www.zonet.in

TUALCHHUNG CHANCHIN THAR

Thenzawl-a NGO Coordination Committee-in Thenzawl Police Training Centre atanga 4th IR Battalion mite lak chhuah an remtih loh chungchangah DGP, Pu Lalrokhuma Pachuau-in thil awm dan a sawi fiah. DGP chuan 4th IR Battalion Hqrs tura ruahmanna lo siam tawh chu Saiha District-a Maubawk a ni a, mahse hetah hian an awmna tur In leh thil dang sak a la nih loh avangin IR Battalion mite hi Thenzawl PTC hmunah awmtir an ni a, 3rd IR Battalion, Mamit Luangpawl-a awm thinte chu Central sorkar thupek angin Assama Udalgiri leh Darrang District-ah dan leh thupek keng kawh tura tirh an nih tak avangin Mamit District-a dan leh thupek kenkawh kawnga hman atan 4th IR Battalion mite hi lak chhuah tur an ni a, hemi chhung hian Thenzawl PTC-a Police hmun hma leh In-te veng turin 5th IR Battalion mi 30 vel, Inspector pakhat hovin Thenzawlah tirh an ni ang a, Police inthlak avang hian Thenzawla Police awm chu an kiam chuang vak lo ang a ti a, Police te chu dan leh thupek kenkawh a tulna hmun apianga sawn kual theih reng an ni tih mipuiten an hriat tlan a ngai a ni a ti bawk. Hemi hma lam, nimin khan Serchhip DC Pu H. Darzika hova Officer ho thukhawm chuan Thenzawl NGO ten tun thla ni 4 leh ni 5-a bandh huaihawt an tum chungchang an sawi hova, engti kawng maha Bandh siam chu an remtih dawn loh thu sawiin, Thenzawl NGO Coordination Committee chu thil awm dan leh sorkar thil tumte hrilhfiah nise, hemi rual hian bandh neih an tum chu thulh tura ngen ni se an ti a ni. He inkhawmah hian Serchhip District SP, Pu John Zothansanga, Thenzawl SDO Civil, Pu H. Dolianbuaia leh mi pawimawh dangte an tel a ni. Hemi chungchangah hian zanin hian Thenzawl NGO Coordination Committee chu an thukhawm leh dawn nia thu dawn a ni.Mizorama Grape Wine zawrh chu RIPANS-a Pharmacy Department-in an enfiah a, Tartaric Acid chu duh aiin a tam niin an ngai a, pum ruaka in chuan pum tan a tha lo thei dawn niin an ngai. He Grape Wine enfiahna result atanga kan corr. zawhna chhangin Asst. Drugs Controller, Pu Lalsawma Pachuau chuan Mizorama Grape Wine siam an enfiahah hian Tartaric Acid za zela 10.7 an hmuh chu sang lutuk leh mihring hriselna atana tha lo thei nia ngaih chin a ni tih a sawi a, amaherawhchu Acid zinga mihring tana hlauhawm ber, Acetic Acid erawh chu a tam lo niin a sawi a, hemi bakah hian Grape Wine up nan plastic hman a nih chuan plastic atanga thil tha lo chhuak thei chu mihring hriselna atan a hlauhawm avangin plastic bur hmanga um lo turin a siamtute a ngen a, zu up-na atana tha ber chu thing atanga bur siam a ni a ti bawk. RIPANS-in Mizoram Grape Wine an enfiahnaah hian Alcohol za zela 9 a awm tihte, Tartaric Acid za zela 10.7 leh Citric Acid za zela 3.04 a awm tihte tarlan a ni.
————

Greater Aizawl Water Supply Scheme Phase-II contractor, a hna tihtawpsak tak, Pu Philip Vanlalmawia John-an Gauhati High Court-a lungawi loh thu a thlen chu nimin khan Court chuan a ngaihtuah a, PHE Department chu chawlhkar 6 chhunga an chhanna thehlut ve turin a hriattir. Hemi chungchanga PHE Department hotute hnen atanga kan Corr. thu dawn danin contractor ban tak-in ban a nihna sut leh tura High Court-a a khinna chungchangah hian Court chuan sorkar lam chhanna a hmuh hnuah thubuai a tlin leh tlin loh a la ngaihtuah dawn chauh a ni. Hetih lai hian PHE Department chuan Greater Aizawl Water Supply Scheme Phase-II-a contractor hna zawh fel loh la awmte chu a theih dan danin an thawh chhunzawm zel a, Lawipu bula pipe lian la phum lohna metre 400 velah pipe lian phumna tur laiin, tun thleng hian metre 170 vela thui pipe an zawm zo tawh a, a bak pawh thawh zui chhoh zel an tum a ni. PHE Department hotute sawi danin Phase-II Project-in Tlawng atanga tui a dawt ve-na tur, Jack well hmun tur pawh Tlawng luia Serlui chhuah chhakah siam mek a ni a, Serlui kanna tur, RCC lei dawh turin a ban phun mek a ni. Hemi bakah hian Serlui chhuah chhak lama tui dawtna tur khuah nan weir pawh siam a ni a, he weir siam tur atang hian Phase-II-in tui a dawtna tur khawl lian leh tui chhek khawlna siam a la ni dawn a ni. Hemi bakah PHE Department chuan Dihmunzawla Pump House-a tui pump khawl, kawlphetha hmang chi pakhat dang la awm chu bun felin an en chhin leh tawh bawk a ni. Zawhna chhangin Department hotute chuan tunlai hian power hmuh that loh avangin tui pump lamah harsatna an tawk tih an sawi bawk. Puan tawh thin angin Greater Aizawl Water Supply Scheme Phase-II hi kum 2007 May ni 19-a hawn a nih khan Tlawng lui atanga tui a dawtna tur khawl bun a nih loh bakah a dawt tur tuikhuah siam a ni lova, hemi bakah hian tui kalna tur pipe lian phum hna pawh metre 400 vela thui zawh a la ni lova, Phase-I tui pump sa leh pipe tawmin khawl pakhat hmangin Tuikhuahtlang-ah tui pump chhoh a ni.
———–

Directorate of Health Services hnuaia Drugs Inspector-te chuan, nimin tlai khan Aizawl Chanmari Venga Siloam Medical Centre atangin ram dang siam damdawi chi nga an man. Assistant Drugs Controller, Pu Lalsawma Pachuau hnen atanga Zonet thu dawn danin, heng damdawi an mante hi a man zat a inziak lo a, a ei dan tur engkim, tawng dang daiha a inziah avangin a chawhtu, Pu Biakthanga pawhin a hre thei lova, a risk a sang hle a ni a ti. Damdawi mante hi Deca (Fluphenazin Decanoate) 25mg, Atlantic Laboratories Company Ltd. Bangkok, Thailand siam ample 11, NOXA 20 (Piroxicam) 20 mg capsule 1,060 Krungdheb Pharmacy Ltd. Bangkok, Thailand siam, Malaria damdawi atana an hman thin Atem (Artemether injection) Kunning Pharmaceuticals Company, China siam ampule 420 lehMalaria damdawi atana hralh chhuah tho, Artesunate 50mg mum 1,080 a ni a, he damdawi hi AA Medical Products Ltd. Mekophar, Vietnam siam a ni. Hengte bakah hian Malaria damdawi tho, Artemeter 50 mg mum 360 pawh an man a, hei hi Kunning Pharmaceuticals Company, China siam a ni thung a, heng bakah hian eng damdawi nge hriat loh, a dip, packet 22 leh Sai Mirra Innopharma Pvt. Ltd., Chennai siam, Liv-up Complex mum 10 an man bawk a ni. Pu Lalsawma chuan heng an damdawi man hi licence nei lo a nih thu sawiin, a zuartute hi chuan damdawi zawrh phalna, licence an nei a, mahse zawrh theih loh damdawi an zawrh avang hian engtia tih tur nge a hriat rih loh thu a sawi. India ram hi khawvelah damdawi siam chhuak tam lama pali-na a ni a, India siamte hi ram dang siam aia a that lohna a awm tih sawiin, damlote pawh an inentirna lamah leh an damdawi ei turah fimkhur a tul hle tih a sawi bawk.
———–

Nizan dar 10 vel khan Zemabawk, Lungbial vengah Bawngkawn police leh Zemabawk JAC ten Ganja kg. 9 an man. Ganja hi Ngurhmingliana, kum 27 Lungbial veng te in atanga man a ni a, Fimsangliana, Senvawn, Manipur ta niin Ngurhmingliana nen hian inthurualin an zuar a ni. Ganja hi fun kua a ni a, fun khat hi kg. 1 zel niin kg. 1 cheng 1,500 man a ni a, an man zawng zawng hi cheng 13500 man a ni a, a neitute pahnih hi thubuai siamsak nghal an ni.
———–

Serlui B Hydel Project-in a chim, Builum khaw mite tana zangnadawmna pek dik lo ni-a sawi endiktu, Builum Inquiry Commission Chairman, Pu SL Sailova chuan Serlui leh Tuirial Hydel Project-ah hian Revenue department-in dik takin thil ti sela chuan, thil dik lo a awm a rin loh thu a sawi. Vawiina kan corr.-in a chenna Ina a kawmna-ah Pu Sailova chuan Hydel Project hi siam leh zel a la ni dawn a, tuna anga thil tih a nih chuan a fel lo hle dawna a hriat thu a sawi a, tuna an thil chhuina-ah hian sorkar hnathawk an mumal lo hle tih an hmu chhuak tih a sawi. Pu Sailova chuan thla 7 chuang hret hna an thawh chhung khan cheng 1,67,000 an hmang tih a sawi a, sum a tlem thei ang ber hman tuma hnathawk an nih thu leh an Office bungraw thenkhat a chhiat pawhin an pawisa-in an siam tih a sawi.
————–

Mizoram Board of School Education (MBSE) buatsaiha pawl 10 Exam, High School Leaving Certificate (HSLC) Exam chu vawiin khan tan a ni. MBSE Secretary, Pu F.Lianhmingthanga hnen atanga thu dawn danin Exam Centre 78-ah mipa 7,408 leh hmeichhia 7,530, an vaiin 14,938 an exam a, tun thla ni 18-ah an zo dawn a ni. MBSE Secretary chuan Exam Centre tinah hian Police duty leh medical duty an awm vek tih a sawi a, MBSE hotute leh DEO leh SDEO-te’n an vil reng tih a sawi bawk. MZP chuan HSLC Exam beitute zawng zawng tluang tak leh tha taka an Exam theih nan duhsakna an hlan a, zirlai, Exam zawng zawngte chu Mizoram nghahfak an ni tih inhre renga Exam bei turin an chah a ni.
—————-

National Bank for Agriculture and Rural Developmet (NABARD), Mizoram Regional Office buatsaih, State Credit Seminar chu vaiwin khan State Guest House-ah neih a ni a, Agriculture Minister, Pu H.Liansailova’n a hmanpui a ni. Minister chuan Mizoram sorkarin lo neiha eizawnna leh thingtlang hmasawnna a ngai pawimawh hle tih sawiin, kut hnathawktute leh mirethei khaichhuak turin sorkar department te, Bank hrang hrangte leh tlawmngai pawlte’n thawh hona tha an neih a pawimawh hle a ni a ti a, NLUP-ah kut hnathawktu tam takin eizawnna an nei thei dawn a, an hlawhtlinna turin market tha thlun zawm a pawimawh hle tih a sawi. Seminar kaihruaitu, NABARD General Manager, Pu P.C.Sahoo chuan kum 2010-11 chhunga Mizoram tana Bank sum puktir tur ruahman zat chu vbc 306 leh nuai 68 a ni, a ti a, hei hi kum 2009-2010 a sum ruahman aiin za-a 30-in a tam a, heta tang hian cheng vbc 65 leh nuai 26 chu Agriculture leh a kaihhnawih eizawnna hna atan a ni a, Non-farm sector tan cheng vbc 46 leh nuai 49 leh sector ngaih pawimawh dangte tan cheng vbc 194 leh nuai 93 ruahman a ni, a ti bawk. Seminar-ah hian Minister hian State Focus Paper 2010-11 chu a tlangzarh nghal a ni. Seminar-ah hian NABARD hotute leh Mizoram chhunga Bank hrang hrang hotute bakah sorkar department pawimawhte leh pawl hrang hrang te an tel a, Crop loan leh Kisan Credit Card chungchang te, kut hnathawktute tana loan leh tanpuina pek chungchanga harsatna te leh thawh hona tur chungchang te sawiho a ni.
———

Elected seat 23 awmna, Lai Autonomous District Council-a elected seat dang 2 siam belhna tura Delimitation Commission ruahmanna siam chu hmun dangah pawh dodal a ni a, vawiin khan Archhuang khua leh Tialdawngilung khuaa mite chuan an awmna bial pangngai siam danglam duh lovin kawng an zawh. Lawngtlaia kan corr. sawi danin Phawngpui biala awm thin Archhuang khua leh =ialdawngilung khuate hi Vawmbuk bial thar siam turah behtir tumna a awm nia sawi chu heng khaw 2-a mite hian an duh lo niin a sawi a ni.
———

Lawngtlai District-ah vawiin khan SSA hnuaia zirlaite tan lehkhabu a thlawna sem tan a ni. Lawngtlai Bazar Areopagi-a inkhawm buatsaihah lehkhabute hi LADC-a Executive Member, Primary School changtu Pu VL Hmuaka’n a sem a, hemi bakah hian Lawngtlai khaw pawna sem tur phurtu motor a vai liam bawk a ni.
————

Falam Unity Trust, Aizawla awmte chuan January ni 20-a Saron Venga Pu C. Lalengmawia In luahtu, Suithuanmawii suamtute thiltih dan chu an dem thu thuchhuah siamin an tarlang a, heng misual 4, Mizoram Police-ten rang taka an man chhuak chu fakawm an tih thu sawiin, an phu tawka hrem ngei turin sorkar an phut bawk. Hemi bakah hian Falam Unity Trust chuan dan leh thupek bawhchhetu leh pawi khawihtute do kawngah Police leh tlawmngai pawlte thawhpui an inpeih reng tih an sawi a ni. Hetih lai hian Dungtlang Welfare Committee, Aizawl chuan mi suamtute zinga pakhat, Lalbiaktluanga, Tuanliana fapa Dungtlang khua inti chu Burma ram atanga lo chhuk thla, Dungtlanga kum 2 vel awm, hemi hnua hmun danga kal bo ta niin an sawi a, amah hi an khua-a piang leh an khaw mi ni lovin an sawi bawk.
————

Excise and Narcotics Squad-ten vawiin chawhnu khan Tuikual South-ah Spasmo Proxyvon capsule 547 leh Parvonspas capsule 85 an man. A neitu nia hriat mi 3 an man tel bawk a, chungte chu Mary Laldinpuii, Vairengte nia insawi, Nancy Vanlalmawii, South Hlimen khaw chhuak, tuna Vaivakawn awm nia insawi leh Lalchhuanawma, South Hlimen-a awm nia insawite an ni. Heng mi 3-te hi thubuai siamsak an ni.
———–

Republic Day New Delhi-a lawmna-a huaisen lawmman dawngtu, Mizo 2-te chuan vawiin khan Mizoram State Council for Child Welfare hotute nen Governor, Lt. Gen. MM Lakhera, Raj Bhawan-ah an hmu a, heng mite hi Lalrammawia, Khawipui hlauhawm tak atanga a thian chhanchhuaktu leh Zonunsanga, a thiante tui tla chhanchhuak tura theihtawp chhuahtute an ni. Heng mite hian Republic Day, New Delhi-a lawmnaah President hnen atangin huaisen lawmman, Bravery Award an dawng a ni.
————

Students Self Support Union chuan Home Minister, Pu R. Lalzirliana hmuin zirlaite tana inhlawhna tur siam chungchangte, Education Loan awlsam zawka lak theih dan turte leh Mizoram Police hnuaia ILP Enforcement Wing siam tul an tih thute an sawipui. An inkawmnaah hian Home Minister chuan ILP online registration siam pawimawh a tih thute, Education loan awlsam zawka pek theih nan bank hotute koh khawm a tum thute a lo hrilh a ni.
————–

MLA Local Area Development Scheme sum atanga Falkland MHIP-te’n Waiting Shed an sak chu vawiin khan Mizoram Law Commission Chairman, Pu R.Lalrinawma’n a hawng. Hawnna thu sawiin Pu Lalrinawma chuan MHIP-te’n anmahni tanghma chauh ngaihtuah lova, khawtlang mamawh ngaihtuah a, hma an la chu fakawm a tih thu a sawi a, sorkar-in ram leh mipuite hmasawnna tura hma a lakna kawngah mahni hma zawn theuhva sorkar tawiawm chu mipuite mawhphurhna a nih thu a sawi. He Waiting Shed hi Pu R.Lalrinawma’n a MLA Local Area Development Scheme sum, Falkland MHIP a pek, cheng 90,000 senga an sak a ni a, an Venga Chite pengah an sa a ni.
————-

Vawiin khan Mizoram University-ah Geography Deptt. zirtirtute tana Refreshers’ Course hmasa ber chu Academic Staff College Director, Prof.Tlanglawma’n a hawng a, he Course hian tun thla ni 22 thleng a awh ang. He Refreshers’ Course-ah hian ram chhung hmun hrang hrang atangin College-a Geography zirtirtute an lo tel a ni. He Course hawn rual hian Mizoram University-a Geography Deptt.-a Reader, Dr.Rintluanga Pachuau lehkhabu, saptawnga ziah, “Mizoram – A study in comprehensive Geography tih chu tlangzarh nghal a ni a, he lehkhabu hi a buatsaihtu-in kum engemawzat, Mizoram chungchang ngun taka a zir hnua a ziah, New Delhi-a Northern Book Centre-in a chhuah a ni.
———–

Mimit District Magistrate chuan K|P General Conference lo awm tura mipui an him zawk nan Cr. P.C 144-na tlawhchhanin Mamit khawpui chhungah motor leh in sakna bungrua, lung, rora, balu, thingzai leh tuizem/barrel motor kawngpui dala dah a khap. He thupek hi thla hlui ni 31 atanga hman tan niin sut leh a nih loh chuan thla hnih chhung a huam dawn a ni.
—————

Chhinga Veng Kohhran chuan, an kum 60-na champha lawmna kal zelah, a mamawhte pan tur Counselling Centre nizan khan an hawng. An Kohhran Hall-a buatsaih, he Counselling Centre hi bialtu Pastor Lalbiakvulmawia’n Pathian hnenah hlanin a hawng a ni. He Centre hi Chhinga Veng kohhran mi, Synod Revival Speaker pangaten an enkawl dawn a, thlarau lama tuihal apiangten Pathianni tiam lovin, ni tin pan theih a ni ang. Chhinga Veng kohhran hian, an kum 60-na lawmna hi thla hlui ni 1 khan an hawng a, an din cham, kumin November ni 5 thleng khian Jubilee lawmna hi chhunzawm a ni ang.
———-

Red Ribbon Inter Village Football Tournament chu khelmual hrang hrangah khelh chhunzawm a ni a, vawiin khan Match 16-ah goal 95 a lut a, penalty shoot out-a chak zawk zawn tum 3 a awm a, Lungverh jersey no. 15. H.Lalrintluanga’n tun tournament-a goal rang ber thunin, second 50-na-ah Riangtlei goal-ah a thun a ni. Vawiin inkhel result hetiang hi a ni.

Group I – Republic Field

Sairang Sihhmui 0 – 8   Bethlehem Vengthlang
Maubuang          1 – 6   Thingsul Tlangnuam
Aizawl Venglai   5 – 4   New Serchhip
Vanchengpui     4 – 2   Luangpawn

Group II – 3rd MAP Ground, Mualpui

West Phaileng      6 – 1  Lungphun
Kawnpui              7 – 1  Selam
Tanhril                 1 – 3  Zohmun
Mualcheng           3 – 0  Bunghmun

Group III – Ramhlun Sports Complex

North Lungleng     1 – 12   Vaivakawn
Saikhamkawn          9 – 8   Venghnuai
Bethlehem                5 – 4   Biate
Falkawn                    2 – 1  Mamit Hmar Veng

Group IV – YMA Field, Vaivakawn

Khatla South       0 – 2   Laipuitlang
Riangtlei             2 – 4   Lungverh
Zemabawk          7 – 2   Piler
Kanan               10 – 1   New Chalrang
————–

Vawiin khan Aizawl khawpui chu a lum lai berin celsius degree 24.4 a ni a, a vawh lai berin degree 12.1 a ni. Naktuk, Nilaini-ah chuan Aizawl-ah khua a tha ang a. A lum lai berin Celsius degree 24 vel, a vawh lai berin degree 11 vel a nih rin a ni.