www.zonet.in

RAM CHHUNG CHANCHIN THAR

FBI ten-Lashkar-e-Taiba mi an man, David Headley leh Tahawwur Rana ten India ram an luh theihna tura visa an dilna lehkha chu ruk bo a ni tih sawrkar laipuiin a puang. Minister of state for External Affairs, Shashi Tharoor chuan, Headley leh Rana-te visa dilna lehkha  hi Chicago atanga ruk bo a ni ngei tih a puang a, Rana-a dilna hi chua awmna chin hriat theih mai tur awm anga a lan avanga zawn mek a nih laiin Headley-a visa dilna erawh a bo dan chin an hre lo tih a sawi a, Foreign Minister, S M Krishna chuan hemi chungchangah hian Chicago-a India Consul General, Ashok Attri pawh an be tawh tih sawiin, an chhanna atangin heng mi pahnihte thil bo chungchang bawhzui dan tur hi rel theih a ni chauh dawn niin a sawi. Hetih lai hian Tahawwur Rana leh David Headley-te hi man an nih atangin, India rama lut tura Visa an dilna lehkha, Chicago-a Consulate General-a mi chu him thei ang ber tura an ngaih angin an dah niin Consul General  Ashok Attri chuan NDTV a hrilh a, tuna a bo anga thuthang awm pawh engmah hriat an nei lo tih sawiin, Headley-a leh Rana ten India rama zin tura Visa an dilna-ah, dan kalha  thil tih engmah a awm loh thu leh, mi dang ang tho a enfiah ngai awm zawng zawng an enfiah thu a sawi a,Visa chungchangah hian US sawrkar chuan inrawlhna engmah a nei lo tih a sawi bawk. National Investigation Agency chuan heng mi pahnihte hi Mumbai beih chungchanga an inhnamhnawih em tih chhuina-ah an Visa dilna lehkha hi an nghak mek a, a bo tih thuthang chungchangah hian sawrkar laipuiin a bo ngei a ni tih sawi mah se, a bona hmun nia sawi, Chicago-a India Consulate chuan a bo lo niin an la sawi tho a ni.

Andhra Pradesh atanga Telangana state hran din duhtute zinga mi, Praja Rajyam Party MLA, Chiranjeevi chuan a rilru thlakin, Andhra Pradesh then darh a duh lohzia lantir nan MLA a nihna atangin a bang tih a puang. He thu hi vawiina thuthar lakhawmtute a kawmnaah sawiin, amah bakah Congress, Telugu Desam leh Communist party-a tun hmaa Telangana State hran din duhtute zinga mite pawhin amah ang tho hian rilru an pu nia a hriat thu a sawi a, hetianga a rilru a thlak chhan hi, Andhra Pradesh mipuite rilru ang a put avang leh an harsatna tawh a hriatthiam pui vang a ni tih sawiin, mipuite duh danin a rilru a thlak ta niin a sawi. Andhra Pradesh hian hetianga harsatna hi a la tawk ngai lo tih a sawi bawk. Chiranjeevi-a’n an party, Praja Rajyam Party duh dan kal pela thu tlukna a siam avang hian, mipui lungawi lo tam tak chu vawiin khan an office kawtah an pung khawm a, an party, Praja Rajyam Party (PRP) hian kumina Lok Sabha inthlan-ah, Telangana State hran ngiatna an thlawp tlat tur thu an puang avang leh Chiranjeevi ngei pawhin, kar kal taa party hrang hrang inhmuhkhawmnaa an Chief Minister hnenah Telangana State hran din tura a la tih avangin, a thu zuk leh a  thutlukna hran a siam leh ta hian an party chhungah buaina a siam phah a, an party hruaitu lu, Chandrababu Naidu chuan hetianga party chhunga buaina chhuah chhanah hian sawrkar laipui chu mawh puhin, Telangana state hran siam tumnaah state chhunga party-te chu sawrkar laipuiin a rawn lo chu mak a ti tih a sawi. Andhra Chief Minister, K Rosaiah pawhin, Congress kaihhruai UPA sawrkar chu Telangana State hran dinna tura thu tlukna a siamah a dem thu sawiin, he thil thlengin an state chhunga party hrang hrang boruak a tihchhiat dan leh an harsatna tawh mekte sawipuiin nizan khan  Home Minister, P Chidambaram-a a hmu a ni. Vawiina Telangana state hran siam chungchang buaina avanga bang ta Chiranjeevi hi a ban chhanah mi tam tak chuan Film chan thiam a nihna anga a hun lo la awm tura harsatna a tawh phah a hlauh vang niin an sawi a, MLA atanga a ban chhanah hian politics ai mahin a film chan leh a chhungte film siam tur a hlawk loh a hlauh vangah an ngai a ni.
———–

Hetih lai hian vawiin Lok Sabha inkhawm chu Telangana state chungchang avang bawkin tihtawp a ni leh a, House inkhawma zawhna leh chhanna hunah TDP MP-te chu ding chhuakin, Andhra Pradesh then darh an duh lohzia tih lan nan “We want united AP” tih thuziak tar chhuakin, House inkhawm hi an tibuai a, hei hi Congress member-te chuan thu ziak hmang veka chhangin, Telangana state dam reng rawh se tih ziakin an tarlang ve thung a,  Speaker Meira Kumar-in TDP member te hi thu tura a khap hnuah pawh thu lo a an au zui zel avangin, House inkhawm hi minute 15 chhung atan tihtawp lailawk a ni leh ta a ni.
————

Sik leh sa inthlak danglam tur ven dan ngaihtuaha khawvel ram hruaitute inhmuhkhawmnaa naktuka tel tur, PM Manmohan Singh chuan, sik leh sa inthlam danglam tur ven dan ngaihtuahna-ah ram thang lai mekte retheihna tizual tur chuan thutlukna siam a ni lo ang tih a sawi. PM chuan India chuan sik leh sa inthlak danglam chak lutuk ven kawngah mawhphurhna pawimawh tak a nei ve tih a sawi a, naktuka Copenhagen summit-a a thusawi naah India chuan kum 2020 hmain a boruak chhe tihchhuah za-a 20 atanga 25 a tihtlem a tum tur thu a puang ve dawn tih sawiin, hei bakah hian sik leh sa inthlak tur veng turin Action Plan on Climate Change leh  National Missions te din a tum tur thu a puang dawn tih a sawi.
——–

Central Administrative Tribunal (CAT) chuan sawrkar hnathawk kaisang tur reng rengte chu an hnathawh dan kim chang ziahna, Annual confidential report (ACR) en hmasak phawt a ni thin ang tih a sawi. CAT member, Shanker Raju leh Ramesh Chandra Panda chuan, sawrkar hnathawkte chu an hnathawh dan kimchang ziahna ACR bakah, an hnathawhpuite bula an khawsak dan, a theih chin chin hriat an tum dawn niin an sawi a, thawhpuite tana mi hnawksak tak chu an hna atanga kaisantir loh hram dan an ngaihtuah dawn tih an sawi.
———-

Assam Chief Minister, Tarun Gogoi chuan nimin khan Delhi-ah Defence Minister, A.K. Antony hmuin, an state atanga inlak hran ngiata sawrkar nawrtute chungchang a sawipui. Gogoi hian an state-a hel pawl pakhat, ULFA chungchang pawh Defence Minister hi a sawipui a, hel pawl hrang hrangte nena remna siam chungchangah state sawrkar leh sawrkar laipuiin tih theih a neih ang angte pawh sawipuiin, an state chhunga helho beih nan sawrkar laipui chuan sipai leh tanpuina sum tam zawk pe thei se a ti takzet tih a hrilh bawk. Defence Minister chuan Gogoi a thu thlente hi a rang thei ang bera ngaihtuah an tum tur thu a lo hrilh niin DDI news chuan a sawi.
———–

Orissa state chhung, Jharkhand nena an inrina lai, Sundargarh district-a Taiburu ramhnuaiah Maoist hel pawl mi 4 man an ni. Police-te chuan an mi man zinga pathum hi Jharkhand mite niin an sawi a, heng mite hi Koida police sub-inspector, Ajit Bardhan thahnaa inhnamhnawihna nei nia an hriat thu an sawi bawk. Orissa-ah hian CRPF, SOG leh Police tangkawpin, Jharkhand nena an inrina lai ramhnuaiah, helho dap hna hi an thawk mek a, tun hnaiah bomb leh puak thei thil chi hrang hrang manin, an hma lakna avang hian,  helai biala Maoist hel ho vanga an khaw chhuahsante pawh an khaw lama kir leh turin an inbuatsaih chho mek nia hriat a ni.
——–

Karnataka High Court Chief Justice, P D Dinakaran chuan, a thubuai a fel hma chuan Court-ah thubuai ngaihtuahin a thu tawh dawn lo tih a sawi. Dinakaran-a thutlukna hi a ai awihin Registrar Judicial-in a puang a, Supreme Court Judge atana ruat a nih hnua a hna a tan hma hauha eiruk thubai siamsak, Chief Justice P D Dinakaran-a thu tlukna hi, Advocates Association of Bangalore President, K N Puttegowda chuan thu tlukna dik tak a ni tih sawiin, a thubuai  fel hmaa thubuai ngaihtuah tawh lo tura a intiamna hi, a thubuai neih tan tirh atanga a tih tur nia a hriat thu leh, an state chu a theih phei chuan chhuahsan hial se an duh tih a sawi bawk. Hetih lai hian Karnataka High Court Chief Justice a nih angin,  Registrar General, Registrar Judicial leh Registrar Administration-te chuan ni tinin Dinakaran hi High Court kal dan tur sawipuiin a chenna-ah an hmu thin dawn a, ni tina hetianga hmuh a ngaih chungchangah hian Advocate General B V Acharaya chuan, Karnataka High Court kal dan phung rel fel turin, Supreme Court chuan ruahmanna siam mai se a duh thu a sawi.
———-

Prime Minister Manmohan Singh-a’n Copenhagen a panna tur thlawhna chu a tuialhthei bawm leh a thlawhna peng dang a insik theih avangin a thlawh chhuah hun hi darkar li-a tihkhawtlai a ni a, thlawhnaa PM a chuan hmain he thil fel lo hi hmuh chhuah a ni. Hetiang thlawhna chiang tawk lovah hian PM chuan phal a nih loh avangin thlawhna dang a hman a ngai dawn ta a ni. Thu dawn pakhat chuan, thlawhna chhunga ei tur sem tur nawr luhna nawrlirhin thlawhna hi a su niin a sawi.