www.zonet.in

RAM CHHUNG CHANCHIN THAR

Lemchang thiam lar, Shah Rukh Khan-a film thar, “My name is Khan” tih dodaltu Shiv Sena pawl mi 1,000 chuang, Mumbai Police-ten an man. Shah Rukh Khan-a, Pakistan Cricket khel thiamte tan zawnga a tawng avanga lungawi lo, Shiv Sena mite hian a Film thar chu Mumbai-ah chhuah an remti lo tih puangin, he film hi tlangzarh a nih loh nan hmun hrang hrangah buaina an siam a, an zinga mi 1,023 chu Police-ten an man tawh a, buaina chawk chhuak theia rin, mi dang 955 pawh an man bawk. Mumbai khawpuia Cinema Hall 63-te chu uluk taka ven a ni a, hemi rual hian Mumbai khaw chhunga buaina chhuak thei veng turin Police tam zawk rawih belh an ni bawk. Shiv Sena chuan, naktip, tun thla ni 12-a tlangzarh tura tih, Shah Rukh Khan-a film thar hi,Shah Rukh Khan-a’n Indian Premier League player zinga Pakistan mite tan zawnga a thusawiah thupha a chawi hma chuan, Mumbai-ah chhuah an remti dawn lo tih an sawi a, hetih lai hian he film siamtu, Karan Johar chuan Mumbai Police Commissioner, D Sivanandhan-a vawiin khan kawmin, a film siam tlangzarh a nih huna venhimna ruahman dan tur a sawipui a ni. SHiv Sena mite pawi khawih hlauvin Cinema Hall neitute pawhin he film thar hi chhuah turin an hauh ngam tawh lova, PVR leh Cinemax te pawhin an hauh tawhna pawh an sut leh a, cinema hall dang neitute pawhin chhuah rih loh mai an rilruk hlawm a ni.Kashmir-a kar kal taa tleirawl kum 16 mi thattu zingah BSF mi pakhat a tel tih BSF hotuten an sawi a, he inthahna hi tihpalh thil niin an sawi thung. BSF hotute chuan, tleirawl Zahid Farooq Shah thattu hi Police hnenah an hlan tawh a, Police-te chuan he pa hi tualthah thubuai siamsak a ni dawn tih an sawi. He tleirawl hi kar kal ta Zirtawpni khan Nishat-ah kah hlum a ni a, a kap hlumtute chuanna motor-ah BSF chhinchhiahna a awm tih mita hmututen an sawi avangin Police-ten thil an chhui zui nghal a, hetih lai hian Jammu and Kashmir CM, Omar Abdullah pawhin, he tualthahna chungchang hi, Prime Minister Manmohan Singh-a hova Internal Security Conference-ah a sawi chhuak a, hemi avang hian tualthattu chhui hna pawh a chak zual ta a ni. Puan tawh angin, he tleirawl tualthihna avang hian, mipui lungawi lo chuan Inrinni kal ta khan Srinagar leh khaw dang thenkhatah kawng zawhin, buaina an siam a ni.
——-

Ei leh bar lam chi man a san chak vangin BJP chuan, New Delhi-ah vawiin khan lungawi lohna a au chhuahpui. Jantar Mantar-ah BJP mi leh sa tam tak pung khawmin, thil man to chak lutuk avanga an lungawi lohna thu, Flag leh Poster-ah te ziakin an keng chhuak a, nitin khawsakna mamawh thil hrang hrang man, tun hnaia a to chak lutuk chhanah sawrkar laipui chu a mawhphurtu a ni tih an aupui a, he punkhawmnaah hian an hruaitu, Nitin Gadkari leh Sushma Swaraj-ten thu an sawi a, pung khawm zingah hian an Party hruaitu hlun, Murli Manohar Joshi, Ananth Kumar leh Vijay Goel-te pawh an tel a ni.
———-

PM hlui, Rajiv Gandhi-a thattu zinga mi, Nalini Sriharan-i’n a tan hun tlak kher lova chhuah a dilna ngaihtuahtu Madras High Court chuan, he thu hi hun danga ngaihtuah chhunzawmah a dah rih. Nalini Sriharan hian a hrisel lohna chhuanlamin, a tan hun tura bituk tlak kher lova chhuah a dil a, Tamil Nadu Sawrkara Advisory Committee chuan, a ngenna tihhlawhtlin rawtna pawh state sawrkarah a thlen tawh a, mahse Subramanian Swamy-a’n a hun hmaa Nalini chhuah rawtna hi High Court-ah a khing let ta a ni. Tamil Nadu sawrkarin Advisory Committee hian sawrkarah a report a la thehlut lo tih leh, a thehluh hnuah Nalini hriselna dinhmun hi mithiamten an enfiah leh phawt a ngai dawn tih Court a hrilh hnuah, Court chuan Nalini ngenna chu thla thar ni 19-a ngaihtuah chhunzawm leh atan a dah ta rih a ni. Nalini chuan, a ngenna hi Court-a ngaihtuah a nih leh hunah ukil ruai lova amah in-Ukil chawp a dil a, a hrisel loh vanga ngaihdam a dilna hnawl tumna chu amah ngeiin beih let a dil a ni.
———–

Petroleum Ministry-in tuialhthei man khuahkhirhna tihtawp leh a man tihsan a rawtna chu Union Cabinet-in naktukah a ngaihtuah rin a ni. Petrol, Diesel, ei rawngbawlna Gas leh khawnvartui man san hret rawtna leh sawrkarin tuialhthei man a khuahkhirhna tihtawp rawtna chungchang hi, Union Cabinet-in a ngaihtuah hnuah Petroleum Minister, Murli Deora chuan UPA-a tel Party hrang hrangte chu he rawtna hi a sawipui tawh a, vawiin khan DMK hruaitu, Telecom Minister, A Raja a kawm a, Trinamool Congress hruaitu, Railway Minister, Mamata Banerjee pawh phone-a bia-in, tuialhthei man tihsan loh theih loh a nih chhan leh a man khuahkhirh chhunzawm reng theih a nih dawn loh thu a hrilh a, heng hruaitu pahnihte hian Deora rawtna chu an pawmpui mai thei rih lo nia hriat a ni. Petroleum Ministry chuan, Petrol litre khat man, Rs 4.72-a tihsan te, Diesel litre khat man, Rs 2.33-a tihsan te, khawnvartui litre khat man, Re 1 tihsan te leh Gas Cylinder khat man, Rs 100/- a tihsan te a rawt a, Gas bik hi UPA-a tel Party dangte rawtna angin Rs 25 chauhva tihsan a ni zawk mai thei niin NDTV chuan a sawi
————

DoNER Minister, Bijoy Krishna Handique chuan hmarchhak State Chief Minister-te chu an state hmasawnna tura sawrkar laipuiin sum a pekte dik taka hmang turin a chah. North Eastern Council (NEC) Review meeting, Gauhati-a nimina neihah he thu hi sawiin Handique chuan, hmasawnna hnathawhna a sum hman dan mumal taka hriat a nih theih nan, utilization certificate fel tak siam turin CM-te chu a ngen a, Utilization Certificate mumal a awm loh vangin, sum hmuh belh tur a khawtlai phah thin tih a hrilh bawk. Handique chuan, hmarchhak State hrang hrangten, hmasawnna hnathawh chi hrang 271 atan Utilization Certificate an siam lo tih sawiin, heng sum hman dan chhinchhiah mumal loh zawng zawng hi cheng vaibelchhe 250 chuang a tling tih a sawi.
———-

Vur leh ruah sur nasa avanga lei minin Jammu leh Srinagar inkar motor kawngpui, ni nga chhung a hnawh ping ta a, lirthei 1,900 vel chu he kawngpui hmun hrang hrangah hian an tangkhang mek tih Police-ten an sawi. Jammu leh Kashmir inkar, National Highway A bakah hian he state-a District hrang hrang inkal pawhna pawh lei minin a hnawh ping nual bawk a, Vur a sur nasat tawlh tawlh avangin, lei min leh vur tawlh vanga harsatna hi engtikah nge a kian ang tih hriat a har rih hle a ni. Kashmir phairuam, lirtheia kal pawhna awm chhun kawngpuia lei verh sei tak, Jawahar Tunnel leh a chhehvel khuate pawh vur tla nasa avanga harsatna dang tawk thei dinhmunah an ding mek niin khaw chin thlirtute chuan an sawi.
——–

Maoist hel nia rinten, tukin dar 2 khan Orissa-ah rel kawng an bomb chhiat vangin, bungraw phur Rel Wagon pariat a chesual a, thi leh hliam erawh chu an awm lo. Bisra leh Bhalulata rel chawlhhmun inkara rel kawng bomb chhiat a nih avang hian Mumbai leh Howrah inkara Rel tlan pawh a khaihlak phah nasa hle a ni. Ni hnih kal ta mai khan Bhalulata leh Jareikela inkara rel kawng pawh Maoist-ho hian an bomb chhia a, Rel Wagon pahnih a chetsual phah tawh a ni.
———–

NSCN (Isak-Muivah) General Secy, Thuingaleng Muivah-a’n April thlaa sorkar laipui leh an pawl aiawhte inbiaknaah tel a remti tih Union Home Secretary, G.K. Pillai-a’n a sawi a, inbiakna hi kum khat thelh, chhunzawm lohvin a awm tawh tih a sawi bawk. Pu Pillai-a chuan he inbiaknaa sorkar laipui aiawh tur pawh tun kar tawp lamah hian tihfel a nih tur thu a sawi a, a hmaa kum 10 chhung lai palai atana hman, Union Home Secy hlui, K. Padmanabhaiah-a hun chu a tawp hnuah sorkar aiawhte leh NSCN(I-M) hruaitute hi mi dang tel lovin an inbia a ni. Sorkar laipui sawmna angin NSCN (IM) hruaitute hian April ni 1 atanga ni 10 thleng, New Delhi-a cham an remti tih Home Secy chuan a sawi bawk.
————-

Valentine’s Day a hnaih tawh avangin, ram chhung hmun hrang hrangah ngaihzawngte thawn tur Card leh thil dang a hralh a tla hle a, hemi rual hian, Condom leh nau pai theih lohna damdawi pawh hun dang aiin a kal chak bawk. Tun thla ni 14-a lo thleng tur, Valentine’s day urlawk a nih dan chhuitu, 24X7 online retail service-a Yes2condom Director Shishir Miglani chuan, Valentine’s day vuakvetah hian nau pai theih lohna hmanraw hrang hrangte chu hun dang aiin zaa 10 atanga 20 velin a kal chak tih a sawi a, thil an zir chianna-ah chuan, mipate leh hmeichhia pawhin Condom hman nachang an hre tawh hle niin a sawi bawk. Friends Medicos neitu, Gurbachan Singh chuan, tun hma ai chuan, nau pai theih lohna hmanraw hrang hrangte hi hralh a kal tawh hle a, mahse Valentine’s day dawn hapta-ah chuan hun dang aiin a sang filawr a ni a ti bawk.