www.zonet.in

TUALCHHUNG CHANCHIN THAR

Federation of Mizoram Govt. School Teachers chuan SSA hotuten zirlaibu sem tlai chungchanga mawhphurtua zirtirtute an puh chu thu dik lo niin an sawi. Mac Donald Hill-a Teachers’ Inn-a chanchinbu mite, vawiina an kawmnaah an pawl President, Pu Lalrammawia chuan nikum October thla-a State Project Director Office-a an thutkhawmnaah kum hluia naupang awm zat mila zirlaibu, a thlawna sem turte hi kumin January ni 11 leh 13 inkarah peih fela lak theiha siam tur tih a ni a, hemi hnu hian SSA OSD, DPC ni bawk chuan amaha thu dang nei lehin School-a enrollment hmuh hunah sem ni se tiin a sawi leh a, School report pawh Village Education Committee-ten countersign se, chu chu Block Resource Centre-a miten endik leh vek se a ti bawk a, tuna lehkhabu sem a nih hian he ruahmanna siam hi tuman an zawm chuang lo niin a sawi bawk. Pu Lalrammawia chuan lehkhabu sem tlai chhanah zirtirtute puh an ni chu an ngaihthiam loh thu sawiin, Mizoram School hrang hranga Headmaster zawng zawngte chu tun thla ni 9 aia tlai lovah an School theuhva lehkhabu, a thlawna sem dan report anmahni pe turin a ngen a, hemi hma lama Federation of Mizoram Govt. School Teachers-in thu tlukna a lo siam tawh chu an dinna a la ni reng tih sawiin, chungte chu SSA-ah report pek tawh lohte, a thlawna sem tur, zirlaibute chu School-ah ngei dah tura a semtute an phutna leh, SSA hnuaia training-ah kal tawh lo tura zirtirtute an ngenna te a ni. Pu Lalrammawia chuan nimin tlai dar 3 thlenga zirlaibu la thlen lohna report an dawn a tarlang bawk a, chungte chu Mamit District pumpui, Buarpui, Tawipui, South Vanlaiphai leh Lunglei South-te a ni a ti a, sem tawhna hmunah pawh zirlaibu hi a kim lo nasa em em a, pawl 4 Mathematics phei chu School tin deuhthawah an indaih lo niin a sawi. Federation of Mizoram Govt. School Teachers President chuan OSD leh Aizawl District Project Corrdinator hna chelhtu officer chuan hna tam tak a chelh tih sawiin, hemi avang hian a hna hi a tlin lo niin a sawi a, thlak a phut bawk a ni. Naupang chaw chhun, Mid Day Meal buatsaih chungchangah pawh SSA chuan zirtirtute rinhlelhna a nei nia sawiin SSA chu sorkarin Agency-ah hmang tawh lo se a duh thu a sawi a, an thil phut chu tun thla chhunga tihhlawhtlin a nih loh chuan Mid Day Meal chungchangah SSA chu thawhpui tawh loh an tum tih a sawi bawk. Zawhna chhangin Pu Lalrammawia chuan School tan hnua naupang zirlaibu nei lote awm tlei nan School Education thuneituten sports neihpui tura an tih chu School naupang an tam loh avangin hun rei tak chhung neihpui theih a ni dawn chuang lo niin a sawi bawk.

Mizoramin phai lam atanga kawlphetha a chawk luhna ber, Kopili leh Khandong Hydel Project, a ruala tun thla ni 1 atanga khar a nih avangin zan lama Mizoramin kawlphetha a hmuh theih zat sang ber chu megawatt 43 a ni a, hei hi zan dar 8 atanga dar 10 thleng tihhniam thlak zel a ni a, zan dar 8 leh dar 10 inkara Mizoramin kawlphetha a hmuh theih zat chu megawatt 20 leh 30 inkar vel chauh a ni thin a ni. Power and Electricity Department hotute hnen atanga kan Corr. thu dawn danin, zan lama kawlphetha mamawh san lai bera mamawh zat chu megawatt 65 vel a ni a, hetih laia hmuh theih chin sang ber megawatt 43-a bithliah a nih tak avang leh hei pawh hi zan rei lamah megawatt 20 vel thlenga tihhniam a nih avangin a inchhawka veng hrang hrang leh khaw hrang hrangte eng pek chu pumpelhtheih loh a ni ta a ni. Hetih lai hian mamawh phuhruk turin kawlphetha megawatt 22 pe chhuak thei Bairabi-a Thermal Plant pawh hman tum mek a ni a, sum senso tur chu sang hle mah se, Power Department rawtna angin Heavy Furnace Oil (HFO) leina tur sum chu sorkarin a sanction tawh a, tunah hian buaipui zui mek a ni. Kopili leh Khandong Hydel Project-te khar a nih chhan hi Water Conductor System siam that nan leh Surge Shaft Gate siam nan a ni a, May ni 2-ah zawh fel beisei a ni. Kan corr. zawhna dang chhangin Power Department hotute chuan, tunah hian Mizorama Mini Hydel Project leh Micro Hydel Project hrang hrang atangin kawlphetha siam chhuah a awm tawh lova, heng zinga lian ber, Teirei Hydel Project pawhin chhun lama tui khawl hmangin zan lamah an chhehvela mite hman khawp kawlphetha tlemte a pe chhuak thei chauh a ni.

Hetih lai hian Aizawl Water Supply Division chuan tui pump an la chhunzawm thei zel a, nizan dar 11 leh minute 20 atang khan Power Department-in kawlphetha an pek theih avangin Phase II khawl hmangin zing dar 6 leh minute 25 thleng an pump a, hemi hnu hian Diesel Engine hmangin vawiin chawhma dar 11 thleng pump leh a ni a, hemi hnu pawh hian kawlphetha hmang bawkin pump zui leh a ni. Hetih chhung hian Phase I pawh hman tel ve a ni bawk tih PHE hotute chuan an sawi.
———–

Mizo Zirlai Pawl (MZP) chuan Mizoram Univerity hnuaia zirlaite Exam hun Mizoram Public Service Commission-in hna lakna tura Competitive Exam hun a buatsaih inrual thin chu tha lo an tih thu sawiin, MPSC hotute chu University Exam laia hna lakna Exam buatsaih lo turin an ngen a, vawiina MZP Executive Committee thu khawm chuan hemi chungchang bakah hian Mizoramah CBSE hnuaia Compartmental Exam-na Centre a awm ve loh avanga Silchar-a kal ngai thin chu a tawp theih nan Mizoram Exam Centre-a siam tul an tih thu an sawi bawk. He MZP hruaitute thutkhawmna, an President, Pu VL Kroshnehzova kaihhruai-ah hian kum 1966-a Zoram buai tirha Mizorama bomb thlak ni, March ni 5 chu kum dang a an lo hman tawh dan angin ‘Zoram ni’ atan hman leh ni se tih an rel bawk a ni.
———-

Information & Public Relations Minister, Pu Zodintluanga chuan Congress sorkarin kih hnawk thian chungin chak takin hna a thawk a ni, a ti. He thu hi sorkar-in Mizoram Journalist Welfare Fund, changtlung zawka a siamsak lawmna, MJA-in Aizawl Press Club-a buatsaiha a sawi a ni a, Pu Zodintluanga chuan mi tuten emaw Congress sorkar chu kih hnawk ringawt buaipuia hna thawk lova an puhna chu a dik lo tih sawiin, kihhnawk thian chungin chak takin hna a thawk niin a sawi. Minister chuan, MNF sorkar khan Tuirial Hydel Project kha tichingpen lo se chuan tunah hian Mizoram chuan hnianghnar takin kawlphetha a nei tawh ang tih a sawi a, Greater Aizawl Water Supply Scheme, Phase II pawh kha a nih dan tur angin MNF sorkar khan ti sela chuan, tunah hian tui a harsa lo ang a ti bawk. Minister chuan Congress Party-in inthlan dawna an manifesto-a an dah, MJA Welfare Fund, changtlung zawka sorkar-in a siam thei ta chu lawmawm a tih thu sawiin, thuthar thehdarhtute chu mipuite kaihruaitu an nih angin a tha lo zawnga mipuite rilru chawk tho thei zawnga thu ziak lo turin a chah a ni. He inkhawm hi MJA President, Pu K.Sapdanga’n a kaihruai a, MJA General Secretary, Pu Zonunsanga Khiangte chuan sorkar-in MJA Welfare Fund, changtlung zawka a siam chu an lawm hle tih sawiin, tun hma chuan he Fund hian an member boral te inralna chauh a huam avanga sorkar-a siam danglam an dil tawh thin dante, Mizoram sorkarin kumin January ni 27 khan famkim zawka siam thain ‘Natna khirhkhan tuar leh khuarel chhiatna avanga bungraw chan leh tawh sual tawh avanga harsatna tawkte chhawmdawlna’ thlenga huam thei tawh turin a siam tih a sawi. He inkhawmah hian I&PR Director, Pu Jim K.Chozah pawhin thu a sawi a, MJA hian an pawl din a nih atangin member 9 a sun tawh a ni.
———-

Mizoram sorkara Principal Secretary, Agriculture changtu Pi. L. Tochhawngi’n Mizorama lei tihthatna hlo, chemical fertilizer lak luh dan a hrilhfiah. A office-a thuthar lakhawmtute, vawiina a kawmnaah Pi L. Tochhawng chuan lei tih thatna hlo, ram danga hralh chhuah chu khap tlat a ni a ti a, Mizorama lei tihthatna hlo lak luh chungchangah hian Fertilizer Control Order, 1985 hman a ni a, he dan hmang tur hian Agriculture Department chu hun rei tak chu Nodal Department-ah hman a ni a, amaherawhchu Nodal Department hnathawh dan hi kum 1999 khan tihdanglama, a lak luh leh hralh chhuah theihna pawh Dealer-te hnenah pek a ni a, heti chung hian Urea erawh chu dan hmanga khuahkhirh zui zel a ni a, Chemical Fertilizer dang, DAP, MOP leh NPK mixture-te erawh chu mamawh dan azira duh zat zat lak luh theih a ni a ti bawk.
——–

Sap tawng inzirtir dan zirna, Awareness Programme in English Language Teaching chu vawiin khan SCERT-in an Conference Hall-ah High School Headmaster-te tan a buatsaih a, School Education Minister, Pu Lalsawta’n a hmanpui a ni. Hetiang programme hi Primary leh Middle School Headmaster-te tan pawh buatsaih a ni tawh a, tuna High School Headmaster-te tana buatsaih hi SCERT Director, Pi Malsawmthangi’n a kaihruai a, Minister chuan hmasawnna hi a hun a lo thlen chuan dan theih a ni lova, tunlai zirtirtu chu sap tawng thiam mamawhna hunah an awm tawh miau avangin saptawng thiam pawimawhna hi hlamchhiah theih a ni lo, a ti a, tumna tak tak nen chuan Mizo-te hian sap tawng thiamah state dangte an khum theiin an chungnung zawk thei a ni, a ti bawk. SCERT hian zirna ina sap tawng zirna tihhmasawn nan kum 1985 khan District Resource Centre 1 dinin bul a tan a, tunah hian Serchhip, Lunglei leh Kolasib Resource Centre-ah kum 5 chhung atana an tih turte zawh a ni tawh a, Champhai leh Mamit-ah kalpui mek a ni a, nakkumah Saiha-ah tih ve tum a ni bawk. SCERT enpuina hnuaiah Mizoram-a Primary School 31 leh Middle School 14-te chu English Medium-a leh a ni tawh a ni. Minister hian Pawl 8 English zirtirtute tana Teachers’ Handbook chu a tlangzarh nghal a ni.
————

Mizoram Social Defence & Rehabilitation Board leh National Institute of Social Defence tangkawp buatsaih, HIV/Aids laka inven dan tih thupui hmanga Worshop, ni hnih awh chu vawiin khan Chaltlanga Mizoram Social Defence & Rehabilitation Board Office-ah tan a ni a, MSD & RB CEO, Pi Lalparmawii chuan HIV/Aids darh zel tur venna kanwga tlawmngai pawlte inpekna chu lawmawm a tih thu sawiin, hlawkna um lo va mahni sum senga ram leh hnam tana an hnathawhna-ah tan la zel turin a fuih a ni. He Workshop-ah hian Dr.C.Lalhrekima leh Dr.Chawnglungmuana-te’n ruihhlo leh HIV/AIDS chungchangaa hriat tur pawimawh leh khawtlang tana tangkaipui theih turte an zirtir a ni.
————–

Nimin atang khan Vairengte-ah Assam Reginment tur sipai lak tan a ni. Vairengte-a kan Corr. hnen atanga thu dawn danin, hetah hian Zoram hmun hrang hrang atanga sipai tang duh mi 600 chuang an intlar a, nimin khan Vairengte YMA field-ah physical fitness test neiin tlan leh zuan-ah endik an ni a, heta tling mi 210-te chu vawiin khan an hriselna dinhmun endik leh a ni. He sipai laknaah hian Aizawla Recruiting Centre leh Silchar-a Recruiting Centre-a officer-ten sipai turte hi an la a, Vairengte-a Counter Insurgency and Jungle Warfare School-a officer-te pawhin an tawiawm a ni. Recruiting Officer 2-te hnen atanga kan corr. thu dawn danin, tun tuma sipai laknaah hian sipai clerk tur, pawl 12 pass chin intlar an awm loh avangin he hna hi hnam dangten an chan mai a ngai dawn a, Mizo thalai lehkhathiamte chu sipai clerk hna tha tak thawk tura intlar ve thin tawh turin an ngen a ni. Recruiting Officer-te chuan tun tuma sipai lakna-a Vairengte khawtlang hruaitute leh Department hrang hrangten an mamawh pe-a tha taka an tanpui chungchangah lawmthu an sawi bawk.
————

Aizawl District Magistrate, Pu C. Thanchhuma chuan Aizawl District huam chhungah ram hal khapna thupek a chhuah. Cr. PC Section 144-na tlawh chhana he thupek a chhuahah hian lo, leipui leh huan hal turte pawhin February thla chhung ngeiin an hal tur a ni tih a hriattir a, an lo, huan leh leipui chin chauh lo chu ram dang an tikang tur a ni lova, mumal taka mei lam sial veka lo hal tura hrilhin, lo leh huan an hal dawnin mihring leh bungraw tana hauhawm lo a ni tih finfiah hmasa vek tur in a chah a, Inthlahdah leh ngaihsam vanga kangmei chhuak thei pumpelh nan mi zawng zawng electric, Gas leh thuk enkawl tha turin a ngen bawk a ni. He thupek hi thla 2 chhung hman tura nimina chhuah a ni.
————

Indira Gandhi National Open University (IGNOU), Aizawl Regional Centre NSS Volunteer-ten vawiin khan Aizawl Civil Hospital-a damlote tan thisen Unit 7 an pe.Thisen petute hi hmeichhe 5 leh mipa 2 an ni. Thisen hi IGNOU Silver Jubilee lawmna puala pek a ni.
———-

State Transport Department chuan naktip, tun thla ni 6, Inrinni atang khian Aizawl leh Sailulak inkarah Bus a tlan dan pangngaiin a tlantir tan leh dawn a, he Bus hi zing dar 6-ah Aizawl atangin a chhuak thin dawn a ni.
———

Red Ribbon Inter Village Football Tournament chu khelmual hrang hrangah khelh chhunzawm a ni a, vawiin khan Match 16-ah goal 63 a lut a, penalty shoot out-a chak zawk zawn tum 3 a awm. Inkhelh result hetiang hi a ni :

Group I, Republic Veng Field

Saitual        1 – 5    Khawzawl II
Darlawn     0 – 0     Ramhlun Venglai
      (Tie break 5 – 3)
Govt. Complex 1 – 3 Samlukhai
Tuikual South 1 – 1 College Veng
(Tie break 4 – 2)

Group II, 3rd MAP Ground, Mualpui

Chawnpui 2 – 3 Lenchim
Durtlang North 1 – 1 Dawrpui Vengthar
(Tie break 9 –
Hliappui 1 – 3 Aibawk
Keifang 5 – 1 Chawngtlai

Group III, Ramhlun Sports Complex

Mission VT 5 – 1 Nursery
Nghalchawm 4 – 1 Kelsih
Republic Veng 4 – 0 Suangpuilawn
Sateek 0 – 2 Salem veng

Group IV, YMA Field, Vaivakawn

Thenzawl 4 – 1 Bungkawn
Armed Veng 5 – 0 Ramhlun Vengthar
Thenzawl North 1 – 3 Zotlang
Tualte 2 – 1 Saron Veng

Inkhel hi naktuk-ah heng khelmual 4-ahte hian a hun pangngai-ah chhunzawm a ni ang a, Group III, Ramhlun Sports Complex-a khel mekte hi kar leh Thawhtanni atangin Aizawl Lammual-ah an insawn ang.
———–

Vawiin khan Aizawl khawpui chu a lum lai berin celsius degree 24.2 a ni a, a vawh lai berin degree 12.4 a ni. Naktuk Zirtawpni-ah chuan Aizawl-ah khua a tha ang a. A lum lai berin Celsius degree 25 vel, a vawh lai berin degree 10 vel a nih rin a ni.