www.zonet.in

TUALCHHUNG CHANCHIN THAR

Naktuka Republic Day lawm turin inbuatsaih fel a ni ta. Mizorama a lawmna inkhawm lian ber, Aizawl Lammuala neih tur chu zing dar 9-ah tan a ni ang a, hetah hian Governor, Lt. General, MM Lakhera-a’n hnam puanzar pawt pharhin parade a endik ang a, hemi hnu hian mipuite hnena thuchah a sawi dawn a ni. Hemi hnu hian ram pum huap leh Mizoram huapa mi chawimawi tlakte chawimawina hlan an ni ang a, parade contingent-te leh Republic Day lawmna atana infiamna-a tithate lawmman pek a ni bawk ang. Tun tuma Republic Day champha 60-na, Aizawla lawmnaah hian parade contingent 27 an tel dawn a, chungte chu CRPF, BSF, Mizoram Police, Mizoram Home Guards, NCC, Scouts and Guides, School naupang leh Ex-Servicemen-te an ni a, hengte bakah hian Assam Rifles, Police leh Mizoram Home Guards atangin Bandh Party an tel dawn a ni. A lawmna inkhawm zawh fel hnu, chawhma dar 11-ah Governor chuan mi pawimawhte Raj Bhawan-ah thingpui a inpui bawk ang. District Hqrs. hrang hrang leh Sub Divisional Hqrs-ahte pawh Republic Day naktuka lawm turin ruahmanna engkim peih fel a ni a, District Hqrs. tinah DC-te chuan hnam puanzar pawt pharhin parade an endik ang a, mipuite hnena thuchah an sawi bawk dawn a ni. Saiha-ah chuan sorkar Department hrang hrang 13 leh Mara Thalai Pawl (MTP) leh Hmeichhe Pawl (M.Ch.P)-te chuan Tableau entirin mipuite zirtirna leh Department hrang hrang hmasawn dan an tarlang dawn a, tlawmngai pawl pahnih, MTP leh M.Ch.P-te hian khawtlang nun siam that leh hmasawnna lam hawi thil bakah hmeichhiate humhalh leh tih changkan pawimawhzia an entir dawn a ni.

President chuan Republic Day lo thleng tura ram chhung mipuite hnena thuchah zanin dar 7 leh dar 8 inkar hian English leh Hindi-in a sawi dawn a, Aizawl Doordarshan Kendra chuan President thusawi hi live-in a tichhuak ang a, hemi hnu hian President thusawi Mizo tawnga lehlin pawh a puang chhuak dawn a ni. Naktuka Lammuala Republic Day lawmna inkhawm pawh Doordarshan Aizawl chuan zing dar 8 leh minute 50 atangin live-in a tichhuak bawk ang a, ZONET pawhin live-in a tichhuak bawk ang.

Delhi-a Republic Day, naktuka lawmna-a tel turin Mizoram sorkar chuan mi engemawzat a tir a, heng mite hian kawng hrang hranga Mizoramin hma a sawn dan tilangtu tur Tableau an entir dawn a ni.
————

Bungthuam tlangval, Zarzokima kah hlum chungchangah Mizoram Police-te chuan Mizoram Bru Displaced Poeple’s Forum General Secretary, R.Laldawngliana chu Inrinni khan Kanhmunah an man. Zarzokima thihna chungchang chhui tura din, Special Investigation Team-te chuan Zarzokima thahna-ah khan R.Laldawngliana hi a inhnamhnawih ngei ni-a an hriat avangin an man tih an sawi a, tunah hian Bawngkawn Police Station-ah an dah thu leh thu an zawt fiah mek tih an sawi. Zawhna chhangin Special Investigation Team chuan Zarzokima thihnaah R.Laldawngliana hi a inhnamhnawih tih hi Zirtawpni-a Mizoram sorkar leh Bru aiawhte an inbiak lai khan an la hre lova, an haw hnu khan a inhnamhnawih tih an hriat leh avangin Kanhmun-a SIT member-te’n an lo man tih an sawi. Zarzokima thah avanga Mizoram tlanchhuahsante lak kir leh dan tur ngaihtuahin Zirtawpni khan Mizoram aiawh leh Tuikuk hruaitute chu Aizawl-ah an inbia a, hemi tum hian R.Laldawngliana pawh hi a tel a, amah hi Kolasib District-a Meidum khua-a cheng thin a ni. Mizoram Police Special Investigation Team chuan Zarzokima kah hlum chungchang hi ngawrh takin an chhui a, he tualthahna-a tel mi pathum an man tawh a, R.Laldawngliana hi Zarzokima thahna-ah khan a tel ngei ni-a an hriat avangin Zirtawpni-a Mizoram sorkar leh Tuikuk hruaitute inbiakna-a a tel zo, Tripura an panna kawngah Inrinni tlai khan Kanhmunah an man a, hemi zan hian Aizawl lo phurh thlen nghal a ni. R.Laldawngliana man a nih chungchangah hian nimin chawhma khan Tripura-a Naisingpara leh Asapara inkarah Tuikuk tam takin kawng an zawh a ni.
—————

Mizo Zirlai Pawl chuan Mizoram Police Special Investigation Team-te’n Zarzokima thahna-a inhnamhnawih ni-a rinhlelh, R.Laldawngliana an man leh chu lawmawm an tih thu an sawi a, Police-ten tualthattute hi an phu tawkin hrem ngei se an duh tih sawiin, Police-te hnathawh chu ropui an tih thu an sawi. MZP chuan R.Laldawngliana man a nih avanga Tuikuk-te’n Tripura-a kawng an zawh chu awm lo an tih thu an sawi bawk.
—————-

Nizan dar 7:45 vel khan Treasury Square-ah Santro car leh Bike an insu a, bike-a chuang hmeichhia chu a hliam tuar lovin tukin dar 9:34 khan a boral. He vanduaina thleng chungchanga Zonet thu dawn danin, Venghlui lam panna kawng, MPC party office lam atangin Santro car, ML 05 D 0536 hi a lo tlan chho a, a khalhtu chu Lalhriatpuia, kum 33, Dinthar veng a ni a, Vanapa Hall lam atanga Khatla pana tlan bike, MZ-01 C 1836, Zirthanpuia, kum 26 Kulikawn khalh nen Treasury Square Bus stand bulah na takin an insu a, bike hnunga chuang, H. Vanrengpuii, kum 23, Pu H. Thangkhuma fanu, Farkawn khua, Kulikawna an chhungte ina awm chu na takin a hliam a ni. Hetia an insut hian Vanrengpuii hi Traffic point bul thleng a invawrh a, Car-ah hian a intauh bawk nia sawi a ni a, Aizawl Civil Hospital panpui a nih hnu, tukin dar 9:34 khan a hliam tuar lovin thi ta a ni. Vanrengpuii ruang hi vawiin khan an khua, Farkawn panpui nghal a ni. Vanrengpuii hi uiin a seh a, Aizawl Civil Hospital-a ui a hri venna-a a inchiutir haw lamah vanduaina hi an tawk ta nia sawi a ni. Bike khalhtu Zirthanpuia pawh hi na lutuk lovin a hliam ve bawk a ni.
————

Truck driver 1, Anwar Hussain chu nimin tlaia Sairang Vengsanga sawisak a nih hnuah Aizawl Civil Hospital-ah a hliam tuar lovin nizan khan a thi. A thih dan chungchangah hian Police-te chuan an tih tur hmasate an tifel a, a ruang hi vawiina endik a nih hnuah Ambulance-in a awmna khua, Katlichera-ah thawn liam a ni. Bairabi atanga kan Corr. thu dawn danin, Katlichera mi, driver tualthih chungchangah hian buaina leh boruak sosang thleng engmah a awm lo a ni. Police hotute hnen atanga thu dawn danin Truck driver, Anwar Hussain-a motor khalh, Sairang lam pana tlan leh Lalremruata, Aizawl Ramthar Veng-a mi motor khalh 207 chu Sairang Vengsangah nimin tlai khan an insu a, an insut hnu hian 207 Motor-a chuang mi 11-te chuan Truck driver Annuar Hussain hi kut an thlak nghal a, na taka sawisak a nih hnuah Anwar Hussain hi Aizawl Civil Hospital-ah lak a ni a, a hliam tuar lovin nizan dar 11 : 30 khan a thi ta a ni. Amah kut thlaktu nia hriat mi 11-te chu Police-ten manin IPC Section 302 leh 34 hmangin tualthah thubuai an siamsak tawh a, chungte chu 207 motor khalhtu Lalremruata, Aizawl Ramthar Veng, Ramthar Veng mi bawk Zothanpuia, C. Vanlalchaka, Lalhmachhuana, Lalchungnunga, Lalduhawma, Samuel Lalnunmawia, Lalramliana leh Lalhruaitluanga bakah Lalhriatpuia, Chawnpui leh Hmangaihpuia Armed Veng, Aizawl-te an ni.

Zoram Drivers Union (ZDU) chuan he inhmuh thiamlohna avanga Katlichera khaw mi driver, Anwar Hussain-a thihna hial a thleng chu pawi an tih thu sawiin, tun hnuah hetianga kut inthlakna hi Mizoramah thleng tawh lo se an duh thu, thuchhuah siamin an tarlang a ni.
———

Rorel lai, Congress Legislature Party-in sikul thenkhat, dinhmun sang zawka lo dah tawhte chu sikul tin, an dinhmun zir chian leh ni se a ti a, an thutkhawm leh hunah la thlir ho leh ni se an ti. Congress Legislature Party hi vawiin chawhnu khan an hruaitu, Chief Minister Pu Lal Thanhawla hovin an thu khawm a, NLUP hmanga tanpuina dawng tur thlan leh an ei zawnna tur thlan chungchangah thil fel lo leh chiang lo a la awm nual avangin Apex Board leh Implementing Board-in lo ennawn leh se an ti a, Champhaia DC leh SP office chu khawpui laili atanga a hlat avanga mipuiin harsatna an tawh nasat avangin sorkarin hmun remchang dangah sawn se, DC Office hmunah polytechnic dah ni se, Mizorama sorkar, Industry Deptt. hnuaia Geology & Mining Wing chu Dept hranga dah ni se, sorkarin lo bawhzui se an ti bawk.
————-

Reserve Bank of India pawmpui loh, Aizawl-a pawisa dah punna ni-a sawi, Relations-a pawisa dahtute chu vawiin khan DC Court leh Consumer Court-ah an kal ni-a thu dawn a ni a, Relations lakah hian thubuai an thehlut em tih erawh chu hriat a la ni lo. Relations-a pawisa dahtute sawi danin, pawisa hi za-a 5 pung turin mi tam takin an dah a, heng pawisa tling khawmte hi cheng nuai 200 chuang a ni a, mahse an pawisa chu a pung lo mai ni lovin, an pawisa dah pawh hi an hmu let thei lo niin an sawi a, hei bakah hian Relations hian Aizawl-ah pawh Office an nei tawh lo tih sawiin, hei vang hian Court an pan ta niin an sawi. Aizawl-ah hian RBI pawmpui loh, pawisa dah punna 19 a awm thu hi ZONET chuan kum hlui November ni 17 khan a puang tawh a, heng zingah hian Relations pawh hi a tel a ni.
————-

Aizawl khawpui chhunga PHE Department tui dah khawlna, Zonal Tank 7 chu siam that tura tih a ni. Urban Development &Poverty Allevation Department leh PHE Department thuneitute hnen atanga kan Corr. thu dawn danin, Aizawla mipui hnena tui semna thuam that hi sorkar laipuia Urban Development Ministry-in a remtih hnuah UD&PA Department hnuaia SIPMIU Infrastructure Development Project kal tlanga thawh tan tura tih a ni a, kum 3 chhunga thawh tura tih a ni. Kumin atan Aizawla Zonal tank 7 siam thatna atan Tender chhuah a ni tawh a, a thawktu tur pawh tihfel thawkhat tawh nia thu dawn a ni. Aizawla Zonal tank 27 zinga siam that tura tih 7-te chu veng hrang hrang – 7th day tlang, Tlangnuam, Mission Vengthlang, Luangmual Complex, Zemabawk TB tlang, Armed Veng leh Bawngkawn-a Zonal tanky-te an ni a, heng zonal tanky-te hi tun thla-a work order chhuah atanga thla 18 chhunga siam that zawh hman tura tih a ni a, heng tuizemte hi kum 2026-a mipui awm tur chawm zo tura ruahman a ni a, tanky siam chhunga mipuite’n harsatna an tawh loh nan PHE chuan ruahmanna a siam a ni.
—————

New Market Building thar, Block I-a insawn lut tura tih, New Market A lane-a hawker-te chu an thutna tharah Nilaini khian an insawn lut dawn. New Market-a Hawkers Association hruaitute chuan tunlai hian an thutna thar tura insawn lut turin an inbuatsaih mek tih sawiin, an thutna thar tura sorkar ruahman chu zana an bungrua-te riah nan a him loh avangin mahni sum sengin an siam tih an sawi a, hemi atan hian cheng 2,000 atanga 3,500 inkar an seng tih an sawi. Puan tawh angin Trade & Commerce Department chuan New Market chhunga thil zuarte thut dan a lo fel zawk nan leh mipui kalna tawt lutuk tihziaawm nan Hawker thute chu kum hlui November thla chhunga New Market Building thar, Block I-a insawn lut vek turin a lo ti tawh a, mahse Hawkers Association ngenna ang leh Trade & Commerce Deptt. remtihna angin kum thar January ni 15 hma-a insawn lat tura tih an ni leh ta a, mahse tun thlengin an la insawn lut lo a, tunah hian an insawn dawn ta a ni. Trade & Commerce Department-in New Marker huam chhunga Hawker, insawn chhuak tura a tihte hi mi 138 an ni.
———–

Mizoram sorkar chuan Department hrang hrangte chu an Department theuhva aikal la an awm leh awm loh, tun thla ni 28 aia tlai lova DP&AR hriattir turin a hrilh. Hemi chungchanga sorkar thupek hi Zirtawpni khan Chief Vigilance Officer, Pu Vanhela Pachuau-in a chhuah a, hetah hian Central Civil Service Rules 1965 hmangin aikal late chu hrem theih an nih thu a tarlang a, Central Civil Service Pension Rules 1975 Rules 8 angin taksa leh rilru lama harsatna nei, hnathawk chhunzawm thei tawh lote chu Invalid Pension pek theih an nih thute, hetiang harsatna tawk, sorkar hnathawk chhungte chu danin ngaihhnathiamna a pek anga Compassionate Ground-a hna pek dan ngaihtuah theih a nih thute a tarlang bawk a ni. Puan tawh angin nikum December ni 1-a Chief Minister hova Cabinet meeting neih chuan aikal lak chungchang hi ngaihtuahin khauh taka khap ni se tiin thutlukna a lo siam tawh a ni.
————

SSA Aizawl District chuan vawiin atanga Zirtawpni thleng awh turin Chaltlanga DIET Auditorium-ah Upper Primary School zirtirtu lak tharte training a pe. He training hi Aizawl District Education Officer, Pu R. Lalthuamliana’n a hawng a, thu sawiin Text Book sem a la nih loh avanga buai mai lova text bu tel lo pawha tha taka naupangte zirtira kaihhruai theih tum turin zirtirtute chu a fuih a ni. Hetiang bawk hian vawiin atang khan Chhinga Veng, Sikulpuikawn, Darlawn, Aibawk, Saitual leh Bungkawnahte pawh zirtirtute training pek an ni.
————

Aizawl Bishop, Most Rev. Stephen Rotluanga chuan nimin, Pathianni khan Vaivakawn Biak-in thar hawngin mal a sawm nghal. He inkhawmah hian Zoram Entu Pawl Director, Father Lawrence Kennedy leh Bialtu Puithiam, Father Joseph Lalbiakthanga-te pawh an tel a ni. Holy Family Church Kohhran hi kum 1991 April thla khan din a ni.
———–

Ramhlun Sports Complex Branch YMA chuan an Branch YMA kum 13 tlin leh YMA kum 75 tlin, Platinum Jubilee lawmna atan vawiin khan Aizawl Civil Hospital-a damlote tan thisen an pe. Thisen petute hi mipa 11 leh hmeichhe 6 an ni a, an thisen hi an Veng Primary School-ah Blood Bank-a thawkten an laksak a ni.
————

Mizoram Football chanchina Tournament lian ber, Red Ribbon Inter Village Football Tournament chu zanin hian Chanmari YMA Hall-ah Health Minister, Pu Lalrinliana Sailo-in hawngin a KICK OFF dawn ta. Naktip, Nilaini-a khelmual pali – Zemabawk, Vaivakawn, Mualpui leh Republic Veng khelmuala tan tur, he Tournament-ah hian Team 212 an tel dawn a, zanina a hawnna-ah hian Health Minister, Pu Lalrinliana Sailo bakah MFA President, Wg. Comdr. J.Lalhmingliana leh MSACS Project Director, Dr. Eric Zomawia-te’n thu an sawi ang a, zaithiam hrang hrang an inlan bawk ang a, ZONET Zawlbuk-ah LIVE-a tihchhuah a ni ang.
———-

He Football Tournament atan hian vawiin khan MPRO Hall-ah MFA buatsaihin Referee Clinic neih a ni a, hetah hian he Tournament kaihruai tur, referee-te’n thil pawimawh an zir a ni. He referee clinic hi MFA Vice President, Referee Board Chairman ni bawk, Pu PC Vanlalhruaia’n a kaihruai a, Mizoram-in All India Football Federation Qualified Referee a neih chhun, Pu Laldika’n thil pawimawh hriat turte a zirtir a, naktuk zing hian Mizo High School Field-ah physical test an nei dawn bawk a ni. He referee clinic-ah hian referee 35 an kal a, MFA hruaitute chuan he Tournament atan hian referee-te chu an paiwmawh hle dawn tih hrilhin, Tournament hlawhtlin leh hlawhtlin loh kawngahte, game hmuhnawm leh hmuhnawm loh kawngahte mawhphurhna lian tak an nei tih an sawi
a, inrin tawkna nena he Tournament hi kaihruai turin an chah a ni.
————-

Vawiin khan Aizawl khawpui chu a lum lai berin celsius degree 25.9 a ni a, a vawh lai berin degree 16.7 a ni. Naktuk, Thawhlehni-ah chuan Aizawl-ah khua a tha ang a. A lum lai berin Celsius degree 24 vel, a vawh lai berin degree 9 vel a nih rin a ni.