Tual Chhung Chanchin Thar

Mizorama Sorkar Middle School zawng zawngah naktuk, August ni 1 atangin Naupang Chaw chhun buatsaih a ni dawn. He mi chungchangah hian School Education Director chuan Chanchinbu mite hmangin mipuite a hriattir tawha, District tinah Deputy Commissioner, District Education Committee Chairman ni bawk hovin Naupang chawchhun, Middle School-a pekna turte hi ruahman a ni. Sorkar Middle School awmna khaw tinah Village Education Committee, tlawmngai pawlte leh mipuite chu he programme tihlawhtling tur hian ngen an lo ni tawh a ni.  Mid-Day Meal hi Aizawl khawpui leh a chhehvel School thenkhatah chuan Sorkar hruaituten naktukah an hawng dawna, Assembly Sepeaker Pu Lalchamliana’n Electric Veng Middle School-ah, School Education Minister Dr. R.Lalthangliana’n Dawrpui Middle School Complex-ah leh Higher and Technical Education Minister Dr. Lalzama’n Bawngkawn Middle School II-ah a hawng dawn a ni. Officer ho pawhin hmun tam takah an hawng dawna, School Education Director Pi Malsawmthangi chuan Sihphir Middle School tan Sihphir Community Hall-ah a hawng anga, SSA State Project Director, Pu V. Ralliana chuan Thingsulthliah Middle School II-ah a hawng anga, DC, Officer dang leh DCSO te pawhin an bial chhunga Schoolah Naupang chawchhun hi an hawng dawn a ni. Tuna naupang chawchhun pekna tur Sorkar Middle School-ahte hian naupang pakhat tan nitin buhfai gram 150 leh chawhmeh leh a bawlhlo atan cheng 3 hisapa chawchhun hi buatsaih tur a ni a, hemi hmalam, Kum 2006 atanga Sorkar Primary School naupang chawchhun buatsaihnaah hian naupang pakhat tan nitin buhfai gram 100 leh chawhmeh leh a bawlhlo atan cheng 2 leh duli hman a ni. Mid-Day Meal hi Central sorkarin National Programme atana a duanchhuah, naupangten hriselna tha neia zirna tha an ban theihna tura ruahman a ni a, Mizoramah chuan State level-ah School Education Directorate-in a kengkawh a, District level-ah erawh chuan SSA hnuaia Committee hrang hrang te hmangin tihpuitlin chhoh mek a ni. Middle School naupang tana naktuk atanga naupang chawchhun buatsaih hi School naupang sing 6 sang 2 leh 562 in an dawng thei ang a, hemi hmalam hian Mizoram pumah Primary School naupang sing 9 sang 9 leh 963 te chu chawchhun pek an lo ni tawh a ni.
————-

Tukin zing dar 5 atanga Khawzawla Bandh huaihawt chu vawiin tlai dar 5 khan tihtawp a ni a, a tira naktuk zing dar 5 thleng awh tura ruahman, darkar 12 laia tihtawi anihna chhan hi mipuiin an thlawp that tawk vang leh, Khawzawl District siam mipuiin an duh zia an tarlang tawk nia hriat vang a ni. Bandh huaihawttu Khawzawl thalai pawl Secretary, Pu Lalrotluanga Ralte hnen atanga thudawn danin, he bandh hi mipuiin an thlawp tha a, Khawzawl Vengtharah mitthi awm avangin mithi vuite erawhchu an chhuah remtih ani a, midangte erawhchu pawnah an chhuak lova, lirthei a tlan loh bakah zirna in, School, dawr leh sumdawnna hmun te khar an ni a, he bandh hian mihring khawsak phung pangngai nasa takin a tibuai a ni. Khawzawl Police station atanga kan corr. thudawn danin, Bandh chhung hian buaina leh thil duhawm lo thleng engmaha awm lova, Police leh magistrate-te chuan an duty tha takin an ti a ni. Puan tawh angin, Khawzawla vawiina darkar 12 chhung bandh neihna chhan hi Khawzawl District siam phutna a ni.
————

Mizoram Truck Owners’ Association chuan, Carrying Contractor-te buhfai phurh man sorkarin a tihsan sak zulzuia Carrying Contractor-ten Truck neitute buhfai phurh man a tihsan sak ve loh avangin an lungawiloh thu thuchhuah siamin an tarlang. Truck Owners Association chuan tunah Diesel, Motor part leh Motor chhe siam mante a san chhoh  tak avangin buhfai phurh man pawh tisang ve turin anmahni ruai chhawngtu Food, Civil Supply & Consumer Affairs Deptt. hnuaia Carrying Contractor-te chu an ngen tih an sawi a, an thil phut tihhlawhtlin anih loh chuan Mizoramin tampui mitthi a tawh lai hian hreh tak chungin lungawilohna lantir lo thei lo dinhmunah an awm tawh niin an sawi a, kan corr. zawhna chhangin Mizoram Truck Owners’ Association President, Pu Ramhlunsanga chuan Kolasib District-a Truck neitute nen Joint Meeting an nei thuai anga, chutah chuan an kal zel dan tur rel ani ang a ti. Truck Owners Association hian tun thla ni 20-a Food, Civil Supply & Consumer Affairs Deptt.-in buhfai phurtur zawnna atana Tender Notice a chhuahah Tender chhang thei te chu, kum 3 tal Experience lo nei tawh, kum 2006 leh 2008 inkara cheng nuai za hu tal hna lo thawk tawh an ni tur a ni a tih chu mi thenkhat, tlemte duhsakbikna leh midang buhfai phur ve tur hnawlna nia an hriat thu sawiin an ngaithiamlo tih an tarlang bawk a ni. Hetih lai hian, Food, Civil Supply & Consumer Affairs Director, Pu TBC Rozara chuan kan corr. zawhna chhangin, tuna buhfai phurh man chungchanga Truck Owners Association lungawilohna hi Carrying Contractor leh an mi  rawih chhawn Truck Owners Association-te inkar thil a ni a, hetah hian sorkar chuan tih theih a nei lova, amaherawhchu Carrying Contractor te chu buhfai phur tura an mi rawihte nen lungrual taka an thawhho theih dan tur zawng turin ngen an ni tawh a ni a ti. Carrying Contractor lakna tura tun thla ni 21-a Tender an chhuaha an mi duh ang sawilan chu, mitha leh rinawm, mautam tam kuma fail lo tur thlanna atan a pawimawh a ni a ti a, hetiang condition hi tunhma lam pawh khan lo hman tawh thin anih thu leh FCI pawhin a hman thin a ni a ti. Hetihlai hian Carrying Contractors Association President, Pi Laltha-i chuan Zonet Corr. zawhna chhangin buhfai phur tura Truck dang an rawih chhawnna Rate hi tih san an remti tawha, tunah hian a tihsan dan tur enfiahtu an ruatte chuan an chhut fel mek a ni a ti.
———

Aizawl North-III Youth Block, Mizoram Pradesh Congress Committee chuan vawiin khan Aizawl Chanmari Hall-ah Block Conference an hmang. He Block Conference-ah hian MPCC President, Pu Lalthanhawla chuan MNF Party chu beidawng lutuk tawh a puhin an Party Publicity Sub-Committee member atan,  an duh leh duh loh pawh zawt hmasa lovin chanchinbu mite an dah tawp tawp a ni a ti a. Pu Lalthanhawla chuan MNF sorkarna hian thalaite hmasana tur kawng tam tak rahbeh a ni a, an sorkarna hnuaiah lungawi lo pawl tam tak an awm tawh ania ti a, heng pawl te hi MNF Party-in anmahni pui tura a din an ni a ti. He Conference-ah hian resolution 3 pass a ni a chungte chu, UPA sorkar thlawptu ngah tawk leh tawk loh fiahna motion chingfel tura vote lakna a Mizoram MP vote pe lo an ngaihthiamloh thu leh, a hnungkhirh saktu MNF Party chu mipui zahlo nia an hriat thu te, MPCC Action Committee-in Mizoram sorkar leh Venus Bamboo Product Ltd inkara indawrna leh  Venus Bamboo Product Ltd sum pekna an haichhuak thei chu lawmawm an tih thu te, an Party President, Pu Lalthanhawla kaihhruaina an thlamuanpui thu te an ni. He Conference hi Aizawl North-III Block Youth Congress President, Pu C.Liankhuman a kaihruai a ni.
———–

Zoram Nationalist Party (ZNP) chuan MNF Publicity Sub-Committee member atana chanchinbu mi thenkhat ruatten, member tura ruatna an pawm duhlo chu fakawm an tih thu thuchhuah siamin a tarlang a, an thiltih dan chu ram leh hnam hmangaihtute ze dik tak, therhlo umna tel lo nun niin an thuchhuahah chuan an sawi a ni.
———

Ex-Mizo National Army Association chuan Bangalore North Bial atanga BJP Ticket-a MP atana thlantlin, Pu HT Sangliana  chuan UPA sorkar buk anih khan an Party BJP duhdan kalhin UPA lamah vote a thlak a, hei hi Mizorama Mizoram Pradesh Congress Committee-a luh a tumna nia an hriat thu sawiin, Pu HT Sanglianan vote a thlak dan chu Party duh dan phatsanna  niah an ngai tih thuchhuah siamin an tarlang a ni.
——–

Vawiin khan Aizawl khawpui chu a lum lai berin celsius degree 29.8 a tling a, a vawh lai berin degree 19.7 a ni. Hemi chhunga ruah sur zat chu milimetre 0.5 a tling a ni.
———-

Mizoram Poor Federation (MPF) chuan vawiin khan ‘Retheite Movement hming chawiin Aizawl Chanmari kawn atanga Salvation Army Temple Square thleng kawng an zawh. Kawng zawhtute hian an pawlin ram rorelna atana kalphung thar an duanchhuah leh Mizoram Municipality Act-2007 chu thil inkalh tlat nia sawiin, Mizoram Municipality Act an duh loh thu an auchhuahpui a,  Central sorkarin Look East Policy hmanga Mizoram kaltlanga khawchhak ramte dawrna tur kawngpui siamtlang a tum chu tun dinhmunah Mizoram leh mipuite tan la hun lo nia an hriat thu an sawi bawk a ni. Kawng zawhtute hian resolution pass-in India danpui kalh lova Mizoram chhunga chengte inenkawlna leh inhumhalhna tha zawk neih tul an tih thu te, thenawm State, Municipality Act hmannaah te Tribal-te chim ralin an awm chho mek nia an hriat thu te an tarlang bawk a ni. Kawng zawh tanna Chanmari kawnah hian an pawl President, Pu. JF Rothangliana’n thu a sawi a. Zarkawt Traffic Point, Israel Point leh Temple Square ah te an hruaitute chuan thu an sawi bawk a ni.
———–

Nimin khan Durtlanga Multipurpose YMA Hall-ah vawk vulh dan leh a kah rai dan vawk vulhtute zirtir an ni. He training-ah hian Dr. KVL Rochharzela chuan vawk chi tha la a vawkpui kah rai chu vawkvulhtute tan a hlawk thu a hrilhfiah a, Kum 2000 khan AH & Veterinary Deptt chuan US leh Australia atangin vawk lian chi Large White Yorkshire a la lut a, chu vawk chi tha chu vulhzui zelin a chi laka dahthatna Selesih-ah siam a ni a, chu vawk chi chu Aizawla an Deptt Hospitalah leh Animal Health Centre hrang hrangah vawkvulhtute hman atan dahthat a ni a ti. He training hi Durtlang VCP, Pi Lalrinsangin a hawng a ni……………………
———-
 
Vawiin khan Rajya Sabha MP, Pu Lalhmingliana chuan AMFU Gen. hqrs. office, Treasury Square ami a tlawh a, AMFU hruaitute nen an inkawmnaah Pu Lalhmingliana chuan, Mizorama Green Revolution thlentir tura AMFU hruaitute hmalakna chu lawmawm a tih thu a sawi a, tanpui a tulna apianga tanpui a inhuam thua  sawi bawk. He inkhawmah hian AMFU chuan MP atana thlannawn leh anih lawmpuina thuziak Pu Lalhmingliana chu an hlan a ni. He inkhawm hi AMFU President, Pu Lalduhawman a kaihruai a ni.
————

Mizorama mautam tam tuartute tanpui nan Canada-a pawl pakhat, Frasers Valley Gleaners chuan anmahni siam Vegetable Mix Soup Mizoramah a rawn thawn thleng. He tanpuina hi Baptist Church of Mizoram kutah leh Central YMA kutah thawn thlen a ni. He Vegetable Mix Soup (Dehydrated) hi quintal 160 rawn thawn thlen a ni a, Canada atang hian lawnga rawn kalin Kolkata atangin truck-a rawn phurh chhoh leh a ni. A tirah a rawn petute hian Relief & Rehabilitation Deptt. kaltlanga rawn pek an tum laiin sawrkar hian kohhran leh NGO kutah hian a hlanchhawng ta zawk a ni. He Vegetable mix soup-ah hian thlai chi hrang hrang 18 chawhpawlh a ni a, chung zingah chuanbroccolli, carrot, parbawr, vaimim, bean, purun, hmarcha, alu, pasta leh tomato te pawh a tel a, a tuamna kawmah chuan a siam dan tur te a inziak tel a, Baptist Kohhran hruaitute chuan he chaw hi atui a siam theih, tam dawm tak leh daihzai tak a ni tih an sawi a ni. Hetih lai hian Central YMA Executive Committee chuan a sem dan tur ruahman nan inrinni khian inkhawm a kova, hetah hian a siam dan inzirtir dan tur chung chang pawh an sawi tel dawn a ni.
———

General Administration Deptt. hnuaia Aviation Wing leh Information Deptt. tangrualte chuan, Lengpui thlawhna tumhmuna Instrument Landing System bun dan tur vawiin khan chanchinbu mite an enpui. Hetah hian Officer on Special Duty, Pu Joe Lalhmingliana chuan Lengpui thlawhna tumhmun thuamthatna tur leh khaw chhia, chhum zing leh zanah pawh thlawhna a tum theihna tur hmanrua Instrument Landing System bun dan tur te, khaw awmdan enna tur Meteorological Observatory leh Enrout DVOR bun dan tur te a hrilhfiah a, he ISL hi bun anih hun chuan khawchhiat vanga thlawhna  cancel-te a tlem tawh tura ngaih a ni. Airport tih changtlun tur hian thlawhna lian leh rit zawk dawl zo tura tihchak te, thlawhna tum hmun ‘Runway’ thui zawk siam te, thlawhna dintirna hmun ‘Apron’ zau zawka siam te, hmun remchanga thlawhna dah thatna tur siam te leh thil vawnthatna ‘Cold Storage’ siamte a huamtel dawn a ni.
——-

Mitmu vawn thatna Mizoram Eye Bank chu vawiin khan Aizawl Civil Hospital-ah Health Minister Pu R.Tlanghmingthanga’n a hawng. Hemi rual hian Lung natna enkawlna tur bik, Cardiology department pawh Minister chuan a hawng nghal a ni. ……………. He eye bank hi National Programme for Control of Blindness hnuaia hawn a ni. Hawnna inkhawma thusawiin, Pu R.Tlanghmingthanga chuan Eye Bank thar chu a bul tanna, la tihphuisui zel tur ani a ti a, Health Deptt. chu hnathawktu lamah leh hmanruaah nasa taka thuamthat ani a ti a, kan corr. thudawn danin Mizoram chu hmarchhak state zinga Eye Bank nei hmasa ber a ni ta a. He Eye Bank hi National Programme for Control of Blindness in India ram state tin te Eye Bank nei tura a ngenna tihhlawhtlinna ani a, heta tan hian sorkar chuan cheng nuai 15 a seng a ni. He Eye Bank hawnnah hian Health Minister chuan midangte tana  mit pe phal in register zingah  a hming a ziak lut hmasa ber a, a dawtah Health Secretary, Pu JC.Ramthanga pawhin a hming a ziak lut ve nghal a ni. Hemi chungchanga sorkar hriattirna tarlan danin, he Eye Bank ah hian tupawh thih hnua midangte tana mit pe phal te chu inziah luh theih a ni a. Health department chuan midangte tana malsawmna ni turin mi zawng zawng a ngen a ni.
———–

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken