www.zonet.in

RAM PAWN CHANCHIN THAR

Thailand sawrkar hotuten an ram Prime Minister hlui, Thaksin Shinawatra, an kuta hlan tura an ngenna chu Cambodia sawrkarin a hnawl. Puan tawh angin, Thankasin-a hian Cambodia sorkar Adviser hna thawk turin nimin khan he ram hi a thleng a,  Thailand sawrkar palaiten Cambodia Foreign Affairs ministry-ah Thailand sorkar kuta amah hlan dilna hi thehlut mah se, Cambodia sorkar chuan he dilna hi phalsak chu sawi loh, ngaihtuah pawh a ngaihtuah loh tur thu leh, Thailand sorkarin an PM hlui chunga thil an tih dan hi politics thila inhuatna thil mai nia a ngaih thu a sawi a ni. Thaksin-a hi Thailand court chuan kum hnih chhung tang turin a lo ti tawh a, Thailand foreign ministry thupuangtu, Thani Thongpakdi chuan Cambodia hian an ngenna hi a hnawl an rin lawk thu leh, an rin lawk dan anga thil a thleng a nih chuan a hnu leh lama thil tih dan tur an ngaihtuah tur thu a sawi a, Thailand Prime Minister Abhisit Vejjajiva pawhin, Cambodia hian an ngenna hi a hnawl chuan ram pahnih inkara dan bawhchhiate inthleng tawnna thuthlung an neih chu thiah vek an tum tih a sawi lawk bawk a ni. Puan tawh angin Thailand Prime Minister hlui Thaksin Shinawatra hi Cambodia sawrkar chuan an rama Economic Adviser atan a ruat a, Cambodia thiltih danah hian,  kum 2006-a PM a nihna atanga Thaksin-a paihthlatu, Abhisit Vejjajiva-a kaihhruai sawrkar chu lungawi loin, Cambodia a an ram palai pawh a lo kokir tawh a, hetih lai hian  Cambodia  Foreign Minister, Hor Namhong chuan, Thaksin-a chu mipuiten an duh taka PM atana an thlan tlin a ni chungin Vejjajiva leh a hote hian sipai chakna hmangin an paihthla niin a sawi ve thung a ni. Thaksin-a hi politician leh PM hlui a nih bakah inbiakpawhna lam company neitu, sumdawng hausa tawntaw a ni a, thawk khat lai phei kha chuan British Football Club lar tak, Manchester City pawh a lei hial a ni.

Khawvel indopui 1-na tawpna champha pualin khawvel hmun hrang hrangah hun hman a ni. He ni lawmna, Paris khawpuia neihah hian Angela Merkel chu German Chancellor ni tawhte zinga he ni, Armistice Day lawmnaa tel hmasa ber a ni a, London-ah pawh lalnu, politician leh sipai hotu luten kum 1918 November ni 11-a khawvel indopui 1-na tawpna champha pual hian hun an hmang a ni. Australia-ah pawh he ni hi hman a ni a, USA-ah pawh Veterans Day pualin hun hman a ni bawk. Afghanistan, Helmand province-a British sipaite hmunpui, Camp Bastion an tihah pawh indopui 1-naa thi leh hliamte puala inkhawm leh tawngtaina hun hman a ni. Kum 1914 July ni 28 khan  Austria leh Hungary chuan Serbia lakah indo an puang a, 1917 thleng khan khawvela ram chak ber berte chu he indopuiah hian an tel ta a, kum 1918 November ni 11-ah khan Germany chuan tangrual pawl nen indopui tihtawpna thuthlung a ziak ta a ni. Khawvel indopui 1-naah khan mi mtd. 15 chuang an thi a, a rapthlak hle a ni. He indopui tawp ni champha hi ropui taka hman a ni mah se, kha indopuia British sipai telte zinga dam rei ber, Australia rama awm,  Claude Choules kum 108 mi chu a tel duh lova, indopui rapthlak tak chawimawina leh tihropuina nia a ngaih thu a sawi. Choules hi Perth khawpuia nursing home-ah a awm a, he indopuia tel ve dang, Harry Patch chu kum 111 mi nia a thih hnuah kha indopuia tel, British sipaite zinga zinga dam rei ber a ni ta a ni.
———–
 
Nelson Mandela-a’n khawvel mipuite tana hna a thawh hriatreng nan a pian ni, July ni 18 chu kum tin, Mandela Day-a vuaha hman turin United Nations General Assembly-in thu a titlu.  He rawtna hi South Africa Ambassador Baso Sangqu-a put luh a ni a, an ram President hlui, Nelson Mandela chu United Nations tana mi tangkai leh UN kalphung zulzuia hna thawk thin a ni a ti a, he a thu put luh hi ram hrang hrang aiawhten an thlawp thu an sawi hnuah Mandela Day atan July ni 18 chu hman remtih a ni ta a ni.
———-
     
Brazil khawpui pahnih, Rio de Janeiro leh  Sao Paulo-a chengte chu an eng hmuhna ber a chhiat avangin an buai hle. He thil thlen chhan hi an eng hmuhna ber, Paraguay nena an inrina laia Itaipu Dam that loh vang a ni a, he hmun atang hian kawlphetha Megawatt 17,000 pek chhuah a ni a, hei hi tun hnaia thli na tak tleh avangin a chhia a, hei hian inrin lawk theih lohin khawpuiah hian harsatna a siam ta nia hriat a ni. Itaipu Dam thuneitute chuan, an harsatna chu a ziaawm leh tawh niin an sawi a, hetianga eng awm lo thut hian khawpui chhung hmun hrang hrangah harsatna a thlen a, Rio de Janeiro leh Sao Paulo khawpui chhunga inkal pawhna atana hman rel tam tak chu he thil thleng hian a tibuai a, hei bakah hian motor tlan dan leh thil dang pawh eng awm lo hian tibuaiin, eng awm loh remchanga hmanga pawi khawihna thleng thei veng turin Police pawh khawpui chhung hmun tinah tirh an ni.
————-

US Secretary of State, Hillary Clinton chuan US-in nasa zawkin Pakistan chu mi firfiakte bei turin a nawr dawn tih a sawi. Pakistan-in Taliban mi firfiakte a mal beih vak ringawt chuan a firfiaka che thin pawl dang-te hnathawhna a dal pha dawn lo-a an hriat thu a sawi a, a ram chhunga hel leh a firfiaka che thinte chu thlei bik nei lo-a a beih vek a ngai tih sawiin, hemi atan hian, US chuan tanpuina pawh a pe chhunzawm zel dawn tih a sawi.
———–

South Korea leh North Korea lawng sipaite, an ram tuipuia nimina an inkah avanga North Korea-in a beih thut theih reng avangin, South Korea sipaite chu inpeih renga awm tura hriattir an ni. South Korea Defence minister, Kim Tae-young chuan, nimina thil thleng chhan let nan, North Korea-in indo a puan theih reng avangin, an ram President-in  thuchhuah siamin, an sipaite chu inralring tura thupek an ni tih a sawi. Nimina ram pahnih lawng sipaite inbeihna-ah hian North Korea chuan South Korea chu thiam lo zawkah a puh a, tuipuia thil fel lo awm anga an hriat enfiah tura chhuak, an lawng sipaite chu South Korea sipaiten engmah sawi loin an kap ringawt niin a sawi a, South Korea erawh chuan North Korea lawng sipaite chu thiam lo hmasa-ah a puh ve thung a ni.
—————

Russia Police-ten thamna an lak thin thu leh, tualthahna thenkhat-ah an inhnamhnawih thin tih thuthang chu a dik ngei tih Russia sawrkarin a puang. Russia Police-ten dik lo taka thamna an lak leh, tualthahna thenkhata an inhnamhnawih dan hi tun hnaiah internet-ah pho chhuah a ni a, Police-te thil tih dik loh hi mi tam takin an hmuh hnu-ah, Russia sawrkar chuan thil dik ngei a ni tih a puang ta a ni. Police-te thil tih dik loh pho chhuaktu, Major Alexei Dymovsky chuan, Police-te chu an thil tih dik lohah thiam loh chantir ngawt theih an ni lo tih sawiin,sawrkar atanga an hlawh a tlem avangin, an nun khaw chhuah nan thil dik lo ti lo thei lo dinhmunah an ding niin a sawi. Major Alexei Dymovsky chuan, Police-te chungchangah hian an ram Prime Minister, Vladimir Putin pawh hmuh a duh tih a sawi a, thil dik lo intanna chu chhui chhuah ngei ni se a duh thu a sawi a ni. 
———-

US President, Barack Obama chuan Texas-a US sipai hmunpui, Fort Hood-a US sipai 13 kap hlumtu thiltih dan chu eng sakhua mahin an pawm theih loh tur a ni a ti. He thu hi sipai 13-te sunna hun an hmannaah sawiin, thite chu an in lum-ah ngei thlamuang taka an awm laia kah hlum an nih avangin an lainatawm takzet a ni a ti a, kha pawi khawihna kha a thlen chhan kimchang hriat ni lo mah se, thil tisualtu chuan, he khawvel-a a awm lai leh khawvel a chhuahsan hnu-ah pawh rorelna a hmachhawn ngei dawn a ni a ti bawk. Kha thil thlenga pawi khawihtu,  Maj Nidal Malik Hasan chu tunah hian damdawi Inah a la awm mek a, a chhui chiang tura ruat, Senate Homeland Security Committee Chairman, Joe Lieberman chuan he thil thlen dan hi a kip a kawia an chhui tur thu sawiin, khatiang thil kha a thlen tawh loh nan nasa takin hna an thawk dawn tih a sawi.
————-

US sipai bang, John Allen Muhammad chu ral saia mi kap hlum thina puhna thubuaiah thiam loh chantir a nih hnuin vawiin khan tihhlum a ni. Kum 48 mi, John Allen Muhammad hian kum 2002 khan, Maryland, Washington leh Virginia-ah ral atangin mi 10 a kap hlum a, a thurualpui, Lee Boyd Malvo erawh chu dam chhung tang tura tih a ni. Muhammad  hi Virginia-a  Greensville Correctional Center-ah tihhlum a ni a,  Virginia Department of Corrections-a thawk, Larry Traylor-a sawi danin, Muhammad hian damdawi-a chiu hlum a nih dawna thu hnuhnung sawi a duh leh duh loh an zawh pawhin engtin mah a chhang lo a, a chunga thil thleng chu a thil tihsual vanga tuar ni awm lo takin a dawh mai a, a taksaa tur chiu luh a nih lai chuan a thle deuh hlek niin a sawi. Muhammad-a hi a Ukil chuan, thiam lohna engmah nei lo, rilru buai niin a lo sawi tawh a, tuna tihhlum a nih hnu pawh hian, Muhammad-a chu dik lo taka tihhlum a nih avangin Martar niin a sawi a ni. Muhammad-a tihhlumna hian minit 5 chauh a awh a, tualchhung sana-a nizan dar 9:11, India ram sanaa tukin dar 7:41 khan a thi a ni. Muhammad-a pawi khawih hian Washington khawpui chu a tiralti hle a, khawlaia mi kal apiang, bazarah te, sikulah te, petrol lakna hmunah te, khawi hmunah pawh, mi tin an ralti a, chawlhkar thum hnuah motor lian din khawmna hmunah an man ta a ni.