www.zonet.in

RAM CHHUNG CHANCHIN THAR

Gorkhaland state chungchanga inbiak tum li-na chu inremna engmah siam lovin an tiltiak leh ta. Sawrkar laipui aiawha he inbiaknaa telte hotu, Union Home Secretary, G K Pillai chuan Gorkhaland state thar siam ngiattu,  Gorkha Janmukti Morcha (GJM) chuan, an thil ngiat chungchanga inbiak thawh ngana, ni 45 chhunga neih leh tura tih chu political level inbiakna ni tawh se tih an rawt tih a sawi. Pillai chuan, inbiakna a hlawhchham hnua chanchinthar lakhawmtute a kawmnaah, an inbiaknaah chuan inremna lam hawi thu tlukna a awm lo tih a sawi a, hemi rual hian, Gorkhaland State siam tura Political level-a inremna pawh a la awm chuang lo a ni a ti a, Sawrkar laipui leh West Bengal sawrkarin, inbiak thawh ngana neih leh hma-in, an ngaihdan mumal tak an sawi ang a, chumi engah chuan thil awm dan a chiang ang a ti bawk. Zawhna chhangin Pillai chuan, inbiak tum 3-naah khan, Darjeeling Gorkha Hill Council (DGHC) chu tihtawpa, a aiawh tur siam remtih a ni chungin, DGHC hi thiah a la nih chuan loh vangin, a hna pangngai a thawh chhunzawm tur a ni tih a sawi. Puan tawh angin, West Bengal atanga Gorkhaland state siam kartute hian, Darjeeling-ah tiam chin awm lovin chaw an nghei mek a, sawrkar laipui chuan, West Bengal sorkarin an state sawr zima, Gorkhaland state thar siam a remtih loh avangin, GJM hruaitute chu state thar siam ringawt kar bur lo tura hriattirin, hetianga an tilui a nih chuan, a tha lo zawngin boruak a inlumlet thei tih a lo hrih tawh a ni.

Rajya Sabha-a eptute chuan, khawvel boruak lum zel venna tura siam, Copenhagen thuthlung  chu nasa takin an sawisel. Vawiina hemi chungchang sawihona-ah eptu member-te chuan, Copenhagen-a thu tlukna an siam chuan,  ram thang mekte dinhmun nasa takin a en khum a, an hmasawn zelna tur a dang a ni an ti a, he thuthlung hian khawvel sik leh sa kalphung pangngai chhe zel tur ven kawnga India dinhmun a phet nasa hle niin an sawi bawk. BJP hruaitu, Arun Jaitley chuan, Copenhagen Accord hian, ram thang mekte, Kyoto Protocol hnuaia an intiamna a phatsan nia sawiin, he accord avang hian India-in, sik leh sa thila hma a lakna chu khawvel ram aiawhten an endik thiang ta niin a sawi bawk. He rorel inkhawmah hian, Union Environment Minister, Jairam Ramesh chuan, Copenhagen Accord chu sawi fiahin, he thuthlung hnuaiah hian lang tlangin, sawrkar chuan hna a thawk dawn a ni a ti a, he thilah hian innawr luihna emaw, inbarh luih thil emaw engmah a awm lova, sawrkarin a zawh tawk zelin, Carbon hu a tihchhuah tur chin a in bituk mai dawn a ni a ti a, hetianga thil ruahman a nih theih chhan hi Brazil, South Africa, China leh India ramte vang ni-a sawiin, Copenhagen-a ram aiawh intawk khawm chuan, khawvel sik leh sa kalphung pangngai a chhe zawnga inthlak danglam mek, siam tha turin Kyoto Protocol leh Bali Action Plan hnuaiah inrawn tawn zel an remti tih a sawi bawk.
———

Hetih lai hian Prime Minister Manmohan Singh-a’n tukin khan President Pratibha Patil hmu-in, Copenhagen-a UN Climate summit-a an thu relte a hrilhfiah. Rashtrapati Bhavan thupuangtu sawi danin, hruaitu pahnih hi minute 40 chhung an inkawm a, khawvel sik leh kalphung pangngai, a chhe zawnga inthlak danglam mek tiziaawm tura intawh khawmnaah hian, US hma lakna hnuaia India, China, South Africa leh Brazil-ten,  thu delh kilh awm lova, boruak tichhetu Carbon hu tihchhuah tlem dan tura inremna an siam chu sawiho a ni tih PM chuan President chu a hrilh a, ruahmanna hi ram rethei zawkten an dodal nasa hle tih a hrilh bawk. PM hian tun hnai lawka zawh fel tak, Lok Sabha thlasik thutkhawm chungchang pawh President hi a sawipui a, hemi bakah hian ram chhung leh khawvel huap thil huam zau takin an sawi dun bawk.
——–

Jammu and Kashmir, Samba Sector-a Ramgarh bialah, Pakistan sipaite leh India sipaite nizan atang khan an inkap. Defence thupuangtu sawi dan chuan, Pakistan sipaite hian, nizan tlai tawh takah khan, Kandral Border Post bula BSF duty-te an kap a, BSF-te hian rang takin an chhang let nghal a, inkahna hi a tawp lova, a khat tawkin silai a la ri reng a ni. Tun tum hi hapta khat vel chhunga Pakistan-in, inkah haina thuthlung a bawhchhiat tum 3-na a ni a, nimin zing vartianah pawh khan, Londi leh Bobiya-a Indai sipai-te an lo kap tawh a, kar kal ta Inrinni khan Poonch District-a Kranti-a Pakistan sipaite hian BSF sipai pakhat an kap hluma, pahnih dang an hliam bawk a ni.
——–

Maoist mi leh saten West Bengal-a West Midnapore District-a CPIM hotute in pathum an halsak. Maoist ho hian, Dahijuri-a CPI-M District Committee member, Amiya Sen Gupta in chu, nasa taka an suasam hnuah, nizan khan an hal a, a In an hal lai hian Sen Gupta chu a awm lova, a nupui, a fanu pali leh a tunu thla 2 leh a chanve mi chu, in kangah hian an an tang a, mahse, a hnu-ah him takin an insaseng thei hlauh a ni. Sen Gupta In hi, Maoist hel pawl ralthuam keng chi leh anmahni thlawptu mi sang 5 chuangin, darkar rei tak an hual bet a,  he khaw pawhtu kawngpui pawh Maoist ho hian an dan pin vangin, sipaite pawh, tukin khan he khuaah hian an lut thei chauh a, Sen Gupta chhungte hi hmun himah an hruai chhuak thei ta a ni.
———–

Ram chhung hmar lamah thlasik a na tan hle a, J&K-a Leh bial chu minus 16 degree-a vawt a ni tawh a, Delhi khawpui pawh a vawh lai berin Celcius Degree 6.4 a ni tawh bawk. Delhi khawpuiah tukin khan tun thla chhunga a vawh ber tum, celcius degree 6.4 a thleng a, nikum tun ang hun aiin degree hnih zetin a vawt a, thli vawt tak a tleh reng bawk vangin Delhi khawpui hi a vawt zual hle a ni. Hetianga khua a vawh zual chhan hi, a bul hnai tlang ram, Himachal Pradesh leh Kashmir-a vur a sur nasat vang a ni. Delhi khawpui vawh zawng hi nikum December ni 26 khan degree 6.4 a ni a, kum 2007 December ni 29 khan Degree 3.9  a ni a, he khawpuia thlasik nat ber tum kum 1945, December ni 26-a khaw vawh zawng chu Celcius degree 1.1 a ni. Hetih lai hian Patiala leh Amritsar-ah pawh thlasik a na hle a,  heng khaw pahnih hi Celcius degree 5.5 vel ve ve, khaw vawtin a tuam mek a, Haryana-a Rohtak-ah phei chuan Degree 1.8 chauh a ni a, phaizawl khaw lum thin, thlasik khaw vawtin a hmeh nat zinga vawt ber chu Rajasthan-a Churu a ni a, minus degree 5 zetin a vawt a ni. |henawm state, Manipur-ah pawh thlasik a na hle a, nimin khan a vawh lai berin Celcius degree 4 a ni a, Met Department chuan He State-a Chandel district chu tun kar chhovah hian a vawt zual hle dawn tih a sawi.
———–

Arunachal Pradesh-a Tirap Dist-ah sawrkar kutah ramhnuai mi 20an inpe. Thuneitute sawi danin, nimina Kholsa khuaa 19 Assam Rifles (AR) kuta inpe-te hi NSCN (IM) hel pawl mi 10, ULFA mi 6 leh ANLA mi 4 an ni a, an ralthuam, Pistol pasarih , revolver 1,  9 mm carbine 3, China siam .22 rifle 1, grenade 2, radio set  2 leh puak thei thil siamna hmanraw thanhnem tak sawrkar kutah an hlan tel bawk. Nimina an puala hun hman-ah Brigadier JS Negi chuan, hel inpe te chu an thutlukna huaisen tak avanga a fak thu leh, hel dang pawh sawrkar kuta him taka awm duhin an inpek zel a beisei thu a sawi a, hel inpe-te chu sawrkarin an hamthatna a ngaihtuahsak dawn tih leh, an chhungte thlenga an khawsak dan tur ngaihtuah an tum thu a sawi bawk.
———-

Nizan khan Mumbai khawpui chhung, Siddhivinayak temple kawta riak, puithiam engemawzat chu mi tu tih hriat lohin tiangin kut an thlak a, he thil thlengah hian mawhphurtu-ah MNS mi-te chu puh an ni. Hetianga sakhaw puithiam temple kawta riak kutthlak an nih chhan hi, Hindu pawl pakhat, Akhil Bhartiya Brahmin Mahasangh hruaitu, Kuldip Bhardway-a’n MNS hruaitu, Raj Thackeray-a sawiselna tawngkam a chhak chhuah vang ni a hriat a ni a, he thil thlen lai hi ram puma hmuh theiha chanchin thara tarlan a nih avangin, sakhaw hrang hrang betute chuan an ngaimawh hle a, politics thil avanga sakhaw hruaituten kut an tuar chu an hriatthiam loh thu, sakhaw hruaitute chuan an sawi a, he thil thlenga mawhphurtu-a puh, MNS party chuan, TV-a lang, he thil thlenga puithiamte kutthlaktu zingah an pawl mi leh sa tumah an awm lo niin an sawi a, Mumbai Police te chuan thlalaka lang, kut thlaktute hi an chhui zui mek a, man erawh chu an la nei lo a ni. 
————-

CNN-IBN  chuan, rimawi tum thiam leh zai thiam AR Rahman chu, Indian of the Year-ah nizan khan a thlang a, he chawimawina hi PM, Manmohan Singh-a’n a hlan a ni. Chawimawina hlanna inkhawm, New Delhi-a neihah, Rahman chuan, a rimawi leh hlate chu, ram chhunga hnam hrang hrangte inkara inunauna siamtu ni se a duh tih a sawi a, rimawi khawvelin dinhmun sang tak a chan tak avanga a lawmthu a sawi bawk. Slumdog Millionaire Music Film tana Music a siam avanga Oscar Award dawngtu, Rahman chuan, rimawi hmanga pathian chawimawi leh khawvel pum huapa zau zawka rimawi rem chu a duhthusam a ni tih a sawi. PM pawhin, Rahman-a rimawi chu, thuk taka mi hip thei leh hneh thei a ni tih sawiin, US President chenna White House-a Rahman-a rimawi tum a ngaihthlak tum phei chuan, hlimna-in a khat tih a sawi a, India mite rimawia an takzia a hmuh phah niin a sawi. He inkhawmah hian Congress General Secretary, Rahul Gandhi MP chu, Politician of the year chawimawina hlan a ni a, Rahul Gandhi hi dinhmun chhe taka Congress a awm laia chhanchhuak a, thalai zawkte politics-a hip luttu a nih avang leh ram tana hmathlir fel tak a neih avangin he chawimawina hi pek a ni. He inkhawmah hian ram chhung hmeichhe zingaBadminton-a super Series title la hmasa ber, Saina Nehwal, Satyam Computers tlu chhe tur tungding lehtu Kiran Karnik, C Achuthan leh Deepak Parekh, Tlawmngai pawl Pratham, Test Cricket-a number one kai ta, India Cricket Team, kum 50 chhung lemchang thiam lar ni tawh, Tamil mi, Kamal Haasan leh rimawi tum thiam, Ravi Shankar-te chawimawina hlan an ni bawk.