TUALCHHUNG CHANCHIN THAR

Aizawl khawpui chawmna atana tui lakna, Serlui chu tu tih hriat loh misualten nimin khan turin an hrai. Hemi avang hian Aizawl khawpui chhunga PHE tui dah khawlna, Tuikhuahtlanga tuizem lian atangte, hmun hrang hranga Zonal Tank atangte-in vawiin khan tui paiha tuizem leh pipe-te thuah fai a ni a, hemi avang hian engemaw chhung chu tui sem a khaihlak dawn a, PHE Chief Engineer, Pu Lallianzuala’n kan Corr. a hrilh danin, tuizem lian leh tui pipe thuah fai fel hnuah tui hi pump zui leha, a rang thei ang bera sem chhuah leh theih tum a ni. PHE Department hotute hnen atanga kan Corr. thu dawn danin nimin chawhnu khan Serluiah hian sangha, kaikuang, uchang, chakai leh luia awm chi rannung thi tam tak hmuh a nih avangin he lui hi tura hrai a ni tih hriat a ni a, Department hotute chuan tui pump kal lai titawpin Tlawng kama tui pump-na hmun leh pump chhawnna hmun, Dihmunzawl an pan nghal a, nizan khan thil awm dan a hmunah an en fiah nghal a, Tuikhuahtlanga tui chhek khawl pawh laboratory-ah endik zui nghal a ni a, a that lohna hmuh chhuah awm lo mah se, PHE Chief Engineer hova tukina officer thukhawm chuan hetiang thil a thlen hnuah hian a him ber leh a tha ber chu tuna tui neih sa zawng zawng paiha, tuizem leh pipe-te silfaia hman zui leh a ni tih chu an thutlukna a ni ta a ni. Tura Serlui hrai a nih chungchang hi nizan khan Police-te hriattir nghal an ni a, Aizawl Police Station atanga Police thawk chhuakte chuan a hmuna kalin thil awm dan an en fiah a, thil chhui zui nan Sangha, Chungu leh tuia awm chi rannung dang thite pawh an la khawm a ni. He pawi khawihna thleng chungchangah hian Aizawl Police Station-ah thubuai ziahluh nghal a ni a, pawi khawihtu hi man chhuah tumin an zawng nghal a, vawiin pawh khan Police-te chuan Serlui hraitute hnuhma chhui zui tur hian Serlui an pan leh a, an thu nghah mek a ni a, tun thlengin rinhleh man an la awm lo a ni. PHE Department hotute hnen atanga kan Corr. thu dawn danin, Serluiin Tlawng lui a finna thlang chiah atangin Aizawl khawpuia chengte tui pekna, Greater Aizawl Water Supply Scheme Phase-I hian Tlawng lui tui a dawt a, Phase- II-ah hian tui dawtna, Intake leh Pumpset-te bun a la nih loh avangin Phase-I tui lak luh hi Phase II hian a dawt pui a,  hemi avang hian Serlui hrai hian Aizawl khawpui a chengte tan buaina nasa tak a thlen thei a ni.

Hetih lai hian Mizoram State Pollution Control Board chuan sorkarin tui hna leh lui, tur hmanga tihbawlhhlawh hremna dan tha tak a nei tih sawiin, The Water Prevention and Control of Pollution Act 1974 hmanga hrem theih an ni tih a tarlang a, he dan Section 43 leh 45-A-ahte chuan lui tui leh tui hna, tur hmanga tibawlhhlawhtute chu kum 1 leh thla 6 thleng lung in tantir leh cheng sing 1 chawitira hrem theih an ni tih sawiin, luia sangha hraitute pawh he dan hmang hian hrem theih an ni tih a sawi bawk.
———

Home Minister, Pu R.Lalzirliana chuan Mizoramah hel an awm a nih chuan sorkar chu a dinna ngai rengah a ding a, an awmna hmuna nawr kir turin theihtawp a chhuah dawn tih a sawi. He thu hi vawiina ZONET-in a Pisa-a a kawmna-ah sawiin Pu Zira chuan MNF thuchhuaha Congress sorkar-in hel a khawi ti-a an sawi fo chu bui chhia laih lovin a inpuang tih ang hi a ni a ti a, MNF-in Issaac Hmar thihna-ah SHDC Chairman, Pu Lalmalsawma Darngawn a inhnamhnawih anga an sawi pawh Police-te’n an chhui ang a, a lo inhnamhnawih a nih chuan Police-te’n an man mai dawn niin a sawi a, mahni tluk lohte dawt hmanga puh chhiat fo hi chuan mipuiin an ring lo thuai thin niin a sawi. Zawhna chhangin Home Minister chuan PRISM, SOSA leh FOMTU-te’n eiru bawm an siam chu tha a ti lo tih a sawi a, eiru bawm chu tlanchhiat paha tute emaw hekna a ni thei tih a sawi.
————

Nakkum Mizoram sorkar chawlh ni atanga MHIP Day paih a nih chungchangah MHIP Gen. Hqrs. hruaitutenvawiin khan Home Minister, Pu R.Lalzirliana, Chief Minister charge latu chu a pisa-ah an hmu a, nakkuma Mizoram sorkar chawlhah MHIP Day telh leh turin an ngen. MHIP Gen. Hqrs. hruaitute hnen atanga ZONET thu dawn danin Home Minister chuan an ngenna chu zahawm tiin Chief Secretary pawh phone-in a be nghal tih an sawi a, hemi hnu hian GAD Secretary, Pu Lalmalsawma pawhin chak takin hma a la nghal tih an sawi a, MHIP Day chu sorkar-in chawlh atan a puang leh dawn ni-a an hriat avangin an lawm hle tih an sawi.
————-

Mara Autonomous District Council huam chhunga VC 77 din thar tura inthlanna chu tun thla ni 12-ah neih a ni dawn. Hemi chungchangah hian vawiin khan Mara Autonomous District Council chuan Saihaah hriattirna a chhuah. He hriattirna chhuahtu, Local Administration Officer, Pu P. Sama hnen atanga kan Corr. thu dawn danin, VC inthlan dan pangngaiin Candidate-te chuan khaw hrang hranga Presiding Officer, Returning Officer hna thawk nghal turte hnenah tun thla ni 11 zing dar 9 leh dar 12 inkarah hming an pe lut ang a, heng hming pek luhte hi chhun dar 12 leh chawhnu dar 1 inkarah Returning Officer chuan a endik ang a, chawhnu dar 1 leh dar 2 inkarah inhnukdawk leh duhte tan inhnuhdawhna hun hawn a ni ang a, hemi hnu hian Candidate ding tlang turte hming chu Returning Officer chuan a tar chhuak dawn a ni. A tuk, vote thlak ni-ah chuan zing dar 7 leh tlai dar 4 inkarah vote thlak a ni ang. Vote thlak zawh veleh hian Returning Officer-te chuan vote tla chhiarin result an puang nghal dawn a ni. Tun tuma Mara Autnomous District council area huam chhunga VC 77 thlanna neih turah hian vote nei thei mi sing 3, sang 3 leh 596 an awm a, heng mite hian Polling Station 79 atangin an aiawha roreltu tur VC member 258 an thlang dawn a ni. MADC-a Local Administration Officer hnen atanga kan Corr. thu dawn danin, khaw tina VC member thlan tharte hian result puan atanga ni 7 chhungin Village Council Executive Body siamin dinhmun leh nihna an insiam fel vek a ngai dawn a ni.
————–

Maubawk Tlangveng Welfare Committee chuan Maubawk kawn atanga Maubawk Tlang chhip Biak-In tlang panna kawng chu motor luh theihna turin hnatlangin nimin khan an siam. He hnatlangah hian veng chhung mi tlawmngai 50 rual vel an thawk chhuak a, ei turte buatsaihin ngawrh takin nimin nileng khan kawng siam hna hi an thawk a, kawng laih zauh ngaihna laia mi thenkhat chuan phal takin an ram an pe a, chung zingah chuan Pu Lalramhluna pawh a tel a ni. An veng chhunga motor luh theihna tura hnatlangte hi Maubawk TlangVeng Welfare Committee Chairman, Pu Lalramhluna leh Secretary Pu Saimawia-ten an ho a ni. 
———

Mihringte hmanga ram dan kalha sumdawnna ven dan tur chungchangah vawiin atang khan Transport Department-a driver-te leh bus conductor-te training pek an ni. He training, Transport Department leh Community Health Action Network (CHAN) buatsaih hian ni 4 chhung a awh ang. Training hawngtu, Assembly Deputy Speaker, Pu John Rotluangliana chuan Mizorama Bus driver leh conductor-ten an mi phurhte hawihawm tak leh fel taka an enkawl thin chu fakawm a tih thu sawiin, dik lo taka mihring hmanga sumdawnna do kawngah pawh Bus driver leh conductor-te chu an tangkai thei hle dawn a ni tih a sawi a, hemi kawnga tangkai tum tur hian a fuih nghal a ni.
———–

MZP Gen.Hqrs. Office Bearer thlan tharten hruaitu hluite hnen atangin vawiin khan mawhphurhna an chelh tan ta. He charge hlanna inkhawm hi vawiin chhun khan MZP Pisapuiah neih a ni a, MZP President kal chhuak tur, Pu C. Lalhmachhuana chuan President thar, Pu VL Krosshnehzova hnenah a mawhphurhna a hlan a ni. He inkhawm hi MZP Adviser, Dr. H. Lallungmuana’n a kaihruai a, President thar chuan thu sawiin, MZP-in a ngaih pawimawh ber tur chu zirna a ni tih a tarlang a, zirna siam that kawngah MZP chuan a tul apiang tih a tum dawn tih sawiin, hemi rual hian Zonunzemawi tungding leh turte, ram leh hnam siam tha turtein MZP chuan thawh zui zel a tum a ni a ti bawk. President kal chhuak ta, Pu C. Lalhmachhuana pawhin MZP chu thil tum, duh dan leh ngaihdan nei a ni tih sawiin, chungte chu kalsan lo tur leh bawhzui zel turin MZP hruaitu tharte a ngen a ni.
————-

Vawiin khan Lunglei-a Mizo Students’ Union Regional Headquarters hruaitute chu Lunglei Venglaia an pisa-ah an thu khawm a, Lunglei-a District Education Officer (DEO) dah thuai tura sorkar an phutnaa an hun tiam, nimin thlenga sorkar an ngaihchan hnua sorkar atangin thawm engmah an hriat loh avangin Lunglei District-a zirna in zawng zawng chu naktuk-ah khar vek ni se an ti a ni. Lunglei MSU hian thla hlui ni 19 khan hetianga school khar hian lo tum tawh a,  District thuneituten lo ngaichang tura an tih avangin an an thulh leh a, mahse an thil phutah an hlawhchham rih avangin naktuk, Nilaini hian zirna in zawng zawng khar ni se an ti ta a ni tih Lungleia kan corr. chuan a sawi.
———-

Aizawl South-II Block Congress hruaitute thu khawm chuan resolution pass-in Chief Minister, Pu Lal Thanhawla’n dikna tungding tura huaisen taka hma a lakna chu an thlawp thute, a kaihhruai sorkarin hmasawnna hna a thawh dante, kumin atana Plan sum za zela 25-a pungte chu chhuanawm an tih thu an sawi a, MLA-ten an bial chhunga hmasawnna hna an thawh theihna tura Local Area Development Fund, cheng nuai 5 danga sorkarin a tipung chu lawmawm an tih thu an sawi bawk. An bialtu MLA, Lt. Col. ZS Zuala chu mi dik leh rinawm, tanpui ngaite tanpui inpeih reng a ni tih sawiin, chhuanawm an tih thu, Aizawl South-II Block Congress chuan an resolution-ah chuan an tarlang bawk a ni.
————

Lunglei High Power Committee Vice Chairman, Pu Joseph Lalhimpuia, MLA chuan tukin khan Lunglei Ramthar Venga Health Sub Centre sakna tur hmun a tlawh. Amah dawngsawngtu mipui pungkhawm hmaa thu sawiin Pu Lalhimpuia chuan Health Sub Centre thar sa turin a ban phun a nih tawh thu leh helai hmuna Fire Department office tur chu MST Bus Station hmunah cheng vaibelchhe 20 sengin building lian leh chhawng tam tak awm theihna a sak tum a ni a ti a, heta tan hian budget-ah sum ruahman fel a ni tawh a ni a ti bawk. Pu Joseph Lalhimpuia chuan Bus Terminal chu Lunglei Luangmualah sawn tum a nih thu a sawi bawk a ni.
————–

Mizoram Government Aided School Association chuan vawiin khan Mc Donald Hill, Zarkawta Teachers’ Inn-ah General Assembly neiin an dinhmun an thlir let. He General Assembly, an pawl President, Pu Zothansanga kaihhruaiah hian resolution engemawzat an pass a, chung zingah chuan Government Aided School, Lump sump Grant-in-Aid School tia hriat bawkte, kum 2008 December thla atanga Lumpsum Grant-in-Aid status-a hlan kai an nih atanga vawiin thlenga an sum dawn tur, sorkarin a la pe lo chu an hriatthiam loh thu tarlangin, kumin December thla ral hma ngeia an chanvo tur dik tak pe turin sorkar an phut a, tun hma lama sorkarna chang tawh Party-ten politics khelh nan School an hmang thin chu zirna tichhetu leh thahnemngai taka hnathawktu zirtirtute rilru tihnatna a ni tih sawiin, tun hnuah hetiang hi thleng tawh lose an duh tih an sawi. Sorkarin Lump sum Grant-in-Aid hmu tur School thlan that leh a tum a nih pawhin tanpuina an hmuh tur rang taka pe turin sorkar an ngen bawk a ni.
——–

Ni 3 awh tur Handloom Exhibition chu Lunglei Saikuti Hall-ah vawiin khan Additional DC, Pu T. Lalduhawma’n a hawng. Thu sawiin Pu Lalduhawma chuan puan tah chu hnathawh tur nei lo tan hnathawh tur tangkai tak ni thei a nih avangin uar zel a tul tih a sawi. He fair-ah hian Lunglei District chhunga hmun hrang hrang atangin Handloom Unit 50 an tel a ni.
————-

Local Area Development Fund hmanga sak, Anganwadi Centre I, Venghnuaia mi chu bialtu MLA, Lt.Col. Z.S. Zuala’n  a hawng.  Hawnna thu sawiin Lt. Col. Z.S. Zuala chuan naupangte chu chhia leh tha hriatna an hman thiam tak tak hmaa nun dan mawi zirtir an nih chuan an upat hnu thlengin nungchang tha leh mawi an neih theih phah thin  tih a sawi. He Centre sak nan hian bialtu MLA fund atangin Rs. 2,50,000/-, ICDS atangin Rs. 1,75,000/- hmuh a ni.
————-

Ni 3 chhung awh tur, tleirawlte mipat hmeichhiatna lama an hriselna lam zirna chu vawiin khan Health Directorate Conference Hall-ah tan a ni a,  a hawnna inkhawm hi Health Deputy Director, Dr.Vanlalhruaii’n a kaihruai. He training hawnna hmanpuitu,  Health Services Director, Dr.N.Pallai chuan Health Department-in kawng hrang hrang hma a sawn dan sawiin, hmasawn zel tura tan lak a tul dan leh thawhhona tha neih a tulzia a sawi. Tleirawl, adolescent an tih hian kum 10-19 inkar a huam a, India ram mipui zinga zaa 22 an tling a ni. Tleirawlte zingah hian natna leh harsatna chi hrang hrang RTI/STI, HIV positive, Drug Addict leh Anaemia te a tam hle a,  Doctor leh mi thiam an pan vak loh avangin ngaihsak an tul hle a ni. Training tur hian District hrang hrang atangin mi 3 zel koh an ni.
———–

Panchayat Yuva Krida Aur Khel Abhiyan (PYKKA) hnuaia Mizoram pum huap inelna, State Level Competition 2009-2010 chu vawiin khan Sports Minister, Pu Zodintluanga’n 3rd MAP Khelmual-ah a hawng. Hawnna thu sawiin Minister chuan, sawrkar laipuiin thingtlang naupangte zingah infiamna lama khawvel puma mi hriat hlawh thei tur an awm tih a sawi a, chutiang mite zawn chhuah leh buatsaih nan PYKKA hi duan a ni tih a sawi. PYKKA chu kum 18 leh a hnuai lamte tana buatsaih a nih angin infiammite chu mahni kum dik tak sawi a, dikna a bul tan turin Minister chuan a chah a ni. State Level Competition hawnna inkhawm hi Mizoram State Sports Council Secretary, Pu Lianzuala’n a kaihruai a, infiam mi sang khat vel tel tura beisei an ni a, infiamna chi hrang hrang, football, hockey, volleyball, basketball, Judo, Taekwando, table tennis, boxing, badminton leh athletics-ah te anintihsiak ang. Hemi hnu hian Pu Zodintluanga chuan Mualpui-a Rajiv Gandhi stadium sakna tur chu a hmunah chipchiar takin a fang nghal a, PWD Engineer-te leh 3rd MAP hotute nen hnathawh tawh dante an en a ni. He stadium sak hna hi ngawrh taka thawh mek a ni a, retaining wall siam mek a ni.
———-

Luangmuala YHAI Hostel atanga chhuak tur, National Trekking & Caving Expedition chu Sports & Youth Services Minister Pu Zodintluanga’n a vai liam. Pu Zodintluanga chuan tlang leh mual lawn tur leh puk fang tura ram chhung hmun dang atanga lo kalte chu Mizoram-ah harsatna an tawh loh a duhsak thu a sawi a, trekking-a kalte hian Reiek tlang leh hmun dang an tlawh kual ang a, zan 5 an thang dawn a ni.  
———-

Vawiin khan Aizawl khawpui chu a lum lai berin celsius degree 28.2 a ni a, a vawh lai berin degree 20.7 a ni. Naktuk, Nilaini-ah Aizawl khawpui chu chhum tlemin a khuh leh ang a, a lum lai berin celsius degree 28 vel, a vawh lai berin degree 18 vel a ni ang.

You can leave a response, or trackback from your own site.

One Response to “TUALCHHUNG CHANCHIN THAR”

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken