www.zonet.in

RAM CHHUNG CHANCHIN THAR

Maharashtra Governor, SC Jamir chuan state sorkar thar din fel thuai turin Congress leh NCP a hrilh a, rorel tura anmahni thlangtu mipuite zah a, khawtlai lova sorkar siam fel thuai turin a hriattir a ni. Caretaker Chief Minister Ashok Chavan chuan ni hnih chhungin sorkar thar hi din fel theih a beisei thu a sawi a, buaipui ngai apiangte, tluang takin an buaipui mek tih a sawi. Puan tawh angin, nimin khan state Governor, SC Jamir chuan care taker Chief Minister, Ashok Chavan leh Dy. CM tur, Chhagan Bhujbal chu a hran ve ve-in a titipui a,  mahse an harsatna chin fel kawngah hian hmasawnna engmah an nei chuang lo a ni. Tun hnaia state Assembly inthlanah Congress hian seat 82 a la a, a thawhpui, Nationalist Congress Party (NCP) hian seat 62 a la a, member 288 awmna Assembly-ah sorkar siam thei mah se, party pahnih hian hna pawimawh leh langsara ngaih – Home, Finance, Power, Agriculture, Urban development leh PWD enkawl an inchuh avangin Minister-te hna chanpual sem fel thu-ah an inmil thei ta lo a ni.  Vawiin khan eptu pawl, Shiv Sena leh BJP hruaitute chuan Governor hmuin, darkar 24 chhunga sorkar a din theih loh chuan an state chu President’s Rule a dah mai turin an ngen a, Assembly inthlan result puan atanga kar hnih hnuah pawh minister hna chanpual hi siam fel a la nih loh avangin,  NCP hruaitute inkar pawh a chhe tan nia sawi a ni. NCP hruaitu thenkhat chuan Congress zawm mai pawh an hnial tawh lo niin an sawi.

State Chief minister leh Tribal Affairs minister-te ni 2 awh Conference chu vawiin khan Prime Minister Manmohan Singh-a’n New Delhi-ah a hawng.  PM chuan, tlang mi, tribal-te chenna a pawi khawihna hluar chhan chu thitisualtute hrem dan mumal loh vang niin a sawi a, ram chhunga tlang mite zingah, rorelna fel leh ruahmanna tha neih a ngaih tawh thu sawiin, khawvel changkanna ban phaka siam chu sawrkar thuneitute mawhphurhna a ni tih a sawi a, he mi kawngah hian thuneitute chu an che muang hle nia a hriat thu leh, hei hian tlang mi mirethei tak tak te chu hel ho lamtang lo theilo dinhmunah a siam thin niin a sawi bawk. Manmohan Singh chuan, tlang mite hmasawn theih loh chhan chu hel an tam lutuk vang nia a hriat thu pawh a sawi a, an thinlung hneh thei tura sawrkar thuneituten kawng an kawhhmuh a tul thu sawiin, tlang mite chu dah hniam ngawt lova hmasawn tura buatsaih an ngaih thu a sawi bawk.
———–

Sumdawng hausa tawntaw, Mukesh Ambani leh Anil Ambani-te unau inkar thubuai ngaihtuahtu, Justice RV Raveendran chuan a thubuai ngaihtuah lai atangin a bang tih a puang. Gas chungchanga Ambani unau buaina hi thla hmasa atang khan ngaihtuah a ni a, he thubuai ngaihtuah tan a nih lai khan Raveendran hian, Mukesh Ambani-a RIL company-ah chan a neih ve thu sawi langin, hemi avang hian he thubuai ngaihtuah thei lo-a an ngaih leh ngaih loh, Mukesh Ambani leh Anil Ambani hi a zawt a, mahse an ukilten, thubuai ngaihtuah tura an pawm ve ve thu an sawi hnuin, he thubuai hi ngaihtuah tan a ni a, mahse Raveendran chuan  a fanu chu Mukesh-Ambani a company-ah a thawh thu leh, a thutlukna siamin a fanu hnathawh-naah nghawng a neih hlauin, ban mai a thlang ta zawk niin a sawi. Chief Justice of India-in November thla chhunga he thubuai hi ngaihtuah fel tura a lo tih tawh avangin naktuk atang khian Judge thar hnuaiah he thubuai hi ngaihtuah zui a ni dawn a ni.
 ————-

Tun hnaia US-a FBI ten an man, Pakistan-a Lashkar-e-Taiba hel tana thawk, David Headley leh Tahawwur Hussain Rana chuan, New Delhi-a National Defence College chu beih an tum ber a ni tih an sawi. An chungchang ngaihtuahtu Court chuan heng mi pahnihte inpuanna hi vawiin khan a puang a, India rama Defence leh Civil Services officer-te zirna hmun ber, National Defence College chu firfiak pawl hian an bitum ber a ni tih sawiin, beih an tum dan zawng zawng pawh Headley hian a sawi chhuak niin Court chuan a sawi a, hei bakah hian Rana chuan, Lashkar-e-Taiba hruaitute chu e-mail-in US-a luh ruk theih dan tur a hrilh bawk niin a sawi. Court-in heng mi pahnihte inpuanna a chhiar chhuah lai hian an mi man zinga mi, Rana a lamtang leh pawi khawih tura ruahmanna a a tel lohzia tlangaupuitute pawh an tel a ni. Vawiin-a an inpuanna te chhiar a nih hnu hian, heng mi pahnihte chungchang hi kar leh Thawhlehni-ah a ngaihtuah chhunzawm dawn tih Court chuan a puang bawk.
—————

Tukin dar 2 vel khan Mumbai bul Dombivli-ah Gandhidham Express rel pindan 12-in a kawng a zawh sual avangin mi 12 an hliam a,  he rel hi Ahmedabad atanga Bangalore pana tlan a ni a, a chetsual lai hi a tlan muan lai tak niin an sawi. Thuneitute chuan heng rel pindan 12 zinga 2 chu a chhe hneh hle tih an sawi a, thi an awm lo hi a mak hle zawk tih an sawi.
————–

Karnataka CM, B S Yeddyurappa paihthlak duhtu, MLA leh MP-ten an thil tum an sawh sawn duh loh avangin BJP hruaitute lu a hai hle. Nimin khan Yeddyurappa chuan CM atanga banna a theh luh loh tur thu a lo sawi tawh a, BJP President Rajnath Singh pawhin, Yeddyurappa hian CM hna a chelh chhunzawm zel dawn tih sawi mah se, CM thlak phuttu, an party MLA leh MP-ten bang tura an la nawr chhunzawm zel avangin he thu ngaihtuah tur hian BJP hruaitu lu-te chu Delhi-ah an thukhawm dawn a, an thutkhawmnaah hian Yeddyurappa leh amah thlak duhtu, Reddy-a te unau pawh an tel dawn a ni.
————-

Prime Minister Manmohan Singh chuan nimina Changdigarh a tlawh laia a kalna tur kawng buaipuitu Police ten mipui an dan avanga thi nia sawi, damlo pakhat chhungte hnenah thupha chawina lehkha a thawn a,  he thil thleng hi vanduaithlak a tih thu a sawi. Prime Minister chuan he damlo thi ta, kal na, Sumit Verma-a nupui chu lehkha thawnin, a pasal a sun tak dan chu pawi a tih thu leh, tun hnuah chuan hetiang hi a thlen tawh loh nan hriattirna pawh a chhuah nghal thu a sawi.  Sumit Prakash Verma, kum 32 hi nimin khan a kal a nat avang leh thawk lama harsatna a neih avangin Chandigarh damdawi in panpui a ni a, mahse he damdawi in hi PM-in a tlawh avangin emergency area an thlen hmain Police ten an lo dang a, hetianga an khawtlai chhung hian a thi ta a ni.
———-

Kashmir-a mi firfiak thenkhat, puka tawmte chu an tawmna puk luahtu savawmin a seh hrep a, pahnih a seh hlum a, pakhat pawh na takin a seh hliam a, pakhat chu himin a chhuak a ni. He savawm puk hi a awm loh hlanin mi firfiakte hian bihruk nan an lo hmang a, a lo haw chuan mi dangin a puk an lo luah ve avang hian a thinrim hle a,  mi firfiakte hi a bei nghal ta mai niin an sawi. Mi firfiakte hian silai tha tak tak an kawl na a, savawm lakah hian an che hman lova, a hnua he puk tlawhtu, Police te chuan mi firfiakten ei tur an siam, savawmin a beih tak avanga an ei hman tak lohte pawh an hmu a ni. He thil thlenna hi Srinagar chhim lama Kulgam district huam chhung, hmun kilkhawr deuhvah a ni a, kum 1989-a Muslim mi firfiakten ralthuam an lek atangin tun hi mi firfiak biru, ramsa-in a beih vawi khatna niin an sawi. Savawmin a seh hlum takte hi Mohammad Amin leh Bashir Ahmed an ni a, a seh hliam pakhat hi inenkawl tura khuaa a luh hnuah an thil tawn hi mi dangin an hre ta a ni. Hemi hnu hian Police leh sipaiten mi firfiakte ruang hi an hlawm a,  AK-46 silai pahnih leh a mu engemawzat pawh he pukah hian an chhar bawk. Ramsa chanchin zir mite chuan, mi firfiakte an chet hnu hian sorkar thuneituten tualchhung mite chu an silai, sorkar hnena pe lut vek tura an tih avangin sa pel theih a ni tawh lova, hei vang hian Kashmir-ah hian savawm leh keite a pung chak hle a, mihring pawh an seh zauh zauh va, kum 3 kal ta khan Mandora khuaah pawh savawm pakhat a lut a, mipuiten an lo vaw hlum a ni.