www.zonet.in

RAM CHHUNG CHANCHIN THAR

Maoist hel pawl hruaitu, Kishanji-a’n remna zawnga inbiak an inpeih tih a sawi. Kishanji hian Trinamool Congress hruaitu, Railway Minister ni bawk, Mamata Banerjee-i hnenah open letter thawnin, sawrkar hotute nena inbiak an duh thu an sawi avang hian an pawl chuan an silai tun an tum tihna erawh chu a ni lo tih a sawi a, Maoist ho hian Parliament rorelna chu an pawm thei lo tih sawiin, Mamata chuan Railway Minister a nihna ang emaw, sawrkar laipui palai a nihna ang emaw, a duh zawk zawk thlanga inbiak an remti tih a sawi bawk. Mamata Banerjee hian thla hmasa khan Maoist chet hluarna hmun, Lalgarh tlawhin, Maoist hel ho chu remna zawnga inbiak puiah a lo sawm tawh a, hemi tum hian inbiak a duh hun chhung pawh sawi langin, a hun tiam erawh hi chu liam tawh mah se, Kishanji-a’n tuna lehkha a thawn hi a chhan ngei rin a ni.

Arunachal Pradesh-a West Siang district-a Numuk khuaa chengte chuan, sakei chi khat, Royal Bengal Tiger kapin a sa an ei thin niin NDTV-in a sawi. NDTV sawi dan chuan, sakei hi khuaa mite chuan a huho a hualin, an kah hnuah a khaw nawta puahin an ei thin a, a vun chu lipin Assam-a sumdawng thenkhat hnenah Rs.Nuai 1 leh sing nga velin an hralh thin niin a sawi. NDTV chuan tun kum khat kal ta chhung khan Numuk khuaa mite hian tum thum lai sakei hi an kap niin a sawi a, a thlalak erawh chu tuna mi bak hi an nei lo a, sakei kah hi ram chhung hmun hrang hrangah khap a nih avang leh, India leh China pawh an innghirngho phahna a nih avangin,he thil thleng hi mi tam tak chuan India ram tan a mualphothlak hle-ah an ngai a ni.
————

Jammu and Kashmir-a helho avanga chenna in tlanchhiatsan chhungkaw 3,500 te chu House Rent Allowance leh City Compensatory Allowance pe turin Supreme Court-in Jammu and Kashmir sawrkar a hrilh. Justice Altamas Kabir leh Swatanter Kumar-a awmna Bench chuan, Jammu and Kashmir-a mi firfiakte chetna avanga mahni chenna in chhuahsan-te hi an state sawrkar chuan a ngai pawimawhin an dinhmun siam tha turin mawh a phurh a ni a ti a, kum 1990 chho atanga chenna in mumal pawh nei thei lo-a khawsate hian sawrkara hamthatna awm theite chu an dawng ngei tur a ni a ti bawk. Heng mite, HRA leh CCA pek an nih loh nana state sorkarin Jammu and Kashmir High Court-a thu a thlen pawh hnawl a ni tih court sang ber chuan a sawi.
————–

Ram chhunga thlai thar leh chini man a tlakhniam theih loh chhanah, sawrkar laipuia thawk dun Party pahnih, Congress leh NCP-te an inpuh tawn. Thil man sang chungchangah hian Congress chuan, an thawhpui, NCP hotu, Sharad Pawar, tuna Union Agriculture Minister ni mek chu a puh a, Pawar hi state hrang hrang CM-te pawhin an dem thu sawiin, Uttar Pradesh CM Mayawati nen phei chuan, thil man sang chungchang avang hian an inhmu thiam lo zual a, Sharad Pawar erawh chuan chini leh thlai thar man san chhanah hian Cabinet thu tlukna dik loh vang niin a sawi thung a ni.
————

Nizan zanlai velah khan Mysore-a biak In pakhat chu mi tu tih hriat lohin an suasam a, biak in chhunga milim an dah thenkhat pawh tihchhiat a ni. Misualten an beih he biak In hi Holy Family Church a ni a, kum 10 kal ta khan he biak In hi nasa taka suasam a lo ni tawh a, he thubuai pawh hi chhui chhuah lohin tun thlengin a la awm a, tun tuma pawi khawihtute hi BJP-te an nih rin a ni a, BJP hotute chuan he thil thlengah hian inhnamhnawihna engmah an nei lo niin an sawi a, Police-te chuan rukru thil tih pawh a ni mai thei niin sawi mah se, biak In chhung a pawisa bawm leh thil hlu dang engmah ru chhuak loin an tichhe ringawt a ni.
—————

Kum 19 kal taa tleirawl kum 14 mi, Ruchika Girhotra-i pawngsualtu-a puh, Haryana DGP hlui, SPS Rathore chu Interim bail-a chhuahtir a ni. Rathore-a’n bail a dilna phalsak a nih thu hi vawiin khan Court-in a puang a, he thubuai chhuitu CBI-in an thil chhui lai bawhzui nan Rathore-a hi an man dawn a nih pawhin, man a nih hma ni 4 velah anhriattir hmasa tur a ni a ti bawk. Rathore-a pawngsual nia sawi, tleirawl Ruchika hi a intihhlum avangin Rathore-a hi tualthah thubuai siamsak a ni a, hei bakah hian, Police hotu a nihna hmang dik lo leh, Ruchika ruang endikna result tidanglama puhna thubuai-te pawh siamsak a ni bawk.
—————

Ram puma inthlan buaipuitu, Election Commission, kum 50 tlin champhaphak chu vawiin khan Delhi-ah lawm a ni a, President Pratibha Devisingh Patil, Vice President Hamid Ansari, Prime Minister Dr Manmohan Singh, Lok Sabha Speaker Meira Kumar, UPA Chairman Sonia Gandhi, Lok Sabha-a eptu pawl hruaitu Sushma Swaraj, NDA Convener Sharad Yadav leh Telecommunications Minister A Raja -te pawh an tel a ni. Political Party hrang hrang hruaitu pawh Commission kum 50 tlin lawmnaah hian an tel bawk.
————-

National Girl Child Day puala Women and Child Development Ministry-in Advertisement a tihchhuah-ah, Pakistan Air Chief Marshal kawr ha thlalak pakhat a awm avangin Prime Minister Office chuan he thil chhui chianna tur thupek a chhuah. PM Office thuchhuah chuan, sawrkar department pakhat Advertisement chhuaha ram dang sipai lem lo lang hi a ngai thiam lo hle tih sawiin, mipuite chu he thilah hian ngaihdam a dil a, hetianga India mi ropui leh sawrkar hotute bula ram dang sipai lal thlalak dah a nih chhan chhui chiang tur hian Inquiry commission din nghal a ni tih a sawi.
————-

Ram chhung hmun hrang hranga zirna in sang, Deemed University 44, sorkar laipuiin a pawmna hlih a tum chu Supreme Court-in tuna a dinhmun pangngaia awmtir rih turin a ti. He thupek avang hian heng Deemed University 44-a zirlai, nuai 2 zette rilru hahna zualpui chu a reh rih thei dawn a, Supreme Court chuan sorkar thuchhuak chungchanga an ngaihdan sawi thuai turin heng Deemed University 44 leh, an inthlun luhna University te pawh a hriattir bawk. Puan tawh angin, ram chhunga zirna sang, University anga ngaih, Deemed University an tih 44-te chu sorkar laipuiin University anga a pawmna sut a tum tih tun hnai khan a puang a, heng Deemed Univ. ah te hian zirlaite thiamna aiin a neitute chhungkaw eizawnna tihngelngheh an ngai pawimawh zawk niin a sawi a, mahse heng state hrang hrang 13-a Deemed Univ.-a zirlai, nuai 2 chuang zette hmakhua a chhiat vek loh nan, heng Deemed Univ. te hi an awmna state-a University pangngai hnuaia College pangngai anga dah kir leh phalsak an ni ang tih a sawi.
———–

Naktuka ram puma lawm tur, Republic Day-a pawi khawih tumna awm theite veng turin sipaite an inbuatsaih tha hle tih Defence Minister A K Antony-a’n a sawi. Defence Minister chuan, ram chhung hmun dang zawng aiin Jammu and Kashmir chu a bika ngaihtuah ngai a nih thu sawiin, ram dang atanga pawi khawih tumna emaw a awm a nih chuan, sipaiten an chhang let nghal zel dawn tih a sawi a ni. Republic Day lawmna hi, hel leh mi firfiak-ten tihbuai an tum nia hriat a nih avangin, lawmna hun hmanna pui ber tur, Delhi khawpuiah chuan, sipai 15,000 vel duty tir an ni a, hei bakah hian CCTV camera, Mobile team, Anti-Aircraft silai leh National Security Guard-a silai kah thiam thlan chhuahte pawh hmun tinah dah an ni.

Hetih lai hian, nimin tuk khan Jammu and Kashmir-a Baramulla district-ah sipaiten Grenade 100 chuang leh ralthuam dang engemawzat an man a, Police thupuangtu chuan, heng ralthuamte hi Cheak Manoosa Pattan khuaah, an thu hriat ruk bawhzui a an man niin a sawi. Police-te hian Inrinni kal ta pawh khan Reasi district-a Lancha Bakhi khuaah ralthuam leh puak thei thil thahnem tak an lo man tawh a ni.