www.zonet.in

TUALCHHUNG CHANCHIN THAR

Mara Autonomous District Council huam chhunga VC 77-te thlan thatna tur hriattirna chu naktukah sorkarin a chhuah dawn. Saiha-a kan Corr. hnen atanga thu dawn danin, inthlan ni atan hian tun thla ni 12 ruat a ni a, inthlan dan tur Programme kimchang chu Sorkar hriattirna chhuah hunah chauh a hriat theih dawn a ni. He VC inthlanna buatsaih tur hian Mara Autonomous District Council chu tun hma deuh atang khan a lo inbuatsaih tawh a, VC Electoral Roll siam that te, Returning Officer tur leh Polling Officer tur ruahman chungchangte pawh a tifel deuh vek tawh a, ven himna lam erawh chu DC leh SP ten an ruahman dawn a ni. Mara Autonomous District Council hnuaia VC inthlanna buatsaih hi a hun tawh hle a, engemaw harsatna a awm avangin VC ding lai term hi thla 6 ve ve-in tum 2 pawh sei a lo ni tawh a ni.

Greater Aizawl Water Supply Scheme Phase II-a tui pump khawl chawmtu, Power line siam that hnua Dihmunzawl Pump House-a thil fel lo awm leh chu vawiin khan siam that leh a ni a, chhun dar 12 leh a chanve atang khan tluang taka tui pump theih a ni ta. PHE Department hotute hnen atanga thu dawn danin kar 2 vel kal ta atang khan Greater Aizawl Water Supply Scheme-a power line chu a buai a, hei hi chhui zui nghal a ni a, Luangmuala Sub-Station-ah CT tha lo hmuh chhuah a ni a, hei hi thlak a nih hnuah Dihmunzawl-a Pump House-ah valve tha lo hmuh chhuah leh a ni a, a thlak tur hian nimin Pathianni atang khan Chief Engineer hovin nilenga hna thawh a nih hnuah vawiin chawhma lam khan he valve dik lo hi thlak fel a ni ta a, tluang takin tui a pump leh thei ta a ni. Puan tawh thin angin Greater Aizawl Water Supply Scheme Phase II-ah hian hna tam tak zawh fel loh a la awm a, a tui pump tan tirhnaah Phase-I tui pump chhoh sa a dawt tawm a, hmun tam takah Phase-I pipe a tawm a, a tihpuitlin dan tur hi Sorkar chuan a ngaihtuah mek a ni.
———–

Vawiin chhun khan Champhai zawla Tuipui hnar khuahah mipa naupang 2 an tla hlum. Champhaia kan Corr. hnen atanga thu dawn danin, he tuikhuaha tlahlum hi Zomuansanga, kum 12 mi, K. Thanghnuna fapa leh Lalramnghaka, kum 12 mi, Khuangnghilhlovi fapa, Zotlang veng ve ve an ni a, an chesual lai hmu an awm lova, tuikhuah kama an thawmhnaw hmuh atangin heng mite hi zawn an ni a, an ruang hi he dil-ah hian hmuh ve ve a ni. Heng naupang tui tlate hi Champhai-a Private English School, Little Rose-a zirlai ve ve an ni a, Police-te chuan vawiin tlai khan an ruang hi endikin an tih turte an tifel a, heng naupang 2 hi naktukah an awmna Champhai Zotlangah vui an ni ang.
————

New Capital Complex Welfare Committee chuan suahsual rawngbawltute lakah an veng chhung him taka vawn an tum. Mi thenkhatin New Capital Complex hi ruihhlo tih nan leh interek nan an hmang thin tih hriain New Capital Complex Welfare Committee chuan hetianga mawi lo taka chetna hi khauh taka do an tum a, hemi chungchanga an thuchhuahah chuan hmun hrang hrangah duty indah a ni ang a, mi awm khawlo leh ruih theih tih nana hmangte chu man chhuah tuma an beih dawn avangin hetiang tih chingte tan hmun a awm dawn tawh lo tih an sawi a ni. Helai hmun hi sorkar office pawimawh chi hrang hrang leh sorkar hnathawkte awmna hmun a nih avangin tha taka humhalh an tum tih leh mi pangngai leng khawthawng duhte tan chuan englai pawhin an inhawng reng tih New Capital Complex Welfare Committee chuan an sawi bawk a ni. New Capital Complex Welfare Committee hi hetianga nawmchenna leh sorkar leh vantlang duh loh zing tih chingte venna hmun, Duty-na tur sa-in vawiin khan an hnatlang a, hetah hian zan lamahte ngawrh taka duty an tum tih an sawi.
————

Maubawk leh Nursery veng inkar kawng, Bungkawn High School Veng kal tlang chu siam tha thuai turin veng chhung miten sorkar an ngen. He kawng, kum 1984 daiha laih tawh, tun thlenga dinhmun chhe taka la awm hi siam that a nih thuai theih nan veng chhung paho chu an hnatlang  leh a, hemi hma, September ni 21 pawh khan he kawng siam tha hian an lo hnatlang tawh a ni. ………. Kan Corr. thu dawn danin he kawng siam tha tur leh black top tur hian tunah hian sorkarah dil mek a ni a, sorkar chuan work schedule-ah a thun tawh a, administrative approval leh technical approval nghah mek a ni.
——–

Vawiin hi Khawvel puma Baptist Hmeichhe tawngtai rual ni a ni a, Baptist Kohhran Hmeichhe Pawl Unit hrang hrangte chuan Biak In tinah he tawngtai Programme hi an hmang a ni. Kum danga an lo tih thin angin kumina an tawngtai thupui hi North America a Kohhran hmeichhiate siam a ni a, tawngtai thupuiah chuan ‘ Pathian thil siamte, mit thar-a hmuh’ tih a ni a, Baptist Kohhran Hmeichhiate hi khawmualpui hrang hrang 7-ah an awm a, Mizoramah hian member 24,740 an awm niin an sawi.
————-

Sikh sakhaw dintu, Guru Nanak-a piancham vawi 340-na chu ram chhung hmun hrang hrangah lawm a ni a, Aizawl-ah pawh Sikh sakhaw zuitute’n Pushpak Gurdwara-ah an lawm a ni. Guru Nanak Dev, Guru Nanak ti-a hriat hi kum 1469, November ni 2 khan tuna Pakistan ni ta, Talwandi-ah a piang a, khawvelah Pathian pakhat chauh a awm a,  a hming chu dikna, khawvel siamtu a ni tiin a zirtir thin a ni. Pushpak-a he ni lawmna-ah hian Sikh sakhaw zuitute an kal tha hle a, nilengin he ni pual hian hun an hmang a ni.
———–

Mizo National Front chuan Congress kaihhruai sorkar hnuaiah hel ho chetna leh ralthuam a hluar lutuk avangin Mizoram People Forum chu Chief Minister, Pu Lal Thanhawla hnenah an zualko ta hial nia sawiin, hei hi pawi an tih thu an sawi. Vawiina thuchhuah an siamah MNF chuan Mizorama rorelna sang ber luahtu, MLA-te hnenah hial, HPC D-te’n chhiah an khawn ta te, Vairengte leh Mizoram hmun hrang hranga chhiah an khawn ngam ta te chu pawi an tih thute, thla hlui ni 25-a Vaphai daia AK 47 Rifle leh pistol keng, tu tih hriat lohin Vanlalpeka kut a thlak chungchang enfiah tura ralthuam pawh keng lo Police tirh an ni chu Home Minister, Pu R.Lalzirliana’n “Mizoramah hel lo lutte chu kan hmet mit zel ang” ti-a a lo sawite nen chuan a inperhsan hle niin an sawi. MNF chuan heti taka HPC D-te an huangtau nachhan chu nikum MLA inthlanpuiah khan Pu Lal Thanhawla kaihhruai, Congress nen thawhhona thuthlung an ziah vang niin an sawi a, kum 2007-a Berawtlanga thi-a chhar, Isaac Hmar thih chungchanga Aizawl SP-in thubuai  siamsak tura a tih, Lalmalsawma Darngawn, Sinlung Hills Development Council Chairman atana an duh nachhan pawh Pu Lal Thanhawla ngeiin Mizoram rorelna sang berah “kan party tana theihtawp chhuahtu a nih avanga dah a ni” ti-a a sawite leh Mizoram Assembly Dy. Chief Whip, Pu R.Lalpianmawia’n State Guest House-ah HPC D mi leh sa a thlentirte chu sawi mam mai chi a ni lo tih an sawi a, hetianga Mizoram-in hel ho nena inhnimhnai reng, Congress sorkar a neih avang hian ralthuam tawlh a hluar a, ulau takin hel ho an che ngam nia sawiin, hetianga sorkar leh hel ho inkungkaihna hi chhu chat nghal turin an phut tih an sawi.
————–

Tuipuiral Zirlai Pawl chuan tun hnaia maia Vanlalpeka, Vaphai khua-in tu tih hriat loh, ralthuam kengte kut a tuar chuan Mizoram him lohzia a lan tir ni-a an hriat thu an sawi. Vawiina thuchhuah an siamah Tuipuiral Zirlai Pawl chuan Vanlalpeka chunga thil thleng chu pawi an tiin an ngaimawh hle tih an sawi a, kum 1972 atang khan an bial chhungah a khat tawkin ralthuam kengte’n mi kut an thlak fo tih sawiin, hetiang a nih avang hian an bial chhungah Police Station dah an phut tih an sawi a ni.
————

Central YMA hruaitu thar thlan a nih hnua Executive Committee thut khawmna hmasa ber chu vawiin khan Central YMA Office-ah neih a ni a, he CEC meeting hi President thar, Pu Lalchungnunga’n a kaihruai a ni. He thutkhawmna-ah hian October ni 20 leh 22 inkara Darlawna YMA General Conference neiha rorel pawimawh thenkhat bawhzuitu tur Committee din a ni a, ram dan hmanga Mizorama ram dang mi lo lutte khuahkhirh tura sorkar ngentu tur Sub Committee chu General Secretary, Pu Lalbiakzuala kaihhruai tura din a ni a, kum puan ‘Khawtlang nun Siam that’ tih chungchang bawhzui tur Committee an din chu Vice President, Pu C. Zoramliana’n a kaihruai dawn a ni. Vawiina CEC thukhawm hian Darlawna YMA General Conference neih chungchang an thlir let a,  tluang taka an zawh fel theih avang leh, hruaitu thlanna leh rorelna dangte fel fai taka zawh a ni ta chu lawmawm an tih thu an sawi a ni. Kan Corr. thu dawn danin Central YMA hruaitu tharte hian October ni 26 khan hruaitu kal chhuak tate hnen atangin an mawhphurhna an la a ni.
———-

Kulikawn Branch YMA chuan an Hall thar hawn lawmna kal zelah vawiin khan a thlawna inentirna leh thisen pek runpui an nei. Kulikawn Branch YMA free clinic-ah hian an veng chhunga Doctor-ten a thlawnin damlo an en a, inentirna hrang hrang 8-ah damlo 321 an en bakah damdawi pawh a thlawnin an sem a, zun leh thisen exam na buatsaih a ni bawk. Free Clinic bakah hian Aizawl Civil Hospital tan thisen unit 48 an pe a, thisen pete hi mipa 45 leh hmeichhia 3 an ni.
———–

3rd Batallion Assam Regiment Ex-Servicemen din champha vawi 15-na chu vawiin khan Khatla-a Sainik Rest House-ah lawm a ni. He hun hi an pawl President, Hon. Capt. Pasena Sailo-in a kaihruai a, an member boral ta te sunna hun an hmang a, tlaiah chawhlui an kil ho a ni. Indopui pahnihna lai khan Assam Regiment 1st leh 2nd Batallion-te chu Indona-ah an indaih loh em avangin 3rd Batallion hi indo zawh hnu khan Shillong-ah din a ni a, ram chhung hmun hrang hrangah an awm a, China leh Pakistan nena indona-ah pawh khan an tel a ni.
———-

10th Assam Rifles chuan an din champha vawi 53-na, Zirtawpni atanga an lawm tan chu nimin khan an khar. Kum 1953, November ni 1-a Meerut-a din, 10th Assam Rifles hian an din champha hi infiamna chi hrang hrang bakah hnam zia rang pho chhuak thei hmangin an lawm a, nimin khan an Batallion-a thite sunna hun hman a ni a, hetah hian Commandant, Colonel Walia chuan Assam Rifles Martyrs Memorial-ah pangpar a dah a ni.
———–

Bukpui khua chuan an khaw Branch YMA huaihawtin an khaw chhuak, Officer leh sakhaw rawngbawltu langsarte chawimawina hun, Zirtawpni kal ta khan an hmang. He chawimawina inkhawm, Bukpui khuaa neihah hian an khaw chhuak, sorkar officer ni lai leh ni tawhte leh sakhaw rawngbawltute, an vaiin mi 42 chu an khaw ,VCP Pu Lalengzauva’n an khawtlang aiawhin chawimawina Thangchhuah puan, Pangparthi leh Certificate a hlan a ni…………Heng mite zingah hian Dr. LN Tluanga, Dr. R.Tlangkunga, Rev. Chuauthuama, Rev. Dr. Lalhmangaiha, Pu RC Thanga, Maj Khaizadinga leh mi dangte an tel a ni. He inkhawma khuallian, bialtu MLA, Pu Hmingdailova Khiangte chuan Mizote chim rala an awm lohna turin taihmak a ngai a ni a ti a, sum lenglak uma dawngdah taka awm chu kawng hlauhawma  mipuite hruaitu a ni tih hre reng tura mipuite chahin, ni 100 inhlawhna tia hriat, NREGS pawh dik taka hman a nih loh chuan thatchhiatna leh rilru dik lova mipuite hruai lut theitu a ni tih a sawi.
————–

Aizawl Venghnuai-a Anganwadi Centre thar chu vawiin khan bialtu MLA, Lt. Col. ZS Zuala’n a hawng. Hawnna thu sawiin MLA chuan he Anganwadi Centre atang hian naupang thahnem takin ei tur tha leh zirtirna tha an dawn a, hriselna tha an neih a beisei thu a sawi a ni.
———-

Kumin September 28-a Rih dil kawnga Bus chetsualna thlengah leh October ni 24-a Rihdila hmeichhe naupang tla hlum ruang zawn kawngah Champhai DC, Pu TV Fambawl chuan Khawmawi leh Rihkawdar mipuite, Myanmar Police leh sipaite chungah lawmthu a sawi. He thu hi nimin khan Rihkhawdar mipuite hnenah a sawi a, Mizoram dep, Myanmar lama chengte chu Mizoram mite nen thisen inzawm, unau leh chhiatni thatni-a inpui tawn tur an ni tih sawiin, tun hnuah pawh inkungkaihna titha zel tur an ni tih a sawi bawk a ni. Hemi rual hian Champhai DC chuan Rihkhawdar thalai pawl tan cheng sing 1 bakah Petromax leh Silpaulin 5 a pe a ni. Champhai DC hi Officer dang leh Champhai YMA Sub-Hqrs hruaitute, chanchinbu miten an tawiawm a ni.
————-

Thla hlui ni 14 atanga 17 inkara Shillong-a North East Wushu Championship-a Team Champion, Mizoram hlawhtlinna chu vawiin khan Central YMA Hall-ah lawm a ni. North East Wushu Championship-ah hian Mizoram hian player 36 tirin Gold medal 21, silver medal 9 leh Bronze medal 5 an rawn hawn a, Team Champion an ni.
————-

Vawiin khan Aizawl khawpui chu a lum lai berin celsius degree 32.8 a ni a, a vawh lai berin degree 19.7 a ni.  Hmuh lawk danin naktuk Thawhlehni-ah Aizawl khawpui chu chhum tlemin a khuh leh ang a, a lum lai berin celcius degree 28 vel, a vawh lai berin celcius degree 17 vel a ni ang.