www.zonet.in

TUALCHHUNG CHANCHIN THAR

Aizawl khawpuia chengte tui in tur hnianghnar tawka pekna tur, Greater Aizawl Water Supply Scheme Phase-II siamtu contractor, Johnson Eastern Power (JEP) contract chu vawiin khan cancel a ni. Cancel-na order hi vawiin khan PHE Department Chief Engineer, Pu R.Lalfanliana’n a chhuah a, hemi hnua kan Corr. thu dawn danin Aizawl khawpui tui pekna contract cancel a nih nachhan hi hna zawh hun tura contractor-in a zawh theih loh vangte, hun rei tak chhung hna a chawlhsan vangte leh contract hna inpek dana contractor tih tur ruat thahnem tak hun tiam chhunga tihpuitlin theih a nih loh vangte a ni. Kan Corr. thu dawn danin, Greater Aizawl Water Supply Scheme Phase-II hi a tira ruahman dan chuan Aizawl khawpuia mihring cheng nuai 2, sing 5 leh sang 5 awmte chawm nan ni tin tui litre maktaduai 30 chuang pump chhuak tura tih a ni a, kum 1999 November ni 23-a PHE Department leh JEP-ten hnathawk tura inremna thuthlung an siam atangin he hna hi thawh tan a ni a, tunah hian hna tam tak zawh loh a nih bakah Tlawng lui atanga tui a dawt luhna tur, Intake leh a khawl cheng vaibelchhe tam tak man tur la bun loh a ni a, Phase-I Intake tui pump chhoh sa leh hmun tam takah Phase-I pipe tawmin tui pump nan hman ve a ni a, he Project pipe lian phum zawh lohna metre 400 chuanga thui a la awm bawk a ni. He Contract cancel a nih tak avang hian he hna hi Contractor dang kutah dah tawh lovin, PHE-in Departmental Work-in an thawk zui dawn nia thu dawn a ni.

Mizo Zirlai Pawl President hlui, Pu PC Laltlansanga chuan, Tuikuk-te chu awm khawm tuma Mizorama rawn let leh tum tlat an nih thu leh, tun hnaia Zarzokima tualthihna pawh vanduai palh ni lovin tum lawk neia thiltih ni ngeia a rin thu a sawi. Vawiin khan Pu PC Laltlansanga hian a chenna inah he thu hi thuthar lakhawmtu thenkhata hrilh a, Tuikuk ho thil tum ber chu Mizoram-ah hmun khata a hlawma awm a, Autonomous District Council neiha, MLA hial neih ve nia sawiin, tun hma pawh khan MLA leh MP inthlanah te pawh chuh an lo tum ve fo tawh thin niin a sawi. Hemi tihlawhtling tur hian thuang hnih, overground leh underground-a kalin, hmun khata an awm khawm vek theih nan hian Mizoram atanga chhuah veka luh that leh an tum a, tihluihna-in an mipuite pem khawmtir an tum niin a sawi. Pu Laltlansanga chuan hei vang hian kum 1998 April ni 19 pawh khan, Mizoram atanga chhuah duh lo zinga mi, Kristian Sesih khuaa mi chu Tuikuk hel BNLF-im an kah hlum phah tawh nghe nghe a ni a ti a, Tuikuk ho hian Tripura an thlen hnuah thu dik lo hmangin Mizote an hek ta nia sawiin, Mizoram atanga anmahni um chhuak ang te, an In leh lo halsak a, an hmeichhiate pawngsual ang hial-te in sawrkar laipuiah Mizote an puh a. Hei vang hian NGO Central YMA, MHIP, MUP leh MZP-te chu National Human Rights Commission-ah zu kalin thil awmzia an zu sawifiah a, Tuikuk te tana hma la a, khawvel hriata Mizote puh chhiatna tidarhtum chhawmdawltu pawl anga insawi, Asian Centre for Human Rights an tih pawh National Human Rights Commission hian an hriatpui loh pawl an nih thu an lo sawi a, hemi tum hian Mizoram aiawhte chuan Delhi Mizoram House-ah Press Conference kovin Tuikuk hovin Mizote an puhna dik loh dan hi an sawi a, hemi hnu hi chuan heti zawng hi chuan Mizo-te hi an puh leh ngai ta lo niin a sawi bawk. Tuikuk ho hi Autonomous District Council hmu hmasa lo chuan Mizorama an lo kir a rinawm loh niin MZP President hlui chuan a sawi a, an lo kir chuan hmun khata inhlawmkhawm a, MLA bial pahnih pathum neihna remchang insiam an tum a, chutiang ni lova hel lokir, BNLF leh Mizoram sawrkarin thuthlung an ziah tawh anga lokir tura ruahman a nih chuan harsatna hi an siam chhunzawm zel a rin thu leh, Tuikuk lokir turte hi hmun khata an awm khawm loh dan tur ngaihtuah chu thil pawimawh niin a sawi bawk………….
———–

Bungthuam khaw tlangval Zarzokima, Tuikuk hel nia hriatten an thah kaihhnawiha buaina chhuak chungchanga thil awm dan thlirin Information Secretary, Pu Nghaklianmawia hovin vawiin khan sawm bik thenkhat an thukhawm. He thutkhawmnaah hian, Information Department, Police, Home, Central YMA leh ZONET leh LPS Cable TV aiawhte an tel a, he meeting hian, Zarzokima thih kaihhnawiha Media-ten thu dik an chhuah theihna turin Media Coordination Committee, Information Department Director Pu Jim K.Chozah kaihhruaiin  a din nghal a, member atan Information department,  Police, Central YMA leh MJA aiawhte ruat an ni a, he Committee hian mipui hnena thudik puan chhuah a nih theih dan tur a ngaihtuah thin dawn a ni.
———–

NLUP Implementing Board Chairman, Pu R. Selthuama chuan NLUP tanpuina dawngtu, hmang dik si lo chu hrem theih a ni ang a ti. He thu hi NLUP kalpui dan tur hrilhfiahna inkhawm, vawiina Lawngtlai YLA Hall-a neihah sawiin Pu R. Selthuama chuan NLUP tanpuina dawngtu tur thlan fel a nih tawh thu leh rei loteah an hnathawh tur pawh thlan fel a nih dawn thu a sawi a, anmahni hlawkna leh dinhmun siam thatna tur a ni tih hre renga tihhlawhtlin ngei tum turin mipuite chu a chah a ni. Lawngtlaia NLUP campaign hi Lawngtlai District AMFU President, Pu N. Lalzova’n a kaihruai a,  mi thahnem tak an tel a ni.
———

Nimina Saiha-a Crop Exhibition 2009 neihna hmunah vawiin khan Agriculture Technology Week hman zui a ni. He technology week hi Saiha-a Krishi Vigyan Kendra (KVK) buatsaiha neih a ni a, hetah hian Saiha KVK leh Agriculture Department tang kawp chuan khawl hmanga thlai chin dante, thlai chi thate, lei tha siam dante, lei awm dan enna khawlte, rannung hmanga lei tha siam dan leh thil chi hrang hrang an entir a, naktukah chuan an hmunpuiah an hnathawh dan leh buh leh tlai chin dante loneitute an entir dawn a ni. He Agriculture Technology Week hi Saiha District Agriculture Officer, Pu James Vanlalluaia’n a hawng a, hetah hian KVK Coordinator, Pu Lalhmingmuana bakah thil chi hrang hranga Subject Matter Specialist-ten loneitute chu an zirtir a ni.
————

Aizawl District Rural Area chhunga VC ten vawiin khan Chanmari Branch YMA Hall-ah Assembly vawi hnihna an hmang a, he hun hi an pawl Vice President, Pu Lalthardenga’n kaihruaiin, Mizoram State Law Commission Chairman, Pu Lalrinawma, MLA-in a hmanpui a ni. Pu Lalrinawma chuan VC te chu khawtlang roreltu an nih avangin thubuai leh hla buai ah pawh hleih nei lo-a rorel turin a chah a, dik tak leh felfai taka rorel a, khawtlangin hma a sawn theihna tur kawng ngaihtuah a, mahni tanghma hai lo turin a chah bawk. Aizawl District Rural Area chhunga VC te hian chawhnu lamah hruaitu thlanna leh inruat tharna hun a hmang a, Member 70 chuang an kal a ni.
——

Mizoram sorkar hnathawk inzawm khawm pawl, Federation of Mizoram Government Employees and Workers General Conference vawi 26-na chu vawiin khan Vanapa Hall-ah tan a ni a, naktuk thleng a awh ang. Vawiina he Conference tan ni hian khuallian, DP&AR Minister, Pu H. Liansailova chuan sorkar hnathawkte chu sorkar mi rawih leh inhlawhfa ringawt ni lovin, sorkar neitu an ni tih a hrilh a, sorkar siamtu chu Chief Minister leh Minister dangte chauh ni lovin sorkar hnathawkte nen vek an ni tih sawiin, dik tak leh thahnem ngai taka hnathawk turin a fuih bawk a ni. Pu H. Liansailova chuan tunlaia Mizorama corruption a hluar hle nia sawi chu a dik a nih chuan ram chhiatna bul a ni a, amaherawhchu sorkar hnathawk zingah mi tha leh rinawm tak tak an awm avangin sorkar tha nei turin hnathawktu tha an awm tih sorkar chuan a hai lo a ni a ti bawk. Minister chuan zaithiam thlanna, Idol leh Icon tihte hi Mizo mipuite hian an chawi lar lutuk thei a, anmahni pawhin an chhiatpui thei a ni a ti a, hemi rual hian sorkar hnathawk tha leh rinawmte leh mahni eizawnna-a mi hlawhtlingte chawimawi tul a tih thu a sawi bawk. DP&AR Minister chuan lang tlang thei leh dan rorelna sorkarin kalpui a tum tih sorkar hnathawkte chu a hrilh a, transfer chungchangah insawipui fo loh a tul a, hmun hlaa awmte chu lirthei leh thil dangah ngaihsak bik an tul a ni tih a sawi bawk. FMGE&W Conference hi naktukah chhunzawm a ni ang a, hruaitu thar an thlang bawk ang. He pawl hian Central Pay Commission 6-na ruahmanna siam anga hlawh lak ve thuaite, DA la pek lohte leh Interim Relief pe thuai tura sorkar an phutnate an tarlang bawk. Vawiina an conference hi Senior Vice President, Pu T. Sangkunga’n a kaihruai a ni.
————-

Aizawl City Traffic Police leh Enforcement Staff-ten naktip, tun thla ni 20 atangin Aizawl khawpui chhungah dan zawm lova lirthei khalh ngaihdam theih lohna hun, Zero Tolerence an hmang tan dawn. Traffic SP, Pu Lalbiakzama hnen atanga thu dawn danin Zero tolerence hi Krismas thleng an hmang dawn a, lirthei khalhtute chu dan zawm theuh turin an beisei tih a sawi.
————

SCERT hnuaia Population Education Cell-in thuthar lakhawmtute tana Adolescense Education Programme Training a buatsaih chu vawiin khan SCERT Committee Room-ah neih a ni a, SCERT Jt. Director, Pi Sangthanmawii’n a hawng a ni. Hawnna thusawiin Pi Sangthanmawii chuan, zirlaiten thiamna tak tak an neih theih nan zirtirtu thiam an neih a ngai tih a sawi. Tleirawlte lehkha zirtir dan zirna-ah hian SCERT Deputy Director, Pi Laldawngliani, SCERT Dy. Director, Pi D.Ramdinthangi, SCERT Lecturer, Pi A.Lalchhandami leh Durtlang Damdawi Ina K.Ward enkawltu, Dr.RL Sanghluna-te’n Adolescense Education Programme chungchangte, tleirawlte than chhoh dante, nitin nun zir thiam dante, damdawi hman sual leh HIV/Aids chungchangte ngaihthlak a, zirho a ni a, hei bakah hian sawihona hun hman a ni bawk.
———-

Ex-Mizo National Army (Ex-MNA) Gen. Hqrs.chuan Chief Minister-in tun hnaia “Chin History, Culture & Identity” tih lehkhabu a tlangzarhna-a thusawi, MNF khan Independent tumna tak tak nei lovin buaina an siam avangin MNF Secretary a nihna a bansan tih chu hriatthiam harsa an tih thu an sawi. Thuchhuah an siamah Ex-MNA chuan MNF-a an hruaitute leh Mizo National Army-te khan Mizoram hi tun hma atanga ram zalen, tuma bawiha awm ngai lo, mahni-a ro inrel a nih anga awm leh turin an bei niin a sawi a, lu chhum ban chhum huama an thawh chhuahna chu a der a ni lo tih sawiin zalenna sualna-a nunna hlantute pawh khan an tider lo tih Pu Lal Thanhawla hian hria se an duh tih an sawi. Ex-MNA Gen. Hqrs thuchhuah chuan hnam dangte pawhin Mizoram zalenna sualtute hi Pu Lal Thanhawla puh ang hian an la puh ngai lo niin an sawi a, tun hnu-ah hetiang thu hi Pu Lal Thanhawla hian sawi tawh lo se an duh tih sawiin, a thusawi hian zalenna sual laia nunna chan chhungte rilru hle niin an sawi a, khatih hun lai khan Pu Lal Thanhawla hi Mizoram-ah a awm em tih chu an zawhna a nih thu an sawi bawk.
————

Vawiin khan Saiha khawpuia Private Motor khalhtute chu motor khalh dan leh him taka lirthei hman dan zirtir an ni. Sorkar duh dan anga driver-te zirtirna pekna inkhawm hi DTO, Pu Lalsangluaia, SDO Sadar ni bawk kaihhruaia neih a ni a, hetah hian driver-te chu Traffic OC, Pu Darhnuna leh MVI, Pu C. Lalawmpuia-ten dik tak leh fimkhur taka motor khalh dan an zirtir a ni.
————-

Thawhtanni khan Biate Community Hall-ah lo neitute training pek a ni a, hetah hian thlai leh hnim hnah tawih hmanga lei tha siam dan zirtir a ni. He training-a khuallian, Parliamentary Secretary, Pu KS Thanga chuan mirethei chhanchhuahna tura sorkarin NLUP a ruahman chu hlawhtlinpui tur leh hmasawn nana hman tangkai ngei tum turin lo neitute a fuih a, rinawm lo leh thatchhe taka eizawn hi Pathian duh loh zawng leh Pathian malsawmna dawn theih lohna niin a sawi bawk.
———

Khawzawlah pawh nimin khan sorkarin NLUP hmanga kut hnathawktute dawm kan a tum dan chungchang hrilhfiahna hun buatsaih a ni a, heta thusawitu Parliamentary Secretary, Pu Lal Thanzara chuan he project aia tha hi kut hnathawktute chhanchhuah nan leh dawm kan nan a awm thei tawh lovang tih sawiin, dik taka hmang turin tanpuina dawngtu turte chu a fuih a ni. Pu Lal Thanzara chuan Mizorama corruption nasa taka hluar tawh tireh turin sorkar chuan dan hmangin hma a la zel dawn tih a sawi bawk.
————–

Trade and Commerce Minister, Pu Lalrinliana Sailo chuan vawiin khan Kolasib Project Vengah District Marketing Officer office thar a hawng. He office-ah hian hnathawktu 9 dah nghal a ni a, heng mite hian Trade and Commerce lamah Kolasib District an enkawl dawn a ni.
———–

Airtel Company-in Children’s Day puala hmarchhak bial pumpuia on the spot painting competition a buatsaih chu vawiin khan result puana lawmman sem a ni. Clean North East, Green North East tih thupui hmanga Aizawl, Thenzawl, Kolasib leh Lawngtlaia intihsiak hi Pu HK Jerry Ramliana’n a endik a, Rinmuanpuii, Lawngtlai chu pakhatna a ni a, 2-na chu Sanny Lalhriatpuia, 3-na chu MS Dawngzuala, St.Mary’s School ve ve an ni a, an pathuma lemziak hi nakkuma Airtel calendar buatsaih tura milem dah tur thlanna atan Guwahati-ah thawn a ni dawn a ni.
———–

Sorkar laipuia Directorate of Telecommunication-in ram chhunga mobile phone sim card, a neitu dik tak hming ni lova ziah luh titawp tura a tih angin tunlai hian Airtel Company chuan Mizoram-a Airtel sim card, a hmangtu dik tak ni lova ziah luhte chu a titawp a, hei vang hian Airtel Company sim card hmang, mahni hming ni lote chu an sim card a thi a ni.
———–

Tunlaiin Mizoram-ah thal ruah a sur avangin Inrinni atang khan Lengpui-ah thlawhna a lo tum mumal tawh lo a, nimin leh vawiin khan thlawhna pakhatmah a lo tum thei lo a ni. Lengpui Airport thuneitute hnen atanga thu dawn danin, khua a that loh avang hian Inrinni atang khan thlawhna thlawk a mumal tawh lo a, Inrinni khan Air India thlawhna a tum lova, Kingfisher Airlines thlawhna erawh chu a tum thei a, Pathianni khan thlawhna zawng zawng cancel vek a ni a, Thawhtanni khan Air India leh Kingfisher Airlines thlawhna an lo tum a, nimin leh vawiin khan khaw that loh avangin heng thlawhna pahnih bakah North East Shuttle pawh a lo tum thei lo a ni.
———-

Vawiin khan Aizawl khawpui chu a lum lai berin celsius degree 19.7 a ni a, a vawh lai berin degree 16.9 a ni. Hemi chhung hian ruah millimetre 6.2 a sur a ni. Naktuk Ningani-ah chuan Aizawl-ah ruah a sur a rinawm a, chawhnu lamah tam zual tura ngaih a ni. A lum lai berin Celsius degree 24 vel, a vawh lai berin degree 16 vel a nih rin a ni.