www.zonet.in

RAM PAWN CHANCHIN THAR

South Africa rama mi hang hruaitu ropui tak, Nelson Mandela, lung in atanga chhuah a nih kum 20 tlinna chu ropui taka lawm a ni a, hei hi South Africa rama chi inthliarna – mi ngo-te tlem te zawkin a tam zawk, mi hang an awp beh luih tlatna tawpna a nih avangin mi hangte tan phei chuan sal tang chhuahna ni ropui tak a tling a ni. Capte Town-ah chuan Mandela, kum 27 chhung a tanna lung in atanga kawng zawhnaah mi chal lang tak tak an tel a, Mandela hi kum 91 lai a nih tawh avangin chak tawh lo hle mah se, tlai lamah chuan mipui hmuh theiha a inlan peih beisei a ni. Mandela hi kum 1994 khan South Africa ram President, mi hang hmasa ber a ni a, a hma, kum 1964 khan an ram sorkar, tharum hmanga paih thlak tuma puh a nih avangin dam chhung tang tura tih a ni a, Robben Island lung inah rei tak a tan hnuah Pollsmoor lung inah a tang leh a, chhuah a nih hma lawkin Cape Town atanga km. 50 vela hla, Victor Verster lung ina pindan pakhatah, amaha chaw chhum hran neiin an dah leh a ni. Victor Verster lung in hi tunah chuan Drakenstein lung in tih a ni tawh a, hetah hian Mandela lim, a kut phar chho lai an siam tawh a ni. Mandela nupui hlui, Winnnie Mandela chu he lung in atanga kawng zawh hruaitu tura beisei zet a ni na a, mahse a tan a rilru nat thlak lutuk dawn avang leh, hun lungchhiatthlak leh hrehawm ber ber hriat chhuah tir lehtu a nih dawn avangin a tel dawn lo tih puan a ni leh a, mahse South Africa President, Jacob Zuma-a hova inkhawm buatsaihah erawh chuan tel a tum tih puan a ni.Nimin khan Pakistan sipaite, motor-a an inzui laiin thih chilh bomb hmanga beih an ni a, sipai 17 an thi a ni. He pawi khawihna thlenna hi an ram hmar thlang lama tribal ho chenna, Khyber-ah a ni a, Khyber bial hi North-West Frontier Province depa awm a ni a, Afghanistan rama America sipaite chak khai lakna kawnga awm a ni. Thu dawn hmasaah chuan bomb tipuaktu hi ke-in a kal a, Police motor inzuiin bazar a pal tlang lai takin a bomb pai chu a tipuak nia sawi a ni a, mahse hei hi finfiah chiah a ni lo. He bomb chak tak puak hian motor engemawzat a tichhia a, civil motor pawh a tichhe nual bawk a, tualchhung TV-ah pawh motor kang chhe thlalak tam tak tarlan a ni. Hliamte chu Peshawar damdawi in panpui an ni a, news agency thenkhat sawi dan chuan, he thil thleng tuartute bawihsawm tura kal, sipai dangte pawh lambun an ni a, hetah hian sipai Brigadier a thih bakah Major leh Lieutenant pakhat pawh an hliam tih sipaite chuan an sawi.
————-

Indonesia rama ei rukna dotu pawl hotu hlui, Antasari Azhar chu tualthah thubuaiah kum 18 tang tura tih a ni. Azhar hi sumdawng pakhat, Nasrudin Zulkarnaen nena ngaihzawng intawm avanga he sumdawng thahtirtu-ah puh a ni a, a thubuai hian ram pum a nghawng a, thubuai siamsaktute chuan Azhar-a hi tihhlum ngei an phut a ni. Ani erawh hi chuan he thihnaah hian mawhphurhna engmah nei lova insawiin, mi lian ei rute a man chhuah thin avanga amah dotute phiar rukna thil tih leh, awmze nei lova amah tihhmingchhiat tumna niin a sawi a, Judge Herri Swantoro chuan Jakarta court-ah a rorel dan hi puangin, he sumdawng thahnaah hian Azhar-a hi a inhnamhnawih ngeia ngaih a nih thu leh, kum 18 tang tura tih a nih thu a puang a, Azhar-a chuan khua leh tui tha a nihna angin court thuchhuak hi pawm mah se, danin a phalsak anga ngaihtuah nawn a dil tur thu a sawi.
———–

Iran President, Mahmoud Ahmadinejad chuan an ram nuclear programme chu a ni lo zawngin ram dangten an sawi bawrhban sak lui niin a sawi. Iran Revolution champha tum 31-na lawmna inkhawmah he thu hi sawiin Ahmadinejad chuan, nuclear ralthuam siamna atana pawimawh Uranium, zaa 20 thlitfim an nei tawh tih sawiin zaa 80 thlenga thlitfim theih an inbeisei tih a sawi a, hun rei lote hnuah, an mamawh tawk Nuclear fuel chu an siam chhuak thei dawn niin a sawi. Ahmadinejad chuan, Iran chu nuclear chakna siam chhuak ram a ni ta tih a sawi a, an Nuclear Programme kalpui mek chu a him tawk nia sawiin, khawthlang ramten Nuclear ralthuam siam tuma an puhna chu thu dik lo nia a sawi bakah, khawthlang ramte chuan Iran hmasawn tur chu thikin kawng tinrengin, kum 40 chuang an dodal tawh niin a sawi bawk. Iran ram revolution champha lawmna hi eptu lamten nasa takin tihbuai an tum a, mahse sipai leh Police tam tak an duty avangin an duh angin an che thei lo tih Iran Police lal, Esmail Ahmadi Moghaddam chuan a sawi. Champha lawmna-a tel tum, eptu hruaitu Mehdi Karroubi chu rorel lam thlawptu, Basij pawlten an bei a, a fapa pawh an mansak a, he ram President hlui, Iran sawrkar kalphung siam that duhtu, Mohammad Khatami pawh Basij pawl hian an bei bawk a ni. Heti chung hian Iran ram chhung hmun hranga Revolution champha lawmna tibuai tur hian eptuten kawng an zawh lui a, an zinga mi tam tak chu man an ni a, thenkhat chu vawiin vek khan chhuah leh nghal an ni .
————-

Hetianga pun khawmna buatsaih tur tihbuai tuma eptu pawlte ruahmanna siam hi hriain Iran sorkar chuan eptu pawlte hi an inbiak theih loh nan an rama Internet service leh sms hmanga inbiak pawhna a titawp vek a, Google e-mail service, Gmail an tih pawh tihtawp a ni a, tihtawp hlen tum a ni em tih erawh chu hriat a ni lo. Iran rama Gmail hmangtute chuan, kar hmasa atang khan Gmail leh Yahoo e-mail service pawh a muan lutuk avangin an hmang hlei thei tawh lo tih an sawi. Vawiin kha Iran rama Islamic Revolution kum 31 tlin ni a ni a, kum tinin uar takin an lawm thin a ni.
———–

North Korea atanga ralthuam phur nia rin vanga Thailand sawrkarin a man, thlawhna khalhtu leh hnathawk, mi 5 chu an ramah thawn haw thuai an ni dawn. Thailand sawrkar Attorney General sawi danin, heng mi pangate thubuai hi Thai Court-in ngaihtuah chhunzawm tawh lovin, anmahni ram-ah thawn hawn an nih hnuah, Court-in an chungchang hi a rel dawn a, Thailand sawrkarin ralthuam phura a rinhlelhna erawh chu hlih felsak an ni tawh a ni. Heng mi pangate hi Kazakhstan mi 4 leh Belurus mi 1 an ni a, nikum December khan Bangkok thlawhna thumhmuna thlawhna tui an thun laiin rinhlelh thilah Thai Police-ten an man a, he thlawhna-ah hian ralthuam ton 30 man a ni a, vawiin thleng hian he thlawhna thil phurh hi khawia dah tur nge a nih hriat chian theih a ni ta lo a ni. North Korea hian Nuclear ralthuam siam kawngah UN thupek a zawm loh avangin, UN chuan ralthuam a hralh chhuah leh a chawk luh a phal lova, hetianga hrek a ni chung hian, North Korea hian a rukin Iran, Syria leh Burma-ah te ralthuam a hralh ru-in, sum tam tak a la lut kum tin tho a ni.
————-

Somalia-a hel pawl, Al-Shabab mi tam tak chuan, ralthuam nen he ram khawpui, Mogadishu hi an luh chilh mek a, khawpuia cheng, sang tam tak chu an raltlan tawh a ni. Helte leh sawrkar sipaite chu khawpui chhungah hian nasa taka inkap thei maiin an inep mek a, tun dinhmunah hian hel pawl chuan, Magadishu khawpui chhung hmun zau tak leh an ram chhim lam zau tak an thunun tawh niin BCC chuan a sawi. He rama sawrkar lailawk thlawptu, African Union Peace Keeping Force-te pawhin hel ho hi an ep bawk a, Mogadishu khawpuiah hian hel leh sawrkar sipaite an inkap deuh reng a, tualchhung mi tam tak an thih phah tawh a ni
———-

Afghanistan-a lei mina thi, ruang 150 chuang lak chhuah tawh a ni tih chhanchhuahna hna thawktuten an sawi. Lei minna hmun hi Soviet Union-in he ram a awp laia a siam, Salang leiverh leh a chheh velah a ni a, vur nasa taka a sur vanga lei min hian kilometre 2.6 zeta thui a awh a ni. Kabul leh Salang inkar enkawltu, General Mohammad Rajab chuan hliamte chu damdawi ina enkawl turin sipai leh mi tlawmngaiten kawng thui takah ke-a kalin an inpuak chhawk thin a ni a ti a, Parwan Province Governor, Basir Salangi chuan, lei min hi lirthei kaltlang theiha then fai a ni tawh na a, leimin leh mai tur leh vur pai thli vawt na tak tleh leh mai tura rin a nih vangin, he lai kawng hi a la him lo hle tih a sawi. He lei mina dama chhanchhuahte hi an chuanna Bus chawpa lei minin a hnawl, Bus chhunga la awmte an ni a, leimin hian Bus pahnih leh Car engemawzat a hnawl a, heng zinga a tam zawk hi chu kawr thuk takah a la tang a, lak chhuah ngaihna a van hmel hle niin chhanchhuahna hna thawktuten an sawi. Afghan Defence Minister, Abdul Rahim Wardak chuan, lei min avang hian mi 3,000 vel chuanna lirthei engemawzat, tlang feet 11,000 vela sangah an la tangkhang tih a sawi
———–

United States-a Chicago-ah pawh thlasik vur tla chu khawlaiah inchi 7 atanga inchi 12 vela chhah a ni a, hei vang hian nimin khan an airport atanga thlawk chhuak tur, thlawhna 600 vel chu a thlawk chhuak thei lo a ni. O’Hare leh Midway airport atanga thlawhna thlawk chhuak thenkhat chu rei tak tak tihkhawtlai a ni bawk a, thlawhna lam thuneitute chuan, zin turte chu airport an pan hmain an thlawhna dinhmun fiah hmasa turin an chah a ni.
————–

British court chuan India hmeichhe pakhat, kum 45 mi, Lakhvir Singh chu a ngaihzawng hlui, a ei tura tur telha hrai hlumah ngaiin thiam loh a chantir a, nikum January thla khan kum 39 mi, Lakhvinder Cheema chu hetia chaw an ei dun hnu rei vak lovah a thih bakah a bialnu thar, hemi tuma chaw ei ve, kum 21 mi, Gurjeet Choongh pawh a pum a na vak a ni. Sky News-in CCTV thlalak a tihchhuahah chuan Cheema leh Choongh, an chaw eina in atanga na tuara zawn chhuah an nih lai leh, car-a hlan luh an nih lai thlalak a lang a, thubuai siamsaktu, Edward Brown chuan Singh hian a bialpa hlui, Cheema hi Choongh nena inneih thuai an tum avangin thikin turin a hrai ta niin a sawi. An thil ei thenkhat, mi thiamten an endiknaah pawh tur zungzam hi hmuh a ni a, Choongh-i hi chuan tlemte chauh a ei avangin a thihpui lova, Cheema hi chuan chaw hi khawrh hnih a ei avangin a thih phah ta niin an sawi.