www.zonet.in

RAM PAWN CHANCHIN THAR

North Korea leh South Korea lawng sipaite chu vawiin khan tuipui-ah an inkap a, thi leh hliam an awm em tih erawh chu hriat a la ni lo.  South Korea lawng sipai thupuangtu chuan, North Korea lawng sipaite hi an ram tuipuiah phalna nei loin an lut niin a sawi a, he lawng hi indo lawng hmanga an kah hnuah, North Korea sipaite hian an kap let ve a, he mi hnu hian an lawng chhe tak nen an ram lamah an tawlh kir leh niin a sawi. North Korea erawh chuan an lawng hian ramri a kan lo nia sawiin, thupha chawi turin South Korea chu a phut tih a sawi thung a ni. Thla hmasa khan North Korea hian South Korea chu a ram chhunga indo lawng chhawp chhuakah a lo puh tawh a, ni khat chhungin South Korea lawngte hian an ramri chu vawi 10 lai an kan hman nia sawiin, hetiang thil an tih hian indo a hrin chhuah mai theih tur thute pawh a lo sawi tawh a ni. South Korea leh North Korea tuipui ramri hi, kum 1953-a Korea ram pahnih indo tawp hnua UN-in a siamsak a ni a, hei hi tun thlengin North Korea hian a la pawm duh lo a, hei vang hian kum 1999 leh 2002 pawh khan lawng sipaite hi an lo inkap tawh a ni. Ram pahnihte hi US President, Barack Obama-a’n Asia a tlawh hma ni chiahah an inkap a, North Korea hian a nuclear programme chungchangah inbiak a duh thu a sawi mek a ni.

Tun hnaia US sipai hmunpuia silai hmanga a thiante 13 kap hlumtu, Maj. Nidal Malik Hasan chanchin chu chhui zel a ni a, FBI chuan tun thlenga an hriat theih chinah chuan, he Major hian Muslim sakhaw puithiam pakhat, Al Qaeda lainattu nia hriat chu a be ngei niin an sawi a, he puithiam, Yemen-a awm, Anwar al-Awlaki chuan Maj.Hasan-a nen hian e-mail-in vawi 10 atanga vawi 20 vel chu an indawr niin a sawi. Mahse FBI hotute chuan hei hi an thil chhui mekah a pawimawh tehchiam lo mai thei tih an sawi a,  US sorkar hotute chuan, Ningani kal taa Fort Hood-a America sipai hmunpuia pawi khawihnaah khan Maj Hasan-a hian thurualpui tumah a nei lo niin an sawi. He puithiam, al-Awlaki an tih hi Yemen jail atangin nikum khan a chhuak a, Virginia-a Falls Church-a Muslim biak in-ah puithiam, Imam a lo ni tawh a ni.
————-

Thailand  Prime Minister hlui, Thaksin Shinawatra chuan Cambodia ram tana Economic Adviser hna thawk turin vawiin khan Cambodia a thleng. Thaksin-a’n Cambodia ram a thlen thu hi Cambodia Information minister, Khieu Kanharith-a’n a puang a, Thaksin-a chu an ramin a lo lawm tih sawiin, a hna thar chelh tur-ah, a thil lo tawn tawhte chhawr tangkaiin, a zarah Cambodia ramin dinhmun tha zawk an chuan kai an inbeisei tih a sawi. Thaksin Shinawatra hi kum 2006 khan PM a nihna atanga paihthlak a ni a, Thailand thuneitute chuan an ram PM a nih laia a thil tihsualte avangin man tumin an hel reng a, Dubai-ah hun engemaw chen a lo tlanchhe tawh a ni. Hetianga a chunga Thailand hotuten rilru an put lai hian, an ram thenawm, Cambodia Prime Minister, Hun Sen chuan Economic Adviser hna chelh tura a ruat thu a puang a, ram pahnih inrina laia temple chungchanga buaina an lo neih tawh bawk avangin Thaksin-a chungchang hian heng ram pahnihte inkar hi a tichhe nasa zual a, he thu puan a nih rual deuhthaw hian Thailand sawrkar chuan Cambodia-a a palai a ko kir a, Cambodia pawhin Thailand tih ang hian a ram palai chu a ko kir ve nghal a ni. Cambodia-ah hian  Thaksin-a hi a awm nghet mai ang tih Thailand hotute chuan an hlau hle a, hetiang a nih chuan amah tantu Thailand mipuite rilru chu awlsam takin a hneh thei mai dawn niin an hria a ni.
———–

Japan-in Afghanistan tanpuina tur sum, US dollar tluklehdingawn 5 a pe dawn. Japan hian Afghanistan-a mi firfiakte beihna atanga a inhnuhdawh thu, hman ni lawk khan a lo puang tawh a, he thu a puan rual hian, Afghanistan tana tanpuina a pek tur chu a pek chhunzawm zel tho tur thu a puang nghal bawk a, he a thu sawi bawhzui nan hian vawiin khan US dollar tluklehdingawn 5 a pek tur thu hi a puang zui a ni. |anpuina sum a pek tur hi kum 5 chhunga pek tlak tur a ni a, he sum hi Afghanistan miten hnathawh tur an neih theih nana zirtir nan te, lo neih leh thil siamna hmun tihchangtlunna bakah, sawrkar kuta inpe, mi firfiakte eizawnna tur ruahman nante hman a ni dawn a ni. Hetiang hian ruahmanna siam lawk mah se, sum hman dan tur kimchang chu an ram Prime Minister, Yukio Hatoyama leh US President, Barack Obama-ten tun kar Zirtawpni khian Japan-ah an sawi dun ang.
———-

America thalai pathum, Iran sipaiten July thlaa an rama lut ru-a an puh-a an mante chu, enthlatu anga thubuai siamsak an ni dawn tih Irna News Agency chuan a sawi. America mi Shane Bauer, Sarah Shourd leh Joshua Fattal -te hi Iraq a Kurdish biala an kal vel laiin, Iran ramah hian an lut palh nia sawi a ni a, hei hi Iran sipaite chuan man nghalin, an ram enthlak tumah an puh a ni. Sawrkar thuchhuahin, an ram enthlatu anga thubuai siamsak an nih tur thu a puan hi, US US Secretary of State Hillary Clinton chuan, finfiahna engmah awm lo-a puhna dik lo hmanga thiamloh chantir tumna niin a sawi a, White House pawhin, heng thalai pathumte hian tihsual an neih loh avangin chhuah an ni ngei tur a ni tiin thuchhuah a siam bawk.
——-

Venezuela President, Hugo Chavez-a’n Colombia nena an indo theih reng avanga a sipaite inpuahchah tura thupek a chhuah chungchang-ah Colombia chuan UN hnenah zualko a tum tih a puang. Colombia sawrkar thupuangtu Cesar Mauricio Velasquez chuan, Chavez a thiltih dan chu mi pangngai tih a mawi lo leh, indo a chhuah theih nana midang fuihpawrhna a ni a ti a, Chavez-a’n hetiang thil a ti hi an ram chuan a hrethiam lo tih sawiin, ram hrang hrang inzawmkhawm pawl hnena zualko a, Chavez-a thil tih dan chu an duh lohzia lantir an tum niin a sawi. Puan tawh angin, Chavez hian an ram sipaite chu Colombia nena an indo thut theih reng avangin inralringa awm tura chahin, ramri-ah pawh sipai 15,000 a thawn luh belh a, he thil a tih chhan hi,  Colombia leh US  tangrualin an ram beih an tum nia a hriat vang leh, Colombia chu US duh dan dana a awm hnuah, Venezuela pawh US hian lak tuma ruahmanna siam nia a hriat vang a ni.
———–

Burma rama mipui sawrkar a awm theih nana beitu Aung San Suu Kyi chu, nakkum inthlan a hmachhawn theih nan, pawn chhuak thei lo-a hren a nihna atangin chhuah a ni dawn. He thu hi an ram Foreign Ministry-a Director General, Min Lwin chuan a puang a, tun hnaia ram dang thuneituten an rama sipai sawrkar thuneitute an kawmna zar zoin, Aung San Suu Kyi hi a zalen hnai ta tih a sawi a, amah hrengtu sipai sawrkar chuan Suu Kyi-i chhuah a nih theih nana ruahmanna a siam mek thu leh, a ni leh a hun tur tak erawh chu an la tihchian theih loh thu sawiin, Suu Kyi-i chuan nakkum inthlan atan a lamtangte a ho thei thuai dawn niin a sawi.
———–

China chuan kumin July thla-a Xinjiang biala hnam leh hnam inkar buaina chhuaka mawhphurtu-a a puh mi 9 a tihlum. Heng mi 9 zinga 8 hi Uighur hnam an ni a, mi dang pakhat hi Han hnam a mi a ni. Xinjiang sawrkar thupuangtu, Hou Hanmin chuan, July thla-a Han hnam leh Uighur hnamte inkara buaina chhuak avanga tihhlum tura an chungthu relsak mi 9 chu tihhlum an ni ta tih a puang a, heng mite hi engtia tihhlum nge tih leh, an tihhlumna hmun erawh chu a puang lo a ni. Puan tawh thin angin, July thlaa Han leh Uighur hnam inkara buaina chhuakah khan mi 197 an thih bakah mi 1,600 vel an hliam nia sawi a ni a, he thil thlenga mawhphurtu zinga mi 21 thubuai chu thla hmasa khan ngaihtuah a ni a, an zinga 9 chu tuna an tihhlum takte hi an ni a, mi dang 3 pawh thi tura an chungthu rel sak tawhte an la awm a, hei bakah hian dam chhunga tang tura tih an awm bakah, mi thenkhat chu an tan hun chhung tihtawisakte pawh an awm a ni.