www.zonet.in

RAM PAWN CHANCHIN THAR

Iran President, Mahmoud Ahmadinejad-a’n nuclear hmanraw chungchanga UN-in inbiak hma hauhva an ram chu hrek a tum a nih chuan, hrek mai se pawi an ti lo tih a sawi.  He thu hi ABC news-in a kawm-naah sawiin, tun hnaia Times chanchinbu-in, an ram nuclear ralthuam-te en chhin tum anga a chhuah pawh America sawrkarin puh chhiat a tumna mai mai niin a sawi a, an ram nuclear ralthuam chungchang chuan sawi a hlawh-in, fiamthu nuihzatthlak lo leh an hriat zin tawh, nuihpui theih tawh loh ang mai niin a sawi bawk. President Ahmadinejad chuan, an ramin nuclear hmanrua a siam chhuahte chu, kawlphetha tihchak nan leh, a tha zawnga an ram hmasawnna kawng hrang hranga hman tur niin a sawi nawn leh bawk. Kar kal ta khan Times chanchinbu chuan, kum 2007 atanga Iran-in an ram nuclear hmanraw chungchanga ruahmanna a siamte ziaka dahna fel tak an nei tih an chhuah a, he lehkha-a a lan danin, Iran hian kum li chhunga tihhlawhtlin turin, nuclear ralthuam tipuak thei thil en chhinna tur, hmun li-ah a ruahman a, hetiang thuchhuah hi President Ahmadinejad chuan America sawrkar thu phuahchawp mai mai niin a sawi. Iran-in nuclear ralthuam hmanga ram dang beihna tur ralthuam neih a duh loh takzet niin President Ahmadinejad chuan a sawi bawk a ni. Iran hian a nuclear sawngbawlna hmun siam chungchanga  UN thu a zawm duh loh avangin, UN-in hrekna tur ruahmanna pathum a siam mek a, hemi chungchang pawh hi President Ahmadinejad chuan sawi langin, UN-in an ram laka beisei a neihte chu inbiak phawt hnua a chin fel dan ngaihtuah a duh thu leh, he thil hi sawiho lo-a UN-in a ngaihdan anga an ram hruaitute an be ngawt thin chu tha a ti lo tih a sawi a, an ngaihdan pawh ngaihtuah ve se, hei hi UN-in a ti thei lo a nih chuan, an ram chu an duh leh hrek mai se pawi an ti lo niin a  sawi bawk. Hei bakah hian President Ahmadinejad chuan an rama inthlan kaihhnawiha eptu pawl mi an man engemawzat chunga mihring dikna leh zahawmna bo thak khawpa sawrkar sipaite an che nia puhna chu thu dik lo niin a sawi a, an ramah dan leh hrai fel tak zam a ni tih sawiin, mi tangte pawhin anmahni pualin ukil an rawih theih thu leh, thil dik lo titute chu dan anga rorelsak an nih thin thu a sawi a ni.

Colombia-a hel pawl lar tak, Farc chuan an ram chhung, Caqueta Province Governor, Luis Fernando Cuellar chu Florencia khawpuia a chenna In atangin an ru bo. Caqueta Province sawrkar Secretary, Edilberto Ramon Endo chuan, Farc mi 20 chuang, silai kengin Luis Fernando Cuellar hi a inah luh khungin an man tih an sawi a, amah vengtu Police kap hlumin, tihluihna in a In atang hian an hruai chhuak niin a sawi. Farc hel hi Colombia a helho zinga upa ber leh lian ber an ni a, pawl chak tak, mi 16,000 chuang awmna ni thin a ni a, amaherawhchu an ram President atana Alvaro Uribe thlan a nih hnu atangin an pawl hi an chep zual a, tun hnaiah phei chuan an pawl mi hi 9,000 vel chauh an ni tawha hriat a ni.
————–

|anpuina hnathawktu pawl, Oxfam Director, Jeremy Hobbs chuan, Gaza-a Israel leh Palestinian hel pawl, Hamas inkar buai avanga harsatna tawkte chu khawvelin ngaihtuah se a duh thu a sawi. Hobbs chuan, Israel-in Gaza-a Palestinian hel pawl, Hamas ho avanga Palestinian mite, kum hnih leh a chanve kal ta atanga a hreng bet reng chu tha a tih loh thu sawiin, he thil-ah hian Israel mai ni loin, khawvel ram dangte pawh he harsatna su kiang tura Israel nawr duh loah a puh bawk. Hemi chungchangah hian Israel PM thupuangtu chuan, Gaza-a Palestinian-te chu ei tur leh damdawi bakah kawlphetha an pek reng thu sawiin, hrekna dang an lek mek erawh chu Hamas helhoin Israel an beih an tihtawp hma chuan an keng tlang zel dawn tih a sawi.
————

Venezuela sawrkarin thlawhna khalhtu awm lo, remote control hmangin Colombia sawrkarin a enthla nia a sawi chu, Venezuela sawrkarin thu dik lo niin a sawi. Venezuela President, Hugo Chavez chuan he thu hi Pathianni khan a sawi a, Colombia sawrkar leh US tang dunin an ram chhunga hmun pawimawh nia an ngaihte chu thlawhna khalhtu awm lo hmangin a thla an la niin a sawi a, hei hi Colombia Defence Minister chuan thu dik lo ni-a sawiin, Venezuela sipaite chuan Krismas putar thlawk kual an hmu sual mai mai a ni thei tho tih fiamthu-in a sawi zui a ni.
————-

Nepal-a eptu pawl, Maoist-ten ni thum awh bandh an huaihawt chu vawiin khan tihtawp a ni. Kum thum kal ta-a tualchhung indona a tawp hnuah, Nepal chuan a ram chhungah politics vanga buaina a tawk chho  leh mek a, eptu pawl, Maoist hoin ni thum awh bandh an huaihawt chhung hian ram chhung hmun hrang hranga thil siamna leh zirna in bakah sawrkar pisa pawh khar a  ni a, heti chung hian sawrkar laka an thil phutte chu sawrkarin tihhlawhtlin tumin a ngaihtuah hran lo nia hriat a ni a, hetiang renga an boruak a kal a, an buaina hi a punlun chhoh chuan an ramin a tuar leh hle dawn nia hriat a ni. Maoist ho hian an duh dan ang taka an ram chu Communist sawrkara siam an tum leh tan tawh nia hriat a ni a, an ram Parliament-ah member 40 lai an la neih bawk si avangin, sawrkar rorelna-ah pawh thawm an la nei lian hle a, hei vang hian an duh dan tihhlawhtlin a nih loh chuan, tun hma a an lo khawsak tawh thin anga tharum thawhna hmanga sawrkar nawr duhin an awm leh mai dawn niin a lang tih Kathmandu Tribhuvan University-a Political Science Professor, Lok Raj Baral chuan a sawi a, sawrkarin anmahni do zawnga thil a kalpui a nih chuan, Maoist ho avang hian an ram chuan thisen chhuahna leh buaina lian tak an tawng leh ngei dawn niin a sawi.
———–

Serbia chuan European Union member ram 27 zinga tel dilna, vawiin khan a thehlut. Serbia President, Boris Tadic chuan an dilna hi Sweden Prime Minister, Fredrik Reinfeldt-a hnenah a thehlut a, hetih lai hian member puitling ni tur chuan, Croatia rama pawi khawihna thlentu Serbia mi pahnih,  Gen. Mladic leh Goran Hadzic-te chu, an thubuai ngaihtuahtu, International Criminal Tribunal kutah an hlan phawt a ngai dawn a, hei bakah hian Netherlands sawrkar chuan EU-a Serbia teltir ve hi a la remti lo nia hriat a ni. Serbia hian EU member ram ni turin hun rei tak a lo bei tawh a, an rama cheng mi thenkhat phei chu, EU member an nih hma hauhin, EU ram hrang hranga kal theihna VISA pek an lo ni tawh a ni.
————-

Europe ram hrang hranga khaw vawt lutuk avanga ni thum chhung chawlhtir tawh, Eurostar rel chak chi chu, dan pangngaia tlantir leh a ni. Puan tawh angin Eurostar rel pali chu Channel tunnel an tih, lei hnuaia rel kawngah tun hnai khan khaw vawt lutuk avangin a tang a, khualzin tam takin harsatna an tawh avangin, Eurostar chuan hmun danga an rel tlan tur-te pawh ni thum chhung a lo titawp lailawk tawh a, hei vang hian an rela chuang duh, mi sing 4 chuangin harsatna an tawk niin Eurostar hotu, Nicolas Petrovic chuan Associated Press news agency  a hrilh a, an relte an tlantir leh hnuah pawh thuchhuah siamin,  khualzinte chu a tul fe a nih loh chuan zin rih lo turin an ngen a ni. Rel-te hi tlantir ni mah se, Europe-a khaw vawt lutuk hian ziaawm lam a la pan chuang lo a, thlawhtheihna a mumal loh avang leh, kawngpui tam tak, vur tla-in tlan tlang theih loha a hnawh avangin, Krismas dawna mahni khaw lam pan tum, mi tam tak an buai hle a ni.
———-

Pakistan khawpui pakhat, Peshawar-a thih chilh bomb puakah mi 3 an thi a, mi dang 10 vel an hliam. Vawiina bomb puak hi Peshawar-a hmun pawimawh tak pakhat, thuthar lakhawmtute fuan khawmna hmun, Press Club kawta tihpuah a ni a, bomb tipuaktu hi Press Club-ah hian luh a tum a, hei hi Police-ten Gate bulah lo dangin, hemi hnu hian a bomb pai chu a tipuak ta mai niin Police hotu, Karim Khan chuan a sawi a, he bomb puak hian Press Club vengtute awmna pindan chu a tichhe hneh hle tih sawiin, Press Club darthlalang zawng zawng a chhiat bakah, a kawta ke pahnih nei lirthei 3 leh Bus pakhat pawh a tichhe vek niin a sawi bawk. Mitthi-te hi bomb tipuaktu bakah Police pakhat leh Press Club-a Accountant, hmeichhe pakhat an ni a, heng mite bomb puah laia Gate bula dingte an ni. Peshawar khawpuiah hian tun hnaiah pawi khawihna a thleng ngun hle a, kumin chhunga pawi khawihna thleng zinga rapthlak berah, October ni 28 khan, bomb puak avangin mi 100 chuang an thi a ni.
————–

Mexico City sawrkar rorel khawl chuan a ram chhunga mahni anpui kawp chingte inneih phalna dan a pawm. Mexico City chuan he dan hi nimin khan a pawm tih a puang a, Latin America ram zinga he dan pawm hmasa ber a ni. Mahni anpui kawp chingte chu mipa leh hmeichhia innei-te ang thoin sawrkarin hamthatna hrang hrang a siamsak dawn a, hei bakah hian fa lak pawh phalsak an ni bawk ang. He dan hi an rama rorel khawl in pawm tawh mah se, Mexico City Mayor, Marcelo Ebrard chuan a pawm ve leh phawt a ngai dawn a, he dan hman theih tura Bill put luh pawm a nih thu an hriat hian, mahni anpui kawp ching mi tam tak chu khawlaiah pung khawmin, an ram rorel khawl thutlukna hi lawmin hun an hmang a, he dan hman a nih theih nana tan latu, Social Democratic Party mi, David Razu chuan, an rama inthliarna awm theite chu paih bo a ni ta niin a sawi a. Hetih lai hian Mexico Catholic Archdiocese chuan, mahni anpui kawp chingte innei thei tura dan siam a ni chu mihring kalphung pangngai a ni lo hrim hrim tih a sawi a, an rama rorelna chelhtu, National Action Party a dan siamtute zinga mi, Giovanni Gutierrez pawhin,  he dan hman tura pawm a ni hian an khawtlang nun a tihchhiat a rin thu sawiin, naupang rilru-ah  pawh he dan hian  thil tha lo tak a tuh dawn niin a sawi bawk.