www.zonet.in

TUALCHHUNG CHANCHIN THAR

MNF National Council-in an party Office Bearer-te zingah Senior Vice President leh Vice President 2 neih tawh ni se an ti. MNF National Council Meeting hi vawiin khan Babutlanga Archives Hall-ah Party President, Pu Zoramthanga hova neih a ni a, hetah hian Party Dan ding laia President, Vice President leh Treasurer thlan thin chu President, Sr. Vice President, Vice President pahnih leh Treasurer thlan chhuah tawh thin ni se an ti a, thla thar ni 22 khian Vanapa Hall-ah MNF General Assembly vawi 24-na neih ni se an ti bawk. MNF National Council Meeting hian resolution pass-in an sorkar laia harsa taka thawhlawm khawn chawpa sikul an din leh zirna that zawk nana sikul 337-te dinhmun sang zawka an hlang kai chu lawmawm an tih thu sawiin, heng sikul-te hi Congress sorkarin chhunzawm ngei se an duh thu an sawi a, kum khat chuang kal tawh Congress sorkar chuan hmasawnna hna a la thawk lo mai ni lovin, an sorkar laia ruahmanna leh hna kal laite pawh an chhunzawm thei lo nia sawiin, mipui harsatna tawh mek chu pawi an tih thu leh, mipuite ni tin mamawh, tui, ei rawngbawlna gas, buhfai, tuialhthei leh kawlphetha harsa reng chu mi rethei-te VIP-a ngaitu, Congress sorkar hian su kiang turin theihtawpin tan la se an duh tih an sawi a ni. MNF National Council Meeting chuan an sorkar laia sorkar hnathawk awm lohna chhungkua-te’n an dam loh nikhuaaa inenkawlna senso, cheng nuai 3 thleng an bill ve theihna tur, Mizoram Health Care Scheme an chhunzawm thei lo chu mak an tih thu an sawi a, Mizoram Health Care atan hian Congress sorkar chu cheng nuai sang hnih zahnih chuang a hnutchhiah chung pawhin an chhunzawm duh lo nia sawiin, tha lo an tih thu leh, hei vang hian mirethei tam takin nunna an chan phah niin an sawi bawk.

Greater Aizawl Water Supply Scheme Phase-II hna thawktu, Contractor, Johnson Eastern Power-in an hna, Mizoram sorkarin a tihtawpsak avanga Gauhati High Court-a sorkar an khinna chu tun thla ni 29 khian ngaihtuah leh a ni dawn. Puan tawh angin, JEP neitu, Pu Phillip Vanlalmawia chuan Mizoram sorkarin a tangka, cheng vaibelchhe 87 a la ba niin a sawi a, thil engkim, chipchiar taka chhut a nih phei chuan hei ai hian a sang hle dawn niin a sawi bawk. GAWSS Phase-II hi kum 1999 atanga thawk tanin, kum 2004-a zawh tura ngaih a ni a, mahse kum 10-ah pawh zawh fel a la nih loh bakah contractor pawh chawlhtir a ni a, Contractor hian a hna a thawh muan bakah deparnment lamin tui pump khawl 50% stand-by bun turin a tih laiin 100% standby a dah a, hei hi an mutan pakhat niin Engineer-te chuan an sawi. Eng vanga he hna hi thawk muang nge tia zawhna chu Pu Phillip-a chuan, engmah department lamin ruahmanna fumfe an nei lo nia sawiin, thawh hmasak tur an sawi zel avangin thawh chak a har niin a sawi bawk. Contractor hian Mizoram sorkar-in cheng vaibelchhe 65 vel a pe tawh a, vaibelchhe 87 a la ba niin a sawi a, pek tur hi hei ai pawh hian a tam fe dawn niin a sawi bawk. Pu Philip-a chuan Mizoram sorkar thil tih dan chu motor lei nena tehkhinin, Maruti car supply tura an tih hnua Esteem car supply tura ti leh si ang an ni, a ti a, an duh ang pek hnuah pawh pawisa pe tha duh si lo ang niin a sawi. Sorkarin pawisa pe tha se chuan hna pawh a chak tur a ni tih sawiin Contractor ban tak chuan, kum li thawh turah kum tin cheng vaibelchhe 30 pe zel sela chuan a hun takah a thawh zawh ngei tur thu a sawi bawk. Hei bakah hian Contractor chuan pump khawl standby, 100% a bun hian sorkarin cheng vaibelchhe 15 chauh a chawi belh a ngai niin a sawi a. He khawl hi bun a nih chuan a tirah sorkarin chawi deuh mah se, hun rei atan a tha zawk hle dawn niin a sawi bawk a, hei hi PHE Engineer thenkhat pawhin an tawmpui thu a sawi bawk. Court-ah hian Contractor hian thiam a chan emaw, sorkarin a banna hi court-in a sut emaw chuan Aizawl khawpuia mipuiten tui lamah harsatna an tawk nasa hle thei dawn niin kan corr. thu dawn chuan a sawi a, nikum kum tawp lama contractor ban a nih hnuin Phase-II hna hi PHE Dept.-in an thawk zui a, Maubawk thlang lawka pipeline, meter 300 zet chu an zawm mek a ni.
———

Tukin khan Health Minister Pu Lalrinliana Sailo chuan Aizawl Civil Hospital tihchangtlun hna thawh mek chu a tlawh a, Department Officer-te nen he hna, chak zawka thawh a nih theih dan tur an sawiho bawk. Health Minister hian Isolation Ward atana hman thin chu Maternity and Neo-natalogy building thar atana hman a nih dawn avangin a tul anga bawhzui zel a nih tur thu a sawi a, tun atanga rei lote-ah damdawi in building thar changtlung tak sak puitlin ngei a nih a beisei thu a sawi. Tukin khan Maternity & Neo-natalogy Building thar sak tur bul tan nan hian Health Minister chuan kut a thlak hmasa ber a ni.
————

Lunglei District-a Khawmawi khuaah an khaw Zirna Puitu Committee leh World Vision India, Chhimtuipui Development Programme-te chuan zirna tihhmasawn nan tangrualin beihpui an thlak. Khawtlang huapa he beihpui thlakna inkhawm hi Khawmawi Community Hall-ah neih a ni a, hetah hian World Vision India hruaitute leh Khawmawi Zirna Puitu Committee hruaitute chuan zirna lama an khaw hnufualzia sawiin, an khaw Govt. Primary School leh Govt. Middle School-ah zirtirtu an mamawh tawk dah thuai an duh thu an tarlang a ni. He beihpui thlaknaah hian resolution pawh pass a ni a, Govt. Primary School-a Headmaster atan an khuaa chen chilh thei dah tur leh zirtirtu dang atan pawh an khaw mi ngei mi 4 dah tura sorkar an phut thute, Govt. Middle School-a Headmaster hna ruak chu an khuaa chenchilh thei ngei hmanga hnawh khah an duh thu leh tuna zirtirtu awm lai mi 2 bakah mi dang 2 lak belhte, Hindi zirtirtu leh Work Experience zirtirtu dah ve an duh thute an tarlang bawk. Kan Corr. sawi danin, In 230 awmna Khawmawi hi Lunglei District leh Lawngtlai District inrina, Ngengpui khaw thlang lama Lunglei District huam chhunga awm a ni a, Lunglei atangin KM 122-a hla, Lawngtlai atanga KM 39-a hla a awm a ni. Tunhma kum 30 vel kal ta chhung khan Primary School leh Middle School-te hi nei tawh mah se, tun thleng hian N an khua atang hian Graduate 3 leh Matric pass chin 20 vel chauh an la nei a ni.
———

Mizoram Primary Teachers Association chuan tun thla ni 14, kumin sorkar kum atana School hawn tan ni-a SSA atanga zirlaibu sem a nih loh nachhan chu zirtirtute inpeih hman loh vang ni lovin, SSA hotute leh zirlaibu supply-tute inpeih hman loh vang niin an sawi. Hemi chungchanga vawiina thuchhuah an siamah Mizoram Primary Teachers Association chuan SSA Text Book Committee leh Education Service Association thut khawmnaah, nikum December ni 13 aia tlai lovah Text bu sem turte hi School tin thleng tawh tura rel a ni a, amaherawhchu hei hi SSA lamin an tihpuitlin theih tak loh vangin zirlaibu chu sem tlai niin an sawi a ni.
————

Mizoram Ministerial Service Association leh Mizoram Group D Association chuan kum 2006 January ni 1-a an hlawh anga chhut leta Central Pay Commission rawtna siam anga an hlawh tihsan sak thuai turin sorkar an ngen a, hemi chungchanga vawiina thuchhuah an siamah sorkarin Dearness Allowance, za zela 26 pek a tiam pawh GPF-a dah lova a pawisa fai ngeia tun thla chhunga pe turin sorkar an ngen bawk.
———-

State Transport Authority hnuaia Motor Vehicle Wing chuan lirthei number plate dik lo leh number ziah dan dik lote chu man chhuakin an hrem dawn tih an sawi. Motor Vehicle Wing-a thawkte chuan tun laia lirthei number plate tle hmang leh number ziak lerh an awm chu dan kalh a ni tih an sawi a, tunlai hian Transport Department hnathawk, sawn an tam vanglai a nih avangin he thil hi an endik thuai thuai thei lo a, remchang hmasa berah lirthei number plate-te an endik dawn tih an sawi. The Central Motor Vehicle Rules, 1989, Section 50 leh 51-na a inziah danin transport vehicle number plate-te chu rawng engah hawrawp leh number dum-a ziah tur a ni a, mimal lirthei number plate chu a var, hawrawp leh number chu a duma ziah tur a ni. The Central Motor Vehicle Rules, 1989 sawi daanin lirthei number plate-te chu English word, Arabic numeral-a ziah tur a ti a ni. STA Motor Vehicle Wing chuan The Motor Vehicle Act, 1988, Section 179-na chuan a dik lo a ni tih hre renga tiluia dan bawhchhia chu cheng 500 thleng chawitir emaw, thla khat chhung lung in tantir emaw-a hrem theih a ni tih an sawi a, hei bakah hian lung ina khung leh tangka chawitira hrem kawp theih an ni bawk tih an sawi. STA Motor Vehicle Wing chuan lirthei nei thar reng rengte chu Transport Department-a an lirthei an ziah luh a, number pek an nihin number ziah dan tur hi fel leh chiang taka hrilh an ni tih an sawi bawk.
————-

Chhim bial Chhantu, vawiina Lunglei Circuit House-a inhmukhawm chuan zirna lama Mizoram hmasawnna tura zirna in lian leh pawimawh din turte, Lunglei District-a din ve a nih theih dan tur chungchang an sawiho. He inkhawm, an pawl Chairman, Dr. F. Lianchhinga kaihhruaia neihah hian Lunglei Polytechnic tihchangtlun nan Lunglei-ah National Institute of Technology (NIT) din ni se, hmasawnna a rual zawk theih nan Agriculture College leh Indian Insitute of Mass Communication-te pawh District Hqrs.-ah dah ve ni se tih an rel a, an thu tlukna chu sorkar dawr nan hman zui ni se an ti bawk a ni.
———–

Mizo hnam nun, zai leh lamte thangtharte hriattir nan Kolasib-a Mizo Cultural Club leh tlawmngai pawl hrang hrang tangrualte chuan naktukah Pawl Kut hman an tum. Kolasib-a kan Corr. sawi danin Pawl Kut Organizing Committee leh Sub Committee-te chuan ruahmanna engkim an peih fel tawh a, khuallian atan bialtu MLA, Art and Culture Minister ni bawk, Pu PC Zoramsangliana sawm a ni a, Pawl Kut hman chhung hian Mizo hnam lam chi hrang hrang leh pipute hun lai atanga infiamna an lo neih thinte tarlan nan hman a ni bawk dawn a ni.
———-

Saiha leh Lawngtlai inkar Kawlchaw kaia Chhimtuipuiah vawiin khan Saiha khaw mi pakhat, H.C Lalrinchhana, kum 15 mi a tla hlum. Saiha-a kan Corr. hnen atanga thu dawn danin Lalrinchhana leh a thiante hi nimin khan Serkawr khuaa inneihnaah an kal a, an lo haw lam Chhimtuipuia Kawlchaw kaia an inbualnaah Lalrinchhana hi tuiah a tla a, chhar leh a nih chuan a lo thi hman tawh a ni. A ruang hi vawiin chawhnu khan Saiha thlenpui a ni.
———-

Saiha-a Mara Thalai Pawl (MTP) chuan nimin khan New Colony-ah mi 2 hnen atangin Proxyvon mum 595 an man. Kan Corr. thu dawn danin, MTP-a Ruihhlo Do Pawlte hian Proxyvon kawltu, Amen-a, Meisavai veng leh Muanzovi, New Colony-te pawh man nghalin an proxyvon man nen Saiha Police-te kutah an hlan a ni.
————

23 Sector Assam Rifles, Mizoram buatsaiha ram chhung chhim lam fang tur, National Integration Tour-a Mizo zirlai kal turte chu vawiin khan Larsap, Lt. Gen MM Lakhera-a’n Lammual atangin a vai liam. Zirlaite kal liam hma-a inkhawm tawi te buatsaihah Larsap chuan Assam Rifles-te’n Mizo zirlai, ram pawn la kal ngai lote tana hetiang zinna hun an buatsaih thin chu a lawmawm hle tih a sawi a, zirlai zin turte chu an tlawh State apiangah thil, a tam thei ang ber zir chhuah tum tura a chah bakah, Mizoram palai an ni tih hre renga an tawngkam leh chetziaah Mizoram tihmingtha turin a chah a ni. 23 Sector Assam Rifles DIG, Brig. S.K.Verma pawhin thu sawiin Mizo zirlaite’n ram hmasawnna leh culture hausakna, an mit ngeia an hmuh chuan anmahniah tumruhna lian tak a pek a beisei thu a sawi a, State hrang hrang an tlawhnaah hmun hmingthang tak tak bakah mi pawimawhte nena inkawmna hun siamsak an ni dawn tih a sawi. He National Integration Tour hi 23 Sector hnuaia Serchhip-a awm 4, Assam Rifles-te’n an hruai a, an chhuah hma hian zirlai zawng zawngte hi Larsap hian ngaihhruina thilpek a hlan a ni.
————-

Silchar atanga Guwahati pan, Sumo pakhat chuan nizan khan Guwahati bul, Khanapara mi 1 a su hlum a, hemi hnu hian tlanchhiat a tumna lamah Bike 1 a su leh a, bike-a chuang dinhmun erawh chu hriat a ni rih lo. Guwahati-a Mizoram sorkar L.O hnen atanga vawiin tlaia kan Corr. thu dawn danin, Sumo khalhtu hi Nepali, Mawia tia koh thin a ni a, a motor khalh pawh hi Silchar mi ta a ni. Amah hi man a ni tawh a, thu chiang nghah mek a ni.
——–

Vawiin khan Aizawl khawpui chu a lum lai berin celsius degree 27.9 a ni a, a vawh lai berin degree 14.4 a ni. Naktuk, Zirtawpni-ah chuan Aizawl-ah khua a tha ang a. A lum lai berin Celsius degree 27 vel, a vawh lai berin degree 11 vel a nih rin a ni.