www.zonet.in

TUALCHHUNG CHANCHIN THAR

Sorkar hnathawk awm lohna chhungkua-a damlote, a thlawna enkawlna Mizoram State Health Care Scheme atanga bill la la thei lo, vawiina Vanapa Hall-a kal khawmte chuan bill hreng khawtlaitu, Reliance General Health Insurance Company Ltd.chu Court-ah khin an tum. Hemi chungchangah hian vote la-in lungrual takin thu tlukna an siam a, Gauhati High Court-ah PIL thehlut-in Reliance hi khin ni se, Pu Rualkhuma Hmar, Advocate leh an hruaitu thlan tharten bawhzui se an ti a ni. Health Care Scheme bill tang, Vanapa hall-a kal khawmte hian Reliance General Health Insurance Company Ltd.-a bill tang nei, an hnena inhriattir tawh zawng zawng chu mi 925 niin an sawi a, bill tang zat chu in-report tawh atanga an hriat theih chinah cheng nuai 600 chuang a tling a, heng zingah hian Private Hospital hrang hrang, Durtlanga Presbyterian Hospital, Bethesda, Grace Nursing Home, New Life leh Greenwood Hospital atangin an bill la tang zat hriat a la ni lova, zawhfiah mek niin an sawi. He inkhawm hi Pu Rualkhuma Hmar, Advocate-in a kaihruai a, hetah hian bill tang an hmuh thuai theihna tura tan la turin Health Care Scheme Bill Tang Association din nghal a ni a, Chairman atan Pu N. Lungmuana, Co-Chairman atan Pu R. Lalrawna leh Secretary atan Pu Rafael Lalrinmawia te thlan an ni a, bill tang nei, la chhinchhiah loh zawng zawngte chu Pu Rualkhuma Hmar hnena inhriattir turin an chah nghal a ni. Puan tawh thin angin Mizoram State Health Care Scheme hi nikum Plan sum cheng nuai 5,000 pukin kum 2008 kum laihawl atang khan tan a ni a, Tender chhang tute zinga mi, Reliance Health Insurance Company chuan Tender chu cheng nuai 2,890-in a chhang a, hei hi pawmin Sorkar chuan Reliance Company nen hian Inremna thutlung (MOU) an siam a, an phut angin cheng vaibelchhe 2,890 atanga za zela 90, cheng vaibelchhe 2,749 chu Reliance Company hnenah hian Sorkar chuan a pe a, amaherawhchu vanduaithlak takin he Scheme hi kum 2008 October thla vel atang khan bill pung chak lutuk vangin a buai ta a ni.

Planning Commission mi tirh, Central Multi-Diciplinary High Power Team, Aizawla cham mekte chuan vawiin khan Aizawl leh a chhehvela NLUP hnuaia hnathawhna tur hmun pawimawhte an tlawh. He Team-a member pakhat, Dr. Surjit Nayak chuan Selesih-a AH & Vety Deptt. farm-a vawk vulhna leh vawk kah raina hmun te, ar leh sai ar vulhna leh a no awp keunate a tlawh a ni. Hmarchhak biala awm chhun, Selesih Farm-ah hian vawk chi tha, a chi thlah tura vulh lai 15 a awm a, Aizawl leh a chhehvela vawk vulhtute hnenah Department chuan heng vawk chi tha chi hi a pe chhuak a, hei bakah hian an vawkte a kah raisak thin a ni. Dr. Nayak-a chuan Vety Department-in hemi kawnga harsatna an neihte, vawk kah rai no hrin thanlen chhoh dante leh hmasawnna tura Department-in hmachhawp a neihte chik takin Department hotute a zawtfiah a, Selesih Farm a tlawh hnuin Sihphir-a Iskut chinna hmun a tlawh leh bawk a, hetah hian Iskut chingtute kawmin an hnathawh dante a ngaithla a ni.
————-

Ani bakah hian he Team hruaitu, Pu SN Brohmo Choudhury leh amah tawiawmtu Pu Prahlad Rai-te chuan vawiin khan Reiek kawng leh Reieka Central sorkar programme chi hrang hrang tihhlawhtlin dan an enfiah a, an kal lamin Lawipu-a JNNURM hnuaia mirethei chenna tur In, chhungkaw 400 vel awm theihna sak mek chu an tlawh a, hnathawh dan chu tha tawk an tih thu sawiin heta tana sum ruahman second instalment pawh rang taka pek chhuah dan tur ngaihtuah an remtih thu an sawi a ni. Tlawng kama Greater Aizawl Water Supply Scheme Phase-I khawl hlui tawh, Central sorkar sum pek hmanga thlakna tur ruahmanna siam dan pawh an en nghal a, cheng nuai 168 senga khawl thar lei tawh, la bun lohte chu a hmuna enfiahin Greater Aizawl Water Supply Scheme Phase-II pawh an tlawh tel bawk a ni. Hemi bakah hian Tlawng kama Anthurium huan, Horticulture Mission hnuaia siam pawh an tlawh bawk. Reiek an thlen hnuah Reiek damdawi in, Public Health Centre-te, National Rural Employment Guarantee Scheme hnuaia kawng laihte, SSA sum hmanga School sakte, Anganwadi Centre-te an tlawh a, Reieka Aieng chingtu, Society Aieng sawngbawlna an din pawh tlawhin lian zawka siam a nih theih nan NEDFI tanpuina tam zawk pek dan zawnpui an duh thu an sawi bawk a ni. Vawiin chawhnu khan Reiek Community Hall-ah vantlang inkhawm buatsaih a ni a, hetah hian NREGA hnuaia inhlawh thin, Job Card nei hote chuan an hnathawh dan leh an hlawh pek dante sawifiahin zawhna tam tak, Central Team chu an zawt a, Central Team pawhin Job Card neitute chu thil tam tak an zawt bawk. Hemi hnua kan Corr. thu dawn danin Central Team hruaitupa ber, Pu SN Brohmo Choudhury hi vawiina Reiek leh Reiek kawnga a thil hmuhah a hlim hle a, a theih dan ang anga hmasawnna tur ruahmanna siam belh zel tul nia a hriat thu pawh a sawi. Multi Disciplinary Central High Power Team hi zanin hian NLUP Implementing Board Chairman, Pu R. Selthuama buatsaih zanriah, State Guest House-ah kilpui an ni dawn a, naktukah Delhi panin an haw tawh dawn a ni.
————

Lunglei YMA Sub-Hqrs. buatsaih, YMA Branch hrang hrang Zaipawl intihsiakna Ningani kal ta atanga neih chu zawh fel a ni a, he intihsiakah hian Branch YMA zaipawl 9 an tel a, Farm Veng Branch chu 1-na niin cheng 10,000 leh dekchi lian an dawng a ni. 2-na chu Chanmari Branch niin cheng 7,000 leh dekchi lian an dawng a, Cherhhlun Branch chu 3-na niin cheng 5,000 leh dekchi lian an dawng bawk.
————

Seventh Day Adventist Kohhran chuan Champhai-ah Mid Aim Damdawi in, khum 20 awm theihna tur an hawng. Hemi chungchang hi Seventh Day Adventist hruaitu, Pu Sapthanga leh he Damdawi in Managing Director, Pu Lalramchullova te chuan nimin khan Champhaiah chanchinbumite an hrilh a, tun dinhmunah chuan he damdawi inah hian kum 18 dah rih niin an sawi a, Managing Director l, Medical Officer pakhat, Nurse 6, Laboratory Technician 1 leh hnathawktu dangte nen an vaiin mi 20, he damdawi inah hian an thawk niin an sawi a, Damdawi in din a nihna chhan sawiin kum 1999-a Champhaia Work Camp neiha Germany atanga lo kal, Dr.Kaimagmisson chuan nau nei tur, Champhai atanga Aizawla thawn a hmu a, an kalna kawng hlat dan leh a buaithlak dan tur ngaihtuahin an tanpuina atangin Champhaiah damdawi in din a rawt a, chumi ang chuan he damdawi in hi mimal in luahin din a ni ta niin a sawi a, tuna sdamdawi in atana an luah mek, Pu Samuel Lalramhluna in hi cheng nuai 45-a lei turin an inbe fel tawh niin a sawi bawk.
———

Vawiin chawhma khan Salvation Army Youth Central North Division General Council meeting chu Salem Corps ah tan a ni a, naktuk zan thleng a awh ang. He SAY General Council meeting hi Divisional Youth Secretary, Major Saitluanga-a’n a ho a, chawhma lama rorel inkhawmah Thianghlimna beihpui thlaka zuk leh hmuam dona campaign kalpui dan tur, Salvation Army nihphung dik tak chawi nun zel dan tur, nungcha leh ramngaw humhalh chungchang leh thil dang engemawzat an rel a, chawhnu lamah budget session an nei bawk. Central North Division General Council hi zanin atangin SAY member zawng zawngin an chhim thei dawn a ni.

Vawiin vek khan Salvation Army Youth Central South Division chuan tun thla ni hnih atanga vawiin thlenga an hman tur, Operation William Booth Social Service Week hman chhunzawmin, SAY member thahnem tak chu Vanapa Hall atanga Kulikawn inkar kawng dungah bawlhhlawh thianfaiin an hnatlang a, Operation William Booth Social Service Week hi zanin hian Venghnuaia Ebenezer Corps-ah khar a ni ang. Salvation Army Youth Central South Division hian Operation William Booth Social Service Week an hman chhung hian, Aizawl Civil hospital-ah thisen an pek bakah kawng hrang hrangin mi dangte an tanpuina a ni.
————-

Tunlai hian Mizoram-in phai lam atanga kawlphetha, Megawatt 54 vel a hmuh theih tak avangin Mizorama eng dinhmun chu a tha chho hret a, Power Department hotute hnen atanga kan corr. thu dawn danin, Mizorama Mini Hydel Project atanga eng hmuh theih zat chu Megawatt 2 velah a tla hniam ve leh thung tawh a, tunlaia eng hmuh theih zawng zawng belhkhawm chu MW 56 vel a ni a, hetih lai hian eng chhit tam ber laia Mizoram kawlphetha mamawh chu MW 60 aia tlem lo a ni ve thung a ni. Hetianga phai lam atanga kawlphetha tam zawk hmuh theih a nihna chhan hi Powergrid atanga eng rawn pek tam zawk dawng thei tura Luangmual Sub-Station siam a nih tak vang a ni a, Power Department hotute chuan kan Corr. zawhna chhangin Hydel Project siamna lui hrang hranga tui a tlem tan leh tak avangin, Mizoram eng hmuh theih chu a tlem telh telh dawn tawh tih an sawi. Hetih lai hian Power Department-a SE, Pu C. Lianlunga leh AE, Pu Lalnunmawia Sailo chuan North East Regional Power Corpoation tirhin Norway rama kawlphetha siam chhuah dan leh enkawl dan an zir a, an thil hmuhte chu nizan khan Berawtlanga Tourist Resort-ah Power Department hotute an hrilhfiah a ni. Kan Corr thu dawn danin Norway hi khawvel ram hrang hrang zinga Power System nei tha leh changkang ber nia sawi a ni a, an rama lui tha leh a chawmtu tlangah vur a tam avangin an lui tui hmanga Hydel Project atangin an kawlphetha neih zawng zawng zinga za zela 98 an siam a ni.
————

Excise and Narcotics Department hnathawkten Thawhlehni leh Ningani khan Phunchawng, Rangvamual leh Melriat-a zu siamna hmunte tlawhin zu siamna hmun thahnem tak an tichhia. An Department thuchhuah tarlan danin an zu tihchhiatte hi zu bilh lai tin 4,863 leh Rakzu litre 580 a ni a, zu thlawrna bel 56 leh dawidim kg 1 leh hemi hmuna hnathawktu mi 2 an man bawk. Hetianga tan an lak thar nachhan hi Krismas leh kumthar lo thleng tur boruak tha leh muanawm tak hnuaia hman theihna atan a ni.
———

Youth Hostels Assoication of India Mizoram Branch-in National Trekking & Caving Expedition a buatsaih chhunzawmin vawiin khan YHAI President, Pu Dominic Lalhmangaiha chuan feh chhuak tur batch dang a vai liam leh. Hemi hma lama batch chhuak hmasate chuan vawiin khan Sairang Sihhmui an thleng a, hmun pawimawh, tlang leh puk an tlawhte chuan anmahni a tihlim hle niin he trekking-a telte chuan an sawi a ni. He trekking-ah hian state hrang hrang – Tamil nadu, Kerala, Andhra Pradesh, Orissa, West Bengal, Karnataka, Maharastra, Assam , Rajasthan, Madhya Pradesh leh Delhi atangin mi 70 vel an tel a ni.
———

All India Tennis Ranking Tournament, tun thla ni 8 atanga 14 chhunga Guwahati-a khelh tura tel turin Mizoram Tennis Association player 6-te chuan tukin khan Aizawl an chhuahsan. Mizoram Tennis Association player-te hi Men’s category-a khel turin Lalhmunmawia, Aizawl Tennis Club leh Lalrinawma, Ngopa Tennis Club-te an ni a, under-18 category-a khel turin Lalhruaitluanga leh Ramengmawia, Ngopa Tennis Club ve ve leh Lalmalsawma, Aizawl Tennis Club-te an ni a, an hruaitu, Laldintluanga, Aizawl Tennis Club pawhin a khel ve nghal dawn a ni.
———

Vawiin khan Aizawl khawpui chu a lum lai berin celsius degree 29.2 a ni a, a vawh lai berin degree 18.8 a ni. Naktuk, Pathianni-ah chuan Aizawl khawpuiah khua a tha ang a, a lum lai berin celcius degree 29, a vawh lai berin celcius degree 16 vel a ni ang. Naktip, Thawhtanni-ah pawh Aizawl khawpuiah khua a tha ang a. A lum lai berin celsius degree 28 vel, a vawh lai berin degree 16 vel a ni ang.