www.zonet.in

RAM CHHUNG CHANCHIN THAR

Maharashtra Dy. CM tur, Chhagan Bhujbal chuan Minister hna chanpual siam chungchangah Congress nena an inrem theih hma chuan, pawn lam atanga Congress sorkar thlawp mai turin NCP chu a inpeih tih a sawi. Congress leh NCP hi Minister te hna chanpual sem fel thu-ah an thu a la inhmuh theih loh avangin state Governor, SC Jamir  chuan vawiin khan care taker Chief Minister, Ashok Chavan leh Dy. CM, Chhagan Bhujbal chu a hran ve ve-in a titipui a,  mahse he harsatna chin fel kawngah hian hmasawnna engmah an nei chuang lo a ni. Bhujbal-a chuan thuthar lakhawmtute hnenah, he an inrem lohna hi ni hnih khat chhunga chin fel theih erawh chu an la beisei tho tih a sawi a, inthlan result puan hnuah ni 13 lai a liam tawh avangin, mipuite chuan sorkar chu ding fel tawh turin an beisei bawk si tih a sawi.  Bhujbal-a chuan Congress chu sorkar thar siam felna tur tikhawtlai zelaha puh a, kum 1999-a an inrem tawh dan chu Congress-in a duh loh chuan, NCP chu Congress kaihhruai sorkarah tel lovin, pawn lam atanga sorkar thlawptu-ah a tang mai dawn niin a sawi. Tun hnaia state Assembly inthlanah Congress hian seat 82 a la a, a thawhpui, Nationalist Congress Party (NCP) hian seat 62 a la a, member 288 awmna Assembly-ah sorkar siam thei mah se, Minister-te hna chanpual sem fel thu-ah an inmil thei ta lo a ni. Party pahnih hian hna pawimawh leh langsara ngaih – Home, Finance, Power, Agriculture, Urban development leh PWD enkawl an inchuh a, hetianga an buai reng avang hian BJP leh Shiv Sena chuan sorkar hi siam fel thuai a nih loh chuan President’s Rule puan an phut dawn tih an sawi.

Jharkhand Chief Minister hlui, Madhu Koda chu pum na avangin Ranchi-a Apollo damdawi Inah dah luh a ni. Koda hi thuneihna a chan laia sum tichingpen leh sorkar sum ei ru nasa-ah puh a ni a, a chungthu ngaihtuah lai mek a ni. Income Tax Director General, Ashwini Kumar chuan, Koda hian an thil chhui laiah sawrkar thuneitute a thlawp tha duh lo tih sawiin, he eiruk thubuai an chhui meka mawhphurtu dik takte chu an hrem ngei dawn tih a sawi a, Income Tax pawisa bo, cheng vbc 2,000 vel chu Koda hian hmun dangah pung awmin a dah tih an hre tawh tih a sawi a, tuna chin hriat loha awm, sum tam tak hi a awmna chin hre turin an chhui zui zel dawn tih a sawi.
————

New Delhi atanga Ajmer pana tlan, Shatabdi Express relin mi 7 a chil hlum. He rel hian, tukin dar 7:30 khan, Pataudi leh Jatauli station inkara a tlan laiin, heng mi 7, rel kawnga kalte hi a chil a, he thil thleng avanga lungawi lo mi sang 1 chuang chuan rel hi an hual nghal a, rel khalhtu bakah, rel vengtu sipaite leh rela thawk mi dang chu an tlanchhe hman a, rel hi darkar 3 chuang dan a nih hnuah Delhi atanga rel lu dang thawn hmangin tlantir leh a ni. Northern Railways-a thawk, Anant Swaroop  chuan, he thil thlen chhan hi he rela khawl thenkhat chian loh vang niin a sawi a, rel khalhtute hian rel kawnga kalte hi an hmuh hnuah tihdin hleih theih lohin rel hi a awm niin a sawi. Vawiin vek khan Amritsar-ah Shatabdi Express, Sachkhand Express leh Super Express relte chu tlan thei lo tura dan an ni a, heng rel dangtute hi Amritsar-a Sikh sakhaw zuitute leh an hmun pawimawh, kum 1984-a beih an nih champha vawi 25-na puala hun hmangtute an ni a, heng rel tlan tur an dan avang hian buaina dang a awm zui lo nia hriat a ni.
—————-

Orissa-a chanchinbu mi pakhat chu sawrkar do zawnga khawsa-a puh a nih avangin man a ni. Gajapti district-a  Oriya tawnga chanchinbu chhuak pakhata thawk, Laxman Choudhury hi Bus Conductor pakhat hnen atanga a hming chuanna Maoist hel lehkha an man avangin Bus Conductor nen hian man an ni a, he lehkha them hi state puma chanchinbu mite hnena thawn darh niin chanchinbu mite chuan sawi mah se, Police te chuan tan Ina tang turin thubuai an siamsak ta tho a ni. Hetih lai hian Orissa CM, Naveen Patnaik chuan Laxman-a thubuai siamsak a nih dan hi chhan tha tak pawh awm lo niin a sawi a, Laxman-a nupui pawhin, Police-te thiltih dan chu sawiselin, Police-te chu Maoist helho bei ngam lo-ah leh, an zuam tawk, chanchinbu mi, pawi sawi lote chunga an thinrim hrithla mai mai-ah a puh bawk. He thil thleng hi Bhubaneshwar-a chanchinbu mite chuan an duh lo takzet tih an sawi a, Police leh an state sawrkar chu Laxman-a chhuah vat turin an phut bawk. Chanchinbumi pakhat, Prashant Patnaik chuan, he thil thleng hi thuthar lakhawmtute zah lohna-a an ngaih thu sawiin, Laxman-a chunga Police-te thil tih chu chanchinbu mi zawng zawng beihna a ni a ti a, thuthar lakhawmtute zalenna leh dikna vawnsak tur zawka an ngaihten harsatna an siam chu thil awm lo tak niin a sawi.
——–

Uttar Pradesh khawpui, Lucknow-a Gomti Nagar-ah truck pakhatin naupang a sut avangin mipui lungawi lo-in he truck hi an hal a, thi leh hliam erawh chu an awm lo nia hriat a ni. Police hotu, A K Jain chuan Truck khalhtu hi thubuai siamsak a ni tawh tih a sawi a, mipui pungkhawm hian pawi dang an khawi lo tih sawiin, an truck hal pawh kang thelh pawlten an thelh tawh tih a sawi.
———–

Home Minister, P.Chidambaram chuan, Muslim sakhua chu ram dang sakhua anga ngaih tur a ni lo tih a sawi. He thu hi Uttar Pradesh-a Saharanpur khuaa Muslim sakhaw zuitu pawl pakhat, Jamiat-e-Ulema-Hind-in Deoband-a National Convention an neihah sawiin, India mite chuan sakhuana vanga inthliarna awm thei apiang an do vek tur a ni tih a sawi a, Babri Masjid tihchhiat chungchang pawh sawi langin, kha thil thlenga pawi khawihtute kha rilru mumal pawh pu lo niin a sawi. Deoband Convention hi Jamiat pawl mi sing 1 chuangin an chhim a, heta kal khawmte chuan vawiin-a an thurelah, hnam hla pakhat, Vande Mataram chu Islam dona lam hawi nia sawiin, Muslim reng rengin sa tawh lo se an ti a ni.
———

Kashmir-a nula pakhat, tun hnaia mi firfiakte beitu, Rukhsana chuan state sorkarin  Special Police Officer (SPO) hna a pek chu a hnawl. Kum 19 mi, Rukhsana leh a nuta pakhat leh an chhungte dangte chuan September ni 27 zanah khan Rajouri district-a khaw kilkhawr taka an ina lut, Lashkar-e-Toiba (LeT) commander Abu Osama leh a hote chu huaisen takin an bei a, LeT hotu hi an chek hlum a ni. An thil tih avang hian state sorkar chuan he mite chhungkuaa mi pathum chu SPO hna a pe a, helho phuba lak chungchangah an dinhmun a hlauhawm avangin Rukhsana hi New Delhi-ah dah nia sawi a ni a, mahse Police te chuan Ruskhsana hi Delhi-ah dah ni lovin, All India Anti-Terrorist Front-in chawimawina an hlanna inkhawma tel turin a zin mai zawk niin an sawi.
————–
 
Air India pilot-te chuan an hlawh chungchanga an thil phutte tihfel thuai a nih loh chuan tun thla ni 24 atang tiam chin awm loin an nuar dawn tih an sawi. Air India Pilot 800 chuang telna, Indian Commercial Pilots Association (ICPA) chuan  NACIL Chairman leh Managing Director, Arvind Jadhav-a hnenah lehkha thawnin, November ni 10 hmaa an hlawh chungchanga harsatna an tawhte, thuneituten an chin fel loh chuan nuar rawh u tihna angah an ngai dawn tih an sawi. Thlawhna khalhtute chuan kumin August thla atang khan an hlawh zaa 70 atanga 80 vel chu an la la lo niin an sawi a, hlawh chungchangah tho hian September thla khan Air India Pilot 400 chuang chu ni 4 chhung an lo nuar tawh a, hemi chhung hian thlawhna 200 chuan cancel a nih bakah Air India chuan cheng vbc.100 vel a hloh hman a ni.
————-
 
Jaipura Indian Oil Corporation (IOC) tuialhthei chhek khawlna hmuna kangmei rapthlak tak a chhuah chungchangah private Company pakhata hotu-in IOC lakah hian thubuai a thehlut a, IOC hi inthlahdah lutukah leh mahni hna ngaihthahah a puh a ni. He lehkha thehluttu, Pratipal Singh hi he IOC depot kang ta bul lawka awm, Genus Power Infrastructure Limited-a thawk a ni a, he kangmei chhuak hi vawiin, a ni rukna thleng khan a la mit lo a ni. Kangmei chhuak avang hian Genus hnathawk 3 an thi a, mi dang 15 an hliam a, an company thil tam tak a kang chhe bawk a ni. Genus hnathawkte chuan mei hi a mih fel hunah chauh, he kangmei an tawrh dan hi an hre chiang thei dawn niin an sawi.
———-

Vawiin khan PM-in Chandigarh-a Post-Graduate Institute of Medical Education and Research damdawi ina inkhawm pawimawh a hmanpui avang leh, PM vengtuten damlo pakhat, kal na chu an dan avangin, he damlo hi a thi nia sawi a ni a,  PM Office chuan he thil thleng chhuina tur thupek a siam nghal a ni.He damdawi in hotute chuan he damlo, kum 32 mi hi a kal a nat avangin Ambala atangin Chandigarh hi panpui a ni a, hetih lai hian PM hian he damdawi in hi a pan ve bawk avangin zing atangin he khawpuia lirthei kal vel dan tihdanglam a ni a, damlo hian a hunah damdawi in hi a thlen hman loh avangin a thi ta niin an sawi. Dr.Manmohan Singh hian he damdawi ina inkhawm pawimawh a hmanpui bakah chawhnu lamah a luhna hlui, Punjab University Special Convocation-ah a tel a, hetah hian Doctor of Laws degree pek a ni. Dr.Singh hian Punjab University-ah hian BA zir bakah a hnuah zirtirtu-ah a tang leh a ni.