www.zonet.in

TUALCHHUNG CHANCHIN THAR

Kum 2007-a Zonet Mizo Idol Contest-a Top-20 zinga mi, zai thiam, Isaac Lalmalsawma chu Bike chesualah tukin dar 2:20 khan Aizawl Civil Hospital-ah a thi. Aizawl Police Station atanga thu dawn danin, a chetsualna hi Aizawl-a Canteen kulalah a ni a, Isaac Lalmalsawma hi Bazar lam atangin an awmna veng, Khatla lam panin a tlan a, Taxi pakhat, Vanapa Hall lam atanga Bazar panna kawng, Mandir chhak lama Wrong side atanga lo tlan nen Assam Rifles Canteen peng bulah hma lam zawng ve vein an insu a, hetah hian Isaac Lalmalsawma hi a Bike atanga invawrh chhuakin, Taxi chu thlawh khumin Lammual lampang kawng sirah a tla a, Police zan duty-te leh mi dang, amah hmutute chuan Civil Hospital an panpui a ni. An chetsual lai hun hi tukin dar 1 leh minute 50 vel nia rin a ni a, Civil Hospital-a lak a nih hnu, zing dar 2 leh minute 20 khan damdawi ina Doctor-te chuan a thi tih an puang ta a ni. Isaac a hian ama Bike, MZ-01 E-4828 a khalh a, Bike hi a chhe nasa viau a, a lu lam zawng chu a darh vek a ni. A insut pui, Taxi hi MZ 01-C 9283 a ni a, a khalhtu hi Lalmuankima, kum 15 mi, Driving Licence la nei lo, Learner Licence erawh chu nei a ni a, Ramthar North-a Sawiluaia fapa niin a insawi a ni. He Taxi hi Lalthankima Tlau, Ramthar veng ta nia sawi a ni a, amawherawhchu a neitu dik tak hming, Motor Document-a chuang chu Lalthantluanga Hnamte, Armed Veng tih a ni. Police-te chuan Taxi khalhtu Lalmuankima hi manin thubuai an siamsak a, bail theih a nih avangin Bail-in a chhuak leh tawh a ni. Bike Accident a boral ta, Isaac Lalmalsawma ruang hi vawiin khan Aizawl Civil Hospital-ah endik a nih hnuah a awmna, Khatla-ah amah thlahna hun hman hnuah an khua, Kanghmun-ah vui tura lak a ni a, naktukah vui a ni ang. Isaac Lalmalsawma hi kum 24 mi, Kanghmuna Pu Sapzuala fapa neih chhun a ni a, kum 2007-a Zonet Mizo Idol Contest-ah khan “Anka nem chu tawk rawh se ” tih a sak atangin Zoram dung tluanah a lar chho ta a ni.

Aizawl City Traffic SP thupek anga Aizawl khawpui chhunga Taxi intlanchhawk chu vawiin, Inrinni hi sorkar chawlh a nih avangin a buai a, hemi chungchangah hian Traffic thuneitute’n thuchhuah thar an siam loh avangin Taxi intlan chhawk dan hi a buai a ni. Traffic SP thupek angin Taxi-te hi Thawhtanni atanga Inrinni thleng, ni tin a inchhawka tlan tur an ni a, mahse hei hian sorkar chawlh a huam lova, vawiin hi Taxi sticker A leh B-te tlan hun a ni a, mahse sorkar chawlh a nih avangin Taxi sticker C-te chu an tlan chhuak ve a, thenkhat chu Traffic Police duty-te’n an man a, mahse man sen an nih loh avang leh SP thupek, sorkar chawlhah duh duh tlan theih tih a nih avangin Traffic Police duty-te chuan tihngaihna vak an hre bik lo nia thu dawn a ni.
———-

Mizoram-in phai lam atanga kawlphetha a hmuh a indaih loh avanga Power & Electricity Department-in kawlphetha ren tura mi tin a ngen laiin tunlai hian Aizawl khawpui chhungah chhunah street light tihthim loh hmuh tur a tam hle. Kan Corr thu dawn danin tunlai hian Aizawl khawpui chhungah chhunah street light eng hmuh tur a tam hle a, hei hi Department lamin kawlphetha remchem tur a tih nen a inhmeh lo hle niin a sawi a, zan tin veng hrang hrang, a inchhawka eng pek an nih laia hetianga chhuna street light eng hmuh tur a awm thian hian mak tih a hlawh hle niin a sawi.
———–

Indian Dental Association, Mizoram State Branch chuan vawiin khan Aizawl Civisl Hospital Doctors’ Seminar Room-ah General Conference vawi hnihna an hmang a, NRHM Mission Director, Dr.P.Sangzuala’n a hmanpui a ni. He Conference-ah hian chawhma lamah report ngaihthlak leh member-te infuih tharna hun atan hman a ni a, chawhnu lamam rorelin hruaitu thar an thlang a ni.
———-

Vawiin kha Mosolman-te sakhaw ni pawimawh, Id u’l Zuha a ni a, Mosolman sakhaw bia mi tam takin tawngtaina hun an hmang a ni. Mizorama tawngtai inkhawm lian ber, Aizawl Lammuala tukina neihah chuan Aizawl Mosque Imam, Maulama Sahin Ahmed Chaudhuri-an tawngtaihona a kaihruai a, Quran atanga chang thianghlim chhiar leh chhama hun a hman zawhah mipui sang 5 rual velte chu a huhovin an tawngtai a ni. An tawngtainaah hian khawvel leh ram chhunga remna leh muannate, mipuite ham thatna leh hmasawnna awm theih na turtein Pathian hnenah an dil a ni.
———

Vawiin khan Bawngkawn Chhim Veng Branch YMA chuan, Bawngkawn chhim Veng Presbyterian Kohhran hall-ah, an kum puan, Faina pual inkhawm an nei a, Central YMA President, Pu Lalchungnunga’n a hmanpui. Bawngkawn Chhim Veng Branch YMA hian an kum puan, Faina hi kumin February ni 20 khan an hawng a, veng chhung faina hnatlang vawi 46 an nei tawh a, tha 766 vel an seng tawh bawk. Faina kum an puan hi a hlawhtlin theih nan, veng chhung school zawng zawng leh Kohhran hrang hrang naupang inkhawm-ah te awareness campaign an nei vek tawh bawk a ni. Vawiin Faina inkhawm-ah hian Central YMA President leh khawtlang hruaituten faina chungchang thu an sawi a, section vawng fai leh veng chhung school vawng faite bakah mahni In leh a vel vawng fai leh school naupang, mahni in vawng faite lawmman pek an ni bawk.
————

Aizawl Civil Hospital atanga thawk chhuak, Medical Team chuan Nilaini khan Hnahlan khuaah free clinic an nei. He Clinic-ah hian damlo 610 an en a, heng zingah hian ultrasound-a en 85, zun leh thisen exam 110 leh X-ray hmanga en 27 an awm a ni. He Medical Team hi Deputy Medical Superintendent, Dr. B. Lalramzau-a’n a hova,  doctor 9, technician 9 leh hnathawktu dang 5 an tel a, an vaiin 24 an ni. He Free Clinic hi National Rural Health Mission hnuaia pek, Mobile Medical Unit motor hmanga neih a ni.
———-

Chawlhhmun Branch YMA chuan nizan khan kum puan, ‘Khawtlang nun siam that’ tih an hmang tan a, kumpuan hi Central YMA Vice President, Pu C. Zoramliana’n a hawng a ni. He inkhawmah hian MJA President, Pu K. Sapdanga pawhin kumpuan thupui hmangin thu a sawi a, Mizote khawtlang nun tlu chhe mek leh tlu chhe zel tur veng tura tan lak nan dikna leh rinawmna mahni awmhmun theuhvah tun din a tul tih a sawi a ni. He inkhawm hi YMA President, Pu RL Tanpuia’n a kaihruai a, advance Krismas an hmang nghal bawk a ni.
———-

Chief Minister, Pu Lal Thanhawla chuan Champhai atanga a lo haw kawngah vawiin khan Khawzawla 2nd IR Battalion Hqrs. a tlawh. Hetah hian 2nd IR Battalion Commandant, Pu H. Ramthlengliana, officer dangte leh IR Battalion Police rualin an lo dawng sawng a, inkhawm tawite neia thu sawiin Chief Minister chuan Police-te chu mipuite thlamuantu tur leh inpe zo taka venhim hna thawktu an ni tih hre reng turin a chah a, hotute thu awi taka awma, mahni inthununna tha tak neia, a tulna hmun apianga an hna thawk tur an ni tih hrilhin, a tul huna hmun danga sawn an nih pawhin thu awi taka an tih tur hlen chhuak turin a chah a ni. Chief Minister chuan tun hnaiah Mizoram leh state dang inrina ramri velah thil duhawm lo a thlen thu sawiin, Police-te chu boruak tha leh ralmuang siamtu tur an ni tih a hrilh a, inpe zo leh huaisen taka a tul dan azira nun hlan ngam khawpa hna thawk tur an ni tih a hrilh bawk a ni. Hemi hnu hian Chief Minister hian Aizawl lam a rawn pan nghal a ni.
————-

Bilkhawthlir-a Police-te chuan Serlui, tun hnaia tura hraitute zawng zui zelin nimin khan North Chawnpui khaw mi 4 thu zawhfiah turin an la. Kan Corr. thu dawn danin, heng mite hi lui dunga sangha mana riak an ni a, Bilkhawthlir atanga Builum thleng he lui dung zawhtu VC aiawh, tlawmngai pawl aiawh, Police, Fishery leh Forest Department aiawhte chuan heng mite Serlui kama buk sa-a riak chu an hmu a, hemi bakah hian hmun engemaw zatah Serlui dunga sangha mantute riahna leh hnu hma an hmu a, lui kama thing pawh zai ruk a ni tih an hmu bawk. He lui dungah hian sangha man bakah a ruka thing leh mau late pawh an awm thin a ni. Serlui tui leh a chhehvel ram ngaw leh ram ngaw chhunga nungcha awmte humhalh that a nih theih nan nimin khan Bilkhawthlira Agriculture Rest House-ah VC leh tlawmngai pawl hrang hrang hruaitute chu Bilkhawthlir VC kaihhruaiin an inhmukhawm a, he lui dung leh a chhehvel ram ngawte tha taka humhalh a nih theih nan hmalatu tur sorkarin ruat thuai se an duh thute, chung mite chu tanpui an hnial loh thute leh he luia tui khuah hi a dung sei tak a nih avangin a enkawl nan Speedboat sorkarin dah thei se an duh thu an resolution-ah chuan an sawi bawk a ni.
———-

UPC (NEI) Kohhran chuan Vanapa Hall-ah Missionary Convention an hmang mek a, nizan atanga nakzan thleng a awh ang. He Convention hi nizan khan UPC NE India General Superintendent, Rev R. Lalrinsanga’n a hawng a,  United Penticostal Church North East India Kohhran hnuaia rawngbawlna hmun, Mission Field hrang hrangte an tel a,  Orissa, Andaman, Kolkata, Bhutan, Arunachal Pradesh, W. Bengal, Sikkim, Assam, Tripura, Dimapur, Tripura, Pâng-Bâwm-Chakma te leh District hrang hrangten Home Missionary an rawih, mi 136 an rawn tel a ni. Mission Field hrang hranga rawngbawltute hian an rawngbawlna report theuh an pe a, an thawhna rama hnam inchei dana inthuamin Field hrang hrangten an awmna ram tawngin UPC thurin an sawi rual bawk. Inkhawm hi District hruaituten kaihhruaiin, thusawi turin Mizorama an Kohhran hruaitute hman deuh vek an ni a, Zaipawlten Hindi hla an sak deuh vek bakah, zaiho naah pawh Hindi leh Mizo hla sak thin a ni bawk. Vawiin chawhnu khan Aizawl City PYD huaihawtin Fellowship hun hman a ni a, item chi hrang hrang hmanga intihhlimna hun hman a ni. Naktip, Thawhtanni hian Missionary-te puala seminar North Mizoram District Hqrs. Kohhran, Tuikhuahtlang-ah neih nghal a ni dawn a, resource person-ah Aizawl East District Treasurer, Rev. P.C. Lalnghakliana leh North Mizoram District Missions Department Secretary, Evangelist Vanlalliana hman an ni ang.
———

Khatla Presbyterian Kohhran hnuaia awm, New Capital Complex Branch Church chu vawiin khan Aizawl Chhim Presbytery Moderator, Upa C.Hmingthanga’n Kohhran puitlingah a hlang kai. New Capital Complex Kohhran indan inkhawm hi an Kohhran Biak Inah neih a ni a,  Khatla Kohhran Chairman, Upa C.Lalkunga’n Bible chhiara Pathian hnena inhlanna hun a hman hnuah Moderator chuan Kohhran chu Lalpa din a nih angin a mite’n Amah fakna leh biak na hmuna an hmanna turin a hlan a ni. He inkhawmah hian zaipawlte ngaihthlak a nih bakah Kohhran report ngaihthlak a ni bawk. New Capital Complex Kohhranah hian chhungkua 84-ah member 327 an awm a, Kohhran Dan zawh kim 231 an awm bawk a, Kohhran Minister leh Upa an la nei lova, Khatla Bialah an tel a, Aizawl Chhim Presbytery hnuaiah an awm a ni.
———-

Meitei Kristian Inkhawmpui, All Meitei Christian Meet vawi 13-na chu nizan khan Electric Veng Presbyterian Kohhran Biak Inah tan a ni a, Rev. Kh.Surajkumar Singh chu Speaker a ni a,  nakzanah a tiak ang. He Inkhawmpui-ah hian thupui atan Genesis 19:17 thu, “I nunna turin tlan chhuak rawh” tih hman a ni a, inkhawm apiangin Speaker-in Pathian thuchah a sawi a, inkhawm ban apiangin Fellowship leh Counselling Class neih a ni. Meitei Meet-ah hian naktuk zingah Bible Study neih a ni ang a, chawhnu inkhawmah Speaker hian ring tharte Baptisma chantirin Lalpa Zanriah Sacrament a buatsaih an kil ho nghal dawn a ni.
———-

The Gideons International in India, Aizawl Camp member tharte lawmna inkhawm chu vawiin khan I&PR Conference Hall-ah neih a ni. He hun hi The Gideons International in India, Aizawl Camp President, Pu Rualzakhuma’n a kaihruai a, hruaitu tharte inhmelhriattirna a neih hnu-in member tharte lawmna hun hman a ni. The Gideons International hi a thlawna Bible sem thin an ni a, tunah hian ram hrang hrang 190 chuangah a thlawnin Bible an sem tawh a ni.
———

Mizoram Wrestling Association chuan December ni 11 khian Mizo Inchai Title fight, Aizawl Lammualah a buatsaih dawn. Vawiin khan Chaltlang YMA Hall-ah Mizo Palian, Palaihawl, Pate, Nulian leh Nute Inchai champion leh anmahni chotute hi an taksa len zawng teh fel a ni a, Palian champion ni lai, F. Lalhmingmawia Kolasib khua hi kg 98.5-a rit a ni a, amah chotu, PB Lalnienga, Saitual khua chu kg 106.8 a ni a, an pahnih hian Mizo Palian Inchai champion hlui, LR Bawlliana cho tur zawnna-ah an lo inchai tawh a, round pangngaiah an inhneh tawk avangin round hnih dang pek belh an ni a, chumi hnuah pawh an la inhneh tawk zel avangin, in-ban-phawiinchak zawk zawn a ni a, F. Lalhmingmawia hi a vanneih tak avangin hetih hun laia Mizo Inchai champion, LR Bawlliana nen inchaiin, F. Lalhmingmawia hian hneh takin LR Bawllian champion nihna chu a laksak ta a ni. Mizoram Wrestling Association hruaitute chuan tun tum Palian Inchai hi a hmuhnawm hle dawna an hriat thu an sawi a, anni bakah hian Palaihawl champion, Zosangzuala leh a chotu, Rothangzuala, Pate champion F. Vanlalsiama leh a chotu Lalrohlua, Nulian champion Lallawmzuali leh amah chotu Lalbiakdiki leh Nute champion, PC Rodingliani leh amah chotu, C. Vanlalzuali te Inchai pawh a hmuhnawm hle tur thu an sawi bawk. He inchaiah hian Palian champion hian cheng 50,000 a hlawh ang a, amah chotu hian cheng 25,000 a hlawh dawn a, Palaihawl leh Pate, Nulian leh Nute inchai-ah pawh champion laiin cheng 15,000 an hlawh ang a, a chotuten cheng 7,500 an hlawh dawn a ni. Title fight-a tel turte hi Nazareth Hospital-ah an hriselna dinhmun endik vek a ni dawn bawk a ni.
———

Mizoram Chess Association (MCA) buatsaih, Children Chess Festival chu vawiin khan Electric Veng YMA Hall-ah neih a ni a, he Chess Festival-ah hian naupang kum 15 hnuai lam, Chess khel thiam 100 chuang an tel a ni. He Festival-ah hian Rapid chess leh simalteneous games hmangin naupangte’n chess an khel ho a, hetah hian Mizoram Chess Association No 1-in a rualin naupang 16-te chess a khelhpui a, hei bakah hian chess game rang chi ti-a sawi, Rapid Chess game an khel bawk. Mizoram Chess Association hian catch them young centre 5 an nei a, hengahte hian naupangte’n Inrinni tin chess khelh an zir a ni. MCA hruaitute chuan ram pum huap pawhin Mizo naupangte chu chess game-ah an tha hle tih an sawi a, category tinah a thiam 20 thlan chhuah zingah an tel phak deuh zel a, kum thar January ni 4 atanga 12 inkara Agartala-a North East Chess Championship khelh turah pawh Junior category-ah catch them young player-te a tir dawn a ni.
————-

Vawiin khan Aizawl khawpui chu a lum lai berin celsius degree 26.1 a ni a, a vawh lai berin degree 14.3 a ni. Naktuk, Pathianni-ah chuan Aizawl-ah khua a tha ang a, a lum lai berin Celsius degree 27 vel, a vawh lai berin degree 14 vel a nih rin a ni. Naktip, Thawhtanni-ah pawh Aizawl-ah khua a tha ang a, a lum lai berin Celsius degree 26 vel, a vawh lai berin degree 14 vel a nih rin a ni bawk.