www.zonet.in

RAM PAWN CHANCHIN THAR

Denmark khawpui, Copenhagen-a khawvel sik leh sa inthlak danglam tur ven dan ngaihtuaha ram hrang hrang hruaitu kal khawmte chuan tun thlengin thu tlukna mumal an la siam thei lo. Ram hausa leh ram thang lai mekte chuan, tu in nge boruak chhia titlem ang a, ram hrang hrangte chuan sik leh sa inthlak danglam tur ven nan engzat chiah nge boruak chhia tihchhuah loh tur tihah leh, ram rethei zawkte tana tanpuina sum pek zat turah engmah thu tlukna an la siam lo a, hetih lai hian ram hausa zawkte chuan sum theh chhuah zat tur hi a thuphungin ruahmanna an siam tawh nia hriat a  ni. Kar hnih awh tur, he summit hi naktuk-ah khar a ni dawn a, heti chunga thutlukna mumal siam theih a la nih loh chungchangah, Britain sorkara Energy and Climate Change Secretary, Ed Milliband chuan, thil engemaw hote avangin kar hnih awh he summit pawimawhna hi a bo vek thei tih sawiin, ram hruaitute hian an ngaihdan theuh sawiin, he summit hlawhtlin dan tur hi an ngaihven reng tur a ni a ti a, European Commission President, Jose Manuel Barroso pawhin, tun thlenga thu tlukna fumfe tak siam a la ni lo chuan a tilawm lo hle tih a sawi. Venezuela President, Hugo Chavez pawhin khawvel sik leh sa inthlak danglam danah ram hausa leh thil ti thei zawkten mawh an phur tih sawiin, siam tha tur pawhin hma an la ngei tur a ni a ti a, United Nations Development Programme (UNDP) Policy Advisor, Olav Kjorven thung chuan, summit an tan dawna khawvela nghawng a neih nasat ang bawkin he summit hian a tawpah chuan khawvel tan a tha zawngin nghawng a nei ngei a a rin thu a sawi. Vawiin hian ram hrang hrang 130 chuanga hruaitute chuan he summit hi an chhim a, naktukah chuan ruahmanna tha zawk siama he summit hun tawp lam hi hman theih ngei beiseina a awm a ni. Summit ni tawpa tel tur hian China Prime Minister Wen Jiabao chuan nimin khan Denamrk khawpui hi a thleng a, ram hrang hruaitu lu zingah German Chancellor Angela Merkel, British Prime Minister Gordon Brown, Brazil President Luiz Inacio Lula de Silva leh Iran President, Mahmoud Ahmadinejad-te chuan vawiin khan he summit-ah hian thu an sawi a, US President, Barack Obama pawhin, naktukah he summit hi a hmanpui ang.

Mexico-a ruihhlo hmanga sumdawng pawl hotu langsar ber zinga mi, Arturo Beltran Leyva chu an ram sipaite nena an inkahna-ah a thi. Mexico city chhim lama Cuernavaca-a in pakhatah sipaite leh heng ruihhlo-a sumdawng pawl, Arturo Beltran Leyva leh a thuihruai mi 4-te hi an inkap a, sipaite hian an vaiin an kap hlum nia hriat a ni. Arturo Beltran Leyva hi ruihhlo-a sumdawng pawl hotu zinga an hotu lawk lehzual, “boss of bosses” tia hming lem an vuah hial a ni a, an ram sawrkarin a lu manah dollar maktaduai leh nuai 1 a phal mek a, tun hma lam chuan a unau dang mi pali nen ruihhlo sumdawng pawl pakhat, Sinaloa-ah an awm ho thin a, hemi hnu hian an pawl hi keh darhin, pawl hran a din a, hemi hnu hian  Mexico-a ruihhlo-a sumdawnna kaihhnawiha tualthahna chu a pawng sawta hriat a ni a, an pawl keh darh hnu hian tun thlengin, ruihhlo kaihhnawih buaina avangin Mexico-ah hian mi 14,000 vel an thi tawh nia hriat a ni.

Hetih lai hian Mexico Police-te chuan, an ram hmar lama Durango state-a biak in pakhatah, ruihhlo-a sumdawng pawlte tih ni ngeia hriat,  mitthi ruang, lu bung 6 an chhar niin an sawi a, hei hi kar kal ta-a ruihhlo-a sumdawng pawlte intihbuaina-a Gulf Cartel hoin, sumdawng pawl danga mi 10 an thahsak phuba lakna nia rin a ni a, tun tuma an mi thahte lu an tansak hi Biak In kawtah sarang ip-a thunin an hnutchhiah niin an sawi bawk.
————

Brazil-a naupang pakhat, kum 2 mi chu, a nu-in a pum na damdawi ina a entirnaah, a taksa-ah hriau inchi 2-a sei, 40 lai vih luh a ni tih hmuhchhuah a ni. He naupang hi Brazil-a Bahia State-a cheng a ni a, a luak leh pum na avanga a nu ngaih tha lo-in damdawi inah a hruai a, a taksa chhunga hriau awmte hi hmuh a ni ta a ni. Police-te chuan he naupang chanchin hi chhui zui nghalin, he thil titu-ah hian a pahrawn, Roberto Carlos Magalhaes chu an puh a, amah pawh hi man nghal a ni a, a thil tih hi a inpuang tawh a ni. A inpuan dan chuan, a pizawnin he thil hi a nupui hlui laka phuba lak nana ti tura a hrilh anga a tih niin a sawi a,  a inchhir thu sawiin ngaihdam a dil niin Ibotirama police hotu, Helder Fernandes Santana chuan a sawi. A pizawn hian he naupang hi inthawina atana that turin a ti niin a sawi bawk. Naupang enkawltu Doctor-te chuan he naupang taksa-a hriau vih luh zinga a tam zawk chu lak chhuah theih an inbeisei tih an sawi a,  pakhat erawh chu a taksa chhunga a luh thuk avang leh an phawi chuan a taksa tana a that loh zawk an hlauh avangin phawi chi a ni dawn lo niin an  sawi a, he naupang taksa-ah hian hriau luhna hmuamhma emaw ser emaw pawh engmah a awm lo niin an sawi bawk.
————–

Colombia-a hel pawl pahnih, Farc leh ELN te chuan an rama US tanpuina-a sipai awmte bei turin inzawm khawm an tum tih an puang. The Revolutionary Armed Forces of Colombia (Farc) leh National Liberation Army (ELN) te chuan thuchhuah intawm siamin, pawl pahnihte hian inzawm khawm turin hma an la mek tih an sawi a, BBC chuan heng pawl pahnihte hi an thil tum leh kal dan phung inang lo mah se, pawl khat anga an ding a nih chuan Colombia-a kum 45 chhung hel tawhte hian an ramah nghawng an nei lian hle dawn niin a sawi. He an thuchhuah hi Farc website ah tihchhuah a  ni a, an thuchhuahah hian America chu mi dang hnuaichhiah leh mi dang awp beh tum reng a nih avangin an huat ber a ni tih an sawi. Farc hi Colombia-a hel pawlte zinga upa ber a ni a, an pawl tana thawk hi mi 16,000 vel an awm mek nia hriat a ni a, an rama thingtlang khaw hrang hrangah awm hmun khuarin, ruihhlo-a an sumdawnna atangin sum an la lut ber nia hriat a ni. Hetih lai hian ELN ve thung hi chu kum 1965-a din tan chauh a ni a, an ram khawpui lian deuh deuhah mi leh sa neiin, politics thilah pawh hnuhma an nei lian hle nia hriat a ni.
————–

South Korea-a Gyeongju khaw bula Bus chesualah mi 17 an thi a, mi dang 14 an hliam. He bus hi khual zinte phur kual thin a ni a, a chetsual lai hian kum 70 atanga 80 inkar mi 31 a phur a, an khawpui, Seoul atanga km 300-a hla, tlang rama an tlan laiin, khamah metre 20 vel a lum niin Police-ten an sawi a, a chuanga te hi an upat hlawm em avangin hliamte pawh hi an dinhmun a derthawng hle nia sawiin, Bus chetsual chhan hi an chhui mek tih an sawi.
———-

Pakistan Supreme Court chuan an President, Asif Zardari leh an ram Politician thenkhat, eiruk thubuaia an fihlim theihna tura dan siam chawp chu an ram danpui kalh a ni tih a puang. President leh Politician te, an thubuaia hum an nih theihna dan hi an ram President hlui, Pervez Musharraf-a’n Benazir Bhutto-i thubuai nei miah lo anga an rama a kir leh theihna tur leh, an ram hruaitu a nih leh theihna tur remchang zawnga President a nih laia a siam chawp a ni a,  he dan hi an ram Supreme Court chuan ngaihtuah nawnin, tuna an President Zardari leh Politician thahnem tak, eiruknaa inhnamhnawiha puh mekte chungah Court-in hremna a lek thei dawn tih a puang a ni. Chief Justice Iftikhar Chaudhry chuan, Supreme Court-a hemi chungchang ngaihtuahtu Judge 17 awmna bench chuan, President hlui Pervez Musharraf-a’n dan a lo siamchawp tawh chu an hnawl tih a puang a, BBC chuan he dan hnawl a nih avang hian Pakistan-a politician sang 8 chuang, he danin a lo hum tawhte dinhmun chu a chhe hle niin a sawi a, President Zardari pawh President a nih chhung chu Court hmaah hian la him thei mah se, President a nih hmaa thubuai tam tak a lo nei tawhte leh, eiruk thubuai avanga kum 1 lai a lo tan tawhna te chu President hna atanga a chawlh hnua a dinhmun tichhe vek thei khawpa thu lian a tling nia hriat a ni.
—————–

Yemen Defence Ministry chuan, an rama Al-Qaeda mi firfiak 34 an that niin an sawi a, mi dang 17 pawh man an ni tih a sawi. Yemen sipaite hian indo thlawhna leh sipai engemawzat hmangin nimin khan Al-Qaeda mi firfiakte nunchan zirna hmun an bei a, he an beihpui thlakna-ah hian an hlawhtling hle ni-a hriat a ni a,  Reuters news agency  chuan, Al-Qaeda mi firfiakte hian Yemen-ah pawi khawih tumin ruahmanna hrang hrang siamin, Abyan province leh Arhab province chu an pawi khawihna tur hmun atana an ruahman a nih thu leh, tuna  sipaite hlawhtlinna hian an ruahmanna neih sa engemawzat chu a thulhtir ngei a rinawm tih a sawi.