www.zonet.in

RAM PAWN CHANCHIN THAR

Afghanistan Police sual pakhatin Helmand Province-ah British sipai panga a kap hlum a, Defence ministry thuchhuah chuan, British sipai thi zinga 3 hi Grenadier Guards-a mi, mi dang pahnih hi Royal Military Police niin a sawi a,  anmahni kap hlumtu,  Afghan police-te nen hian hmun pakhatah an khawsa hova, he Police sual hian mi 5 a kah hlum bakah mi dang engemawzat a kap hliam a, chumi hnuah a tlanbo zui ta a ni. Hengte nen hian kuminah ngawt pawh Afghanistan-ah hian British sipai 92 an thi tawh a, kum 1982-a Falklands indo hnua kum khata British sipai thih hnem ber a la ni. He pawi khawihna thlen dan hi chhui nghal a ni a, sipai thite chhungte pawh he thil thleng chanchin hi hrilh an ni tawh a ni. British sipai thupuangtu chuan, he Afghan police sual hian thurualpui a neih a rinawm hle tih a sawi a, hetianga a chet chhan leh tuna a awmna pawh hriat a ni rih lova, chhui mek a ni tih a sawi. Kabul-a BBC correspondent, Ian Pannell-a’n a thu dawn a sawi chhawn danin, he Police sual hi Gulbuddin a ni a, an pute nena an intih thiam loh avangin a lungawi lovin a silai lekin a bula British sipaite chu a kap ta mai nia rin a ni tih a sawi.  NATO chuan Afghanistan-ah hian tualchhung sipai leh Police te training tha tak pek a, British leh America sipaite koh kir an nih hnuah pawh tualchhunga tha taka an inenkawl theih hi a duh dan a ni a, hetiang hian training pawh pek an ni reng a, mahse Afghan sorkar laka rinawm tlat tur, tualchhung sipai leh Police lak hi a awlai lo hle a, tualchhung Police-te hi an hlemhlet bakah an rintlak loh hle a ni. Afghan police-te hi an hlawh a tlem a,  Taliban mi firfiak ai pawha an hlawh tlem avangin remchang an hmuh chuan thamna lak an ching hle a ni.

US President, Barack Obama chuan Iran chu hun lo la awm tur ngaihtuaha thu tlukna siam thuai turin a duh tih a sawi. He thu hi Iran khawpui, Tehran-a US embassy beih a nih champha vawi 30-na-ah President Obama hian a sawi a, Iran hian hun tha a neih chu hmang tangkai se a duh tih sawiin, a ram mipuite tana hamthatna ngaihtuaha hun kal tawh thlir lo-a ngaihdan siam tura a duh thu a sawi. Iran khawpui, Tehran-a US embassy hi kum 1979 November ni 4 khan Muslim zirlaiten luhchilhin an bei a, he hmuna hnathawk, America mi 52 chu ni 444 chhung an hreng a ni. Vawiin khan Iran khawpui, Tehran-ah eptu pawl pungkhawm leh sawrkar sipaite inkarah buaina a chhuak bawk a, eptu pawl kal khawm hian an President, Mahmoud Ahmadinejad chu ama mimal rorelna hmanga an ram kaihruai-ah puhin, bang tura an duh thu an tlangaupui a, heng mite hnawh darh nan hian sawrkar sipaite chuan mittui tlakna hlo leh tiang an hmang a ni. Vawiin-a mipui punkhawmna huaihawt lo tur hian Iran Revolutionary Guards chuan eptu pawlte a lo hriattir tawh a, hetianga thil a thlen leh tak tho si avang hian eptu pawl mi tam tak chu vawiin khan man an ni.
——–
 
Vietnam ramah thlipui, Mirinae avangin mi 57 an thi tawh  a, Vietnam sawrkara chhawmdawltu pawl hotu, Dang Thi Lanh chuan, Phu yen Province-ah ngawt pawh he thlipui avang hian mitthi 24 an awm tih thu an dawng tih a sawi a, Kanah Hoa, Gia Lai leh Binh Dinh bialah pawh thlipui hi an tuar nasa hle bawk. Mi 18 chu chin hriat lohin an awm mek a, harsatna tawkte hi chhanchhuah hna thawktuten theihtawpin an buaipui a, tui lian avanga hmun dang pan thei lo-a la tangkhangte pawh lawng leh hmanraw dang hmanga thiar chhuah mek an ni tih a sawi. Vietnam-a nimin atanga ruah keng tel thli tleh hian, Ha Thanh lui a tilian nasa hle a, hei hian a bul hnaia chengte tan harsatna siamin, mi 15,000 chuang chu tui lianin an chenna In a chim avangin, hmun him lama sawn chhuah an ni tawh a, he chhiatna thleng avang hian mi 52 an hliam nia hriat a ni. Chenna In 14,000 chuang chu luah tlak lohin a chhia a, tuiin ram acre 12,400 chuang a chim tawh bawk a ni.
———-
 
US-a Ohio state-a cheng, Anthony Sowell chu tualthah thubuai 5 siamsak a nih hnuah nimin khan a inah ruang dang 4 hmuh chhuah leh a ni. Kum 50 mi, Anthony hian tualthah thubuai bakah, pawngsual, mi rukbo leh tharum thawh ching thubuai a awrh mek a, kar hmasa khan Cleveland-a a chenna in bulah hmeichhe ruang 6 chhar a ni a, nimin khan a inah ruang dang 4 leh luruh pakhat chhar a ni leh a, Police-te chuan heng lo pawh hi ruang dang a awm an rin thu an sawi. Police hotu, Michael McGrath chuan ruang an hmuh chhuah tharte hi a in hnung lama huanah an lo phum tih a sawi a, lu ruh chu Bucket pakhat-ah a lo awm niin  a sawi. Anthony Sowell hi kum 1989-a pawngsual thubuai-a thiam loh chantir a nih hnuah kum 15 chhung lung Inah a lo tang tawh a, tan In atanga a chhuah hnuah hetiang hi a tih leh tak avangin Inrinni kal ta khan man a ni.
——–

Colombia miten Venezuela ram vengtu sipai, ramri-a awmte an kah avangin Venezuela leh Colombia inrina chu   khar chhunzawm zel a ni. Heng ram inthenawm pahnihte hi, tun Thawhtanni-a Colombia miten ramri-a duty Venezuela sipai pahnih an kah hlum avangin, tun hma zawng aiin an boruak a chhe zual a, he thil thlengah hian Venezuela sawrkar chuan Colombia sipaite an inrawlh ngeia a hriat thu a sawi a, hei vang hian, ramri-a lei pahnih - Simon Bolivar leh Francisco de Paula Santander chu khar nghal a ni. Venezuela Vice President, Ramon Carrizalez chuan, tun hma pawhin Colombia sipaite hian an ramri-ah harsatna an lo siam tawh thin niin a sawi a, tun tuma thil thleng avang hian Colombia mi 3 an man tawh tih sawiin, an thubuai hi an ram court-in a ngaihtuah dawn tih a sawi. Kumin August thla-a Colombia sawrkar-in an rama FARC helho-te ralthuam hmanga tanpui-a Venezuela a puh avangin, ram pahnih inkar hi a lo chhe hle tawh a, Venezuela pawhin thla hmasa khan an ram chhungah enthlatu Colombia mi 2 an man tih a sawi a, enthlatu dah anga Venezuela-in a puhna hi Colombia chuan a pha nasa hle a ni.
————–

Commodore Vorque Bainimarama-a  kaihhruai, Fiji sipai sawrkarin, an rama New Zealand leh Australia palai , darkar 24 chhunga an ram chhuahsan tura a tih chhan let nan, vawiin khan Australia leh New Zealand sawrkar chuan an rama Fiji sawrkar palai chu an ram chhuahsan turin an hriattir. Kum 2006-a Fiji-a sipai sawrkar, Bainimarama-a’n a din atangin, Australia leh New Zealand hian, mipui rorelna a awm leh theih nan Fiji sawrkar hi nasa takin an nawr thin a, tun hnaiah Fiji sawrkarin an rama dan rorelna kengkawh tura Sri Lanka mite chhawr a tumna chu New Zealand leh Australia hian an sawisel avangin, nimin khan heng ram pahnih aiawhte hi an ram chhuahsan turin Fiji sawrkar chuan a hriattir a ni. Australia Foreign Minister, Stephen Smith chuan Fiji sawrkar thiltih danah hian an lungawi lo takzet tih a sawi a, Australia chuan Fiji-a mipui rorelna a awm chu a duh ber a ni tih sawiin, Fiji thuneituten an rama mipui rorelna a awm theih nana Australia biak a duh chuan Fiji mipuite tan hian an inhawng reng tho dawn tih a sawi.
————-

European Court of Human Rights chuan Italy rama classroom hrang hranga tar thin, Kros-a Isua khenbeh lai lem chu tar a khap tawh dawn. Court chuan he thil tar hian nu leh paten an fate, an duh dan anga an kaihhruai theihna a dal niin a sawi a, naupangten sakhaw engpawh, zalen taka an zui theihna kawngah a hnawksak bawk niin a sawi. Italy nu pakhat, Soile Lautsi chuan hemi chungchang hi court-ah hian a thlen a, classroom-a he thil tar hian a fa a kaihhruaina a tibuai niin a sawi a ni. Mahse Court thuchhuak hian Italy rama Catholic mipuite chu a tilungni lo hle a,  he thuchhuak hi thil zahthlak leh awm lo niin an sawi a ni.