www.zonet.in

RAM PAWN CHANCHIN THAR

US President, Barack Obama chuan, US sipai hmunpui, Fort Hood base-a nimina pawi khawihna thlenga an sipaite leh civil mite huaisenna leh, an tih tur, ranga taka an tih dan chu a chhuanawm takzet a ni, a ti. Tih dan pangngaia kar tawpa thuchah a sawiah President Obama chuan, kha pawi khawihna kha suahsualna runthlak leh pawi tak ni mah se, America mite huaisenzia leh an ze dik tak lantirna a ni ve tho a ni, a ti a, puan tawh angin, nimin khan US sipai pakhat, Muslim, America rama piang, Maj Nidal Malik Hasan chuan he hmunah hian mi 13 a kap hlum a ni. President Obama chuan sipai thite chu an chhungte leh thiante chauh ni lo, ram pumin a sun a ni a ti a, heng mite sun nan hian an rama hnam puanzar zawng zawng chu a ngul chanve-ah, tun thla ni 11-a Veterans Day thlengin zar a nih tur thu a puang bawk. President Obama chuan he thil thleng hian an rama hnam hrang hrang chu phuar khawm se a duh thu a sawi a, US sipai chu, sakhaw hrang hrang vuantu leh hnam chi hrang hrang siam ni mah se, hei hian America ropuina a lantir a ni a ti bawk. Pawi khawihtu, Maj Nidal Malik Hasan hi sipai zinga rilru lam doctor, psychiatrist, kum 39 mi a ni a, hetia pawi a khawih hnu hian a bul hnaia awmte chuan vawi li an kap a, tun thleng hian nikhaw hre lovin a la awm a ni. He pawi khawihnaa hliam, mi 30 vel zinga thenkhat chu an la ngaihtuahawm hle a, nizan khan Fort Hood base-a stadium-ah mi za tam tak, sathau khawnvar chhiin an pung khawm a ni. America sipaite zingah rilru hah leh beidawng an tam nia hriat a nih avangin hotu thenkhat chuan fimkhur a tul hle tih an lo sawi tawh thin a, Afghanistan leh Iraq rama an sipai tirhte zinga sang tam tak chu rilru hrehawm leh beidawng taka haw an ni a, intihlum pawh an tam hle a, kum tir lamah khan Pentagon chuan sipai zinga intihlum an pun chhan zir chian nan hian dollar mtd. 50 a lo ruahman tawh nghe nghe a ni. Maj Nidal Malik Hasan hi Palestinian nu leh pa kara America rama piang a ni a, Muslim ruh tak, tawngtai pawh peih tak a ni a, sipaiah hian a tui vak lo nia an hriat bakah Afghanistan-ah emaw, Iraq-ah emaw kal tura tih a ni tih a hriat hnuah phei chuan a hlim lo hle niin an sawi a, America-in Muslim rama sipai a tir fo mai chu a duh lo sa hrim hrim niin an sawi.

Iran nuclear hmanraw siamna hmanrua, Uranium ram danga endik tura thawn chhuak tura UN-in a tihna chu Iran-in a hnawl niin Iran Students News Agency chuan a sawi. Iran Parliament National Security leh Foreign Policy Commission hotu, Alaeddin Boroujerdi-a thusawi sawi chhawngin Students News Agency chuan, Iran-in Uranium a neihte chu endik turin Russia leh France a thawn se tih chu Iran chuan a pawm thei lo niin a sawi a, he an thutlukna siam avanga ram dangten an ensan loh hram dan zawng turin, UN hnuaia Nuclear ralthuam endiktu pawl, IAEA-a Iran aiawh, Ali Asghar Soltanieh chu ruat a ni tih Boroujerdi chuan a sawi bawk.
————–

Vietnam ram hmun hrang hrangah ruah sur nasa leh thli tleh avanga harsatna an tawh mek laiin nimin khan, lei min avangin mi 13 an thi leh a, tun hnaia thlipuiin an ram a nuai avanga chhiatna thleng a thi hi an vaiin mi 130 an tling tawh a ni. Lei min avanga thite hi Quang Nam Province-a mite an ni a, Ruah keng tel thli, Mirinae-in Vietnam-a harsatna a thlen rual hian an ram thenawm, Cambodia-ah pawh mi pahnih an thi tawh a, Phillipines-ah pawh mi 27 an thih tawh bakah, mi tam tak chu an chenna in thli leh ruahin a tihchhiat avangin harsatna an tawk mek bawk a ni.
————–

US Orlando-a Engineering company pakhat, Reynolds Smith & Hill office chu nimin tlai khan mi pakhatin silaiin a pawng kah a, mi 1 a kap hlum a, mi dang 5 an hliam. Pawi khawihtu kum 40 mi, Jason Rodriguez hi he company-a thawk ve thin, kum 2007-a a hna atanga ban a ni a, tuna hetiang thil a tih chhan hi hriat a la ni lo a ni. Silai-a he office a kah vak hnu hian a nu chenna In lamah a tlanchhe nghal a, pawi khawihna a thlen atanga darkar 3 hnuah, Police ten report an dawn bawhzuiin a nu chenna-ah hian an man nghal a ni.
————-

United Nations Security Council chuan Hamid Karzai-a kaihhruai, Afghanistan sawrkar thar nena hma lam pana an thawh ho zel tur thu a sawi. Security Council chuan Afghanistan sawrkar thar chu ram chhung ven him kawngah te, sawrkar ngelnghet a awm theih nana thawhna kawngah leh ei rukna leh ruihhlo-a sumdawngte do kawngah a hma aia nasa zawka thawk turin a beisei tih a sawi a. Secretary-General, Ban Ki-moon pawhin, Aghanistan-a UN hnathawkte chu a hma zawng aia an himna ngaihtuahsak an nih tur thu sawiin, hei hi ram dang miten Afghanistan an ensan loh nana an tih a nih thu leh, UN hnathawkte ven him an nih theih nana ruahmanna an lo siam tawh angin, UN hnathawk mi 600, an awm hmun sawn lailawk tura tih zingah mi 200 chu sawn chhuah an nih tawh thu a sawi.
————

Russia sipai thlawhna, Tu-142 chu sipaiten nunchan zirna atana an hman laiin a tla a, a chhunga chuang mi 9 chu chin hriat lohin an awm mek. Sipai thupuangtu chuan he thlawhna hi tuipui kam atanga km 15 vela hla-ah a tla tih a sawi a, thlawhna a chuang zingah dam chhuak an awm leh awm loh an la hre mai lo tih a sawi.
————

Australia-a Sydney khawpui hmar lama Coffs tuipui kama ruah sur nasa avangin, mi sang 5 chuang, hmun him lamah thiar chhuah an ni tawh. Ni hnih kal ta chhung khan Australia ram chhung hmun hrang hrangah ruah millimetre 500 vel a sur tawh a, hei hian hmun tam takah tui a tihlen avangin harsatna tawk an tam tawh hle a, tui len zualna hmunte chu sawrkar-in an rama chhiatna rapthlak thlengah puangin, tanpuina sum pawh ruahman a ni. New South Wales-ah pawh ruah sur nasa avang hian hmun him lamah mi 40 thiar chhuah an ni a, New South WalesEmergency Service Minister, Steve Whan chuan, harsatna tawkte hi sawrkarin tanpuina sum a pe dawn tih sawiin, khaw chin zirtute hnen atanga an thu dawn danin, harsatna nasa zawk pawh thleng thei dinhmunah a la ding reng niin a sawi.
————-

Ram hausa 20-a Finance minister-te inhmuhkhawmna chu vawiin khan Scotland ramah tan a ni. He intawh khawmnaah hian khawvel ram hausa 20-a Finance minister-te an tel kim a, an thu khel zingah hian ram hrang hranga sum leh pai dinhmun ziaawm chho ta avanga tanpuina sum pek tawh loh chungchang leh sik leh sa inthlak danglam chak lutuk ven chungchangte a tel a ni. He in tawhkhawmna hawnna-ah hian British PM, Gordon Brown pawh a tel a, ram hrang hrang aiawhte hi an kal khawm hma atangin an ngaihdan a inang lo hlawm hle a, an thu ngaihtuah tur zinga mi, sum leh paia ram dang rethei zawkte tanpuina an pek thin hlih tawh mai ni se tih chu, ram thenkhat chuan tul tawha an hriat laiin, khawvel sum dinhmunin ngai a la awh tak tak hma chu ram rethei zawkte hnena tanpuina pek duh tam tak an la awm bawk a ni.
———

South Korea nu pakhat, kum 68 mi, Cha Sa-soon chuan motor khalh phalna, driving licence nei thei tura written exam a beih chu vawi 950-naah a pass ta a, kum li chhung a beih hnuah pass tura mark hmuh ngai, zaa 60 chu a hmu ve ta a ni. Cha Sa-soon hian driving licence dilna manah ngawt hian an ram tangka, mtd. 5 a seng tawh a, hei hi dollar 4,200 hu a ni a, India ram tangka chuan cheng nuai 2 vel a ni. Pi Cha-i hian Driving Licence nei tak tak thei tur chuan practical test a pass leh a ngai dawn a ni. South Korea rama motor khalh phalna pe chhuaktu, Korean Driver’s Licence Agency-in exam a buatsaihah hian zawhna 50, minit 50 chhunga chhan tur a awm a, Pi Cha-i hian 2005 atang khan he exam hi vawi 950 a bei tawh a ni.
———

German mi thiamte chuan nausente hian an pian hma, chhula an awm lai atangin an nu leh pate tawng leh an thluk dan an zir nghal niin an sawi a, nausen hrisel tha pangngai 60, French leh German tawng hmang chhungkuaa mite awm dan an zir hnua an hmuh chhuah dan chuan, French naute chu an an tah pawhin a ki a sang deuh va, German naute chu a ri a kuai thla deuh niin an sawi. Current Biology chanchinbu-ah mi thiamte chuan hei hi an ziak a, nu leh naute inlaichinna hi a thukin a ril hle a ni tih fiahna niin an sawi. Tun hma deuh khan mi thiamte chuan nausente hian chawlhkar 12 an nih atangin puitling tawng ri hi an hrethiam tan niin an sawi thin a, mahse tunah chuan an pian hma atangin hriat chin an nei niin an sawi leh ta a ni.