www.zonet.in

TUALCHHUNG CHANCHIN THAR

Central YMA-in Tuikuk-ten ralthuam leka pawi sawi lo rikrap an chin chhung chuan Mizorama lo kir turin an duh lo tih Asian Centre for Human Rights a hrilh. Central YMA hruaitute leh Asian Centre for Human Rights aiawhte hian Mizoramah Human Rights palzutna awm nia sawi chungchang, nimin khan Central YMA Office-ah an sawi hova, hemi hnua Central YMA thuchhuah tarlan danin, he inkhawmah hian pawi sawi lo, Bungthuam tlangval Zarzokima, Bru Revolutionary Union invuahten an thah chungchang pawh sawiho a ni a, he sawihonaah hian Central YMA chuan a lehlam chauh atanga thu la lova, hmun dang atang pawha thu la thin turin Asian Centre for Human Rights hotute chu a ngen a ni. He sawihonaah hian Central YMA chu an President, Pu Lalchungnunga’n a hova, Asian Centre for Human Rights hotu mi 4-te chu an Director, Pu Subash Chakma-a’n a ho a ni.

Nghakhlel taka mipuiten an thlir, Krismas chu ni 12 chauhvin a dang ta a, hetih lai hian Krismas hmang turin Mizoram hmun tinah chhungkawtin an inbuatsaih chho mek. Aizawlah chuan mipuite mamawh lak khawmna, New Market chu a lun tawh hle a, Market Inspector-te atanga thu dawn danin nikum Krismas dawn aiin New Market hi tunah hian a lunin a tawt zawk tawh a ni. Hetih lai hian mi bag leh ipte-a pawisa leh thil dang ruk tuma lo hmanhlel an awm reng bawk a, Market Inspector-te sawi danin tun thla chhung ringawt pawh hian rukru 5 man an ni tawh a, an zingah hian hmeichhiate pawh an tel a, a tam ber erawh chu mipa an ni a, an zingah hian vai leh Meitei-te pawh an tel a ni. Vawiin pawh khan Haulawng khaw putar ipte atanga pawisa cheng 9,355 ruksaktu vai pakhat, Sankar Dev inti, kum 46 mi, Guwahati mi nia insawi, Khatla-a Lottery Ticket zuara khawsa thin Khatla-a cheng nia insawi pawh man a ni a, Aizawl Police Station-ah rukruk thubuai siamsak a ni. Police-te chuan Haulawng pa pawisa a ruksak hi an chhuhsak hnuah a neitupa hnenah an pe let leh a ni. New Market-a Trade and Commerce Office-a thawkte chuan helai hmuna rukru che tla thin, mi 20 vel chu an hriat tawh thu leh an zinga mi thenkhat hmel chu kumin hian an la hmuh loh thu kan Corr. an hrilh a ni. Tun thla chhung hian Bazar-a pawisa bo report an dawn tawh zawng zawng chu cheng sing 6, sang 2, za 9 leh 55 a tling tawh a ni. Bazar enkawltute chuan rukru lakah fimkhur turin Bazar-a thil lei tura kalte chu an ngen nawn leh a, Bazar-a thil chhar pek let leh duhte chu an thil chhar kawl mai lova Market office-a dah turin an ngen a, anni chuan aurinna hmangin rang takin an puang zar thei tih an sawi nawn leh bawk a ni.
——–

Chaltlang Lily Venga Pu Vanlalnghakate awmpui, Burma mi, Enga tia koh chuan tukin khawvar hma khan an pawisa cheng sing 7 chuang laksakin a tlanbo. Pu Vanlalnghaka nupuiin kan Corr. a hrilh danin an pawisa bo chungchang hi Bawngkawn Police-ah an hriattir tawh a, Bawngkawn Police-te chuan an zawng mek a ni. An pawisa laksaktu, Enga hi pa te lam, tawng pai tak, nghawnga ser lian tak nei, a chhip kawlh vanga lukhum khum reng a ni a, a tlanbonaah hian Taxi a hman ngei an ring bawk a, ama hmel ang hmute chu Bawngkawn Police Station hriattir turin an ngen a ni.
———–

Mizoram Synod Inkhawmpui-in Synod Executive Secretary thlan thar 3, Synod Mission Board Secretary leh Administrative Secretary thar 3 leh Synod Executive Committee-in Kohhran Thunun Dan en thatna a siam chu apawm fel ta. Mission Vengthlang Biak Ina Synod Inkhawmpui rorel, vawiina Moderator, Rev.C.Chawngliana hova chhunzawmah General Agenda 54 atanga rel tanin an zo hman a, hetah hian ram pum huapin sual thupha chawi leh ram tana tawngtai, Synod-in ruahman rawh se tih chu SEC-in lo bawhzui rawh se an ti a, Synod hnuaia thawkte degree increment pek dan tihdanglam rawtna chu en that a tul avangin SEC-in lo bawhzui rawh se an ti a, In hmun lo ram chungchanga mi hausa leh mi rethei inkar zau ta lutuk hi siam rem turin Synod-in sorkar-ah thlen rawh se tih chu sorkar hmasa-ah khan thlen a nih thu an inhrilhfiah rualin, Synod-in chak takin bawhzui zel rawh se an ti a, Bairabi Hydel Project siam chungchangah, sawihona a tawk e an ti bawk. Hmarthlang Presbytery atanga thu lut, Kohhran Hmeichhe Inkhawmpui Liana Lalpa Zanriah Sakramen telh tawh loh rawtna chungchangah chuan kal dan pangngai hi a tha e an ti a, Synod-in motor a neih dan hi en that ni rawh se tih pawh SEC-in uluk zawkin entha rawh se an ti bawk. Synod Inkhawmpui hian Nomination, Pastoral leh General Agenda-te zo hman mah se SEC leh Board atanga thu lutte an rel zo hman lova, zanin Pathian Biak Inkhawm banah an rel chhunzawm ang. Nizan inkhawm banah pawh khan rorel hi chhunzawm a ni bawk. Puan tawh angin kumin Synod Inkhawmpui-ah hian Palai 1,742 an kal a, ram chhung Synod atangin palai lo kal an awm bakah Presbyterian Church of Wales atangin Moderator, Rev. Ian Barlow Hodgins-a hovin mi 3 an lo tel a, nakkum Synod inkhawmpui chu December ni 1 atanga 12 chhungin Zarkawt Kohhranah nghah a ni a, Moderator thar atan Mission Vengthlang bial Pastor, Rev.C.Lalsangliana chu ruat a ni. Synod Inkhawmpui-ah hian zan tin Pathian Biak Inkhawm neih a ni a, naktuk chawhma inkhawmah Pro Pastor 14, Pastor-ah nemngheh an ni ang a, Pro Pastor lak thar mi 15-te pawh dah ngheh an ni bawk ang. Chawhnu-ah nikum Synod Inkhawmpui leh kumin Inkhawmpui inkara Minister boral, Rev. Dr. Zairema, Rev. H. Zalawma leh Rev. R. Vanthangpuia-te sunna hun hman a ni ang a, Moderator-in Lalpa Zanriah Sacramen a theh bawk ang. Zanah Moderator kal chhuak, Rev. H. Lalchhanhima’n Valedictory Sermon a sawi ang.
———

Aizawl District SP, Pu Lalbiakthanga Khiangte chuan nizan khan Kulikawn Police Station biala Krismas leh kumthar boruak tha leh muanawm siam nan khawtlang hruaitute leh tlawmngai pawl hrang hrang ruahmanna a siampui. He inkhawm, Kulikawn Police Station-a neihah hian SP chuan Krismas leh kumthar lawm chhunga boruak tha leh muanawm neih theih nan halpuah, halmawi leh rocket hmang lo tur leh zu leh ruihtheih thil man chhuak turte leh thalai hawklak buaina siam zawnga khawsate tha taka khuahkhirh turin tlawmngai pawl hrang hrang leh khawtlang hruaitute a ngen a, a tul apiangah Police-in sul an su ang tih a hrilh bawk. He inkhawmah hian veng hrang hrang VC, YMA, JAC leh VDP hruaitute an tel a, boruak tha siam nan lungrual taka tan tlan an remti a, veng chhung mi ni lo, veng dang mi, a hnawksak leh buaina siam zawnga khawsate chu manin an awmna veng VDP emaw YMA emaw kutah hlana hrem ngei ni se tih an rawt bawk a ni.
————

Tun kar Thawhleh zan atanga a Taxi nen chin hriat lohva bo, Chawnghmingthanga, kum 36, Bungkawn Veng chu tlanbo a nih an rin loh avangin Bungkawn khawtlangin an zawng. Bungkawn YMA President, Pu VL Zamlova hnen atanga thu dawn danin, MZ 01 D 7299 khalhtu, Chawnghmingthanga hi lirthei uluk, a thlen chin apiang, a pute emaw a nupui emaw hrilh thin a nih avangin a Taxi nen hian a tlanbo an rin loh avangin khawtlangin an zawng tih a sawi a, tawh sual a tawk emaw, hruai bo emaw a nih an rin avangin Ningani atang khan an zawng a, an zawnna khua apiangah Branch YMA hruaitute chu chinchang lo ngaihven turin an ngen tih a sawi. Chawnghmingthanga nupui, Pi Dengtluangi chuan an pa hian Thawhleh zan dar 10:17 khan Bawngkawn atangin a bia tih a sawi a, chu chu an inbiak hnuhnun ber niin a sawi. An inbiak lai hian Chawnghmingthanga hian a mi phurhte nen chaw an ei ho tih a sawi a, amah chu lo ngaihtuah lo tura hrilhin lo haw nghal mai a tum niin a sawi. Pi Dengtluangi chuan an pa hian a thlen chin apiang a hrilh thin a ni tih a sawi a, Nilani zing atang khan a be tlang thei tawh lo niin a sawi bawk. ZONET thu dawn danin, Ningani khan Chawnghmingthanga Taxi anga lang thei tur chu Kawrthah bul velah hmu an awm ni-a sawi a ni a, tukin pawh khan Tripura Jampui tlang dungah he Taxi ni thei awm deuh chu hmuh a ni a, hemi chungchangah hian Bungkawn YMA President, Pu VL Zamlova chuan Jampui YMA hruaitute dawr turin lam kal an insiam tih a sawi. Puan tawh angin he thil chungchangah hian Taxi neitu, Pu Remruatdika, Bungkawn High School Veng chuan Aizawl Police Station-ah FIR a thehlut a, amah hmu leh a chinchang hriate chu Aizawl Police Station-ah emaw motor neitu phone number 9612514721-ah emaw hriattir tura ngen an ni. Chawnghmingthanga hi feet 5 leh inchee 3 vela sang, hang deuh, sa pan lam a ni.
———-

District hrang hranga kumin sorkar kum chhunga NLUP tanpuina dawng tur thlangtu turte leh an hnathawh tur thlangtu tur, Village Level Implementing Committee hruaitute training chu District Level Implementing Committee chuan a pe zo ta a, he training hi Saiha leh Lawngtlai District-ah chuan vawiin khan zawh fel a ni a, District dangah erawh chuan hemi hma lam hian zawhfel a ni tawh a ni. District hrang hrang atanga kan Corr. thu dawn danin, DC-te kaihhruaia he training buatsaihah hian khaw hrang hranga NLUP Implementing Committee-te chu NLUP tanpuina dawngtu tur leh an hnathawh tur thlansak dan turah dik taka thilti tur leh eizawnna ngelnghet siamsak theihna ngaihtuah a tul thu an hrilh a, tanpuina dawng tur thlante chu an hnathawh atana thlansakah tui taka thawka hlawhtlin ngei tum tura an rilru buatsaihpui turin an chah bawk a ni. Puan tawh angin District hrang hranga Village Level Implementing Committee-te hian District Level Implementing Committee-ah an rawtna siam chu rang takin an thehlut ang a, chu chu ennawnin District Level Implementing Committee chuan tun thla ni 20 aia tlai lovah NLUP Implementing Board hnenah a theh luh a ngai dawn a ni.
———-

CM hlui, MNF President, Pu Zoramthanga chuan nimin tuk khan Lunglei Circuit House Conference Hall-ah thu thar lakhawmtute a kawm a, Assembly inthlan hnuhnung bera an tla chu hrehawm hle mah se, an sorkar leh Party thil tihfuh tawh lohte a awm avangininsiam that nan Pathianin hun tha a pe-ah a ngai tih a sawi. Pu Zoramthanga chuan an sorkar laia mipui, party leh sorkar inkara kar awl zau tak awm chu an tihsual lian tak a ni tih a sawi a, tuna sorkarna chelh mektuten kih hnawk tia an sawi fo chu an hmaa mite hmachhawp leh zawh hman loh an rawn chhunzawm dawn tihna a a ni tih sawiin, hnathawh zawh hman loh chu kih hnawk a ni ngai lo, a ti bawk. Congress sorkar chu kum chhung pawha Project mumal sawi tur nei lovah puhin MNF President chuan mi dang vau nan leh Kih hnawk thu sawi nan hun an hmang zo va, khuallian nih nana hun an hman ral avangin Office-ah hna an thawk hman lo a nih hi a ti bawk. NLUP a hlawhtlin a rin loh thu sawiin Pu Zoramthanga chuan, State Plan Fund-ah Agriculture leh Industry Deptt chan an titlem a, Deptt sum hi NLUP atan cheng vbc. 100 an tham a ni, a ti a, Tuirial Hydel Project chu compensation avanga hlawhchham nia CM, Pu Hawla’n a puh chungchangah Pu Zoramthanga chuan NEEPCO CMD vang zawk a ni a ti a, Compensation awm ve kha tih tham a ni lo, a ti bawk. MNF President chuan an tlak chhan chu thil dang bakah vote thlakna khawl, EVM vang niin a sawi nawn leh a, NLUP kha a zen a ni a, a zen tipuaktu, a kep ber chu EVM kha a ni a, sorkar hriatpui si lohva Company thuneitu sang ber hnena cheng nuai 50/60 pek chuan remote control hmangin vote tla kha a tihdanglam theih niin a sawi. Pu Zoramthanga chuan Parliamentary Secretary chungchang, court-a an khinna chu an hlawhtlin ngei a rin thu sawiin, hei hi dan zah lohna a ni a, ‘tuman Dal lei loh tur’ tih laia Dailuah kan lei tih ang chauh niin a sawi a ni.
———

Nimin tlai khan Mualpuia fahrah enkawlna hmun, Muanna In Nite hman a ni a, Social Welfare Minister, Pu PC Lalthanliana’n hmanpuiin mimal leh pawl hrang hrangte thahnem ngaihna zarah dinhmun hniam zawk leh rual ban lote pawh an dinhmun chawikanin a awm mek zel a ni a ti a, Muanna Ina awm, naupangte chu fahrah ni mah se, fahrah ni lo naupang dang tam tak aiin lainattu leh enkawlna tha an nei zawk niin a sawi. Minister hian Muanna In-a mipa naupang 29 awm mekte chu Blanket pakhat theuh a pe a ni. Muana In Nite-ah hian naupangten an thil thiam an entir bakah zaithiamte an zai a, Salvation Army Territory leh Divisional Headquarters hruaituten he hun hi an hman pui bawk.
———–

Mizoram Health Care Members Association General Meeting, vawiina Vanapa Hall-a neih chuan resolution pass-in, Mizoram State Health Care Society hnuaia mi retheite bill tang tam tak la awm ching fel thuai turin sorkar an ngen. Reliance Health Insurance Company hotute chu Aizawla ko chhoa bill tang chinfel dan tur chungchang sawipui turin sorkar an phut a, hemi bakah hian sorkar hnathawk awm lohna chhungkua-a miten MR an Bill ve theih nan Health Care Scheme chhunzawm thuai turin sorkar an ngen a, Krismas hma-a an bill tang pek dan ngaihtuah turin sorkar leh an Association hruaitute leh an Ukil-te chu an ngen bawk a ni. He General Meeting hi an Association Chairman, Pu N. Lungmuana’n a kaihruai a ni.
———–

Lawngtlai District MJA chuan vawiin khan kum tawp thut khawm, Lawngtlai Press Club-ah an nei a, tun thla ni 21 atangin Lawngtlai MJA office chu khar ni se, nakkum January ni 5-ah hawn leh ni se an ti a, hemi chhung hian chanchinbu mite pawhin chawlh hmangin chanchinbu an chhuah dawn lo a ni. Lawngtlaia kan Corr. hnen atanga thu dawn danin, Lawngtlai MJA inkhawm hian resolution pass-in, sorkar hnathawkte chu Krismas leh kumthar lawm lai vela sorkar pisa hawn ni-ah tha taka pisa kal tur leh mipuite dawr theiha awm turin an ngen a ni.
———–

Mizoram UPC rorêlna sang ber, General Assembly vawi 15-na chu Ningani atang khan Electric Veng YMA Hall-ah neih a ni a, nakzan thleng a awh ang.  General Assembly-ah hian hruaitu thar pawh thlan an ni a, General Supdt.-ah Rev. Chhunglawma, General Secretary-ah Rev. Vanlalsipaia thlan an ni a, General Mission Chairman-ah Rev. R. Lalrinawma, General Mission Secretary-ah Rev. C. Liansanga ruat thar a ni bawk. He khawmpuia thurelte zingah nakkum General Assembly chu Chawlhmun bialah nghah ni se an ti a, 2011 Gen Assembly pawh Headquaters bialin thleng se an ti bawk. Gen Assembly leh Deptt hrang hrangten khawmpuina atana hman tur ram lei ni se, Hall pawh sah nghal ni se, khawmpui thlen dil an awm loh huna khawmpuina atan hman ni se an ti bawk. Mizoram UPC General Assembly chuan Subrroom bial thar chu bial hnihah a then a, Mauchar Kohhran chu nakkum atangin Sakawrdai bialah awm tura tih a nih bakah Khawzawl bial chu bial 2-ah then a ni bawk. Nakkum atangin Lawngtlai District-ah ram lak beihpui thlak tura tih a ni.Mizoram UPC Day thuchah siamin kohhran tinah he ni hi hman tawh tura tih a ni a, Mizoram UPC danpui siam that rawtna 28, he khawmpui hian a pass bawk a ni. He Kohhran hian kumin chhunga sum hmuh tura beisei, cheng nuai 235 chu cheng nuai 30 chuangin an khum tawh a, naktuk chawhnuah Rev. Halaia’n Lalpa Zanriah Sakramen a buatsaih ang a, tlaiah khawmpui hmangtute tan chawhlui buatsaih a ni bawk ang. Mizoram UPC hian member 43,494 a nei a, District 10-ah Pastor Bial 63, kohhran 347 an nei a ni. He Kohhran hian India ram state hrang hrangah nasa takin rawng an bâwl a, India ram state 5 tih lohah chuan rawngbâwltu an indah vek tawh a ni.
———-

Aizawl City PYD chuan vawiin khan a tum hnihna atan Bawngkawn Primary School II-ah Aizawl Civil Hospital-a damlote hman atan thisen an pe leh a, he thisen pek hi Krismas lawmna chi khat atana tih a nih angin a hmingah ‘Blood for Jesus” tih an vuah. City PYD hian Inrinni hmasa khan thisen an lo pe tawh a, hemi tum hian unit 53 an pe a ni. Blood for Jesus atana nimina thisen pete hi Bawngkawn bial, Chaltlang bial, Durtlang bial, Thuampui bial, Zemabawk bial leh Bethlehem bial an ni a. Aizawl Civil hospital atanga thisen laksaktu Doctor te chuan Mizoram-ah kohhran leh mi tlawmngai tam takin thisen pek an intihhmuh avanga an lawmthu an sawi a, tunah chuan damlo ten thisen an mamawh apiangin Blood bank-in pek mai tur a nei reng tawh niin an sawi. Vawiina Bawngkawn Primary School II-a PYD  thisen pek hi unit 28 a ni a, a petute hi mipa 26 leh hmeichhia 2 an ni.
———-

Chaltlang Lily Veng Presbyterian Kohhran Senior Deptt. leh Environment & Forests Deptt.buatsaihin Lily Veng Senior Deptt. te tan khawtlang tana hnathawh that a pawimawhna inzirtirna hun, Aizawl sahuan-ah hman a ni a,  Pu H. Lalhmachhuana’n kaihruaiin, ACF Wildlife, Pu H. Laltlanhlua’n nungcha humhalh a pawimawhzia sawiin India khua leh tui chuan nungchate an humhalh tur a ni a, nungcha tinawmnah a, tiduhdahtute chu mana thubuai siamsak theih an ni tih a sawi. Lily Veng Senior Deptt-te hi sahuan tifaiin an hnatlang nghal a ni. Aizawl sahuan hian ram Hectare 60-a zau a thut a, nungcha chi hrang 30 vel, a vaiin nungcha 116 vel an awm a, thawktu mi 20 an awm bawk.
—————

Nimin tlai khan Home Minister, Pu R.Lalzirliana’n Mizoram Police Sports Meet vawi 13-na, ni nga chhung awh 3rd Bn. MAP Ground, Mualpuia neih chu a khar. He Sports Meet-ah hian Police Batallion hrang hrang leh Group-a inthenin intihsiak a ni a, a pumpuiah Red Group pakhatna an ni a, pahnihna PHQ Group, pathumna Northern Range an ni. Kharna inkhawmah hian Organising Chairman, DIG Hqrs., Pu Saizela’n he meet report tlangpui a pe a, Home Minister Pu R.Lalzirliana chuan he Sports Meet avang hian Police-ten inunauna, thawh hona leh inthununna tha an neih a beisei thu a sawi a, Police-te chu mipuite thlamuang leh zalen taka vengtu tur an nih avangin, inthlahdah theih a ni lo tih sawiin, Police tan dulkiar lutuk pawh a inhmeh lo tih pawh a hrilh a ni.
———–

Youth Women’s National Boxing Championship vawi 5-na, December ni 7-a Zarkawt Recreation Centre-a tan chu khar a ni ta a, a kharna inkhawm hi Sports & Youth Services Minister, Pu Zodintluanga’n a hmanpui, He intihsiakna ah hian Haryana chu team champion an ni a, Kerala chu pahnihna an ni a, Mizoram-in Silver Medal pahnih leh Bronze Medal an la a ni.
—————

Bharat Scouts & Guides State Rally  vawi 13-na kharna inkhawm chu nimin khan STC, Tanhril-ah neih a ni a, Sports & Youth Services Secretary, Pu Nghaklianmawia’n hmanpuiin, nu leh pa thu awite, Pathian thu awite leh aia upa zah thiam a pawimawh zia, Scouts leh Guides te chu a hrilh a ni. Khuallian hian Scouts leh Guides titha zualte lawmman a sem bawk.
——————-

Vawiin khan Aizawl khawpui chu a lum lai berin celsius degree 26.5 a ni a, a vawh lai berin degree 13.3 a ni. Naktuk, Pathianni-ah chuan Aizawl-ah khua a tha ang a, a lum lai berin Celsius degree 27 vel, a vawh lai berin degree 11 vel a nih rin a ni. Naktip, Thawhtanni-ah pawh Aizawl-ah khua a tha ang a. A lum lai berin Celsius degree 25 vel, a vawh lai berin degree 10 vel a nih rin a ni.