www.zonet.in

RAM PAWN CHANCHIN THAR

Sik leh sa danglam chho mek ven dan ngaihtuaha Denmark khawpui, Copenhagen-a ram hrang hrang aiawh kal khawmna, Copenhagen Summit chu tun kar Zirtawpni khian khar a ni dawn a, an thurel tawhah sik leh sa awm dan chhe zel tur venna atana ruahmanna lian tham leh tangkai tur engmah thutlukna siam a la nih loh avangin, ram hrang hrang aiawhte chuan, he summit hi a hlawhtling lo thei mai dawn nia an hriat thu an sawi. He hun kharna inkhawm leh, a hun tawp lam hmanpui turin, ram hrang hrang atangin an aiawhte tawiawm turin ram hruaitu lu-ten Copenhagen hi an pan mek a, ram hruaitu lu, he hmuna thleng tawhte chu vawiin tlai hian, summit-a an thurel leh thutlukna siam dan tur ngaihtuah-in thukhawm dawn mah se, he summit hian sik leh sa inthlak danglam tur ven kawngah ran tha a chhuah dawn chuang lo nia ngai tam tak an awm tawh a ni. Ram tenau leh rethei zawkte chuanram hausa zawkte chu sik leh sa inthlak danglam tur ven kawngah hian an inphal tawk lo nia sawiin, ram tenau zawkte tanpuina tur sum theh chhuah-ah an inren hle niin an sawi bawk a, hei vang hian nimin pawh khan he summit rorel-na atang hian ram rethei leh tenau zawkte chu lungawi lohna lantir nan an lo chhuak tau tawh a ni. UN Secretary General, Ban ki-moon pawhin, thutlukna siam turin hun an ngah tawh lo hle tih a sawi a, thutlukna siam tura ram hruaitu lute bur bun ngawt chu a dik lo tih sawiin, an innghah khawtlai chuan Zirtawpni-a summit khar ni-ah thu tlukna mumal nei loin, an thil tum chu hlawhchham let derin an tin darh ringawt dawn niin a sawi.

Afghanistan khawpui Kabul-a thih chilh bomb puakah mi 8 an thi. Vawiina pawi khawihna thlenna hmun hi Kabul khawpui chhung, Wazir Akbar Khan district-a Heetal Hotel bulah a ni a, a hmuna awmte sawi danin, bomb hi lirthei ke pali nei pakhatin a phur a, Hotel bul a thlen hian zawi muanga tlanin, Hotel luh hmaa vengtu sipaite awmna bulah lirthei chhungah bomb hi a puak ta a ni. An phurhna motor pawh hi feet 10 vela hlaah bomb hian a paih niin an sawi. Associated Press chuan he bomb puak avang hian Heetal Hotel hi a chhe hle niin a sawi a, hotel chhunga awmte erawh chu an hliam lo nia hriat a ni.  Afghanistan sawrkarin an rama ei rukna do dan tur ngaihtuaha ni 3 awh anti-corruption conference a tan hma lawkin he bomb hi tihpuah a ni a, he hun tanna-a thusawitu, President Hamid Karzai chuan he pawi khawihna-a thi zingah hian an ram Vice President hlui, Ahmed Zia Massoud-a vengtu pahnih pawh an tel tih a sawi.
————–

Fiji thliarkar pakhat, Viti Levu-a thlipui chi khat Mick tleh avangin mi 3 an thi a, mi dang engemawzat, chin hriat lohin an awm mek. Police-te chuan thi zinga mi 2 hi thliin tuia a len luhte niin an sawi a, mi dang pakhat hi thli na tak tleh avanga thing tlu-in a delh hlum niin an sawi bawk. Fiji Meteorological Service chuan he thli hi darkar khata km 100-a na-in a tleh niin an sawi a, Unicef thupuangtu, Tim Sutton-a’n New Zealand National Radio a hrilh danin, Viti Levu panna kawngte chu tuiin a chim avang leh thing tlu-in kawlphetha peknate a tihchhiat avangin harsatna an tawk nasa hle a ni. Thingtlang khaw tam zawk nena an inbiak theih loh avangin, he chhiatna thlenga thi zat chiah hi hriat theih mai a ni lo niin Disaster Mangement hotute chuan an sawi a, tuna hriat theih china thite bak pawh hi thingtlang khaw tam takah pawh mitthi an awm ngei an rin thu an sawi bawk.
————

Iraq khawpui, Baghdad-a car bomb pathum puakah mi 4 an thi a, mi dang 14 vel an hliam. Bomb puahna hmun hi Baghdad khawpui chhunga venhimna uluk zualna hmun, Green Zone bul hnai lawkah a ni a, he pawi khawihna hi eng pawl mahin an tihah an la chhal lo chungin Al-Qaeda mi firfiakte tih a nih rin a ni. Banghdad-ah hian kumin October thla atang khan pawi khawihna a hluar zual a, kar kal ta pawh khan he khawpuia bomb puak avangin mi 127 an lo thi tawh a, hetianga tun hnaia pawi khawihna thleng tam chhan hi, nakkum March thla-a an ram inthlanpui neih tur tihbuai tuma hel leh mi firfiakte chetna niin BBC chuan a sawi.
————–

China Vice President, Xi Jinping-a’n vawiina Japan lal, Emperor Akihito a hmuh danah Japan ram mipui leh sawrkar thuneitu thenkhat an lungni lo hle. Japan mipuite leh an sawrkar thuneitu thenkhat lungawi loh chhan hi, an ram tlawha zin, China Vice President Xi Jinping-a hian Japan Imperial Household Agency-in an lal, Emperor Akihito hmu theih dan tur dan a lo siam tawh bawhchhia-a a hmuh vang a ni a, lal hmu turten an hmuh hma thla khat la awma an hrilh lawk ngei ngei tur a ni tih chu tun tuma China Vice President, Xi Jinping-a’n a hmuh dawn hian bawhchhiat a ni a, a karah ni 19 chauh a tla a, an ram PM, Yukio Hatoyama chu heng mi pahnihte inhmuh theih dan tur duangtu a nih avang hian, eptu pawl leh mi tam takin an lal zahawmna tibawrhbangah an puh a ni. An ram PM bakah hian a party,  Democratic Party of Japan General Secretary Ichiro Ozawa pawh he thilah hian mawhphurtu-a puh a ni a, Ozawa leh an PM thiltih dana lungawi lo mi tam tak chu Tokyo-a hotel pakhat ,China Vice President Xi Jinping-a lawmna puala hun hmanna kawtah vawiin khan mipui  an pungkhawm a, Ozawa leh an PM chu China tihlungawi nana an ram phatsantu-ah hial an puh a ni.
————–

Zunthlum natna laka inven nan Coffee leh thingpui in tam a tha niin mi thiamten an sawi. Archives of Internal Medicine-in mi 5,00,000 chuang dinhmun an zir chianna-ah hei hi an hmu chhuak niin an sawi a, thingpui leh coffee a caffeine awm chuan zunthlum natna hi a veng niin an sawi. Ni tin thingpui emaw coffee emaw, no 3 atanga no 4 tal in thinte chuan, in ngai lo aiin a let nga emaw a aia tamin emaw zunthlum vei theihna hi an nei tlem zawk niin mi thiamte chuan an sawi. Tuna an thil hmuh chhuah hi zunthlum natna pakhat Type 2 an tih tan bik niin mithiamte chuan an sawi a, he natna hi mihringin kum 40 a tlin hnuah a vei tlangpui tih sawiin, he natna veite hian insawizawi an mamawh hle tih an sawi bawk.
————–

Eritrea ram national football team chu Kenya rama inkhela an zin hnuah an ramah an haw leh lova, an chin ngaihven mek a ni. Kar kal ta khan Eritrea team hi East leh Central Africa ramte telna,  Cecafa competition-ah an tla a, an ramah hian an Coach leh hotu dang pakhat chauh an kir leh ta mai a, mi dangte hi khawnge an awm hriat a ni ta lo niin BBC chuan a sawi. Sorkar erawh chuan  an inkhel thiamte an bo tih hi a la puang duh lova, mahse an ram football federation hotute chuan Cecafa hotupa, Nicholas Musonye-a hnenah, an ram team hi an la haw lo tih a hrilh a ni.Musonye chuan tun hi Eritrea team, inkhelh hnua an haw mai loh vawi thumna niin a sawi a, an ram mi tam tak awmna, Kenya khawpui, Nairobi-ah an la awm ngei nia a rin thu a sawi. UN chuan Eritrea mi tam tak chu an ram atangin thla tin an tlan chhuak thin niin a sawi a, he ram hi ram rethei a nih bakah sorkar a khauh lutuk avangin mi tam takin hrehawm an ti a, ram danga tlanbo an ching nia sawi a ni. Eritrea sorkar erawh chuan an ram a hrehawm hle tih hi thu dik lo niin a sawi a, UN chu ram dangte hnena thu dik lo sawiah a puh a ni.