www.zonet.in

TUALCHHUNG CHANCHIN THAR

Home Minister, Pu R.Lalzirliana chuan sorkar chu tu emaw nawr avangin maiin a kal dawn lova, ram thatna turin theihtawp a chhuah tih a sawi. He thu hi vawiina Congress Bhavan-a NLUP sawihona inkhawma a sawi a ni a, Pu Zira chuan Lunglei MSU-te’n Lungleia DEO post ruak hnawh khat tura sorkarah vauna thu an thlen chu tha a ti lo tih a sawi a, hetianga thil tih hi a dawihzepthlak a tih thu leh thu tha chu sawi tlanga ngaihtuah tlang zel tur an nih laia ram hlui zia anga thil tih tum an la awm chu pawi a tih thu a sawi. Chief Minister zin hlana a charge latu, Pu R.Lalzirliana chuan Lungleia DEO post ruak hnawh khat turin Education Minister, Pu Lalsawta’n chak takin hma a la a, tun kar chhungin order a chhuak ang a, a post chelhtu tur pawh kal hman ngei turin an ti dawn tih a sawi a, tuna DEO post an hnawhkhah chu tu nawr vang mah ni lo, sorkar-in tul a tih avanga hnawh khah a nih thu a sawi. NLUP chungchang sawihona inkhawm hi Mizoram Pradesh Congress Committee, Mahila, Mizoram Pradesh Youth Congress Committee leh Aizawl District Congress Committee Executive Committee chinte tana buatsaih a ni a, Congress Bhavan-a Golden Hall-ah neih a ni. He inkhawm hi MPCC Sr. Vice President, Pu R.Lalzirliana’n a kaihruai a, MPCC Treasurer, Pu H.Liansailova chuan NLUP chu mi tam takin muangah ngai mah se, sorkar-in chak takin a kalpui tih a sawi a, Mizorama lo neitu hlawhtlingte chu Congress sorkar hmasaka NLUP chhawr tangkaite an nih thu a sawi a, tuna sorkar programme lian ber, NLUP hlawhtlin leh hlawhchham hian Mizoram politics chu nasa takin a nghawng dawn tih a sawi. Pu Liansailova chuan Party dang pawhin NLUP chu an hlut hle na a, an hlut dan erawh a hlawhtlin lam ni lovin pawisa sem dan lamah a ni a ti a, tunah hian sorkar-in NLUP atan Annual Plan-ah cheng vbc 100 a dah tih a sawi. He huna thusawitu dang, NLUP Implementing Board Chairman, Pu R.Selthuama pawhin NLUP bawhzui chhoh dan leh hmachhawpte a sawi a, District tinah Bawrhsap kaihhruaina-in Apex Board din a nih tur thu leh MLA kaihhruaina-in Monitoring Cell pawh din a nih tur thu a sawi a, Implementing Committee pawh din a ni ang a, sorkar atanga pawisa sanction tawh lovin Apex Board-in tul leh tha a tih angin a sanction tawh dawn tih a sawi a ni. Pu R.Selthuama chuan NLUP atan hian sorkar laipui pawhin a thuphungin cheng vbc 2,500 pek a phal tawh tih a sawi a, tun kar chhungin kut hnathawktute hnathawh dan en turin mi thiam an lo kal dawn tih a sawi. He inkhawmah hian sawihona hun hman a nih bakah zawhna leh chhana hun pawh hman a ni.

Aizawl khawpui chawmtu, Greater Aizawl Water Supply Scheme Phase I leh II hmangin nizan dar 9:30 vel atang khan tluang takin tui pump leh a ni a, naktuk atang chuan tih dan pangngaia tui sem chhuah leh theih beisei a ni. PHE Department hotute hnen atanga thu dawn danin, Serlui, tura hrai a nih avanga Tuikhuahtlanga tuizem lian leh Zonal Tank hrang hranga tui dah khawl, litre nuai tam tak, nimina paih a nih hnuah nizan khan tui pump luh tan leh a ni a, a tir lamah tui pump khawl a Air-lock avangin harsatna tenau an tawk na a, hei hi tihfai hnuah nizan dar 9:30 vel atanga vawiin tlai thleng khan Phase I leh Phase II te hmangin tui pump leh a ni a, tlai thleng khan Tuikhuahtlanga tuizem lianah tui feet 4 vel a sang a tling hman a, tuizem te zawkah erawh chuan feet 8 vel laia sang a tling a, Laipuitlanga tui chhekna zem lian, Main Reservoir-ah pawh naktuka tui sem tur pek mek a ni bawk. Tui harsatna avanga buaina tawk nasa ber, Aizawl Civil Hospital pawh tui pek a ni leh tawh a, hemi bakah hian vawiin khan mi pawimawh thenkhatte pawh tui pek an ni. Hetih lai hian Aizawl khawpui chawmna tura tui lakna Serlui tura hraitu chu Police-ten ngawrh takin an zawng zel a, Aizawl Police Station atanga thu dawn danin tun thlengin man an la nei lo a ni.
———–

Tripura Camp-a awm Mizoram Bru Refugee-te lak let chu tun thla chawhnu lam hian tan theih beisei a ni. Hemi chungchang hi vawiin khan Home Secretary, Pu Lalmalsawma Office-ah Mizoram sorkar aiawh, Home Ministry aiawh leh Bru refugee aiawhten an sawihova, Mizoram sorkar aiawhin Home Secretary, Pu Lalmalsawma leh Home Department-a officer dangte an tel a, Central Home Ministry aiawhin Director, RR Jha an tel a ni. Bru refugee aiawhtute chu Pu Sriromani-a’n a hova, mi dangte chu Elvis Chorki, Bruno Meska, A. Sawibunga leh Dawngliana-te an ni. Sawihona neih hnua kan Corr. thu dawn danin Tripura atanga Mizoram Bru lak let turte dahna tur hmun, Mizoram sorkarin a ruahmanna ‘Road Map’ chu pawm tlan a ni a, amaherawhchu a tak taka thiltih hunah erawh chuan thil thenkhat tihdanglam hret hret ngai a awm thei dawn tih hriat a ni a, hemi chungchang hi ngawrh taka bawhzui a ni dawn a ni. Puan tawh angin Tripura Camp atanga Bru refugee-te hi lak let leh nan hian Central sorkar atangin cheng nuai 2,586 dil a ni a, hei hi Central sorkar chuan a thuphungin a remti tawh a, sum hmuh veleh a lak let hna hi thawh a ni ang tih October ni 26-a Mizoram Assembly Session-ah Home Minister, Pu R. Lalzirliana chuan a lo sawi tawh a, bial 1-a an awm khawm loh nan an awmna tur ruahman a ni a ti bawk.
———

Lungleia Dist. Education Officer (DEO) dah thuai phuttu,. Lunglei MSU Regional Hqrs. ngenna angin vawiin khan Lungleia School zawng zawnga zirlai, Primary School atanga College thleng-te chuan class an kal lova, School thenkhat class kalte pawh chawhnu lamah chuan an haw leh vek niin Lungleia kan Corr.-in a sawi. Zirtirtute erawh chu School tinah leh College-ah a pangngaiin an kal a ni. MSU Lunglei Regional Hqrs. President, Pu Laltanpuia hnen atanga kan Corr. thu dawn danin, Lungleia District Education Officer dah thuai tura sorkar nawrna atana vawiina zirlaite lungawi lohna an huaihawt chu naktuk atang chuanchawlhsan a, sorkar ngaihchan rih a ni ang a, Lunglei MSU hruaitute, vawiin chawhnua inhmukhawm chuan an thil phut chungchang sawihovin an thil tih tawhte an thlir let a, naktuk atanga Primary School leh Middle School Board Exam-na neih tan tur pawh thlir telin MSU hruaitute chuan lungawi lohna lantir zel tawh loh rih an remti a ni. Lungleia kan Corr. thu dawn danin Lunglei District-ah hian DEO ni thin, Pu Chalhlira, kumin January thla-a a pension hnuah February thla atang khan Lunglei District hian DEO a nei ta lova, he hna hi SDEO, Pu Zalawma Punte chuan hna dang tam tak nen a kawp avangin a indaih lo hle a, hemi avang hian MSU bakah mipuite chuan DEO hi dah thuai an duh a ni.
————

Tukin khan Salem Veng Ar-Huan Road-a Sadawrkawr lui tlantute chu he lui kawr hnar chhak lam atanga Septic Tank sahin kawr leh lui a tihbawlhhlawh thianfaiin an hnatlang a, mi thahnem tak thawk chhuakte hi Salem Veng Village Council hotute pawhin an tawiawm a ni. Sadawrkawr lui hi Thakthing Dam Veng leh Mission Veng inkara luang a ni a, he lui hian Salem Veng pal tlangin, Salem Veng chinah hian lui sirah Tuikhur a awm a, he tuikhurah hian kawr tui hi an la lut a. Thal tui harsat hun a thlen chhoh mek laiin, Dam Veng area chhunga Septic Tank pakhat chu tun thla ni 2 chawhma dar 10 leh 11 inkar vel khan sah a ni a. Hei vang hian Sadawrkawr lui tlantu tam tak chuan tui lamah harsatna nasa tak an tawk mek niin Zonet an hrilh a ni. Septic Tank sah chungchanga harsatna an tawh hi Urban Development & Poverty Alleviation department-ah November ni 3 khan he tui chhawrtu aiawh mi 10 te chuan an thlen a, a rang lama enfiahsak tur leh dan anga action la turin department hotute an ngen a. Mahse UD & PA hnuaia Officer pakhat chuan hei hi tun hma pawha an lo enfiah tawh a nih thu leh, sah tawh lo a, dan zawm tura hriattirna lehkha pek an nih tawh thu sawiin, a hmuna kal kher lova lehkha pek leh phone-a biak an tum thu a lo hrilh a, |hal, tui harsat hun a thlen chhoh mek laia UD&PA hotu thenkhatin an harsatna tawh leh manganna te a hmunah enfiah pawh ngai an tih tawh loh thu an sawi hian he tuikhur tlantute rilru a tina hle tih an sawi bawk. Zonet thu dawn dan chuan Septic Tank hi tum 4 tum 5 lai sah a ni tawh a, kumin February ni 11-ah pawh khan sah a ni tawh niin an sawi a, tui harsat lai a nih avangin he lui tui tlantute chuan thla khat chuang zet harsatna an lo tawk tawh tih an sawi bawk. 
————
 
East Tuipui biala tlawmngai pawl hrang hrangte chuan hmasawnna hna thawh dan that tawk leh tawk loh enpuitu tur Monitoring Committee an din. Monitoring Committee Secretary, Pu Lalnunhlima Sailo, Group YMA Secretary ni bawk hnen atanga thu dawn danin, East Tuipui Assembly bial huam chhunga hmasawnna tura sorkar hnathawh hrang hrang enpuitu tur, Monitoring Committee hi October ni 16 khan Khawbungah din a ni a, hetah hian Group YMA chuan hma a hruai ang a, tlawmngai pawl hrang hrang leh Political Party lian 4, Congress, MNF, MPC leh ZNP aiawhte bakah bialtu MLA, Pu B. Lalthlengliana leh officer pawimawh zawng zawngte chu a member an ni vek ang a, hmasawnna hna chi hrang hrang thawh dan that tawk leh tawk loh leh sum hman zat phu tawk hna thawh a nih leh nih lohte a hmuna kalin an enfiah thin dawn a ni. He Monitoring Committee hian an bial chhunga hmasawnna hna tha taka thawh a nih theih nan thawhpui turin sorkar Department hrang hrang, contractor-te leh politician-te an ngen bawk a ni.
———-

Mizoram Youth Commission Chairman, Pu Hmingdailova Khiangte, MLA leh MZP hruaitu tharten vawiin khan Youth Commission hnathawh tawh leh thawh zel dan tur an sawiho. He sawihona, Youth Commission Chairman office-a neihah hian Youth Commission Chairman chuan Mizoram thalaite hamthatna tura hnathawh tawh leh hmachhawp mekte a sawi fiah a, MZP hruaitute chuan Youth Commission thil tum tipuitling tura theihtawp chhuah zel an huam thu, Commission Chairman chu an hrilh bawk a ni. He inkhawmah hian MZP hruaitute chuan Post Matric Tribal Scholarship, kumin Krismas hma ngeia zirlaiten an lak hman an duh thu an tarlang bawk a ni.
———

Vawiin khan Agriculture Conference Hall-ah ‘Workshop on Operationalisation of ATMA’ tia vuah chu tan a ni.  He Workshop hi sorkar laipui hnuaia MANAGE leh Mizoram Agricultural Management & Extension Training Institute (MAMETI) buatsaih a neih a ni a, ni 3 chhung a awh ang. He Workshop hawnna hi Agriculture Joint Director, Pu C. Lalzarliana’n a kaihruai a,  Agriculture (Crop Husbandry) Director, Pu P. Bhattacharjee, MAMETI Director ni bawk chu khuallian a ni a.  District tina Project Director (DAO) theuh leh ATMA hna khawihtu Officer 2 theuh bakah Horticulture Department leh A.H & Vety Department aiawhte pawh he Workshop-ah hian an tel a, sorkar laipui atangin Agriculture lama mithiam, Dr. Jagbir Singh leh a thianten ATMA kalphung leh a bawhzui dan tur an zirtir a ni. ATMA hi Mizoram tan thil thar deuh a ni a,  Agriculture Technology Management Agency tihna a ni a, Agriculture Scientist ten an thiamna, lo neitute an hlan chhawn theihna tura kaihhruaina a ni.
——–

Aizawl Bishop, Most Rev. Stephen Rotluanga chuan nimin khan Chawngtlaia St. Paulinus Biak-In thar hawngin mal a sawm a, he Biak-In thar hawnnaah hian Catholic Kohhran Puithiam dangte pawh an tel a ni. Tun tuma a zin hian Bishop hian Khawzawl leh Champhaiah rawngbawlna a nei bawk a ni.
———

Mizoram Producers Guild chuan hnam dang film siam English, Hindi, Korean, Chinese leh a dangte, phalna nei lova chhuah chhawnte, Mizo tawnga lehlina Cable TV-a chhuah chhawnte chu Copyright Reservation Act bawhchhiatna a ni tih sawiin, hetiang ti tawh lo tur hian mi dang film letlingtu leh chhuah chhawngtute a ngen a, hemi chungchanga thuchhuah an siamah Mizoram Producers Guild chuan hetianga film chhuah chhawn leh Mizo tawnga lehlin hian Mizo Film Industry thanna a dal bakah, Mizote khawtlang nun a chhe zawngin a nghawng mek niin a sawi bawk.
————

Aizawl District Magistrate chuan halpuah, halmawi, puak thei chi dang leh Airgun zawrh tura Aizawl District-a lak luhte, kawl, zawrh leh hmante a khap. He khapna thupek Cr. PC Section 144 tlawh chhana chhuah hi thla 2 chhung hman phawt a ni ang.
———–

Micah Challenge, Active Sound leh ZONET tangho buatsaih, Cry for Justice Beat Contest-a pakhatna, Freddy’s Nightmare Band-te chuan an lawmman dawn atanga sawma pakhat chu tanpui ngaite tanpui nan an hlan. Freddy’s Nightmare Band member-te hian Thawhtan khan Zonuama naupang natna khirh veite enkawlna, Gan Sabra-ah cheng 5,000 an hlan a, he Beat Contest-a pakhatna an nih hi vawiin khan Lengpuia West End Resort-ah an lawm a ni.
————-

Vawiin khan Aizawl khawpui chu a lum lai berin celsius degree 29.1 a ni a, a vawh lai berin degree 20.5 a ni. Naktuk Ningani-ah pawh Aizawl khawpui chu chhumin a khuh leh ang a, ruah pawh sur mai thei dinhmunah a ding a ni. A lum lai berin celsius degree 26 vel, a vawh lai berin celcius degree 19 vel a ni ang.