www.zonet.in

RAM CHHUNG CHANCHIN THAR

Jharkhand Mukti Morcha (JMM) hruaitu Shibu Soren chu vawiin khan Jharkhand CM thar atan lak luh a ni ta. Party panga thawk ho sawrkar kaihruai tura CM atana lak luhna inkhawm, Ranchi-a Morabadi ground-a neihah Soren hi state Governor, K.Sankara Narayanan-a’n rinawmna thu tiam tirin a la lut a, kum kaw chhunga state CM 7-na a ni. Kum 65 mi, Soren hi he State CM atana tum thum lak luh a nihna a ni a, CM a nih hmasak ber chuan ni kaw chhung chauh a lal a, a vawi hnihnaah pawh thla li chauh a lal bawk a ni. CM rual hian,  BJP Jharkhand Unit President, Raghubar Das leh All Jharkhand Students Union (AJSU) hruaitu, Sudesh Mahato pawh Minister-ah lak luh an ni a, an pahnih hian Dy.CM an ni dawn nia sawi a ni. JMM hruaitu, Shibu Soren hian, Krismas ni khan, sawrkar thar a siam thei tih an State Governor a hrilh a, amah thlawptu JMM, BJP, JDU, AJSU leh Jharkhand Janadhikar Manch (JJM) MLA 44 a nei a,  a tuk ni 26 khan Governor chuan sawrkar siamturin a sawm ta nghal a, vawiina lakluh a nih hun tur hi chawhnu dar 2-a neih tura ruat lawk a ni na a, aienthiam thurawn angin, chawhma dar 10:30 khan a hun hi sawn a ni ta a ni. Soren hian sawrkar ngelnghet siam thei turin thlawptu member a ngah tawk em tih chu, kumthar January ni 8 khian House-ah fiah turin Governor-in a hriattir tawh a ni. Puan tawh thin angin, Jharkhand State Assembly inthlan tun hnaia zawh fel takah khan, Party mala sawrkarna siam thei khawpa chak filawr an awm lova, seat 18 latu, Soren-a kaihhruai, JMM chu party mala seat la hnem ber a nih vangin, Governor chuan sawrkar a siam tir ta a ni. Soren hi UPA sawrkar hmasaa Union Minister a nih laiin, tualthah thubuai  avangin, Minister atanga ban a lo ni tawh a, PM hlui, PV Narasimha Rao sawrkar a tluk thelh khan, Congress leh JMM chuan, Narasimha Rao sawrkar chhanchhuak turin, a rukin thuthlung an siam a, chumi hretu nia sawi, Shashi Nath chu, kum 1994 khan Soren-a hoten ru bo-in an that ta ni a puh a ni a, he thubuai hi kumthar March ni 10 khian Supreme Court chuan a ngaihtuah chhunzawm dawn a, Shasi Nath-a chhungte chuan, Soren-a chu tualthattu a ni a, CM ni tlak a ni lo tiin BJP in a thlawp chu mak an tih thu an sawi a ni.

Soren-a hi chanchin ngah tak a ni a, thamna lak ching leh mi rinawm lovah mi thenkhatin ngai mah se, mi retheite hmangaihtu-ah ngaih a ni a,  a mipuite chuan ‘zirtirtu’, ‘Guruji’, tiin an ko ber a ni. A pa hi mi retheite sum puktirtu mi hausa rawih, misualten an that nia sawi a ni a, chuvangin Shibu Soren-a hian mi retheite retheihna remchanga hmanga awp bettu, mi hausate hi a haw hle a, kum 18 mi a nihin pawl a din nghal a, kum 1960 chhovah phei kha chuan mi hausata tihkhai a tling tawh a ni. Mi hausate bakah hian tribal ni lote chu pawn lam mi tia vuahin a haw hle bawk a, Jamtara dist.-a tribal hovin mi 11 an thah tum pawhin Soren-a hi a mawhphurtu-ah puh a ni a, tribal ho chuan pathian ang thawthangah an ngai a ni. A thubuai avang hian ramhnuaiah a tlanbo va,  1971 khan JMM Gen.Secy a ni a, 1980 khan Lok Sabha member-ah thlan a ni a,  1986 atangin JMM President a ni. Hemi hnu hian  Dumka Lok Sabha bial atangin tum 5 thlan tlin a ni tawh bawk.
————-

Ram chhung hmar lam chu thlasik khaw vawt na takin a hmet zel a, phaizawl khaw lum na takin a tuam thin, Punjab, Haryana leh Chandigarh-te chu nikum tun ang hun aia nasa fe-in a vawt a, chhum chhah takin hmun tam tak a tuam mek bawk. Punjab-ah chuan Amritsar a vawt ber a, a vawh lai berin Zero degree celsius a ni a, khaw chin zir mite sawi danin, nikum tun ang hun aiin degree 4 zetin a vawt a ni. Ludhiana leh Patiala pawh nikum tun ang hun aiin degree 6 zetin a vawt ve ve a, Ludhiana chu a vawh lai berin celsius degree 0.2 a ni a, Patiala pawh degree 2.4 a ni bawk. Haryana-ah chuan, Ambala chu a vawh lai berin Celsius degree 0.3 a ni a, Rohtak pawh degree 0.9 a tla thla a, heng khaw pahnihte hi nikum tun ang hun aiin degree 5 zetin a vawt ve ve a ni. Chandigarh khawpui pawh a vawh lai berin celsius degree 3.2 a ni a, Himachal Pradesh chu, zero degree hnuai lamah englai pawha a awm bakah, vur thli vawt a tleh deuh reng avangin a vawt zual hle a, Lahaul leh Spiti District khawpui intawm, Keylong chu Himachal Pradesh-a hmun vawt ber a ni a, a vawh lai berin minus degree 9.7 a ni. Hetih lai hian Kullu chu 0.4 degree a ni a, Sundernagar pawh 0.2 a vawt a ni bawk. Thlaler state, Rajasthan-a Mount Abu chu a vawh lai berin degree 1 a ni a, Delhi khawpui boruak pawh tlemin a ziaawm hret a, a vawh lai berin celsius degre 5.5 a ni a,  Jammu and Kashmir boruak vawt lutuk pawh tlemin a ziaawm hret bawk a, Ladakh bial-ah vur a la sur nasa hle thung a, Kargil chu a vawh lai berin minus degree 15.2 a ni a, Leh pawh minus degree 14 a ni a, Srinagar khawpui chu a vawh lai berin celsius degree 2.6 a ni a, chhunah chuan degree 3.7 ah a chho thung a ni. Khaw vawt leh chhum lei vak chhah lutuk avangin vawiin khan Delhi airport-a thlawhna lut leh chhuak tur 22 chu tihkhawtlai a ni.
————-

Kum thar January ni 15 khian, minute 11.08 chhung awkin ni a lem dawn a, Tamil Nadu leh ram chhung chhim lam hmun thenkhat atangin a lem chhung zawng hi a hmuh theih ang. Awkin ni a lem dan tur hi, mithiamten Annular Eclipse an tih ang chi a ni dawn a, ni chu thla-in a hliah pumhlum lo ang a, a sirah ni eng chu, zungbun bial angin a lang thei dawn a, hei hi awkin ni a lem pumhlum, total eclipse nen a inang chiah lo a ni. Awkin ni a lem tur hi, chawhma dar 10 leh minute 44-ah Central Africa-ah a intan ang a, China-a Tuipui-eng chungah, chawhnu dar 2 leh minute 29-ah a chhak chhuak dawn tih Tamil Nadu Science and Technology Centre Executive Director, Dr P Iyamperumal chuan a sawi a, awkin ni a lem chhung hi a rei dawn avangin, annular eclipse-ah chuan tun hnaia a rei ber a ni dawn tih a sawi. Dr Iyamperumal chuan, hetianga awkin ni a lem hi, Tamil Nadu atanga hmuh theihin kum 108 danah a thleng thin tih a sawi a, he state leh a chhehvela khaw engemawzat atangin fiah taka hmuh theih a nih tur thu a sawi bawk.
———–

Telangana state thar siam thuai kartute bandh siam vangin, khualzin phur Rel 165 leh bus 5,200 dintir a ni a, khualzin nuai 30 chuangin harsatna an tawh phah. Telangana bial, Hyderabad-a Osmania University zirlaite chuan, sawrkar laipuiin Telangana state thar siam dan tura tih tur indawt a puan chian hma chuan, an nawrhna chu an bansan tawh dawn lo tih an puang a, hemi avang hian, Telangana biala ven himna hna thawk turin, Police leh Paramilitary Force tam tak thawn luh belh an ni tawh a, Southern Railways chuan, khualzin phur leh tualchhung rel tam tak a dintir a, Andhra Pradesh State Road Transport Corporation (APSRTC) pawhin khualzin phur Bus, Telangana biala tlante chu a dintir vek bawk a ni. Hetih lai hian, Telangana state thar siam kara tiam chin awm lova chaw nghei tawh, Telangana Rashtra Samiti (TRS) hotu, K Chandrasekhar Rao chuan, state thar siam tura inbiak a duh thu sawiin, hemi chungchang sawiho tura inbiakna satliah erawh chu a pawm lo tih a sawi. PM, Manmohan Singh-a hovin, Congress Core Group chu Telangana chungchang ngaihtuah hian, nimin khan New Delhi-ah an thu khawm a, Party President Sonia Gandhi leh mi pawimawh dangte an tel a, Telangana state thar siam tura thil pawimawh ngaihtuah tur Committee siam an rel a, TRS hotu, Rao erawh chuan, hetianga thil tih hi, thil tihkhawtlaina mai maiah ngaiin a pawm loh thu a puang nghal a ni. Telangana State thar siam kartu pawl, Telangana Joint Action Committee leh Osamania University zirlaiten bandh leh buaina dang an siam tawh china Andra Pradesh-in  thil a hloh tawh hlut zawng chu cheng vaibelchhe 15 hu a ni tih Andhra Pradesh, DGP, Girish Kumar chuan a sawi.
———–

Hmeichhe tleirawl kum 14 mi, Rutchika pawngsual vanga thiam loh chang, Haryana DGP hlui, SPS Rathore-a bail dilna chu hnawl rih a ni. Rathore-a’n anticipatory bail a dilna chu, vawiin khan Panchkula Special Judge, SP Singh-a’n ngaihtuahin, kum thar January ni 1 hma chuan hemi chungchangah hian thu tlukna siam a tum lo tih a puang ta a, hemi avang hian, tun ni 2 chhung hian Rathore hi Panchkulla Police-te chuan an duh hun hunah an man thei ta a ni. Rathore-a thubuai hi a khirh zual tawh hle a, a hmaa hmeichhe pawngsual thubuai ringawt nei kha, Rutchika-i intihhlum thu-ah mawhphura puh belh a ni a, hei hi bail-a chhuah theih loh thubuai a ni. Puan tawh thin angin, Rathore hian, kum 14 mi tleirawl Rutchika chu kum 19 kal ta khan a pawngsual thin a, he tleirawl rilruna lutuk chu, a hnu kum 3-ah tur in-in a intihlum a ni. Hetiang karah hian,  Rajasthan-a hmeichhia, Malli Devi kum 1997-a pawngsualtu-a puh, IPS officer Madhukar Tandon chu, vawiin thlengin Police-ten an la man lova, Police sawi dan chuan Tandon hi a awmna chin an hriat loh vanga man lo an ni a, he hmeichhe thlavang hauha lungawi lohna lantira, nimin atanga eel kawnga thu tawh, MP, Kiroral Lal Meena chu tukin dar 1:30 vel khan Police-ten an man a, mahse he hmeichhia pawngsualtu IPS offiicer hi man a nih hma chuan, sawrkar nawr chhunzawm a tum tih a sawi. Vawiin khan mi tam takin pawngsualtu man a nih loh avanga lungawi lohna lantirin Agra leh Jaipur inkar kawngpui an dang ping a ni.
————

India mite leh an thawhna, tuialhthei phur lawng, St James Park chu Gulf of Aden-ah Somalia lawng suamhmangten an hreng mek. Khawvela lawng suamhmang chet hluarna ber, Gulf of Aden-a thla ruk kal ta chhunga lawng ruk bo leh hmasak ber hi, Spain rama Tarragona atanga Thailand pan a ni a, misualte hian, he lawnga thawk India mi, Philippines, Russia, Georgia, Romania, Bulgaria, Ukraine, Poland leh Turkey-mi hnathawktu 26-te an hreng tel a, khawi hmunah chiah nge lawng hi an dah a, enge an thil phut tih misualte hian an la puang lo a ni.