www.zonet.in

RAM CHHUNG CHANCHIN THAR

Maharashtra-a tangrual sawrkar siam tumtu, Congress leh NCP-te chu, hun rei tak Minister hna chanpual chungchanga an inrem theih loh hnu-ah vawiin khan an inrem. NDTV puan danin, Congress hian a hma-a an lo sawi tawh angin Minister 23 a chang dawn a, NCP-in Home leh Finance telin Minister 20 a chang thung dawn a ni. Minister hna chanpual siam chungchangah hian NCP chuan inthlan result puan a nih atangin, Minister hna chu a inzata insem turin Congress an nawr ngar ngar a, inthlanah hian NCP aia Congress-in MLA an ngah zawk avangin, NCP duh dan hi Congress chuan pawm thei-ah an inngai lo a, kar hnih chuang zet party pahnihten duh dan an sawh sawn theih loh avangin, an state governor, SC Jamir  chuan eptu pawlte nawr anga President’s Rule puan a nih loh nan, Congress leh NCP hi inrem thuai turin a hriattir a, nimin khan Party pahnih hruaitute hi thukhawmin, Minister hna chanpual chu an siam fel thei ta a ni.  Party pahnihte hian remna hi siam tawh mah se, inthlan avanga sawrkarin thla khat chhung hna a thawh theih loh avang leh, inthlan result puan a nih atanga kar 2 hnu-ah pawh sawrkar mumal an neih loh avangin, sawrkar mi pawimawh. DGP bakah Mumbai Municipal Commissioner-hna pawh hnawh khah lohin hun rei tak a awm tawh a, hei bakah hian sawrkar hnathawh hrang hrang zingah  Dharavi Redevelopment Plan leh tuipui atanga Mumbai kal pawhna zauh mek pawh hun rei tak an chawl tawh a ni.

New Delhi-in nakkuma Commonwealth Games a thlen tur inbuatsaihna atana, infiam mite ven him dan tur a ruahmanna lehkha a bo nia sawi chu thudik lo niin Police ten an sawi. New Delhi-a infiamna hunpui thleng tura vengtu sipaite hnathawh tur hrang hrang buaipuitu, Assistant project manager motor chu tun hnai khan a chenna in Jai Singh Road-ah misualten a darthlalang tichhia-in a chhunga thil awmte an la chhuak nia sawi a ni a, motor chhungah hian lehkha pawimawh hrang hrang a awm avangin, he Games buaipuitute chu he thil thleng hian a tibuai hle a, he thil hi Police-te chuan an chhui nghal a, misualte hi man la ni lo mah se, motor chhung atang hian lehkha pawimawh engmah a bo lo niin Police-te chuan an sawi.
————-

Egypt tlawha zin mek, Congress General Secretary, Rahul Gandhi chuan nimin khan  Arab League hotu, Amr Musa kawmin, Middle East leh South Asia ram hrang hranga harsatna thleng mek leh India leh Pakistan chungchang a sawipui. Rahul-a leh Amr Musa te inkawm hian Palestinian ho leh Israel inkara harsatna thleng mek te,  India-in retheihna umbo kawnga ruahmanna a siamte, zirna leh hriselna chungchangte an sawi dun niin Arab League thuchhuah chuan a sawi. Arab League-ah hian ram hrang hrang 22 an tel a, he pawl hi Arab ram hrang hrangte thawh hona atan 1946 khan din a ni. Amr Musa nena an inkawm hnu hian Cairo University zirlaite hmaah Rahul Gandhi hian thu a sawi a, thalaite chu hun lo la awm tura ram hruaitu tur an nih avangin, an hun hman mekah ramin harsatna a tawhte chu chhut ngun se a duh thu a sawi a, hel leh a firfiaka che thinte pawi khawihna pawh zirlaiten do tlat se a duh thu a sawi bawk.
———-

West Bengal-a Sunderban leh Buxa sanctuary-a sakei humhalh nan sawrkar laipuiin West Bengal sawrkar hnenah cheng  vbc. 300 a pe dawn. West Bengal sawrkar leh National Tiger Conservation Authority (NTCA) ten thla hmasa khan Sakei humhalh chungchangah hian thawh dunna thuthlung an lo siam tawh a. Tuna sawrkar laipuiin sum thahnem tak a pek tur hi heng sanctuary pahnih-ah hian sem a ni dawn a, Sunderban-a sakei awmte humhalh nan chengvbc.260 leh Buxa-ah cheng vbc. 38 maktaduai 5 leh nuai 8 hman a ni dawn tih NTCA thupuangtu chuan a sawi. Heng bakah hian helai biala awm chhungkaw thenkhatte chu Sakei laka an him theih nana insawn chhuak tura hriattir an ni a, heng chhungkua, insawn chhuakte hi cheng nuai 10 theuh pek an ni dawn a ni. West Bengal-ah hian kum 10 kal ta khan sakei sing 1 chuang an awm nia hriat a ni a, tun hnaiah heng sakei-te hi enfiah an nih hnuin 1,400 vel bak an awm tawh lo nia hriat a ni.
————

Nakkuma New Delhi-a Commonwealth Games thlenna tur senso chu cheng vbc.1,620 vel a ni dawn a, hei hi a tira ruahman, cheng vbc. 767 let hnih chuang a tling a ni. Commonwealth Games thlenna tur senso tihpun hi vawiina PM hova thukhawm, Union Cabinet-in a remti a, Youth Affairs and Sports Ministry rawtna angin he sum hi Organising Committee hman puktir phawt a ni dawn tih Information and Broadcasting Minister, Ambika Soni chuan thuthar lakhawmtute a hrilh a ni. He infiamna hunpuia sum hmuh tur beisei chu chu cheng vbc.1,708 a ni a,  Commonwealth Games vawi 19-na hi nakkum Oct ni 3 atanga ni 14 chhungin infiamna chi 17-ah neih a ni ang.
—————–

Sorkar tangka tihchingpen thubuai nei mek, Jharkhand CM hlui, Madhu Koda chu damdawi In atanga a chhuah ruala man nghalna tur thupek chhuah a ni a, he thupek bawhzui nan hian, Income Tax officer-te chuan Ranchi-a Koda-a chenna In chu tlawh theih lohin an siam tawh a ni.  Enforcement Directorate (ED) leh I-T department pawhin Koda-a awmna,  Appollo Group hnuaia Abdur Razzak Weavers’ Memorial Hospital hotute chu, an hriat lohva Madhu Koda chhuah lo turin an hriattir tawh a, Koda hi ICU atangin pindan pangngaiah sawn a ni tawh a, he damdawi in Medical Superintendent, P D Sinha chuan Madhu Koda dinhmun hi IT leh ED hriattir reng a ngai tih sawiin, tunah chuan a pum a la na deuh tih mai lo chu natna dang a nei tawh lo niin a sawi. Jharkhand-a Income Tax hotute chuan Koda-a sum tihchingpen hi cheng vbc. sang 2 chuang niin an sawi a, heng an puhna hi a dik ngei a ni tih finfiahna tur pawh Koda-a in an dap atangin an hmuchhuak tawh niin an insawi a, pum nat chhuanlamin damdawi Inah Koda hi dah ni mah se, a chhuah ruala man nghal a ni dawn tih an sawi.
———-

West Bengal Hoogly district-a Khanakul-a Trinamool Congress party-in vantlang inkhawm a buatsaihah buaina a chhuak a, mi engemawzat an hliam. He buaina hi CPM leh Trinamool Congress mite inkara chhuak a ni a, bomb te pawh an hmang nia sawi a ni. Buaina chhuah chhan hi Trinamool hruaitu, Mamata Banerjee-i’n Maoist helho, Nepal atanga chah chhuaka ralthuam chi hrang hrang hmanga thuam-ah , CPI-M a puh vang a ni a, he vantlang inkhawma thusawi tura Kolkata a pan lai pawhin Mamata hi CPM mite chuan an lo dang tawh a, he thil thleng avanga lungawi lo, Trinamool mite chuan CPM office an hal a, buaina hi a punlun chho ta a ni.  
——-

Maoist hel pawl hruaitu, Kishenji chuan sawrkarin an thil phut a tihhlawhtlin theih chuan remna zawnga inbiak an inpeih tih a sawi. Kishenji hian Press Trust of India (PTI) chu phone-a biain, sawrkar laipuiin remna a duh tak tak a nih chuan Andhra Pradesh, Maharashtra, Chhattisgarh, Orissa, Bihar, Jharkhand leh West Bengal  hmun thenkhata sipai awm mekte a hnuh kir phawt a ngai tih a sawi a, hei bakah hian tlang mite hamthatna tur ngaihtuah-a ruahmanna siam tur leh, hnam hnuaihnung zawkte tana harsatna an lo siam tawhte avanga ngaihdam dil turin sawrkar chu a phut tih a sawi bawk. PTI zawhna chhangin Kishenji chuan, nimina PM Manmohan Singh-a’n tlang mite hamthatna tur ngaihtuah tura sawrkar thuneitute a hriattirna chu sawrkar thil tih sual tawhte chhui let chunga a hmai phihna mai mai niin a sawi a, sawrkar hotute chu tlang mite hnenah kalin, an chanai an eisakte leh, harsatna an siamsak thin avanga ngaihdam dil turin an phut tih a sawi bawk. Hetih lai hian, sawrkarin anmahni beih nana beihpui a thlak,  `Operation Godavari’ an duh lohzia lantirna atana state pali-a ni 2 awh bandh huaihawttu, Maoist helho hian truck 2 an hal a, nizan zanlaiah khan Orissa leh Jharkhand inrina, Anandpur  khuaah truck 2 khalhtute chu an motor atanga chhuka an truck-te hal turin an tilui a ni. Hei bakah hian Maoist mi 60 velin Essar Steel company ta,  mikhual thlen in chu nizan vek khan an hal bawk a, he ina lehkha pawimawh awmte chu a kang chhe vek tih District Collector, Nitin Bhanudas Jawale chuan a sawi.
————

Bihar-ah zu chhe in avangin mi 9 an thi a, mi dang 50, damdawi Inah enkawl mek an ni. NDTV sawi danin, he thil hi Siwan District-a Naunpur khuaa thleng a ni a, zu hi sawrkar enkawl dawr pakhat atanga an lei niin a sawi.