www.zonet.in

RAM CHHUNG CHANCHIN THAR

Jaipur-a IOC tuialhthei chhek khawlna hmuna kangmei chhuak chu ni nga hnuah pawh thelh mih theih a la ni lo a, he chhiatna thleng avanga thi erawh chu an pun belh tawh lo ni-a hriat a ni. Nimin khan he kangmei chhuahna atangametre 200 vela hla a awm, Electronic company leh Instrument Company-te chu, tuialhthei barrel puak avangin a kang ve leh a, mahse harsatna lian tham a thlen hmain darkar 2 chhungin an thelh mit thei a ni. He kangmei chhuak avanga zirna in kharte pawh naktukah chuandan pangngaia hawn a ni tawh dawn tih thuneituten an sawi a, Chief Minister, Ashok Gehlot-a hova mi pawimawh thu khawm chuan, he kangmei chhuak avanga harsatna dang a thlen belh loh nan theihtawp chhuah turin IOC thuneitute chu an hriattir a, he hmun tlawha kal, khawtlang hruaitute chuan, kangmei hi thelh tum lo-a a kan ral vek nghah chu tha bera an hriat thu an sawi bawk. He kangmei chhuah chhan chhui tura Petroleum Ministry-in a din Committee chuan a hna thawk tanin Rajasthan hi an tlawh a, HPCL Chairman leh Managing Director hlui, M B Lal-a kaihhruai, member 7 awmna Committee hian he kangmei, mi 12-in an thah phah hi eng vanga chhuak nge, a ven theih dan a awm em, kangmei chhuah hnua hnathawh dan a tha tawk em, tun hnuah hetiang thil a thlen tawh loh nan engtia tih tur nge tih leh a kaihhnawih thil pawimawh dangte an zir chiang dawn a ni. He Committee hian civil leh Police hotute hruaiin he kangmei chhuahna hmun leh a chhehvel an tlawh a,  biak awma an ngaihte an bia a ni. He Committee hian chawlhkar 6 chhungin sorkarah a report a thehlut ang.

Maharashtra-a tangrual sawrkar siamtu, Congress leh NCP chu Minister hna chanpual siam kawngah an la inlungrual thei lo. Party pahnih hruaitute hi nimin khan an state Chief Minister, Ashok Chavan-a chenna Ina thu khawm tur an ni a, he hmun hi MPCC President, Manikrao Thakre leh Mumbai Unit hruaitu, Kripashankar Singh-ten an thlen hnuah NCP Legislature Party hruaitu, Chhagan Bhujbal chuan tel an tum loh thu a sawi avangin thulh a ni leh ta a ni. Party pahnihte inkara harsatna chungchangah hian NCP ngaihdan an nghak phawt dawn tih state Congress President, Manikrao Thakre chuan a sawi a, hetih lai hian NCP aiawh, Praful Patel chuan Maharashtra-a minister hna chanpual siam chungchangah hian vawiin khan an party hruaitu  Sharad Pawar-chu Delhi-ah a hmu a, an thuchhuak hi hriat a la ni lo a ni.
——–

Manipur khawpui, Imphal-a, kum kaw kal taa Assam Rifles ten pawi sawi lo mi 10 an thah duh loh lantir nana Irom Sharmila-in lungawi lohna a lantirna champha pualin, vawiin atang khan chawlhkar khat awh tur, Beiseina hunpui, Hope Festival an tih chu Imphal-ah tan a ni. Iram Sharmila hian sipaite thuneihna sang tak pekna dan, Armed Forces Special Powers Act (AFSPA) hlip tura sawrkar nawr nan kum kaw chhung chaw a nghei a, a thih loh nan tihluihna-in a hnar atangte-in chaw an thun thin a ni. Kum kaw kal taa thil thleng hian vawiin thlengin Manipur-ah chuan hriat a la hlawh a, Sharmila-i chaw nghei tan ni atanga chhuta chawlhkar khat awh turin, Manipur-a Peace Foundation chuan Hope festival hi a buatsaih a, remna, rorelna dik leh beiseina tih thupui hmangin Imphal khawpui-ah kar khat chhung he festival hi hman a ni ang. Hetih lai hian nimin khan Chandel district-a thingtlang khaw pakhat, Laiten-ah 29th Assam Rifles leh hel pakhat an inkap a, hun rei tak an inkah hnuah hel hi kah hlum a ni a, a ruang bulah hian Grenade leh M-20 pistol leh a mu round 3 an chhar tih sipaite chuan an sawi.
———–

Karnataka CM, B S Yeddyurappa chuan an state-a rorel lai, BJP hruaitute inkara inrem lohna leh amah thlak duhna awm mek chu amah hawtuten an state-in tuilian avanga harsatna a tawh, remchanga hmanga mimala an beihna niin a sawi. Puan tawh angin Karnataka CM, Yeddyurappa hi a sawrkara MLA 60 chuangin paih thlak tumin an bei mek a, an zingah hian Minister pawh engenawzat an tel a ni. BJP chhungkuaa buaina thlen chhan hi Minister pahnih, Janardhan Reddy leh G Karunakar Reddy-te unau ruahman nia ngaih a ni a, he buaina-ah hian BJP hruaitu lu-te pawh an lu a hai hle a ni. Union Labour Minister, M Mallikarjun Kharge chuan, Karnataka state-in tui lian avanga harsatna an tawh laia thuneitute inkara buaina a awm hi tha lo a tih thu sawiin, sorkar buaina hian state harsatna a belhchhah niin a sawi.
——-

Home Minister, P Chidambaram chuan Pakistan atanga beihna reng reng chu sorkarin a chhang let zel tawh dawn tih a sawi.  He thu hi Madurai-a thuthar lakhawmtute hmaah sawiin Home Minister chuan, Pakistan chu Mumbai beihna bak, India rama pawi khawihna thlentir tawh lo turin a hriattir tawh tih a sawi a, India ram ven him kawngah a ni telin sipaiten hma an sawn thu leh, Pakistan atanga India rama luta pawi khawih tumtu chu tupawh ni se, a na thei ang bera kut thlak an ni tawh ang tih a sawi.
————–

Sorkar laipui chuan tih ngaihna dang a awm ngang loh hunah chauh Maoist hel ho lakah sipai rawih an ni ang tih a sawi. Defence Minister, A K Antony chuan Maoist ho buaina leh an pawi khawihna hi ram dang nena indona ni lovin, ram chhung harsatna a nih avangin sorkar chuan sipai rawih loh hram a duh a ni, a ti a, hemi rilru pu hian sorkarin kawng a la zawng zel tih sawiin, thil dang zawng zawng a hlawhchham hunah chauh sipai hi rawih an nih tur thu a sawi a ni.  Maoist ho hi West Bengal, Orissa, Chhattisgarh leh Jharkhand-ah an che nasa hle a, state sorkar ten theihtawp chhuahin an bei zel a, a tul phawt chuan sorkar laipuiin puih a inpeih reng a,  ram dang nena indo ang ziazanga sipai chakna hman erawh chu tul rih lovah ngaih a ni tih a sawi.
————-

Kingfisher Airlines Pilot pakhat chu Chennai-a a chenna Inah thi-a chhar a ni. Police-te chuan a ruang bulah mutna damdawi an chhar atangin, he pilot hi mahni intihlum a nih an rin thu an sawi a, a ruang hi a rim a chhiat tawh avangin ni 5 vel kal taa thi nia an rin thu an sawi bawk. He pilot hian kar hnih chhung chawlh a la niin Kingfisher Airlines thuneitute chuan an sawi.
————

Chief Justice of India, K G Balakrishnan chuan Supreme Court Judge atana ruat thar panga zinga 4-te chu, an hna an chelh thuai theih dan tur ngaihtuah mek a ni a ti.  Central Administrative Tribunal (CAT)-in All-India Conference, New Delhi-a a buatsaih-ah he thu hi sawiin, Supreme Court Judge atana ruat ve tho, ram lei leh eiruk chungchang a thawhpuiten an hek, Karnataka High Court Chief Justice,  P D Dinakaran chu a hming paih a la ni chuang lo tih a sawi a, mi dang 4 te chuan an hna an chelh thuai a beisei tih a sawi. Law Minister, M Veerappa Moily pawhin Supreme Court Judge thar ruat chungchangah hian zawhna a dawng hnem hle tih a sawi a, tun maiah chuan Dinakaran-a hi an lo ruat tawhna hlihsak emaw, a hna atanga bantir emaw ngaihtuah theih a la ni lo tih a sawi.
———-

Kumin September thla-a Jammu and Kashmir-a an chenna In-a lut, LeT hel pawl hruaitu thata, mi dang pawh kut thlaktu, Rukhsana Kausar leh a nutapa bakah a pate-a te chu Jammu and Kashmir Police-a Special Police Officer (SPO)-ah dah an ni. He thu hi Rajouri District SP, Shafkat Wattali chuan vawiin khan a puang a,  Rukhsana leh a nutapa, kum 18 mi, Aijaz bakah, a patea, Wakalat Hussain, he inkahnaa hliamte chu an vaiin SPO atan lak thar an ni tih sawiin, he inkahna thlenga AK-47 silaia LeT  hruaitu kap hlumtu, Rukhsana-i, Delhi-a dah tumna awm anga sawi chu, chanchinbu mite thu phuahchawp mai mai niin a sawi a, hel hoin tun hnaia an chenna In an beih avangin, an chenna in leh a chhehvel chu a hma aia uluk zawka ven a nih thu leh, tuna a awmna hmun, Rajouri-a a chenna pawh helho-in an beih loh nan uluk taka ven niin a sawi.