www.zonet.in

RAM PAWN CHANCHIN THAR

Russia khawpui, Moscow atanga St Petersburgh pana nizana tlan rel chesualah mi 39 an thi a, mi dang 100 vel an hliam. He rel chesualah hian mi 660 vel an chuang nia hriat a ni a, hliam zinga 90 vel chu damdawi inah enkawl an ni a, rel pindan 3-in a kawng zawh a sual a ni. He vanduaina thlenna hmun,  Tver biala Bologoye-ah hian  kum 2007 khan rel tlan lai, bomb hmanga beih a nih avangin mi 30 vel an lo thi tawh a, tun tumah pawh hian a chetsualna  hmuna bungraw them thenkhat atanga a lan dan leh bomb puahna hnuhma ni awm taka lei pawh a khuar deuh duk avangin, rel hi bomb-a beih nia hriat a ni a, hei bakah hian a bul hnaia awmten rel chetsual hma hian thil puak ri an hria nia an sawi avangin, misual an inrawlh ni ngeia rin a ni a, thu chiang erawh chu hriat a la ni lo niin Law Enforcement hotute chuan an sawi. He thil thlenna hmunah hian chhanchhuah hna thawktute tirh nghal an ni a, Ambulance 20 vel bakah, damdawi lam thiamten thlawhna pahnih hmangin an vil reng a ni. Sorkar hotute chuan he thilah hian mi firfiakte an inrawlh ringin ngun taka chhui nghalna tur thupek an siam a, Russia rama television channel te pawhin he rel chetsual dawn laia a khalhtu tawng ri, rel hnuaiah thil puak a awm tih record-te pawh an tichhuak a ni. He rel, Nevsky Express an tih tlanna hi Russia rama rel kawng lun ber pakhata a tlan laiin a chesual a ni. He thil thleng hi United States sawrkar chuan pawi a tih thu a sawi a, White House thuchhuah chuan mitthi chhungte an tuarpui thu sawiin, hliamte pawh dam leh thuai tura anduhsak thu a sawi.

Golf khelh thiam hmingthang leh infiamna atanga sum la lut hnem bera ngaih, Tiger Woods chu nizan khan United States-a Florida-a Car chesualah a hliam a, a tirah hliam na hle anga sawi ni mah se, tukin khan damdawi In atanga chhuahtir a ni. Tiger Woods hian an in bul, kawngpui sira kangmei chhuah thulha a thelh nana hman mai atana tui pipe an siam leh thing kung a su a, hei hi a nupui, Elin chuan hriain, car hnung lam darthlalang chu Golf khelhna tianga vaw kehin a pasal hi a la chhuak niin Police hotute chuan an sawi a, Tiger Woods chetsual chhan hi zu ruih vang a ni lo niin an sawi. Florida Highway Patrol thupuangtu chuan Tiger Woods a chetsual chhan hi an chhui mek niin a sawi a, Woods-a hi Golf Tournament lian thamah vawi 14 teh meuh, khawvel champion a lo ni tawh a, kuminah ngawt pawh vawi 6 a chak tawh a ni.
—————

Bangladesh rama nizana lawng chesualah mi 30 vel an thi a, he lawng hi vawiina Islam ni pawimawh hmang tura hmun hrang hrang atanga mahni khaw pana hawte phurtu a ni a, mi tam tak an la bo bawk niin thuneituten an sawi. He lawng, chhawng thuma sang, MV Coco-4-ah hian mi 1,500 chuang an chuang nia hriat a ni a, an ram chhim lam, Bhola thliarkar-a  Lalmohan khaw bulah a chesual a, a chetsual chhan hi, a phurh zawh tawk aia tam a phurh vang niin Police-te chuan an sawi. Police Inspector Nazrul Islam chuan, tui thiam deuhte chu he thil thlenna hmun-ah hian buaipui ngaite buaipuiin an buai hle tih sawiin, mi 50 nungdama an chhanchhuah tawh thu a sawi.  Police leh kang thelh mite chuan ruang 30 chuang an la chhuak tawh tih an sawi a, thite zingah hian hmeichhia leh naupang pawh an awm nual tih sawiin, a chetsual lai hian engemawzat chu an chhuk tawh niin an sawi.
—————-

Kum 2006 March thla-a Germany rama zirlai kum 17 mi, Tim Kretschmer-a’n a zirlai puite, silaia pawng kah-a mi 15 a thah chungchang-ah a pa, Joerg Kretschmer chu thiam loh chantir a ni. Hetianga tualthahna-a a fapa thiam loh chantir a nih chhan hi, a silai kawl a dah that loh vanga ngaih a ni a, phalna neiin silai 12 dawn lai kawl mah se, a fate khawih mai theiha a dah avangin he pawi khawihna thlengah hian a inhnamhnawih ve niin a chungthu ngaihtuahtu Court chuan a sawi. Joerg Kretschmer-te hi Stuutgart khaw bula cheng an ni a, a fapa Tim hian a pa pistol la chhuakin, Winnenden khuaa Albertville Secondary school zirlaite leh an zirtirtute chu an school chhunga luh chilhin a pawng kah a, hemi hnu hian amah inkaphlum zui mah se, a pa chu he pawi khawihna-ah hian thiam loh chantir a ni ta tho a ni.
————

Pakistan President, Asif Ali Zardari-a’n an ram nuclear ralthuama thuneihna zawng zawng, an Prime Minister Yousuf Raza Gilani-a hnenah a hlan. Yousuf Raza Gilani hi an ram Nuclear ralthuam chunga thuneitu ber National Command Authority Chairman a ni tawh dawn a , hetianga President Zardari-a’n a thuneihna, PM hnena a hlanna hi an ram President hlui, Pervez Musharraf-a’n rorelna a chan laia dan a siam hmanga tih a ni. President thupuangtu Farhatullah Babar chuan, hei hian an ram rorel khawl, Parliament leh Prime Minister pawimawhna a tilang chiang hle niin a sawi.
————–

China khawpui pakhat, Shanghai-a Pudong airport-a Zimbabwe bungraw phur thlawhna chesualah mi 3 an thi a,mi dang 4 an hliam. He thlawhna hi a thlawh chhuah dawnin, a mei-in thlawhna tlan kawng a tauh nia hriat a ni a, hemi hnu hian bungraw dah khawmna su-in a kang zui a, thlawhna a chuang 7 zinga 3 chu a hmunah hian an thi nghal a, mi dang 4 chu damdawi In panpui an ni a, hliam zinga pakhat chu a na hle nia thu dawn a ni.
————

World Health Organization (WHO) thuchhuah chuan kar khat chhungin Swine Flu vanga thi mi 1,000-in an pung niin a sawi. WHO sawi danin, Mexico ramah kumin April thla atang khan he hri leng avang hian mi 7,826 an thi tawh a, Europe khawmualpui-ah kar kal taa he natna avanga thi, mi 350 chu tun kar chhung hian mi 650 an tling chho bawk. Khawmualpui huapa he natna vanga thi zat chhuina-ah America chu a sang ber a, kar kal ta-a thi, mi 554 chauh an nih laiin, tun kar chhungin mi  5,360 an thi tawh a ni. WHO-in swine flu avanga thi an pun zel thu a puan rual hian, Saudi Arabia-a Muslim sakhaw hunpui puala Mecca-a mi maktaduai 3 chuang pung khawm zingah, Swine Flu vanga thi an awm niin an ram Health Ministry thuchhuah chuan a sawi a, hei hian hriselna lam ngaihtuahtute chu a tihlauthawng hle a, he natna hi taksa inkhawih fuh leh khuh avanga kai theih a nih avangin, sakhaw thil avanga he hmuna kal khawmte chu fimkhur hle turin an chah a ni.