www.zonet.in

RAM PAWN CHANCHIN THAR

Indonesia rama thliarkar pakhat, Sumatra-a nimina lawng chesualah mi 29 an thi a, mi dang 17 chin hriat lohin an awm mek. Transport ministry sawi danin, he lawng hi Riau atanga Batam thliarkar pana kal a ni a, lawnga chuang zinga mi 250 chu nung dama chhanchhuah an ni tawh a, a chetsual chhan hi lawngin a phurh zawh tawk aia tam a phurh vang nia hriat a ni. Transport ministry hotute chuan khaw chhia avanga thli leh ruahin tanpuina hna thawktute a tihbuai avangin, chhanchhuah hna thawh a har hle niin an sawi a, he lawnga chuang tura ticket la hi mi 242 chauh an ni a, mitthi leh chhanchhuah tawh pawh an tam em avangin, tuna chin hriat loha awm mek puan tawh sa bakah hian mi dang pawh an la awm mai thei niin an sawi.  Riau bial Police hotu,  Yasin Kosasih sawi danin he lawng, Dumai Express 10 an tih hi a chhuah atanga minit 90 velah a pil a, he lawnga chuang ve pakhat chuan, lawngah hian naupang 15 telin mi 228 an chuang niin a sawi. Mihring bakah he lawng hian bungrua a phur tam hle a, tuipuia a kal lai hian hmuh lawk hman lohvin tui fawn, metre hnih vela sangin a rawn chhilh hlup mai niin an sawi. Riau thliarkar leh Indonesia rama thliarkar dang inkal pawhna ber chu lawng hi a ni a, Riau leh Sumatra inkarah hian lawng lian deuh, chak deuh leh tunlai deuh an hmang tlangpui a, chhiatna thlen thulha hman tur, life jacket leh lawnglengte pawh an kawl tel thin a ni.  

Iraq rama ram dang sipaite chet dan hleihluak chungchang chhui tura din, Inquiry Comission hotu, Sir John Chilcot chuan, an thil hmuh chhuah leh, an thil finfiahte chu a nihna ang takin an puangzar dawn tih a sawi a, an thil chhui chu sap sipaite thiam chantirna tur emaw, duhsakna lantirna emaw a ni dawn lo tih a sawi. Chilcot chuan, an thil chhui tur hi naktuk atang khian an tan dawn tih a sawi a, sawrkar thuneitute chu an thu zawh fiah hmasak turte an ni tih sawiin, heng zingah hian British PM hlui, Tony Blair pawh a tel tih a sawi. Sir John Chilcot chuan, an thil chhui turah sawrkar a inrawlh dawn lo tih a sawi a, member 5 awmna Commission hian an duh dan ang takin an thil chhui mai dawn tih a sawi.
————

Philippines ram chhim lama Mindanao thliarkarah tukin khan politician leh chanchinbu mi 21 ruk bo an ni a, heng mite ruang hi a hnuah chhar a ni tih sipaiten an sawi. Heng mi 21 hi tualchhung roreltute thlanna tur chuh tumte an ni a, chuh tura hming an pek luh dawn laiin silai kengten manin an ru bo a ni. Philippines ram inthlanah hian tharum thawhna a chhuak nasa hle thin a, chhim lamah a hluar zual a, tualchhunga an inepna bakah hel ho an inrawlh ziah bawk a ni. Nakkum May thlaah ram pum hruaitu tur an thlang dawn a, hemi atana inbuatsaihna chi khat atan tunah hian tualchhung inthlan an hmabak a ni. Sipai hotu pakhat, Maj- Gen Alfredo Cayton chuan, silai kengten heng mi 21 an man hnua an hruaina hmunah hian an motor hmante pawh an hmu tih radio-ah a sawi a, an ruangah hian silaia kahna hnuhma an hmu bawk tih a sawi. Ruk bo hnua thah takte hi hmeichhe 13 leh mipa 8 an ni a, an zingah hian candidate nih tum pakhat nupui pawh a tel a ni.
———–

Pakistan rama thil hlui lai chhuaktute chuan, an rama Taliban mi firfiakte chu sawrkarin a tuk dawl vat loh chuan  an ramin hman lai thil hlui a neih zinga Gandhara leh Buddhist sakhaw hmun pawimawhte chu a chhe thuai thei dawn niin an sawi. Taxila Museum-a thawk, Abdul Nasir Khan chuan, mi firfiakte chu hnam ro tichhetute an ni tih a  sawi a, an ram chhung buaina-in ziaawm lam a pan thuai loh chuan an ramin hmanlai thil hlu a neih vete chu a riral mai a hlauhawm tawh a ni a ti. Taxila hi Pakita khawpui Islamabad atanga km 20 vela hla-a awm a ni a, he khua-ah hian hman lai mite kuthnu tam tak bakah kum zabi pangana atanga kum zabi pahnihna lai vela Buddhist sakhaw thil pawimawh tam tak pawh a awm a, tun hnaiah heng lai bial hi firfiak pawlte leh sawrkar sipai inkahna-a bomb leh silaimu-in a den fo avangin, heng thil hlui hlu tak takte hi a riral mai a hlauhawm hle nia hriat a ni. Taliban-ho hian kum 2001 March thla pawh khan Afghanistan-a Bamiyan Buddha lim, kum 1,500 chuang zeta upa chu an lo tichhe tawh a, helho hian thil hlui bakah tunlaia intihhlimna lam chi an huat avangin, Pakistan-a thil hlui awmte hi a him tawh lo hle nia hriat a ni bawk.
————-

US President hlui, George W Bush-a hnuaia National Security Adviser, Stephen Hadley chuan, Pakistan Nuclear ralthuam chu mi firfiakte kuta a luh mai a hlauhawm tawh hle niin a sawi. He thu hi Halifax-a International Security Conference neihah nimin khan a sawi a, Stephen Hadley chuan, Pakistan dinhmun chu a chhe takzet tih sawiin, Pakistan sawrkar chu a ngelngheh loh avangin a nuclear ralthuam siamna hmanrua-te chu thawk leh khata bo duak thei a ni tih a sawi a, he ngaihdan hi George W Bush-a, President a nih lai atanga a neih tawh a ni tih sawiin, a hma phei kha chuan Pakistan chu Taliban mi firfiak-te thuneihna hnuaia awm mai tur awmin a lang hman niin a sawi.
————-

Lashkar-e-Toiba (LeT) chuan FBI ten an man, David Headley leh Tahawwur Hussain Rana chu an pawl mi an nih loh bakah, heng mi pahnihte hian an pawl nen engmah inkungkaihna an nei lo niin a sawi a, an pawl thupuangtu chuan, Headley leh Rana-ten an pawl mi anga an insawina chu thu dik lo leh phuahchawp mai niin a sawi. Puan tawh thin angin, Headley leh Rana hi Chicago-ah FBI ten an man a, an chungchang chhuina kal zelah LeT mi firfiakte nena inkungkaihna tha tak nei leh, India leh Denmark ram chanchinbu pakhat, Jyllands-Posten beih dan tur ruahman tute nia hriat an ni a, an inpuanna-ah pawh hei hi tihchian ni tawh mah se, LeT helho chuan an pawl mi an nih loh thu an sawi ve thung a ni.
———-

England chhim lama Oxford khuaa In an lilam chhungah Scientist hmingthang tak, zawng atangin mihring hi a lo piang nia sawitu, Charles Darwin-a lehkhabu ziah ‘On the Origin of Species’ chhuak hmasa ber hmuh chhuah a ni. He lehkhabu hi kum 1859-a chhut a ni a, copy 1,250 tihchhuah a ni a, tuna In an lilam-ah hian bual in chhunga an lehkhabu dah zingah hmuh chhuah a ni a, he lehkhabu hi naktukah lilam ve nghal a ni ang. Thil hlui lilam lama eizawng, Christie’s chuan, he lehkhabu hi pound sing 6 vela hralh thei an inbeisei tih an sawi a, Darwin-a lehkhabu ziah, chhuak hmasak ber a nih bakah, he lehkhabu atang hian mihring lo pian chhuahdan zirtute tan thil tam tak hriat tur a awm niin an sawi.
———-

China rama lungalhthei khura Gas puak avanga thi chu mi 104 an tling tawh. State sawkar thuchhuah sawi danin, hevanduaina thlenna hmun, Heilongjiang khuaa lungalhthei khur chhungah hian mi 4 an la tang a, hliam zinga mi 60 chu damdawi Inah enkawl an ni a, an zinga 6 chu an ngaihtuahawm hle nia hriat a ni. Puan tawh angin, Inrinni zinga he vanduaina thlen lai hian hnathawktu 530 an awm a ni.
————

Pakistan sipaiten Afghanistan nena an inrina laia mi firfiakte an beihnaah mi 29 an thi niin Pakistan sipai hotu, Maj. Gen. Athar Abbas-an CNN a hrilh. Afghanistan nena an inrina lai, tlang rama awm, mi firfiakte hi thlawhna hmangin an bei niin Maj. Gen. Athar Abbas chuan a sawi a, darkar 24 chhung an beih hnu-ah mi 29 vel an thi hman niin a sawi. Hemi rual hian an ram hmar lam, Loesam biala mi firfiakte an beihna-ah pawh mi firfiak 11 an thi niin sipai hotute chuan an sawi a, he an inbeihna-ah hian sawrkar sipai 2 pawh an thi a, chhim lama Orakzai bialah pawh sawrkar sipaite hian hel 13 an thah bakah, sipai 1 pawh he hmunah hian a thi a, South Waziristan-ah pawh ni khat chhungin hel 5 an that niin an sawi bawk.
————

Australia rama Christmas thliarkara Sri Lanka leh Afghanistan ral tlante inkara buaina chhuakah mi 40 an hliam. Christmas thliarkar hi Australia awpna hnuaia awm a ni a, he hmuna raltlan anga luh tum, Sri Lanka leh Afghanistan mi, ral tlan an dah khawmna hmuna intibuaite hi darkar chanve chhung zet an thelh hnuah boruak hi an beng dai thei hram a ni. He buainaa inhnamhnawih hi mi 150 vel an ni a, an zinga mi 40 vel chu an hliam hman a, hliam zingah hian mi 3 chu an ruh a tliah avangin, Perth khawpui panpui an ni a, hliam dang chu he thliarkara damdawi Inah enkawl an ni a, buaina chhuah chhan chhui chiang tur hian raltlan zinga mi thahnem tak chu hren mek an ni. He thliarkar hi Australia rama ral tlan anga luh tumte dah khawmna hmun a ni a, tunah hian mi 1,000 vel tana ruahman a ni a, Australia sawrkar chuan khum 2,000 dah belha tihlen a tum mek a ni.
————

Kum 1975 leh 1979 inkara Cambodia rama thuneihna changtu nunrawng tak,  Khmer Rouge pawla an hruaitu panga zinga pakhat, Comrade Duch ti-a hriat lar, Kaing Guek Eav-a thubuai chu tihtawp a ni dawn hnai tawh niin a chungchang ngaihtuahtu Court chuan a sawi. Kum 67 mi, Comrade Duch hian khatih hunlai khan tan In pakhat a enkawl a, an pawlin an rama thuneihna an chan lai khan mi maktaduai 2 vel an tihlum hman nia hriat a ni a, Khmer Rouge rorelna rapthlak taka an hruaitu  lu ber a nih avangin, khang hun laia an rama harsatna thleng hre pha zinga la damte chuan Duch-a chunga court-in hremna a lek dan tur hi an hre chak tawh hle  a ni. Comrade Duch-a thubuai hi kumin February thla atang khan ngaihtuah tan a ni a, thil finfiah ngai tam tak Court-in a finfiah tawh avangin, nakkum kum tir lamah khi chuan Duch-a chungchangah hian thutlukna a siam thei tawh dawn nia hriat a ni a, hemi hnu hian Khmer Rouge hruaitu dang 4-te chungchang ngaihtuah a ni leh dawn a ni.