www.zonet.in

RAM CHHUNG CHANCHIN THAR

Sorkar laipuiin Pakistan rama zin tum, India mite chu fimkhur tur leh, loh theih lohvah lo chuan zin rih lo turin thu rawn a pe. Vawiina Home ministry thuchhuah chuan, ram pahnih inkar boruak chu a that vak loh avangin, fimkhur thilah Pakistan rama zin rih loh a him zawk tih a sawi a, tunah hian Sikh sakhaw betu sang tam tak chu  Pakistan rama Punjab province-ah an zin a, he hmun hi Sikh sakhaw hmun pawimawh leh zahawm ber ber awmna hmun a nih avangin Sikh mite tan chuan hmun pawimawh a ni a, kum zabi 15-naa Sikh sakhaw hmu chhuaktu, Guru Nanak pawh kha he biala piang hi a nih avangin Sikh sakhaw betute chuan an tlawh fo a ni. Tun hnaiah Islam mi firfiakten Punjab province-a hmun hrang hrangah pawi an khawih a, mi firfiakte leh sipaite pawh an inkap fova, chuvangin sorkar laipui chuan sakhaw thil pawh ni se, Pakistan rama Punjab bial hi tlawh rih loh a tha zawkah a ngai tih a sawi. Nikum November thlaa mi firfiakten Mumbai an beih hnuah khan sorkar laipui chuan India mite chu Pakistan tlawh chungchangah fimkhur turin thurawn a lo pe tawh a,  kha thil thleng avang khan India chuan kum 2004 atanga muanna zawnga Pakistan nena an inbiakna pawh a lo titawp tawh a, Pakistan sorkarin a ram leilunga mi firfiakte awm hmun khuar leh an inthlun zawmnate a tihchhiat hma chuan muanna zawnna hi chhunzawm a tum tawh loh thu pawh a sawi chiang nghal a ni.

Hetih lai hian Pakistana Taliban hoin India beih an tum thu an sawi hnuah, India rama Kashmir-ah Taliban an awm awm an la hriat loh thu, sipai hotuten an sawi a, Major General K Surendranath chuan, kar hnih liam ta-a Taliban hruaitu, Baitullah Mehsud-a’n India beih an tum thu a sawi chu, a takin an la bawhzui lo nia an hriat thu a sawi. Sipai hotu chuan Taliban ho hian Pakistan sawrkar sipaite beihna avangin, an sa himna an zawn mek thu leh, India beih tuma an che a nih chuan an beih let ve nghal tur thu a sawi bawk. Tun thla tir lam khan, Pakistan atanga India-a luh tum, Taliban mi 60 vel chu ramri-ah an awm niin NDTV chuan a sawi a, heng mite hi Pakistan-a Intelligence pawl, ISI-ten an tanpui nia sawiin, India rama an luh theih nan pawh Pakistan hian a tanpui niin a sawi a. Nimin khan Pakistan Interior Minister, Rehman Malik chuan Taliban-ho hi India in a tanpui niin a sawi ve thung a, sum leh paia tanpuina pawh India hian a pe thin niin  a sawi. Pakistan Minister thusawi hi  thu dik lo leh inpuhna awmze nei lo niin India External Affairs Minister, SM Krishna chuan NDTV a hrilh a, Taliban leh a kaihhnawih engpawh, India chuan nuai bo a duh thu a sawi a, Defence Minister, A K Antony pawhin, Pakistan Minister-in India a puhna chu finfiahna awm lo leh thu phuahchawp niin a sawi bawk.
————–

India, Russia leh China Foreign Minister-te, vawiin-a  Bangalore-a inhmukhawm chuan Pakistan chungchangah thuchhuah intawm siamin, Pakistan chu a ram chhunga mi firfiakte hrem ngei turin an phut tih an sawi. He an thuchhuah-ah hian, UN Resolution 1267 angin, Pakistan rama Jamaat-ud-dawa chu Pakistan pawhin mi firfiak pawl anga a en ngei an duh thu an sawi a, ram pathum aiawhte chuan, he pawl leh an hruaitu, Hafiz Saeed-a khuahkhirh chu Pakistan sawrkar mawh liau liaua an ngaih thu an sawi a ni. Ram pathum Foreign Minister-te thutkhawm hnu hian External Affairs Minister, S M Krishna leh China Foreign Minister, Yang Jiechi chu a hranin an inkawm zui leh a, tun hnaia ram pahnih inkara inhmuh thiam lohna awm chhan Arunachal Pradesh chungchangte, Kashmir leh Dalai Lama chungchanga ram pahnih ngaihdante an sawi dun a  ni.
———–

Mumbai-a Kala Chowkie vengah tukin khan nupa, zing kara insawizawi-a ke-a kal chu misual pahnihin an bei a, an nu an thah bakah a pasal pawh na takin a hliam a ni. Police-te sawi danin,  heng misual pahnih hian he mite nupa hi an sana chhuhsak tumin an bei a, an nu, Tina Dedhia hian a pek duh loh avangin na takin kut an thlak a, hemi hnu hian a sana chu chhuhsakin an tlanbo zui ta niin an sawi. Misualte kut thlakna avang hian Tina hi a hmunah a thi nghal a, a pasal pawh hi damdawi inah enkawl a ni.
——————-

Assam-a Kokrajhar district, Fakiragram station-ah sipai pakhatin rela chuang, hmeichhe pakhat mawi lo taka a khawih avangin, mipui thinrimin rel kawng an dang. Police-te chuan, Brahmaputra Mail, Guwahati atanga Delhi pana tlanah he thil hi a thleng tih an sawi a, he rel hian Assam leh West Bengal inrina, Fakiragram station hi tukin dar 8.30 vel khan a thleng a, he rel chawlhhmunah hian mi  500 vel chuan he thil thleng hi hriain, rel kawng hi an dang zui nghal a ni. Thil sual titu hi an man tawh tih Police te chuan an sawi a, thuneitute pawh a hmunah kalin, mipui lungawi lote nena an inbiak hnuah rel hi dan pangngaia tlantir a ni leh tawh tih an sawi.
————

Mumbai International Airport-a thlawhna tum kawng thenkhat thawm that a nih avangin vawiin khan darkar ruk chhung he thlawhna tumhmun hi khar a ni. Hei vang hian he airport atanga vawiina thlawhna thlawk chhuak tur 12 chu thulh a ni a, he hmun hi chawlhkar 22 chhung siam a nih dawn avangin, thlawhna dang, he hmun atanga thlawk chhuak thinte pawhin an thlawh hun tur an sawn tawh a ni.
————-

Bihar-a Gaya district-ah thla hmasa khan thluaka khawsik lut, encephalitis avangin naupang 27 an thi nia hriat a ni a, he hri leng avang hian naupang 15 chu Magadh Medical College Hospital-ah enkawl mek an ni. He hri leng chungchang chhui tur hian damdawi In hrang hrangah doctor-te chu tirh an ni a, zanin hian he state chhunga harsatna thlen chhan an hriat theih ang angte chu an sawiho ang a, hnathawh zui dan tur an rel bawk dawn a ni. Sawrkar thuchhuah chuan he hri leng hi a darh zau zel loh nan theihtawp a chhuah tih a sawi a, thla leh ni 12 hmain state chhung hmun hrang hrangah he natna laka invenna damdawi pawh sem hman an tum tih a sawi.
———

Jharkhand-a Giridih district-a school pahnih chu tukin khan Maoist hel hoin an hal. Maoist te hian Haridih School leh Dharpahari School-ah hian bomb an tipuak hmasa niin Police te chuan an sawi a, thi leh hliam erawh chu an awm lo tih an sawi. Jharkhand-ah hian Police ten Maoist bei turte inkhuarna atan school tam tak an hman avangin, Maoist-ho hian school tam tak halin an tichhe tawh a ni.
———-

UK leh Cyprus tlawh tura zin mek, President Pratibha Patil-i pualin Kumpinu-in ruai a buatsaih. Kum 1990-a  President R Venkatraman-a’n a tlawh hnuah, kum 20 kal ta chhung khan, India President tumahin sawrkar thilah UK hi an la tlawh leh lo a, President hian London-a a cham chhungin British Prime Minister, Gordon Brown bakah eptu pawl hruaitu David Cameroon pawh a kawm dawn a, nakkum-a Delhi-in Commonwealth Games a thlen tur pualin Commonwealth Games meichher chu Kumpinu-in a hlan bawk ang. President hian Mahatma Gandhi-a lehkhathawn thenkhat leh, India hruaitu hlui, Nath Puri leh Ghulam Noon-a thawmhnaw-te pawh British sawrkar hnen atang hian a dawng dawn a ni.