www.zonet.in

TUALCHHUNG CHANCHIN THAR

MNF Party President, Pu Zoramthanga chuan, mikhual sorkar enkawl leh awp hlen atan siamtu-in Mizoram hi a din lo a, a neitute, khawchhak atanga a rawn hruai thlak, ram thuthlung, hnam thuthlung leh lal thuthlunga mal a sawmte neih leh enkawl atan a dah zawk a ni, a ti. He thu hi vawiin khan Hnam runa MNF party inkhawmah sawiin Pu Zoramthanga chuan, Congress sorkar hian kihhnawk policy hmangin Mizo mipuite mit tihvaih a tum reng dawn em ni tih a zawt a, Congress sorkar hmasa paihthlak a nih hlim khan MNF sorkar chuan kihhnawk then fai tur namen lo an nei nia sawiin, an sawi chhuah pawh ngai lovin anmahni mi leh sa ngeiin an sawi-sak niin a sawi. Kihhnawk policy hi chhan tlakah an ngai lo tih sawiin Pu Zoramthanga chuan, Chanchinbuten editorial hmangin an chhan khalh zel zawk niin a sawi. Aizawl khawpui tawt leh Traffic jam chungchang sawiin Pu Zoramthanga chuan,  lirthei tawt lutuk tiziaawm tur chuan, an party hmachhawp sa, kawng chhawng neih chu tuna sorkarin chhunzawm mai se a duh thu a sawi a, an ti duh lo a nih chuan thuneihna an chan leh hunah an ti dawn tho tih a sawi. Hei bakah hian lei verh pawh  thangtharin an la rawn ti dawn tho tho niin a sawi bawk. Congress sorkarah malsawmna a tawlh kir nia sawiin MNF President chuan, mautam laia a thlawna buhfai an sem laiin tunah chuan YMA information mike-ah ring tak takin, puitling tan kg 2 naupang tan kg 1, chini gram 400 tih velte an aupui ta reng mai a ni, a ti a, a zahthlak em avangin state thenawmten an hriat a hlauhawm hle niin a sawi.

Chief Secretary, Pu Vanhela Pachuau-in sorkar Department tam tak tihlen ni mah se, mipui tana hnathawh erawh chu a la tam tawk lo a ni a ti. He thu hi Serchhip-a sorkar hnathawkte, Serchhip DC Office-a vawiina kal khawmte sawiin Chief Secretary chuan, tun thlengin Mizoramah building sakte, kawng siamte leh hmasawnna hnathawh tam tak, a nih tur ang ni phak lo a awm thin hi a pawi a ni a ti a, hna vang tawh tak kara sorkar hnathawkte chu an nihlawhzia hriaa an hna tha taka thawk tur leh hun vawng dik tur leh hna nei lo pawhin an office hun chhung chu office-a hmang turin a fuih a, tlaktlumna atan leh service record thatna atan politician-te tlawn ching lo tura hrilhin, dik tak leh taima taka thawk turin a fuih a ni. Chief Secretary chuan sorkar hnathawkte chu sorkar atanga dan anga hamthatna an hmuh theihte an phut rualin danin an thiltih tur a phut vete hriaa hlen chhuah tum turin a chah bawk. Hemi hnu hian Cheif Secretary, Health Secretary ni bawk Pu Vanhela chuan Serchhip-a Chief Medical Officer office building thar, cheng nuai 47, sing 2 leh sang 6 senga sak a hawng bawk a ni.
——–

Mizoram sorkarin sorkar officer-te sawn kualna thupek tun hnaia a chhuah angin Saiha DC, Pu Rodney Lalrinawma chu vawiin khan DC thar, Pu Kunal-a’n a thlak a, an mawhphurhna hi vawiin khan an inhlan a ni. Pu Rodney Lalrinawma hi Planning Department-ah Joint Secretary a ni dawn a ni.
——–

HPC (D) hel pawl, Lalhmingthanga Sanate kaihhruai chuan tun hnai khan Union Home Minister hnenah Hmar Territorial Council siamsak tura ngenna memorandum an thehlut. He memorandum copy an sem chhuah tarlan danin kum 1994 July ni 27-a HPC leh Mizoram sorkar inkara inremna thuthlung siam kha an pawm loh thu leh kha thil thleng kha tun thlenga la tihpuitlin loh, politics-a inbumna mai nia an ngaih tu an sawi a, Hmar mipuite harsatna chin fel nan Mizoram then darh lova Mizoram sorkar hnuaia Hmar Territorial Council din chu an mamawh leh Mizoram sorkar pawhin a thatpui tur niin an sawi a ni. Hemi bakah hian he thil hi Hmar mipuite thil duh leh tihpuitlin ngei atana an phut niin an memorandum thehluh takah chuan an sawi bawk.
———

Nizan dar 8 vel khan Ramhlun South VDP-ten mi pakhat, Abdul Mazit Ali hnen atangin sap zu, AC Black leh Mc Dowell No. 1 case 6 an man. Hemi rual hian zu neitu, Abdul Mazit Ali hi an man nghal bawk a ni. Hemi hma lam hian Ramhlun South VDP-te hian an report dawn bawhzuiin tlaivarin zu tawlh an chang bawk a ni.
———–

Food, Civil Supplies and Consumer Affairs Director, Pu Lallungmuana chuan ei rawngbawlna Gas hralh dan kaihhruaina, LPG marketing discipline guideline section no. 5 phut angin gas distributor zawng zawngte chu showroom-a an telephone tinunga phone atanga mipui dawr theiha mumal taka duty turin a hriattir. Hemi bakah hian LPG Regulation of Supply and Distribution Section 7-na leh hemi tlawh chhana sorkar dan siamah chuan ei rawngbawlna gas distributor zawng zawngte chu an dawr leh show room-ah mipuiten awlsam taka an hmuh theih turin gas cylinder khat man zat, stock an neih zat leh mipuite hriat tur thil dang tarlang vek tur an ni tih gas distributor leh mipuite a hriattir bawk a, dan zawm lo gas distributor-te chu dan anga hrem theih an ni tih a sawi tel bawk a ni.
———-

Aizawl City Traffic Police leh Enforcement Staff tangkawpten kar kal ta Zirtawpni atanga Aizawl khawpui chhunga lirthei, dan lova tlante khauh zawka endik leh dan bawhchhiate ngaihdam theih lohna, Zero Tolerance an hman avangin nimin leh vawiin khan Aizawl District Transport Office-ah, hun tiam chhunga Road tax pe lo leh Licence tinung leh lo mi tam tak, Road tax pek leh Licence tihnun leh tumin an pung khawm nasa hle a, mi tam tak chu zing dar 6 atanga nghakte an awm hial a ni. Vawiina Zonet-in a tlawh lai pawhin, pung khawm hi an thahnem hle a, thui tak tak an intlar a, Transport department thawktute pawh nasa takin an buai phah a ni. Transport department hotute chuan lirthei neituten a hun taka thil an tihfel loh hian, anmahni bawk an buai leh thin avang leh pawisa chawi ngai pawh a tam phah avangin a hun taka pe thin turin lirthei neitute an chah a ni. Zonet thu dawn danin, Aizawlah hian lirthei a pung chak hle a, tuna registration number-a E hman mek chu kumin emaw nakkum kum tir lamah emaw chuan F-ah a kai hman rin a ni.    
————

Zero Tolerence hun hi hman chhunzawm zel a ni a, vawiina duty, Enforcement Staff-te chuan lirthei, dan lova tlan tam tak manin an chawitir a ni. Enforcement Staff-te hnen atanga thu dawn danin, licence nei lote chu cheng 500 an chawitir a, road tax pe lote chu cheng 400, insurance fel lo chu cheng 1,000 an chawitir niin an sawi a, lirthei khalhtu, licence leh document lem, xerox copy kengte pawh a tak an neih loh chuan an chawitir zel tih an sawi. Enforcement Staff-te chuan lirthei an man tam berte chu insurance fel lo a ni tih an sawi a, lirthei khalhtute chu licence leh document dik tak keng keng turin an chah a ni.
———–

Delhi-a India International Trade Fair chu hman mek a ni a, nimin khan Mizoram Day hman a ni a, Chief Minister, Pu Lal Thanhawla’n a hmanpui a ni. Lal Chowk Theatre-a Mizoram Day hmanna-ah hian Art & Culture Deptt. chuan hnam lam chi hrang hrang leh Mizo thuam chi hrang hrang an entir a, hei bakah hian zai thiam hrang hrangte an zai bawk. Mizoram Day hi Delhi-a Mizote bakah hnam dangte pawhin an hlut hle a, programme hman zawh hian Mizoram Pavillion-ah thingpui ruai an kilho a ni. Mizoram Day hmanna-ah hian Chief Minister bakah Industries Minister, Pu S.Hiato, Art & Culture Minister, Pu PC Zoramsangliana, LAD Minister, Pu PC Lalthanliana, Lok Sabha member, Pu CL Ruala, Rajya Sabha member, Pu Lalhmingliana, Nagaland Lok Sabha member, Pu CM Chang leh Chief Secretary hlui, Pu Haukhum Hauzel-te’n an tawiawm a ni. India International Trade Fair-a Mizoram Pavillion hi vawiin khan Parliamentary Secretary, Pu Lal Thanzara, Pu KS Thanga, Pu Chawngtinthanga leh Pu S.Laldingliana-te’n an tlawh bawk.
———–

Mizoram Secretariat Service Association (MSSA) General Conference vawi 6-na chu vawiin khan Chaltlanga Tourist Lodge-ah hman a ni a, DP&AR Minister, Pu H.Liansailova’n a hmanpui a ni. MSSA General Assembly hi an pawl Vice President, Pu T.Sangkunga’n a kaihruai a, Minister chuan sorkar hnathawka service association zawng zawngte chu an pawimawh vek na chungin, sorkar khawl pawimawh lai ber chelhtute chu Secretariat Service-te hi an ni a ti a, hlemhletna do kawngah pawh an pawimawh hle tih a sawi. Pu Liansailova chuan hun vawn dik chu sorkar hnathawkte hmasawn zelna tur a ni a ti a, hemi kawngah hian sorkar hnathawkten hma an sawn chu lawmawm a tih thu a sawi a, transfer leh posting chungchangah pawh harsatna leh chhuanlam siam lova thu awih taka kal mai turin a chah a ni. MSSA Gen. Conference-ah hian chawhnu lamah ro an rel a, hetah hian sorkara an thu thehluh bawhzui dan chungchangte, an pawl inrelbawl dan hrang hrangte an ngaihtuah a, hruaitu thar an thlang nghal bawk. Mizoram Secretariat Service Association-ah hian member 200 chuang an awm a, kum kal ta chhung khan an member 3 an thi a, pension-in mi 26 an chawl bawk.
————

Sorkar laipuia Science and Technology Ministry hnuaia National Science & Technology Entreprenuership Development Board bul tuma Mizoram Entrepreneurship Network (MEN) buatsaih, Entrepreneurship Development Programme on Sustainable Economic Growth chu vawiin khan Lunglei DIC Hall-ah Lunglei Bawrhsap, Pi M Zohmingthangi’n a hawng. Hawnna thusawiin Bawrhsap chuan MEN-in Lunglei thalaite tana hetiang training an buatsaih hi Pathian remruat a ni a ti a, mahni thluak leh tha senga eizawnna nghelnghet leh tlo neih theih a nih chuan Mizoram sum leh pai dinhmunin a that phah ngei a rinawm tih a sawi a, thu awi tak leh tih tak takna thinlung pua training turin a chah a ni. He training hawnna hi Pu Rosangzela’n a kaihruai a, Programme Co-ordinator, Pu Daniel Hauhnar chuan training buatsaih chhan a sawifiah a ni. He training-ah hian mi 30 an tel a, December ni 14 thleng a awh ang.
————–

Mizoram sorkar hnathawk inzawmkhawm pawl, Federation of Mizoram Government Employees & Workers hruaitu tharte chuan vawiin khan an mawhphurhna an inhlan. Puan tawh angin kar kal ta Ningani-a FMGE&W General Conference-a an pawl hruaitu 10 an thlan chhuahte chuan nihna an invuah fel a, President-ah Pu T.Sangkunga, Sr. Vice President-ah Pu T.Rohmingliana, Vice President-ah Pu Pu R.Lalrammawia leh Pu Lalrammawia, Secretary General-ah Pu Lalchuailova, Addl. Secy General-ah Pu F.Vanlalchhuanga, Treasurer-ah Pu Ramhmangaiha Ralte, Secretary, Information changtu-ah Pu Lalthansiama Tochhong, Organisation changtu-ah Dr. Gordon Zohmingthanga leh Finance changtu-ah Pu R.Zoramthanga-te an ni.
————

Mizoram Journalists Association Executive Committee, vawiina Aizawla thukhawm chuan Aizawl Civil Hospital-a damlo harsa zual tanpuina atan Charity Fund tur thawh khawm an remti a, hei hi Civil Hospital Charity Fund-ah pek luh a ni ang. Hemi bakah hian MJA member thar atan mi 10 an la lut bawk a, heng mite lawm luhna hi thla leh ni 12 khian neih a ni ang. He inkhawm hi MJA President, Pu K. Sapdanga’n a kaihruai a ni.
————

Kumpui lingleta mipuite thlir leh nghahfak, Krismas chu thla khat chiahin a dang ta a, hetih lai hian Aizawl khawpui leh District Hqrs. hrang hrangah sorkar leh mipuite chuan boruak ralmuang leh tha tak hnuaia Krismas leh kum thar an hman theihna turin ruihhlo, zu leh suahsual rawngbawlna dang veng turin ngawrh takin tan an la tan. Aizawlah chuan District Magistrate-in halpuah, puak thei thil dang leh naupang pistol, a mu nei chi kawl, zawrh leh hman a khap a, Excise leh Police-ten ruihhlo leh ruihtheih thil dang zawrh leh tawlh rukte man chhuak tura tan an lak bakah zan lama boruak tha leh muanawm a awm theih nan Police-te chuan tlaivarin veng hrang hrang an fang kual thin a, zan rei tak thlenga mi mit tikham zawnga tuallaia khawsa thinte pawh a hmei a pain an man khawm thin a ni. Hetih lai hian veng hrang hranga khawtlang hruaitute leh tlawmngai pawlte chuan an veng chhung theuhvah boruak thianghlim leh muanawm a awm theih tan an la chho mek a ni. District hrang hrangah pawh DC-ten halpuah leh puak thei chi zawrh khapna thupek an chhuah chu Police-ten an kengkawh chho mek a, hemi rual hian Police, Excise leh veng hrang hranga tlawmngai pawlte chuan ruihhlo, zu leh boruak tichhe thei thil vengin ngawrh takin tan an la mek a ni.
—————
 
Sorkar laipuia Youth Services Ministry hnuaia Nehru Yuvah Kendra, Mizoram Zone-in Youth Hostel, Luangmual-a tun thla ni 18 atanga a buatsaih, National Integration Camp chu vawiin khan khar a ni a, Sports and Youth Minister Pu Zodintluangan a hmanpui. Minister chuan NYK chu India ram hmun hrang hranga thingtlanga thalaite tana buatsaih a nih angin thingtlang mite tan a pawimawh hle a ni a ti a, India rama hnam chi hrang hrangte inpumkhatna atan hnam hrang hrang te nunphung leh ningkhawng inhriat tawn a pawimawh tih a sawi bawk. NYK hian zirna tihhmasawnna kawngah te, sports leh hriselna tihchangtlunna kawngah te hna a thawk thin a, India ramah hian thalai kum 15 leh kum 35 inkar, zaa 75 chu thingtlanga khawsa an nih avangin NYK hian pawimawhna lian tak a nei a ni, a ti bawk.  Vawiina khar tak National Integration Camp ah hian state hrang hrang panga atangin an lo kal khawm a. Nagaland atangin 19, Manipur 10, Tripura 10, Assam 10 leh Mizoram atangin 52, an zavaiin 101 an tel a ni.
—————

Lunglei District Tennis Association buatsaih, Lunglei Open 2009, Mizoram Ranking Tennis Tournament, Lunglei a khelh chu vawiin khan zawh fel a ni a, Mizoram hmun hrang hrang atangin Tenis Player thahnem tak an fuan khawm a, Mizorama tennis khel thiam ber berte an tel kim thei a ni. He Tournament-ah hian Veteran-ah Vanlalmawia a chak ber a, Men’s Doubles-ah Lalrinawma, Ngopa leh Lalmalsawma, Aizawl, Junior Boys-ah Vanlalruata, Ngopa, Men’s Singles-ah Lalrinawma Ngopa, tuna Mizoram No 1 ni lai chu a champion bawk a ni. He tournament chhunga Most Promising Player-ah Lalhruaizela, Aizawl chu thlan a ni a, Champion leh Runner Up-te hian Trophy bakah Certificate leh tangkafai an dawng bawk a ni.
———

Vawiin khan Aizawl khawpui chu a lum lai berin celsius degree 22.4 a ni a, a vawh lai berin degree 14.4 a ni. Naktuk Nilaini-ah chuan Aizawl-ah khua a tha ang a, a lum lai berin Celsius degree 27 vel, a vawh lai berin degree 14 vel a nih rin a ni.