www.zonet.in

RAM CHHUNG CHANCHIN THAR

Parliament in hnih thutkhawmah eptu pawlten thil man sang zel leh Telangana state hran din tumna duh lohna an lantir avangin vawiin khan rorel inkhawm tihtawp lailawk a ni. Lok Sabha-ah chuan Speaker, Meira Kumar-i’n a thuthmun a luah rualin eptu pawlte an ding chhuak nghal a, thil man sang chungchang leh, Telangana chungchanga an lungawi lohna au puiin House inkhawm hi an tibuai nghal a ni. BJP, Left, SP, BSP leh Shiv Sena member te chuan ram mipuiten an ni tin mamawh an leina man chu UPA sawrkar din a nih atangin mipuite hamthatna tura ruahman a la awm ngai lo niin an sawi a, hei bakah hian TDP member-te pawhin Andhra Pradesh then darh an duh lohzia tlangaupuiin House inkhawm hi an tibuai a ni. Eptu pawl au bengchheng nasa tak karah Speaker chuan, thil man sang chungchang chu tun session chhunga an sawi ho tawh avangin sawiho a ni tawh dawn lo tih a sawi a, eptu pawlte chu thu dang rel theih loh khawpa an bengchhen avangin House inkhawm hi darkar chanve chhung tihtawp lailawk a ni. Rajya Sabha-ah pawh Chairman, Hamid Ansari-a’n a thutna a thlen hma hauh atangin eptu pawlte hiHouse-ah an au nghal a, TDP MP pahnih, M V Mysura Reddy leh Nandamuri Harikrishna-te chuan Telangana state hran din an duh lo thu an sawi a, hei hi an state Congress MP-te chuan lo hnial buaiin, eptu pawl BJP, Left leh SP MP-ten thil man sang chungchang an lo au chhuahpui ve bawk avangin rorel inkhawm hi darkar chanve chhung tihtawp a ni bawk.

Cabinet Committee on Political Affairs chu Telangana chungchang ngaihtuahin nimin tlai khan PM hovin an thukhawm. Hetah hian Finance Minister, Pranab Mukherjee,  Home Minister P Chidambaram, Agriculture Minister leh NCP hruaitu Sharad Pawar, Railway Minister leh Trinamool Congress hruaitu Mamata Banerjee, Textiles Minister leh DMK hruaitu Dayanidhi Maran, Cabinet Secretary K Chandrasekhar leh Home Secretary G K Pillai bakah Cabinet minister dangte pawh an tel a, an thutkhawm zawh a nih hnu hian Prime Minister Office (PMO) chuan thuchhuah siamin, sawrkar laipui thutlukna anga Telangana state hran din duh lotuten buaina an siam zel loh nan Andhra Pradesh-a Political Party hrang hrangte chu remna leh muanna a awm theih dan zawng turin a ngen a ni. Cabinet Committee on Political Affairs thutkhawmnaah hian UPA sawrkara party hrang hrang inthlung khawmte ngaihdan a inang lo hle nia hriat a ni a, Telangana state hran siam hi Congress thawhpui, DMK leh Trinamool Congress-te chuan tha an ti lo nia hriat ni mah se, an thawhpui Party dangte chu buaina siam zawnga che lo hram hram turin Congress hruaitute hian an ngen a ni.

Hetih lai hian Telangana state hran siam duh lotu, Congress MP  L Rajagopal leh hruaitu dang, tiam chin awm lo-a chaw ngheite chuan vawiin khan an chaw nghei an la chhunzawm a, Rajgopal  chuan, Andhra Pradesh state then hran a nih loh nan an theihtawp an chhuah zel dawn tih sawiin, sawrkarin thu tlukna a lo siam tawh chu a tihdanglam hma loh chuan chaw a nghei dawn tih a sawi a, an thil tum chu hlen a nih hunah Telugu tawng hmang tute inunauna turin theihtawp a chhuah dawn tih a sawi bawk. Chaw ngheia sawrkar laipui nawrtu, TDP MLA, D Umamaheswar Rao leh Ch Ramakotaiah pawhin ni li chhung chaw a nghei tawh a, nizan khan heng mi pahnihte hi Police-ten tihluihna in damdawi Inah dah mah se, an chaw nghei an la thulh duh chuang lo a ni. Damdawi Ina sawn luh an nih hnuah D Umamaheswar Rao chuan, Andhra Pradesh then darh a nih loh nan a nun a hlan dawn tih sawiin, Police-te chu buaina dang siam loa chaw nghei hmanga sawrkar a nawrna tibuaitu ni mah se, a thil tum an thulhtir thei lo  tih vawiin khan a sawi a, an state CM thi ta,  Y S Rajasekhara Reddy-a unaupa, Y S Vivekananda Reddy pawhin nimin atang khan Telangana state hran siam duh lohna lantir nan Kadapa-ah chaw nghei a tan bawk.
———

Kashmir chhim lama Shopian district-ah hmeichhe pakhat kum 20 mi, Sheeraza Akhtar chu silai keng tu tih hriat lohten nizan khan an kaphlum niin Police ten an sawi. He pawi khawihna hi Shopian district-a Hergam-Keller khuaah nizan dar 8 leh a chanve vel khan a thleng a, pawi khawihtu hi an zawng mek tih Shopian SP, Shahid Mehraj chuan a sawi. He bialah hian kumin June thla atang khan misual kut tuarin hmeichhe panga an thi tawh a ni.
———

Maharastra state chhunga dan lova naupang hnathawk tura chhawr luihte chu Police ten an zawng chhuak dawn niin state Home Minister, R R Patil-a’n a sawi. He thu hi Legislative Council thutkhawmna a Shiv Sena party member,Kiran Pawaskar-a zawhna chhanga a sawi a ni a, Police-te hi tlawmngai pawl hrang hrangin an pui dawn  tih sawiin, kum 2 kal ta pawh khan hetianga Police-ten naupang chhawr luihte an dapna-ah naupang 13,000 chuang, dan lova chhawrte chhanchhuah an ni tih a sawi a, tun tumah pawh hian hlawhtlinna an hmuh an beisei takzet tih a sawi bawk. Patil chuan, naupang, dan lova chhawr luih leh mibo chungchang chhuitu tur department hran pawh Police-te hian an nei tawh tih a sawi a, mi bo-te zawn chhuah an nih theih nan Police-te chuan website hran an siam mek tih a sawi bawk.
—————

Russia sawrkar-in Goa Chief Minister, Digambar Kamat-a hnenah lehkha thawnin, Goa politician pakhat, John Fernandes-a’n Russia khualzin pakhat a pawngsual nia sawi chungchang chu Goa sawrkarin chhui lo se a duh thu a hrilh. Puan tawh angin, Russia khualzin hmeichhe pakhatin John Fernandes hi chawhlui an kil dun hnua a car a pawngsualah a puh a, Russia Consulate chuan, Goa sawrkar hian tualthah thubuai leh pawngsual thubuai chhuina ah hnuhma a nei tha lo hle nia sawiin, hetianga Goa sawrkarin an state chhunga ram dang mite a humhim zawh loh avang hian, Russia khualzinte pawh an thlenna hmun atanga zan dar 10 hnu lama chhuak lo turin hriattirna a chhuah a ni.
————

Sorkar laipui chuan kum 1992 December ni 6-a Ayodhya-a Ram Janma Bhoomi-Babri Masjid tihchhiat a nih dan chhuitu, Liberhan Commission sdenso atan cheng vbc. 9 hman a nih thu a sawi a, Rajya Sabha-a ziaka zawhna a chhannaah Minister of State for Home, Ajay Maken chuan, he Commission-in kum 17 chhung hna a thawh chhung khan sorkarin cheng vbc. 9 leh sang 2 a hmang ral tih a sawi. He Commission hian kum 2008-2009 chhung khan cheng nuai 89, sing 7 leh sang 7 a hmang a, 2001-02-ah cheng nuai 68 sing 5 leh sang 8 hman a ni tih a sawi bawk. Puan tawh angin, he Commission-in report a thehluh luh tur hi vawi 49 pawh sei a ni.
———

BJP hruaitu hlui, Jaswant Singh chu Parliament Committee pawimawh bera ngaih, Public Accounts Committee (PAC) Chairman a nihna atangin a bang a, a banna hi tun thla ni 31 atanga pawm anga ngaih a ni. Pu Jaswant Singh-a hi a lehkhabu ziaha Pakistan hruaitu, Mohammad Ali Jinnah a fak avangin an party atanga hnawhchhuah a ni a, heta tang hian BJP chuan PAC Chairman a nihna atanga bang turin an nawr reng a, hun rei tak a ban duh loh hnuah tunah hian a bang ta a ni.
—————

Janata Party President, Subramanian Swamy-a’n Congress President, Sonia Gandhi-i MP nihna hlihsak tura Delhi High Court-a thu a thehluh chu hnawl a ni. High Court-a a thu thehluh-ah Swamy chuan, Sonia Gandhi-i’n Belgium sawrkar hnen atanga chawimawina a dawn chu chhui chian ngaia a hriat thu leh, hemi chungchang chhui chian a nih hma chuan Sonia Gandhi hian MP a nihna a bansan lailawk tur nia a hriat thu a thlen a,  High Court Chief Justice A P Shah leh Justice S Murlidhar chuan hei hi hnawlin, kum 2006 November thla-a Belgium sawrkarin an rama civil mite chawimawina sang ber dawttu,  ‘Order of Leopold’ Sonia Gandhi-i hnena a hlan chungchang chu Election Commission-in a chhui tawh tih a sawi a,  thil chhui ngai a awm tawh loh avangin Swamy-a thu thehluh anga MP atanga Sonia-i chawlhtir chu thil tih theih a ni lo tih chu an thu tlukna a ni ta a ni.
———
 
State Bank of Indore leh SBI chhun fin tumna duh lovin ram puma bank engemawzat, vawiin khan an nuar a,  he nawrhna hi All India Bank Employees’ Association (AIBEA) leh All India Bank Officers’ Association (AIBOA) an ni a, bank tam tak khar a ni.
————

Mumbai damdawi in pakhata kum 36 chhung ni khaw hre lo-a awm tawh, Aruna Shanbaug-i chu tihhlum mai tur a ni em tih Supreme Court-in a ngaihtuah dawn. Tuna kum 60 mi, Aruna hi nurse hna a thawh laiin,  kum 36 kal ta khan tuna a awmna damdawi Inah hian hmunphiat pakhatin a pawngsual a, hemi hnu atang hian a tawng theih loh bakah a thil hriatna zawng zawng a hloh a, chaw pawh tihluihna-a barh chawp a ngaih bakah, a chhungte pawhin an ngaihven duh lo a, doctor-ten a that chhuah leh theih a beiseiawm tawh lo tih an sawi bawk si avangin, social activist, Pinki Virani chuan Supreme Court-ah Aruna-i hi chaw pek tawh lo phalna a dil a, hei hi Supreme Court-in a remtih chuan ni 4 chhungin Aruna hi a thi mai dawn niin Doctor-te chuan an sawi a, a thih leh dam chungchang hi Supreme Court thutlukna-ah a innghat tawh a ni.