www.zonet.in

RAM PAWN CHANCHIN THAR

Afghanistan-a UN hnathawk mi 600 chu, an awm hmun sawn lailawk a ni dawn tih UN-in a puang. UN thuchhuah chuan, hei hi tun hnaia mi firfiakten ram dang mi an beih nasat vang niin a sawi a,  Afghanistan-a UN hnathawk la awmte chu an tlem deuh tawh avangin pawi khawihna thleng thei lakah venhim an awl deuh tawh dawna an hriat thu an sawi bawk. UN hian Afghanistan-ah hnathawk mi 1,300 vel a nei mek a, tun hnaiah mi firfiakten UN hnathawk leh ram dang mi, Afghanistan-a awmte hi an bei fo a, kar hmasa pawh khan Taliban mi firfiakte pawi khawihna avangin UN hnathawk, ram dang mi 5 leh Afghanistan mi 3 an thi a ni. Afghanistan-a UN hotu, Kai Eide chuan, tuna an sawn chhuah tur zinga a tam zawk hi chu ram danga sawn tur an ni tih a sawi a, mi thenkhat chu Afghanistan ram chhung vek, hmun dangah sawn an ni dawn tih sawiin, hei hi Afghanistan atanga inlak chhuah vek an tum vang a nih loh thu leh, UN-in Afghanistan-a tanpuina hna a thawhte chu a bansan chuan loh tur thu a sawi bawk.  UN chuan tuna an sawn chhuah lailawkte pawh hi ven himna tha zawk an neih theih hunah an thawhna ngaiah thawhtir leh an nih tur thu a sawi a,  Nilaini ta khan Shar-i-Naw district-a UN hnathawkte awmna, an hostel, Bekhtar guesthouse an tih chu khawvar rualin Taliban miten an beih avangin, an hnathawkte hi an him tawk rih lovah a ngai tih a sawi.

Pakistan-a North Waziristan Province-a US sipaiten Drone Missile hmanga mi firfiakte an beihnaah mi pahnih an thi. US sipaiten Norak khuaa Musharraf Gul-a In chu mi firfiakten bihrukna atan an hmang nia an hriat avangin, he In hi Drone Missile hmangin an bei a, hemi hnu hian sipaiten he in hi luhchilhin, mi firfiak pahnih ruang hi an la chhuak a, eng pawla mi ber nge an nih erawh chu hriat an la ni lo tih sipai hotute chuan an sawi. US sipaiten a firfiaka che thinte beih nana an hman fo, Drone Missile hian sawisel hlawh hle mah se,  kumin chhungin he ralthuam hmang hian mi firfiak 100 chuang thah an ni tawh nia hriat a ni.
————

Vietnam-a Mirinae thlipui tleh avanga thi chu mi 99 an tling tawh nia hriat a ni a, hei bakah hian he thlipuiin thil a tihchhiat hlut zawng chu dollar maktaduai 55 chuang niin Vietnam hotute chuan an sawi. Thli tleh avanga harsatna tawk nasa ber, Phu Yen Province-a Provincial People’s Committee Chairman, Nguyen Ba Loc chuan, an Province-a district pathuma cheng, mi nuai 3 chuang chu tuiin an awmna a chim avangin an buai hle tih a sawi a, heng bakah hian mi  24,000 chuang chu hmun hima thiar chhuah an ni tawh tih a sawi. Phu Yen province bikah hian mi 69 an thi tawh a, mi dang 16 chin hriat lohin an la awm mek bawk a ni. Vietnam Prime Minister Nguyen Tan Dung chuan, heng harsatna tawkte chhawmdawl nan hian buhfai ton 10,000 pekna tur thupek a siam tawh a, hei bakah hian dollar maktaduai 12 chu sawrkarin chhawmdawlna atan a ruahman lailawk a ni a ti bawk.
————–

Phillipines chhim lam, Zamboanga del Norte province-a Gutalac khaw bulah silai keng pakhatin khualzin phur Bus a pawngkah avangin mi 2 an thi a, mi dang 8 an hliam. Sipai thupuangtu, Maj, David Hontiveros chuan, he pawi khawihna thlenga mawhphurtu hi tunge a nih an la hre lo tih a sawi a, Bus a pawng kah vak hnu hian a tlanchhe nghal niin a sawi. He lai bial hi Roman Catholic tamna hmun a ni a, Muslim helhoin buaina an siam fo a, thla hmasa pawh khan Ireland mi, Rev. Michael Sinnott chu heng helho hian manin, a tlan chhuahna atan dollar maktaduai 2 an lo phut tawh a ni.
————-

Ni 2 chama Burma tlawhtu, US sawrkar mi pawimawh pahnihte chuan US-in Burma sawrkar a hrekna chu chhunzawm zel a ni dawn tih an sawi. Burma ram tlawhtu, US sawrkar-a Deputy Assistant Secretary of State for East Asia, Scot Marciel chuan US-in Burma nena inkungkaihna tha zawk neih duh mah se, tuna a kal anga sipai sawrkar hnuaia an ram a awm reng chuan, ram pahnihte inkara bung thar kaia remna kawng zawn a harsat thu a sawi a, sipai sawrkar hotuten an rama mipui sawrkar siam a nih thuai theih nana ke an pen a ngai tih sawiin, tun tuma an zinna chuan ram pahnih inkar siamthatna-ah rah tha a chhuah ngei a beisei tih a sawi bawk. US Assistant Secretary of State, Kurt Campbell pawhin mipui sorkar din tuma beitu, Aung San Suu Kyi pawh an kawm tih a sawi a,  Yangon Airport-ah he thu hi sawiin,  National League for Democracy party hruaitute pawh an partyheadquarters-ah an titipui tih a sawi bawk.
—————-

US rorel khawl, House of Representatives thukhawm chuan, Sri Lanka ramchhung buai avanga ral tlan, mi  3,00,000 chuang, sawrkarin hmun khata a khung khawm mekte chu, an chenna hmuna an let theih dan ruahman thuaiturin Sri Lanka sawrkar an phut. House of Representatives thukhawm hi, Sri Lanka chungchangah hian an lungrual hle a, Sri Lanka sawrkar chet dan chu a dik lo nia sawiin, an ram buai avanga awm hmun siamsak an nihna ah raltlante hian an zalenna an hmang hlei thei lo nia an hriat thu leh, heng mite tanpui tura thawktute pawhin an tlawh pawh thei lo chu pawi an tih thu an sawi a, chhawmdawlna hna thawktu, Red Cross mite chu nitina ral tlante awmna-a an luh theih dan ngaihtuah vat turin Sri Lanka sawrkar chu an phut a, Sri Lanka hian an ram buai avanga harsatna tawkte chungchang ngaihtuah tur pawh an ramah luh a phal ngei tur a ni tih an sawi.
————–

Soviet Union President hlui, Mikhail Gorbachev chuan kum 1989 khan khawvel indopui 3-na chhuak tur chu amah avang chauhvin khawvelin a pumpelh niin a sawi a, Berlin bangpui chhut chhiat a nih hmaa lungawi lohna lantirtute kha nuai turin a sipaite tir sela chuan, indopui a chhuak ngei dawn niin a sawi. Gorbachev hi khatih lai khan Eatern Bloc ram an tiha hruaitu langsar, a ruhkawl deuhte chuan na taka che turin an nawr nasa hle reng a, an thu kha awih sela chuan Berlin bangpui kha chhut chhiat a ni lovang a,  Soviet Union pawh a keh darh loh rin a ni. Kum 20 liam hunah Gorbachev chuan, a thu kal tlangpui lo sela chuan Germany ram pahnih kha ram pakhatah an insuih fin thei dawn lo niin a sawi a,  thisen chhuah a duh loh avangin tharum hman a duh lova, Soviet Union erawh chu a keh darh ta niin a sawi. Khatih lai khan Soviet Union chuan East Germany-ah sipai nuai 5 vel a dah a, a hmang ta lo kha a la inchhir chuang lo tih Gorbachev chuan a sawi a ni.
———

Malaysia sorkar chuan an rama Bible thawn luh, sing khat zet a man a, he Bible-ah hian Pathian sawi nan Allah tih hman a nih avangin tun thleng hian a la hreng a ni. Malaysia hi Muslim ram a nih avang leh, Allah hi Islam hovin Pathian an sawina a nih avangin, Kristiante Bible-a Allah tih hman a ni chu Muslim hovin an ngai thiam dawn lo niin sorkar chuan a sawi a,  Roman Catholic Kohhran chuan sorkarin he thumal hman ve a remti lo chu a khing mek a ni. Malaysia ram mi hmun thuma thena hmun hnih vel hi Muslim an ni a, tuna Bible an man hi Indonesia atanga thawn luh a ni. Christian Federation of Malaysia chuan tualchhung mite tawnga Bible chhut hi sorkarin theh darh a phal loh avangin, an ram danpuia sakhaw zalenna chu sorkarin a palzut nia an ngaih thu an sawi.
———-

Lirthei siamtu company lar, General Motors chuan an hnuaia company pahnih, Opel leh Vauxhall company-te hralh a tum leh tak loh thu nimin-a a puan hnuah, vawiin khan Opel-a hnathawk mi sing 1 ban an nih tur thu a puang leh. Opel company hi Europe ram hrang hrangah inzar pharhin, Europe-ah hian he company tana thawktu mi 54,000 an awm mek a, a tam ber, mi mi 25,000 vel chu Germany-ah an awm a ni. Hetianga General Motors-in a hnathawkte ban a tum thu an hriat hian, Germany-a hnathawktu pawl, German trade union chuan, GM thu tlukna hi an duh loh thu sawiin, he thutlukna hi sut leh tura GM thuneitute nawr an tum thu an puang ve nghal a, hemi hma pawh hian, GM-in Canada-a  Magna company hnena Opel hralh a tum khan, sum lama harsatna an tawh lai a nih avangin, an hralh loh chuan Opel-a hnathawktu tam tak ban an nih ngei a rin avangin Germany sawrkar chuan Opel hi hralh a nih ngei theih nan tan a lo la tawh a, Magna company-ah pawh sum tam tham tak a lo thap hman a, hralh leh lo tura GM-in thutlukna a siam hnu-ah German sawrkar chuan a sum lo sen tawh, dollar tluklehdingawn 2 leh maktaduai 2 chu rul ngei turin GM-hi a phut thu a lo sawi tawh a ni.