tlawh a, a zinna-ah hian Mamit atangin DRDA Project Director, District Education Officer leh PWD EE ten an tawiawm a, Zawlnuam BDO leh West Phaileng SDO (civil) leh BDO ten an tawiawm bawk a ni.
————-

Tuivai Group YMA Conference vawi 25 na Phullen-a neih leh Saitual Group YMA Conference vawi 15-na chu Nilai zan khan Parliamentary Secretary, Pu Chawngtinthanga’n a hmanpui a, Saitual Group YMA Conference vawi 15-na, Thanglailunga neihah Pu Chawngtinthanga chuan India ram chauh ni lo, khawvel huap pawhin YMA anga Tlawmngai pawl ropui a awm lo tih a sawi. Pu Chawngtinthanga hian a bial chhung khaw hrang hrangte a tlawh kual zel a, naktuk hian Aizawl a lo thlen beisei a ni.
————

Mizoram Presbyterian Kohhran Hmeichhiate rawngbawlna langsar ber pakhat, Buhfaitham kum za tlinna lungphun chu nizan khan Synod Moderator, Rev. C. Chawngliana’n a hawng. Hemi hmaa  Electric Veng Kohhran Biak In-a hemi puala inkhawmah Moderator chuan Buhfaitham chu khawvel hmun danga Kristiante pawhin an tih ve loh, rawngbawlna danglam leh chhinchhiahtlak tak a ni, a ti a, he rawngbawlna, tlawm leh mawl tak anga lang, mi tin tel theihnaah hian thlarau thianghlim hnathawh a lang fo tawh tih sawiin, uar deuh deuh turin Kohhran mipuite a sawm a ni. He inkhawmah hian Kohhran Hmeichhe lam changtu, Synod Executive Secretary, Rev. Zosangliana Colney-in Buhfaitham Centenary Souvenir a tlangzarh a, Synod Secretary,Upa Vanlalhuma’n Kristian chhungkaw dinhmun tehna lawmman a sem bawk a, ram pumah NE Khawdungsei bial chu a titha ber an ni leh a ni. Hemi bakah hian Buhfaitham Centenary puala Drama inziaksiak lawmman leh Buhfaitham zaa za (100%) thamtu Bialte lawmman pawh Senior Executive Secretary, Rev. Vanlalzuata’n a sem bawk. Synod tangka kum hmasa, 2008 April atanga nikum March thla tawp thlenga Buhfaitham atanga Synod sum hmuh chu Rs. 6,08,84,586 a ni a, budget khumna  ringawt pawh Rs. 88,84,586 a tling a, kum hmasa (2007 -2008)-a buhfaitham atanga sum hmuh khumna zat chu Rs. 57,72,315 a ni a. Kum kal mek, 2009 -2010 chhunga Buhfaitham atanga sum hmuh beisei zat chu Rs. 5,60,00,000 a ni.
————–

Vawiin khan Aizawl khawpui chu a lum lai berin celsius degree 28.3 a ni a, a vawh lai berin degree 17.5 a ni. Naktuk, Inrinni-ah chuan Aizawl-ah khua a tha ang a. A lum lai berin Celsius degree 30 vel, a vawh lai berin degree 19 vel a nih rin a ni.