www.zonet.in

RAM CHHUNG CHANCHIN THAR

UPA sawrkar rem fel a nih hnu-a Cabinet thutkhawm hmasa ber chu vawiin khan neih a ni. PM Manmohan Singh-a kaihhruaia neih, he inkhawma thil ngaihtuah zinga langsar ber chu Parliament Session hmasa ber, thla thar ni 1, kar leh Thawhtanni-a tan tura President Pratibha Patil thusawi tur thlir lawk a ni a, President hian UPA sawrkar tharin kum khat chhunga hna a thawh tur pawimawh zualte, Parliament session hmasa berah hian a puang dawn a, hemi avang hian, PM chenna In, New Delhi-a Race Course road-a Cabinet thukhawm hian, uluk tak leh huam zau takin thil hrang hrang an sawiho a ni. President thusawi turah hian ni 100 inhlawhna, NREGA, sawrkar Economic Policy thar leh thingtlang mite hamthatna tura ruahmanna tharte a tel rin a ni. Sawrkar thar hian, kum kal mek, 2009-2010 Union Budget chu July thla tawp khian pass hman ngei turin ruahmanna a siam tawh a, Budet thar hmang hian, khawvel sum leh pai dinhmun tla chhe zel avanga India-in harsatna lian a tawh lohna tur kawng hrang hrang thawh theih beisei a ni. Hetih lai hian Sonia Gandhi kaihhruai, UPA sawrkar hian Parliament leh State Assembly-a hmeichhiate tana seat hauhsakna, hun engemaw chen pass lohva awm, Women’s Reservation Bill chu a hma thei anga pass dan ngaihtuah a tum a ni. Ruahman dan chuan Lok Sabha 15-na session hmasa ber hi naktip, Thawhtanni khian tan a ni ang a, Nilaini, June ni 3-ah Speaker thar thlan a ni ang a, a tuk, Ningani-ah President hian House pahnih member thukhawmte hmaah thu a sawi ang.

Australia-a awm, India mite chunga tun hnaia tharum thawhna thleng thin chu a ngaihmawh thu, PM Manmohan Singh-a’n Australia PM, Kevin Rudd a hrilh. PM hian, Australia PM nen telephone-a an inbiakna-ah an ram chhunga India mi chengte thla hlui leh tun thla chhunga beih an ni thin chu a ngaimawh hle thu a hrilh a ni. Australia PM hian nimin tlai khan PM hi bia-in, an rama awm India mi zirlaite chunga tharum thawhna thleng thin pawi a tih thu a hrilh a, hetiang thil a thlen tawh loh nan theihtawp chhuaha hma an lak mek thu a sawi a ni. External Affairs Ministry sawi danin, Australia-a India mi, zirlaite chunga tharum thawhna thleng thin avangin, he rama India Consulate chuan theihtawp chhuahin, India mite humhim hna leh thil pawimawh dang a thawk mek tih a sawi a, New Delhi-a Australia palai, John McCarthy pawh hemi chungchangah hian sawrkarin a ko tawh tih a sawi bawk. India mi zirlai, Australia-a awmte hi misual thenkhatten an bei fova, tunah hian mi pahnihin a dula an vih, damdawiina la awm, Baljinder Singh vangin India sawrkar chuan, Australia rama Mingo zingah Mihang ngaih theih lohna a awm niin a hria a, he thil hi a ngai thutak hle a ni. Hetih lai hian Australia Police-te chuan India mi zirlaite chunga tharum thawh chungchangah Mingo thalai panga an man tawh a,  an zinga pakhat kum 17 mi chu tualthah tuma che, Attempt to Murder, thubuai siamsak an ni. Filmstar hmingthang Amitabh Bachchan chuan, Australia rama Queensland University-in Honorary Doctorate Degree hlan a tum chu, heng thil thleng avang hian a hnawl dawn tih a sawi.
———–

New Delhi-a Indira Gandhi International Airport-a kang thelhtu pahnih, lirthei chesualah an thi a, mi dang pathum an hliam bawk. He airport-a Senior Fire Co-ordinator, Ashok Chandra Verma leh a hote pali chuan, kangthelh motor tunlai ber an neih thar, Rosenbauer-RB chu nizan khan an enchhin a, thlawhna tum kawnga an tlan laiin he lirthei hi a a chesual ta a, a chhunga chuangte chu a bul luikawr thuk takah an tla khawm ta a ni. He chetsualnaa thi te ruang hi Safdarjung Hospital-ah endik a ni a, hliamte chu Vasant Kunj-ah Indian Spinal Injuries Centre-ah dah luh nghal an ni bawk. Kangthelhtute chetsualna hmun hi Indira Gandhi Airport-a tum tual thar a ni a, he tum tuala thlawhna tum hian a bul vela chengte harsatna a siam thin avangin Civil Aviation Director General chuan a khar mek a ni.
————–

Assam-a North Cachar Hills huam chhunga rel kawng chu ram chhunga rel kawng ralti bera ngaih a ni. He bial huam chhungah hian hel pawlten rel lambun an chin avangin, khualzin phur rel bik chu thla khat chuang tlantir a ni tawh lova, bungrua leh hmarchhak, a bikin Tripura leh Mizoram buhfai tur phur rel-te chu tlan hram hram mah se, hel ho avang hian a tlan mumal thei tawh lo bawk a ni. Hel pawlte hian rel an lam bun theih nan rel kawng tihchhiat an ching hle a, heng rel kawng chhia siamtha tur, rel hnathawkte chu lambun an chin bawk avangin, hnathawk tha ngam pawh an awm tawh lo a, rel hnathawkte bakah hian, East-West Corridor Project hnuaia hnathawk National Highway Authority of India hnuaia Contractor-te pawh hel ho hian an bei chamchi bawk a ni. Contractor zinga mi, Borgohain Gammon chuan kar kal ta lawk pawh khan Engineer pathum chu helhoten an ru bo tih sawiin kum khat chuang zen zawn hna mumal an thawk ngam tawh lo a ni a ti a, North Cachar Hills bial boruak chu a rit takzet tih a sawi. Hetih lai hian Dimasa hel pawl DHD(J) nena inzawmna nei nia puh, North Cachar Hills Autonomous District Council, Chief Executive memebr Mohit Hojai chu man a ni a, he pa hi kumin March atanga khan chin hriat lohin a bo tawh a ni.  Hojai hian an District hmasawnna tur sum tam tham tak chu hel pawl puih nan a hmang niin Police-ten an sawi. Hetih lai hian Tripura Rajya Sabha MP Mati Lal Sarkar chuan Union Food Minister, Sharad Pawar hnenah lehkha thawnin, Lumding leh Badarpur inkara rel tlan thla hlui ni 10 atanga tihtawp tawh avanga, ei leh bar lam chi thil hrang hranga harsatna an tawh nasat tawh thu a hrilh a, nitin mamawh hrang hrangte chu Motor-a phurhtir dan dap turin a ngen a, an mamawh zat buhfai an neih theih nan nitin Truck trip 100 tal thawn luh dan dap turin a ngen bawk. Tripura hian thla kipin Buhfai ton 25,000 an mamawh a, tunah hian chhek khawl sa tonne 48,000 vel chauh an nei tawh a ni.
———–

External Affairs Minister, S M Krishna chuan Pakistan sawrkar chu a ram chhunga hel pawl hmunte tichhe thuai turin a ngen. Krishna chuan, a ngen anga Pakistan sawrkarin thil a tih tak tak hma chuan India-in inbiak a duh lo a ni a ti a, Pakistan sawrkar hian a ram chhunga mi firfiak awm mek leh hel pawl hrang hrangte che thei lova siam chu ngaih pawimawh hmasakah a neih tur a ni a ti bawk.
———

Bihar khawpui, Patna-a mipa naupang kum 7 mi rukbo a, thah a nih avangin lungawi lohna lantirin mipuiin buaina an siam.  Kankarbagh venga mi, Doon Academy-a pawl 4 zirlai, Satyam chu an thenawm tleirawl pahnihin Ningani khan an ru bo a, a tlan chhuah nan cheng nuai 50 an phut a, an thil phut hi an dawn loh avangin naupang hi an that ta a ni. He mipa naupang khawngaihthlak tak rubotute hi man ve ve an ni a, an thil sual tih pawh an puang vek tawh a, an inpuanna atangin an mi thah ruang hi Ashok Nagar-ah hmuh a ni ta a ni. Patna SP, Anwar Hussain sawi danin tualthattute hi Hnephnawl Dawr neitu, Avinash leh mipa naupang thi tate thenawma mi monu an ni a, an inpuan dan chuan mipa naupang hi an rek hlum a ni. He thil thleng rapthlak tak avanga thinrim mipui pungkhawm chuan Aivinash-a dawr hi an suasam a, kawngpui an dang ping bawk a ni.
———-

Hmeichhe chhaih nawmnah avangin Kanpur-a mipa pathum chu National Security Act dan hmangin thubuai siamsak an ni. Heng mi pathum hian zurui chungin khawlaia kal hmeichhe thenkhat an chhaih nawmnah a, a bul vela lo awm midangten heng mi pathumte hi manin Police Station-ah an hruai ta a ni. Kanpur-ah hian hmeichhe chhaih nawmnah, eve teasing thubuai hi ni tin pathum vel awm ziah anga chhut a ni a, hemi avang hian, hetiang ching miten an thil chin tha lo an sim theih nan, heng mi pathumte hi NSA dan hmangin thubuai siamsak an ni ta a, hei hi hmeichhe chhaih nawmnahtute chunga NSA dan lekna hmasa ber a ni.