www.zonet.in

RAM PAWN CHANCHIN THAR

Iran ramin a nuclear programme chungchanga UN duh danah thil pawimawh tak thlak danglam a nih chuan, UN duh dan hi pawm a hnial lo tih a sawi. Al Alam TV sawi danin, nuclear programme chungchanga International Atomic Energy Agency (IAEA) nena an indawrnaa a ngaihdan hi darkar 48 chhunga puan a nih tur thu a puang a, rawtna ang chuan Iran hian nuclear hmanraw siamna atana a sawngbawl tawh, uranium chu kawlphetha chakna atana siam atan Russia leh France ramah a thawn ang. IAEA rawtna hi Zirtawpni khan Iran hian chhang tawh tur a ni na a, hun tiam chhungin a chhang hman ta lo a ni. Iran hian a nuclear programme hi ralthuam siamna atan ni lo, energy siam chhuah a, an ram kawlphetha indaih lohna phuhrukna tur niin a sawi thin a, hei vang hian a hmanna tur nia a sawi ang taka hman a nih theih nan Russia leh France ramah siam chhuah ni se tiin IAEA hian ruahmanna a siam a ni. Mahse Iran sorkar hian IAEA rawtna-ah hian thil pawimawh tak tihdanglam a phut tih Al Alam chuan a sawi a, he thil pawimawh tak a tih hi a sawi chiang lo a ni.

Thailand chhim lama Muslim hel hovin Buddhist pahnih an thah avangin buaina a chhuak a, chhuahna hmun - Narathiwat, Yala leh  Pattani Province hi Malaysia nena an inrina laia awm an ni a, heng biala cheng mi tam zawk hi Muslim sakhaw betute an ni. Kum 1902-a Thailand sawrkar awpna hnuaia an awm atangin Thailand sawrkar atanga inlak hran duh pawl an ding nghal a, heng pawlte hian sawrkar laka an lungawi loh lantir nan kawng hrang hrangin pawi an lo khawih tawh thin a, kum 2004 atang phei kha chuan Muslim helho hian pawi sawi lo beih an ching a, tun thleng hian mi 3,600 velin an thih phah tawh a ni. Nimin khan Muslim hel ho hian Pattani-ah Buddhist pahnih an kap hlum leh a, he pawi khawihna-a mawhphurtute chu Pattani khuaah hian an tawm nia hriat a nih avangin, sipai, Police leh helai biala thuneitute chuan, he khua hi panin, hel ho nena an inbeihna-ah Police officer pakhat leh Muslim mi pakhat an thi  a ni.
————

Cuba ram hruaitu hlui, Fidel Castro-a farnu, Juanita Castro  chuan CIA tana enthlatu hna a thawh tawh thu a puang. US-a Miami a cheng, Juanita chuan, kum 1960 chho khan CIA tan enthlak hna, kum 3 chhung a thawk tih a sawi a, a nutapa laka hetia a chet chhan hi, a nutate pahnih- Fidel Castro leh tuna Cuba President ni lai, Raul Castro-ten anmahni duh lotu, eptu pawl mite an thah vang nia sawiin, kum 1964-a Cuba ram a chhuahsan hmain, a nutapa Fidel Castro a duh lotu-te chu humin an bihruk theihna tur a zawnsak thin tih a sawi. Kum 76 mi, Juanita chuan, Fidel Castro-a’n kum 1959 a lalna a chan hnu kum hnihna-ah, US-a Havana-ah CIA tana thawk turin lak a ni tih a sawi a, a nutapa hi a phiarruk loh thu leh amah zawkin a phiarruk hmasak avanga hetianga ti hi a nih thu a sawi bawk. Hetianga phiar ru-a a nuta a puh chhan hi, an sawrkar paihthlak tuma an beih laia a intiamnate a tihhlawhtlin leh si loh vang niin a sawi a, Fidel Castro hian amah mai pawh ni loin, a ram mipui zawng zawng a tibeidawng hmasa niin a sawi. Juanita chuan, CIA hnuaia a thawh lai hian hming lem Donna tih vuahsak a ni tih a sawi a, hetianga CIA-te nena remna an siam theih chhan hi, Cuba ram laka pawi khawihnaa inhnamhnawih lo tur leh, CIA-te hian a hlawh tur sum pek loh an remtih vang niin a sawi.
————

Malaysia hmar lam, Perak State-a Kuala Dipang lei chimah naupang pakhat a thi. Bernama News Agency chuan, he lei, metre 50-a sei hi, kar hnih kal ta khan hman theiha siam zawh a ni tih a sawi a, an khawpui Kuala Lumpur hmar lam km 200-a hlaa Kampar, Tronoh leh Batu Gajah khuaa Primary school zirlai camp 300 zinga 60 vel chuan he lei hi an zawh a, naupang lei zawh thenkhatte chu lei-a an zawh laia an zuan vak vak avangin a chim ta niin a sawi. He chhiatna thlengah hian naupang 19, tuiah an tla a, an zinga pakhat chu thia chhar a nih hnuah, naupang pahnih chu chin hriat lohin an la awm mek a, mi dang erawh chu nungdama chhanchhuah an ni.
————–

Honduras-a sawrkar chelh lailawktu, President Roberto Micheletti-a tupa, Enzo Micheletti chu tun Pathianni khan rawng taka thah a ni. Enzo hi ni hnih chhung a bo hnuah a ruang hi an khawpui, Tegucigalpa atanga km 250 a hla, Choloma khaw bulah chhar a ni a. Police-te chuan, Enzo hi a kut hnungkhirhsak a nih bakah, a taksa-ah silai-a kahna a tam hle tih an sawi a, a ruang bulah hian mi dang pakhat ruang pawh an chhar tih an sawi. Honduras-ah hian Manuel Zuleya paih thlak a nih hnuah buaina hrang hrang a thleng chamchi a, hemi hma pawh hian, he ram hi tualthah tamna ber ram zinga mi a ni a, heng zinga a tam ber hi ruihhlo vanga buaina chhuaka thite an ni a, nikum chhung ngawt pawh khan mi sang 7 vel an thi a ni.
—————–

Palestinian-te tui lakna chu Israel-in a tihtawpsak niin Amnesty International-in a sawi. He pawl sawi dan chuan, Israel miten ni khata tui litre 300 vel an hman theih laiin, West Bank-a cheng, Palestinian-te chuan chawh rualin ni khatah tui litre 70 vel an dawng anga chhut a ni a, mi thenkhat phei chuan ni khatah tui litre 20 pawh an dawng pha lo niin an sawi. West Bank-a thil awm dan report, phek 112 a chhah-ah hemi chungchang hi Amnesty chuan a sawi a, Israel-in Palestinian mite a thliar dan hi a rapthlak takzet nia sawiin, mi tam takin hetianga tui in tur leh ni tin mamawha hman tur, tui an mamawh ang an hmuh loh avang hian harsatna an tawk mek niin a sawi. Hetih lai hian Israel chuan, Amnesty International-in a puhna hi thudik lo leh phuahchawp niin a sawi thung a, Palestinian thuneitute nen, kum 1990-a tui chungchanga remna an siam bawhchhiain eng thil mah a la ti lo niin a sawi. Report-a a lan dan anga, tuichhunchhuah laih khap te, an laih sa pawh tihchhiatsak leh, a bul lawka Israel chengten swimming pool nena nawm an chen chungchang-te chu thu belh chian dawl lo vek niin Israel sawrkar thupuangtu, Mark Regev chuan a sawi a ni.
————–

Afghanistan-a sipai thawn luh belh chu nawrna avang maia tihhlawhtlin a tum lo tih US President, Barack Obama chuan a sawi. Tun hnaia Senator John Kerry-a’n sipaite harsatna hriat thiampui lo leh, a ngaih pawimawh nia a sawi pawh dah pawimawh thei tawh lo President, an ramin a nei nia a sawi chhan let nan he thu hi Florida-a sipai pung khawm hmaah a sawi a. Afghanistan-a US sipai dah belh tura nawrna nasa tak awm mek chu, chuti maia tihhlawhtlin theih a ni lo tih sawiin, sipaite hmun ralti zawka thawn lut tura thutlukna siam chu thil namai lo tak a nih thu leh, an thawn lut a nih chuan US sawrkarin ngaihtuahna zawng zawng senga a um zui tur thu a sawi. Puan tawh thin angin, Afghanistan-a US sipai hotu, Stanley McChrystal-a’n sipai sing 4 thawn luh belh tura a ngenna chu, US sawrkar chuan Afghanistan President tharin US thawhpui a duh leh duh loh a chian hunah chauh ngaihtuah a nih tur thu a lo sawi tawh a ni.
———-

Al Qaeda chuan Pathianni kal taa Iraq rama pawi khawihna chi hnih, mi 155 thihna thlentu chu an pawl thil tih niin an sawi a,  Al-Qaeda peng pakhat, Islamic State of Iraq invuahte chuan thuchhuah siamin, an pawl martarten an sakhaw tana mi hnawksakte an senghawi leh ta niin an sawi.  Al-Qaeda leh Sunni mi firfiakten Iraq rama sorkar,  Shiite Muslim ho tamna tihbuaina atana pawi an khawihnaah hian thih chilh bomb tihpuah an ching hle a, puan tawhangin, Pathianni-ah khan Baghdad khawpuia Justice Ministry leh Baghdad Provincial Administration hmun pawimawh bulah bomb chak tak an tipuak a ni.  Justice Ministry building bul lawkah hian nau awmna hmun a awm avangin, thite zingah hian naupang 20 vel an tel a,  Al-Qaeda thuchhuah chuan Shiite sorkar leh a thurualpui, Iran tana pawi khawih chu an tum ber a ni tih a sawi.