TUALCHHUNG CHANCHIN THAR

Kumin kumtawp lama Mizoram Assembly inthlanna neih tur thlirin, Central YMA Office Bearer-te chuan vawiin khan Party hrang hrang aiawhte Central YMA Office-ah a kawm a, hetah hian inthlanna thianghlim, dik leh fel fai, invauna leh intihthaihna awm lo, vote neiten zalen taka vote an thlak theih dantur chungchang sawiho. He inkhawm, Central YMA President, Pu JH Zoremthanga kaihhruaiah hian Political Party tin atangin an aiawh mi 3 theuh an tel a, hetah hian Cenral YMA chuan, mitinin zalen taka anchhia leh tha hriatna hmanga an duh dan ang taka vote an thlak theih tul an tih thu-te, chibing Politics hman loh-te, inpumkhatna ti chhe thei zawng leh Mizoram thendarh tur zawnga Politics khelh loh leh intiamkamna neih loh tul an tih thu-te, State pawn lama hel pawlte chakna hman tangkai tum loh tul an tih thu-te, therhlo leh sum hmanga Campaign loh tha an tih thu-te Political Party-te chu hrilhin, Party hrang hrangte chu inthlanna dik, zalen leh felfai-a awm theihna tura YMA nena thawkdun turin an ngen a ni. Hemi hnua kan corr. thudawn danin, he inkhawma kal, Political Party hrang hrang aiawhte chuan Central YMA hruaitute rawtna leh duh dan chu tha an tih thu leh zawm ngei an duh tih Central YMA hruaitute chu an hrilh a ni. He sawihona-ah hian Kum 2008 Electoral Roll, inthlanna a hman theih tura tuna ennawn leh mek chungchang pawh an sawihova, ram khua leh tui dik tak-te chauh vote thlak theiha siam chu pawimawh an tih thu an sawi a ni. Central YMA hruaitute hian Political Party hrang hrang, Political Affairs Committee kawmin inthlanna felfai leh thianghlim neih theih dan tur chungchang an sawipui chhunzawm dawn a ni.
—————–

Luangmual Retailer, Pi Nupuii chuan an enkawl Ration dawra Ration man lova pek tur chhungkaw 54-te hnena Ration sem an nih lohna chhan chu an hming DCSO office atangin an hmuh loh vang niin a sawi a, Office lam atanga an hming hmuh a nih hnuah heng mite hi Ration pek leh vek tawh an ni tih a thuchhuah-ah a sawi a ni. Hetih lai hian, Aizawl West bialtu DCSO pawhin ZONET corr. zawhna chhangin, heng mi 54-te hming hi tihsual palh avangin Ration, a thlawna dawng turte zingah telh loh a ni tih a sawifiah a, Ration a thlawna dawngtu turte hming chhut a nih laiin carbon paper a letlinga dah palh a nih avangin heng mite hming hi lo telh loh palh a ni a, an chan tur buhfai chu pekchhuah tho nimahse a hnu lama tih dik leh hnuah heng mite hi Ration pek leh tawh an ni tih a sawi.
———-

Khawzawl District siam tura sorkar nawrna kal zelah Khawzawl Thalai Pawl, MZP leh Khawzel Students Association-te’n naktuk zing dar 5 atanga darkar 24 chhung Bandh huaihawt an tum avangin, venhimna lam tih that a ni a, Champhai SP Pu F Lalhuliana’n kan Correspondent a hrilh danin IR Battalion Police leh Khawzela Mizoram Police awmte chu buaina chhuak palh thei vengin hmun hrang hrangah ngwrh takin an duty dawn a ni. Hemi rual hian Magistrate-te pawh duty tir an ni ang a, Champhai DC Pu TV Fambawl sawi danin, Khawzawl SDO Civil leh Magistrate dangte chuan bandh chhung hian buaina leh thil duhawmlo thleng palh thei tha takin an veng dawn a ni. Darkar 24 chhung bandh neih tum a nih chhan chu Khawzawl Thalai Pawl Secretary Pu Rotluanga Ralte chuan sawifiahin, kum 1998-a MNF Sorkar-in Khawzawl District Hqrs a dah a lo tum tawh, tun thlenga tih hlawhtlin la nilo leh a tih hlawhtlinna tura VC leh Tlawmngaipawl inzawm khawmte hmalakna an thlawp zia tih lanna tur a ni a tia, Bandh hian naktuk zing dar 5 atanga naktip, August ni 1 zing dar 5 thleng a awh dawn a ni a ti. He Bandh neih tur hi Biate, Khawhai, Sialhawk, Chawngtlai, Kawlkulh leh Ngopa-a MZP te chuan an thlawp tih Khawzawl Thalai pawl chu an hrilh tawh niin an Secretary chuan a sawi bawk.
————

Mizoram sorkar thupek anga Aizawl Civil Hospital hung hna kal mekah Aizawl Civil Hospital sira Care Hospital zawn hungna lungbang siamthar chu nizan khan tih chhiat a ni a, hemi hmunah hian thir Gate siam nghal a ni. Hemi hmuna Civil Hospital hungna lungbang tihchhiat a ni hi tukin thleng khan Aizawl Civil Hospital Medical Superintendent, Dr. Lalbiakkima chuan a hre lo tih amah betu chanchinbu mite a hrilh a,  Dr. Lalbiakkima chuan Civil Hospital hungna siam mek chu damdawi in himna atan leh thil bo awm lohna atan a pawimawh a ni tih sawiin, Health Deptt.-a Association hrang hrangte pawhin Resolution siamin Deptt. ram humhalh that chu an ngaih pawimawh thu an lo tarlang tawh tih a sawi a ni. ZONET Thudawn danin Aizawl Civil Hospital kianga damdawi in siam, Care Hospital hi Dr. Tlangkunga ta a ni a, a panna kawng ber hi Aizawl Civil Hospital ram kal tlang ngai a nih avangin Hospital ram hung hian a kalkawng a dang ping thei a ni. Health Deptt. hotute sawi danin he ram hi Civil Hospital ram ni thin, IVth Grade quarter sakna atana hman thin a ni a, Dr. Tlangkunga hian hmun danga a ram nen a thlengpui niin an sawi a ni.
—————

Mizoram Drugs Whole Sellers’ Association chuan SRS leh Drugs Inspector-te’n Teresa Pachuau chenna In, Bungkawn atanga ruihtheih chi damdawi an man chungchanga an thlavang hauhna thuchhuah an siam chu thil awmdan dik tak an hriat loh vanga an tihsual palh a ni tih thuchhuah siamin an sawifiah a, vawiin khan an hruaitu  thenkhat-te chu Central YMA Office-ah lengin an pawl hming-a thuchhuah an lo neih tawh-ah ngaihdam an dil a ni. Central YMA Office-a leng, Mizoram Drugs Whole Sallers’ Association hruaitute hi an Vice President Pu Sanglura Sailo-in a ho a, hetah Teresa Pachuau chu Drugs Wholesale Licence a nei lo tih an hriat loh vanga a thlavang hauhna thuchhuah chu an siam niin an sawi a, an thuchhuah-a Secretary-in hming a ziah pawh chu Committee-na-ah Secretary chu kal lovin a hnu-ah thuchhuah tur an siamfel hnu-ah Secretary hi hming an sign tir niin an sawi a, an thiltih dik loh chungchangah hian ngaihdam an dil a ni.
————-

IR Battalion 5-na atana Constable 877 lakna District Hqrs hrang hranga neih mekah Measurement, Physical Fintness Test, Medical Test leh tih tur tul dangte zawh fel a ni tawh a, naktuk-ah a lakna Recruiting Centre tinah Written Test Exam neih a ni ang. Aizawl-ah chuan Written Test Exam bei tur hi mi 4,000 dawn lai a ni a, Exam turte chu zing dar 10-ah 3rd Battalion MAP Hqrs, Mualpui Gate-a lut hman vek tura  hriattir an ni a, mahni pen, ziah chhan, Admit Card leh thil pawimawh dangte keng vek tura hriattir an ni a, Mobile Phone erawh chu an ken phal a ni dawn lo a ni. Aizawl Recruiting Centre-ah hian sipai 322 lak a ni dawn a ni. Hetiang bawk hian Lungleia 2nd MAP Battallion Hqrs. Luangmualah-te, Saiha, Lawngtlai, Serchhip, Champhai, Mamit leh Kolasib-ahte naktuk hian Written Test neih a ni dawn a, he Exam-na-a tel tur zawng zawngte chu a hun dik taka thleng theuh tura hriattir an nih bakah, ziah chhan tur leh ziakna Pen leh Admit Card  keng vek tura hriattir an ni a, Examna hmunah Mobile Phone ken luh awih ni lo a ni. Tun tuma IR Battallion 5-na atana Recruiting Centre hrang hranga Constable lak tur zat chu, Saiha-ah 45, Lawngtlai-ah 88, Lunglei-ah 135, Serchhip-ah 53, Champhai-ah 107, Mamit-ah 62, Kolasib-ah 65 leh Aizawl-ah 322 a ni.
————-

Peoples Right to Information and Development Implementation Society of Mizoram (PRISM)  chuan Mizoram Assembly inthlan, kumin kum tawp lama neih tura Candidate-te lipse vek an tum. Hemi chungchanga an thuchhuah-ah chuan candidate-te mimal nun leh, tun hma-a an thiltih dan-te tarlangin, ram hruai tlak mihring an ni nge ni lo tih mipui hnenah tarlan an tum tih an sawi a, hemi bakah hian Political Party tin Manifesto pawh lip se an tum bawk a, an thiltih dan tur hi hun reilo te-ah PRISM hruaitute chuan relfelin an puangzar dawn a ni.
————-

Mizoram Director General of Police Pu Lalrokhuma Pachuau chuan Police Officer tur leh Indian Reserve Battallion tur lak runpui, tunlaia neih mek chu mi tam tak eizawnna siamsakna tur a nih thu a sawi. Tukin-a New Market Police Beat Post a tlawhna-a amah tawiawmtu, thuthar lakhawmtute zawhna chhangin, DGP chuan tunlaia hna lak mekah hian Police hotu lu ber atanga a hniam ber thlengin rim taka an thawh thu a sawi a, hna dang pawh lak leh zel tum a nih thu leh chung zingah chuan Nurse leh IV Grade-te pawh lak tel an ni ang tih a sawi a ni. DGP chuan Bazar-a Beat Post tih changtlun leh Dawrpui Veng him that zawkna tura khawtlang hruaitute’n tan la tura an ngenna chu theihtawp chhuah-a bawhzui a tum thu a sawi a ni.
—————-

Kuthnathawktu Pawl hrang hrang aiawhte leh Agriculture Deptt. hotute chuan damdawi atanga lei tih thatna hlo siam, Chemical Fertilizer hman avanga mihring hriselna tlahniam leh natna chi hrang hrang mihringte’n an vei chungchang vawiin khan an sawiho. He sawihona, Agriculture Minister, Pu H.Rammawi Office-a ama hova neihah hian Chemical Fertilizer hmang lova thing leh hnim tawih hmanga buh leh thlai chin uar a tul thu-te, Mizo-te’n pi leh pu hunlai atanga Chemical Fertilizer hmang lova ei an zawn dan-te sawi a ni a, he inkhawmah hian Thingdawl Agriculture Firm atan Organic Certification hmuh a nih tawh thu leh Aieng chinna atan Organic Certification hmuh leh theih beisei a nih thu-te Minister chuan a sawi a, Chemical Fertilizer, Sikkim State-in a lak luh loh thu leh Mizoram pawhin Chemical Fertilizer a la lut lo ve thei tih a sawi a ni.
—————

MNF Party- a Information & Publicity Department chuan tunhnai khan Publicity Sub-Committee dinin Chanchinbu mi leh Cable TV-a thawk, media mi thenkhat member atan a ruat. Member atana ruat, chanchinbu mithenkhatte hnen atanga ZONET corr. thudawn danin, member atana rua, Chanchinbu mite hian an hriat loh-a lo ruat an ni tih leh chanchin thar ziaka eizawng an nih avangin an tan tan bik neih a thiang lo tih an sawi a, Zoram Politik Editor chuan eng party mah a thlawp loh thu leh, thlawp a tum loh thute sawiin MNF Party Information & Publicity Sub-Committee member atana ruat a nihna chu a pawm lo tih a sawi a, amah anga ngaihdan nei chanchinbu mi zingah an awm bawk a ni.
————–

Mizoram State Social Welfare Board buatsaih vawiin khan Agriculture Conference Hall-ah Tlawmngai Pawl-te nen Mizoram State Social Welfare Board hnuaia ruahmanna chi hrang hrang thlir hona hun hman a ni a, Social Welfare Minister Pu R.Tlanghmingthanga’n a hmanpui a ni. He hun hi Mizoram State Social Welfare Board Chairman Pi Lalengruali Sailo-in a kaihruai a, Minister chuan kalkhawmte chu mihring dam hun chhung chhiar thiam tum turin a fuih a, nitin-a hun hman danah mi pawi sawi loh tum chu thil tha ber a ni thu leh insiamthatna ngai lai-ah insiamthat a pawimawh thu a sawi a ni. Minister chuan Deptt thenkhat chu sum hailuh mai nana din a nih loh thu a sawi a, mipui-te tih dan tha zirtir-a a tul chuan hmasawn nan sum seng thin an nih thu a sawi a ni. He hun hmanpuitu dang, Social Welfare Secretary Pu Lalsawta chuan Social Welfare Deptt chu sorkar laipui-ah pawh Department pawimawh tak a nih thu a sawi a, State danga a awm laiin tlamngai pawl tha an tam loh thu leh Mizoram-ah chuan tlawmngai pawl zawng zawngte chu pawl tha tak niin sorkar nen pawh tha taka an thawk thei chu thil lawmawm tak a nih thu a sawi a ni. He meeting-ah hian tlawmngai pawl aiawh kal an tha hle a, chawhnu session-ah scheme hrang hrang an zirho a ni.
————

Kumin Independence Day pawmna lawmna tura Technical Committee chu vawiin khan an Chairman, Aizawl SP Pu LT Hrangchal hovin a Pisa-ah an thukhawm a, kumin-a ram zalenna lawm-na tura inbuatsaih-na hrang hrang an sawiho a ni. He meeting-ah hian Department hrang hrang aiawh-te’n sum lama harsatnate sawi chhuakin a chinfel dan turte an sawiho a, Lammual cheimawina chu Bawrhsap-in a hmanrua tumin 10th AR-te’n a hnatul-te an thawk ang a, Ground chu a rualrem tawh loh avangin Parade turte tan a remchan tawh loh avangin PWD-in Lammual cheithat hna lo thawk se an ti a, Pavillion leh Gallery-te a that tawk tawh loh bawk avangin mipuite him theih nan siamthat nise an ti a ni. Meeting-ah hian Chairman chuan Department tinte mawhphurhna sawi chhuakin Independence Day lawmna hlawhtling taka neih a nih theih nan mahni Department mawhphurhna-te hneh tak leh inpumpek-na rilru nen kalpui theuh turin member-te a chah a,
————-

Inter Media Publicity Coordination Committee (IMPCC)-te chu vawiin khan an Chairman Pu C.Lalrosanga hovin an thukhawm a, he  hunah hian July thla thupui  “Sikserh do” chungchanga hmalakna hrang hrang thlirletin an sawiho a ni. Meeting chuan Sikserh Do chungchanga Health Department  bakah Media hrang hrang-te hmalakna chu tha thawkhat hle-in an ngai a, hetah hian Health Services Jt Director, Malaria changtu, Dr.Lalkailiani’n  Mizorama malaria hluar hlea lang chu hmanrua leh thawktu an awm that tawh avanga enkawl an tam tak vang a ni tih a sawi a, Malaria thihpui pawh an kiam zel niin a sawi a ni. Meeting chuan mautam avanga sazu puangte suat nan tur hman thin a ni a, t<r ei sazu-te hian an thih dawnin tui hmun an pan thin avangin loneitute chu an sazu thah lakhawm a, ti riral ngei tura zirtir tam a tul hle tih an sawi a, AIR Aizawl Station chu thla thar ni 15 atangin FM function tir tur a nih thu an sawi bawk. IMPCC meetinmg hian August thla chhung thupui atan Hnam inpumkhatna an thlang a ni.
————

Mizoram People Conference Party thalaite chuan Mizoram MP Pu Vanlalzawma’n UPA sorkar fiah ni-a vote a thlak ve lo chu an ngaihthiam loh thu thuchhuah siamin an sawi a, an thuchhuah-ah chuan MNF chu an thawhpui thin BJP hmaizah leh Kohhran vengthawng bawk-a, ‘B^k Politics’ hmangah an puh a, hmai hnih neia Politics khelh ai chuan mahni nihna zahpui lova lanchhuahpui ngam chu a pawimawh zawk tih an sawi a ni. MPC Thalai chuan Politics chu Party ral venbuk ni lovin ram leh hnam ral venbuk a ni zawk tih an sawi a, United Nation pawhin North Korea hnenah Nuclear Reactor a siam chu bansan tura ngenin a bansan chuan tanpuina tam zawk pek a tiam a, hetiang hi vote hralh-na ni lo, ram tana thil tha niin an sawi a ni. Hetih lai hian Aizawl District Congress Committee pawhin Pu Vanlalzawma chu Lok Sabha member atan MNF hruaitute thlantlin ni lovin Mizoram mipuite thlantlin a ni tih an sawi a, hemi chungchanga  MNF insawifiahna chu an pawm loh thu an sawi a ni.
————–

Mizoram sorkar hnuaia zirtirtu chi 3, Joint Committee hruaitute chuan an hlawh chungchanga an lungawi loh thu vawiin khan Aizawl Press Club-ah thuthar lakhawmtute an hrilh. He Joint Committee-ah hian Mizoram Primary Teachers Association (MPTA), Mizoram Middle School Teachers Association (MSTA) leh Mizoram Post-Graduate Teachers Association (MPGTA) hruaitute an tel a, an President Pu C.Chhuanvawra chuan an lungawi loh chhan sawifiah-in, sorkar hnathawk zawng zawngte hlawh tum thum tum li tih s^n a nih hnuah zirtirtute hlawh erawh chu tih s^n a la ni ve lova, Post-Graduate zirtirtute hlawh chu entry scale sang chuang lovin Special Allowance Cheng 200 chauh pek belh an ni a, Middle Headmaster-te hlawh chu tun hma-a thawkte leh tuna kai tharte nen inanga siamsak an ni a, Primary School-a thawk theuh theuh Selection Grade Scale-in lut tharte hlawh a phak lova, hlawh chungchanga thil dik lo awmte chu siamtha turin sorkar ngen a ni a, an ngenna a hlawhtlin loh chuan huam zau taka lungawi lohna lantir an tum dawn tih an sawi a ni. An kalzel dan tur zawhna chhangin Pu C.Chhuanvawra chuan, Joint Committee-in a la ngaihtuah dawn tih a sawi a ni.
————–

Vawiin khan Aizawl khawpui chu a lum lai berin celsius degree 27.6 a tling a, a vawh lai berin degree 19.2 a ni. Hemi chhunga ruah sur zat chu milimetre 1.2 a tling a ni.
———-

You can leave a response, or trackback from your own site.

2 Responses to “TUALCHHUNG CHANCHIN THAR”

  1. tomyvl says:

    Enga ti nge state dang district khata awm zatlo hian district neih hi kan atchilh tlat mai le.Kan ramhruatute zir loh nge, kan ngaihtuahna hi a selfish em em mai.Kan chhungkua leh laina kan ngaipawimah ber a, chutah kan khua, kan district a tawpah Mizoram.
    Mizoram pum din chhuahna tur leh hmasawnna tur hi a pawimawh hmasa ber dawn lawm ni.

  2. rotluanga says:

    MPC Thalai ten thuchhuah an siam hi a va dik hmel ve, ram leh hnam tana thil tha tura beiseina leh ngenna siam a vote thlak hi inhralhna a ni dawm en ni? Insual laia ka hai kan tih chuan kan chak lova, kan chan a chauh vang a ni thin a, kan ngamlo tihna a ni.Pu Zawma hi a hai a nih chuan a hai a ni mai. Pu Sangliana chu hma ata tawh tun thlengin a hmalak theihna ah a hai ve ngai lo. Pu Zawma leh Pu Sangliana hi patla khata buk chi an ni lo. Inleina pawh hi thil hrang daih a ni a, tumahin inleina an ti hlek lovang a, Pu Vaibelchhia a chiah hian inleina a ti ang. Hel pawl a biak avangin central sorkar in duhsakna pe ta sela, hel pawl hmangin an lei tihna a ni thei em?

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken