www.zonet.in

TUALCHHUNG CHANCHIN THAR

Mizorama party lian pathum aiawhten vawiin khan Aizawl-ah thuthar lakhawmtute an kawm vek a, heng party MNF, MPCC leh UDA hian Assembly inthlanpui lo awm turah sorkarna chan ngei an inrin thu an sawi theuh a ni. MNF hruaitute chuan hel thawhpui leh public meeting chungchangah Mizoram People Forum hnenah an zualko tih an sawi a, Hnam Run-a thuthar lakhawmtute kawmtu, an party Gen.Secy, Pu F. Aithanga leh hruaitu dangte chuan tualchhung chanchinbu pakhat-a HPC (D) te thuchhuah lo lang chungchang sawiin, MNF an thawhpui loh tur thu an sawi avangin HPC(D) hian thawhpui an nei th leh, an thawhpuite chu MNF an ni lo tih a tichiang niin an sawi a, he thil hi MPF President hnena an thlen thu an sawi bawk. MNF hruaitute chuan inthlanaa a lang a paua hel pawl an inrawlh hi MPF leh political party dangte pawhin an duh loh thu an puang tawh  tih sawiin, HPC (D) thiltih dan leh an thawhpui party te pawh hi mipui hriatah an khap turah an ngai tih an sawi a, hetiang taka hma la tur hian MPF pawh an ngen tih an sawi a ni. Vantlang inkhawm neih chungchangah party dang zawng zawngin MPF duh dan an kal tlangpui laiin  tun hnaia Indian National Congress tana rawn campaign, Rahul Gandhi leh Prime Minister Dr. Manmohan Singh chuan anmahni thu in vantlang inkhawm hi an huaihawt niin MNF hruaitu chuan a sawi bawk a. Prime Minister lokal hma khan MPF hnenah hemi chungchang hi an thlen nia sawiin, MPF pawhin MPCC president Pu Lal Thanhawla chu an lenchilh nghal a, vantlang inkhawm neih turah MPF an rawn loh bakah a kaihhruai hna pawh MPF kuta dah tura an lo inngaih thu an thlen a, mahse a tukah chuan MPF rawn lovin, a kaihhruai hna pawh an keng tlang ta tho niin a sawi. MNF hruaitu dang, Pu KL Rochama chuan Congress party-in Mizo chauh duh tawk lova campaign tura hnam dang an chah chhuak chiam mai chu an inrin tawk lohzia tilangtu niin a sawi a, tun hnaia campaign tura lo kal, Sonia Gandhi chu Thenzawl-a a tum hnu lawkah helicopter atangin bawm khai chhuah a awm nia sawiin, he thil hi en zui turin inchah mah se, mak tak maiin a bo zui nghal daih niin a sawi.

Mizoram Pradesh Congress Committee (MPCC) hruaitute pawhin Aizawl Press Club-ah thuthar lakhawmtute kawmin Congress-in sawrkarna chan ngei an inrin thu an hrilh a, an hruaitu, Pu C. Chawngkunga chuan, Aizawl khawpui chhunga neutral vote chu vote awm zawng zawng zaa 40 nia sawiin, heng zinga zaa 20 vel chuan awn lam an nei tho niin a sawi. Congress hruaitute chuan hmasawnna thlentir chu an ngaih pawimawh ber a ni tih sawi nawnin, MNF sawrkarin kum 10 chhung ro an rel tawh avangin mipuiin an ning thawkhat tawh hle niin a sawi bawk. An hruaitu dang, Pu Lalkhama chuan Mizoramah hian hnathawh dan kalphung hi thlak danglam a hun tawh hle nia sawiin, NLUP hmangin mi retheiten din khawchhuahna an lo nei ve dawn a ni a ti a. Tuna Building Regulation dan pawh hi a that tawk loh avangin hman tlak zawka siam that an tum tih a sawi.
————

United Democratic Alliance (UDA) pawhin Aizawl Press Club-ah thuthar lakhawmtute kawmin sawrkarna siam thei ngei tura an inngaih thu leh, party dangte chu mahnia sawrkarna chang thei lo tura inngaih avanga pawl tenau te te thawhpui niin an sawi a, policy inzah tawnna boruak hnuaia sawrkar intawm hmanga mipui sawrkar dik tak din theitu chu UDA chauh hi a ni an ti a ni. Vawiina inkawmhona hun hi Pu C. Lalsanglura UDA coordination Committee Chairman in a kaihruai a, Secretary Lallianchhunga chuan UDA huang chhunga thawhhona model hi khawvel huap pawha zahpuiawm lo khawpa tha, inthlan hma chauh ni lo, a hnu lam thlenga thawh hona tur a ni tih sawiin, mipuite pawhin UDA-ah hian rinna an nghat hle niin a sawi. UDA hruaitute hian Congress NLUP zawrh lai chu nasa takin an sawisel a, MNF chu policy zawrh tur pawh nei lo, an Manifesto pawh sem chhuah zahthlak khawpa duang uluk lovah puhin, BAFFACOS sum vaibelchhe 125 chuang pawngsualtu, Tuirial Hydel Project hna kal lai titawptu, Falkawn Referral Hospital tur tisawngnawitu, Aizawl leh a chhehvel area-a chengten tui hnianghnara an dawn theihna tur GAWSS-II tipiangsualtu-ah an puh bawk.
———–

Sorkar hnathawk awm lohna chhungkuate’n Medical Re-imbursement an bill ve theihna tura sorkar ruahmanna siam, Mizoram State Health Care Scheme hmanga Aizawl Civil Hospital-a damlo enkawl tam ber chuan a thlawna  damdawi pekna, damdawi-In canteen atang leh Emy Drugs Store atangin damdawi  an la thei tawh lova, heng damdawi dawrte hian an leiba rulhsaktu tur, Reliance Company-in pawisa tam tak a bat avanga damdawi pe chhuak thei tawh lo niin an insawi. Kan Correspondent zawhna chhangin Civil Hospital Canteen hian kumin June ni 6 atang  khan damdawi hi a lo pe chhuak thin a, tunah hian damdawi man an batsak chu cheng nuai 20 leh 24 inkar vel a tling tawh a, Reliance company hian tun thlengin cheng nuai 10 tling lo deuh an pe tawh a, hetianga harsatna an tawh chhoh tak avang hian thingtlang mi, mirethei zualte chauh lo chu damdawi an pe thei tawh lo niin an sawi a ni. Emy Drugs Store chuan kumin June thla atanga October thla thleng khan damdawi a pe chhuak a, amaherawhchu tunah chuan Cancer damdawi Chemo Therapy atana hman chauh lo chu a pe chhuak tawh lo niin an sawi a, an damdawi dawra Reliance Company-in pawisa a bat chu cheng nuai 9 vel niin a sawi bawk. Hetih lai hian  hemi chungchanga ZONET Correspondent-in mi pawimawh pakhat hnen atanga thu a dawn danin, Reliance company hi an leiba pe tlak thuai tura hrilh a, biak pawh reng a ni a, tunah hian cheng vaibelchhe 4 pe chhuak tura beisei a ni.
————–

Lunglei leh Lawngtlai Dist-ah Mizoram Assembly inthlanna, kar leh Thawhlehnia neih tura polling station hla zual deuha duty turte chuan vawiin khan an duty-na tur polling station an pan ta. Election Officer-te hnen atanga thu dawn danin, Lunglei atangin vawiin khan hmun hla pan tur polling station 59-a duty turte chu an chhuak a, Lunglei district-ah hian polling station 12, motor luh theih lohna, kea kal ngai a awm a ni. Hemi bak polling station dang 69-a duty-turte chu naktukah an chhuak leh dawn a, a bak polling party 36-te chu ni 1-ah an chhuak ang. Lawngtlai atang pawhin tukin khan Polling Party 71, an duty-na tur polling station panin an chhuak a, a bak polling station 74-a duty turte chu naktuk leh naktipah an chhuak dawn a ni.  Hemi bak district dang, Aizawl, Mamit, Kolasib, Champhai, Serchhip leh Saiha district-a Polling Party-te chu Pathianni khian an chhuak ang a, Polling Party tlemte, khawpui chhunga duty turte erawh chu Thawhtanni khian an chhuak dawn a ni. Naktuka Polling Party chhuak turte chuan vawiin khan inthlanna hmanraw pawimawhte an la a, inthlanna TA leh DA pawh an la nghal deuh vek a ni.
———–

Champhai-ah chuan inthlannaa kal chhuak tur Driver 1, Chawngthanmawia’n postal ballot paper thlak tura nimina a lak chhuah chu MNF Party worker nia sawi, B.Vanlalhruaia’n a duhna lovah a lo thaisak nia thu dawn a ni a, Chawngthanmawia lungawi lo hian Returning Officer, Pu TV Fambol hnenah ziakin a lungawi loh thu a thehlut a, hemi bakah hian Champhai North Block Congress Thalai President, Pu Zoremthanga Chalngeng pawhin he thu hi Returning Officer hnenah a thehlut a, Champhai atanga kan Correspondent thudawn danin Driver zin chhuak tur, Chawngthanmawia hian postal ballot paper chu a bawmah a thlak hman tawh avangin he thil hi chin fel zui atan Returning Officer chuan a dah ta a ni.
———-

Lungleiah chuan Sports Minister, Pu ZH Ropuia, Lunglei South biala MNF candidate-in Congress campaigner a hnek nia sawi thuthang a awm a, Lunglei MNF Sub Hqrs.-a MNF Thalaite chuan thuchhuah siamin Pu ZH Ropuia’n Congress campaigner a khawih lo tih an sawi chaing a, tun thla ni 25 zana Sethluna Pu ZH Ropuia public meeting-a tel haw lam chu an kawng pengah tuten emaw motor dahin an kalna kawng tur an dang ping a, Minister PSO leh driver-te chuan kal sawn turin an ngen a, an kal sawn thuai duh loh avangin an inchhang lawk deuh a, helai hmuna motor dahtute hi Congress campaigner mi 4 leh mi dang 1 an ni a, PSO leh driver-te chuan heng mite hi nam kiangin an kalsan ta niin an thuchhuah chuan a sawi a ni.
———

MPF Tawi Constituency Forum chuan Tawi constituency huam chhungah hel pawl mi thenkhat an lut nia sawi leh mi rik rap leh tithlabar zawngin an che nia sawi chu Police leh MPF-ten an enfiah mek niin an sawi a, an thuchhuahah chuan an thil hmuh chinah he thuthang hi thu belhchian dawl lo niin an hria a, mi tumah thlabar lo turin an ngen a ni.
———

Thla thar ni 2-a MLA Inthlanpui chuan a vawr tawp a thleng lek lek tawh a, he Inthlan lo awm tur avanga Party flag tar duh loh avangin In luah lai chhuahsan phah an awm ni-a sawi a ni. ZONET thu dawn danin Health Minister PSO, Pu Lalromawia, College Venga cheng chuan an In luahtu, Pu Lalnunhlua-te’n Congress flag an lo tar avangin an In atangin chhuahtir niin a sawi a, thudawnna pakhat chuan Pu Lalnunhlua nupui hian an kawngka-ah Congress sticker leh Congress flag an tar a, hei hi Pu Lalromawia hian duh lovin an In luah tawh lo turin a ti niin a sawi a, vawiin khan Pu Lalnunhlua-te hian Pu Lalromawia In an luah chu an chhuahsan niin an sawi a ni. Hetih lai hian In neitu, Pu Lalromawia nupui chuan an In luahtu, Pu Lalnunhlua nupui chuan tun kar Ningani khan an Inah Congress flag leh sticker a tar a, hei hi an pa chuan MPF duh dan a nih loh avangin tar lo turin a hrilh a, mahse hei hi Pu Lalnunhlua nupui chuan ngaithiam lovin a aia lian zawk a tar lui a, chu chu In neitupa chuan la thla leh turin a ngen a, chutah chuan an In luahtu nu chu thinrimin flag a lak thlak pahin an In pawh an luah zui dawn lo niin a sawi a, hetia In luahtute zawkin luah tawh lo tura In neitute an vau chu In neitupa pawhin duh lovin tun kar chhunga chhuak turin a hrilh ve ta mai niin a sawi.
————-

Kar leh Thawhlehni-a MLA Inthlanpui neih turah Champhai District chu a inpeih fel thawkhat a, District Bawrhsap, District Election Officer nibawk, Pu TV Fambawl kaihhruaina-in nimin khan inthlan buaipui tur, Polling Station hrang hranga kal turte thliar felna Randomisation of Polling Personnel chu Election Observer 3-te enpuina hnuaiah a tichhuak ta a, Polling Party-te kal chhuahna tur chu hriat a ni ta a ni. Champhai-ah hian nimin nileng khan Town Hall-ah duty tur-te’n final rehearsal an nei a, hetah hian chawhma lamah chuan Election Officer Pu R. Lalremsanga chuan inthlan ni-a Electoral Roll Mark dan turte leh fimkhur a pawimawhzia thu a sawi a, Presiding Officer leh Polling Officer-te’n Vote tla zat D.C. Control Room-ah report an pek theih nan SMS hmang turin a hrilh a, Vote tla-te hi chawhma dar 9:00, chhun dar 12:00 leh tlai dar 4:00-ah D.C. Control Room-ah rawn thawn turin a hriattir a, mahni awmna hmun-ah Mobile Signal a awm lo a nih chuan a remchang hnen atangin SMS thawn dan lo ngaihtuah turin a hriattir nghal bawk a ni. Sorkar thuchhuah tarlan danin Champhai-ah hian Polling Party zawng zawngte hnenah TA/DA sem chhuah nghal mai tura peih a ni tawh a, hemi rual hian inthlannaa hman tur bungrua-te chu sem chhuah a ni ang a, hmun hla zawka duty turte chuan an duty-na hmun chu naktuk hian an pan ang a, December ni 1-ah Champhai Town huam chhugha duty turte pawhin an duty-na tur an pan tawh dawn a ni.
————–

Saiha-ah pawh he Inthlanna neih tura inbuatsaihna thlir hovin vawiin khan Bawrhsap, District Election Officer ni bawk, Pu Rodney Lalrinawma hovin a Pisa-ah Election Observer 2 leh inthlan buaipuitute an thu khawm a, Inthlanna tluang tak leh felfai taka neih a nih theih nana kawng hrang hranga inbuatsaihna kalpui chhoh mek dante sawi hovin harsatna emaw rokhawlhna emaw awm thulha hmalak dan turte an sawi ho a ni. Sorkar thuchhuah tarlan danin Saiha District-a venhimna lam thawk turin Mizoram Police-te tanpui turin vawiin hian CRPF-te chu Saiha an lo thlen beisei a ni a, inkalpawhna kawng tha lo zual siam ngai lai la awmte endik-a siamthat dan turte, buhfai dinhmun that thute, Polling Station tina damdawi packet leh Health Department staff duty tur inruat a nih thute, Polling Party-te leh District Election hmunpui inbiak pawh zung zung dan turte an sawi ho a, Saiha leh Palak Constituency Election Observer 2, Pu S L Bhakat leh Pu M A Mondal-te pawhin an ngaih pawimawhte sawilangin thingtlang kilkhawr lama tui supply leh inkalpawhna kawng tha lo deuh awm mah se inthlan a tih buai an rin loh thu an sawi a, inbuatsaihnate chu lungawithlak tiin harsatna a thlen an beisei loh thute sawiin inthlannaa mawhphurtute chu inthlan zawh fel vek hma zawng chu, tha thlah lova theih tawpa tan la chhunzawm zel turin an chah bawk. Tukin khan Observer-te hriatpuinain a vawi 3 nan Randomisation neih a ni a, inthlanna duty turte kalna tur Polling Station tih fel a ni a, hmun hla deuhva duty tur Polling Party 21-te chu naktuk hian an chhuak ang a, a bak zawng 45-te chu Thawhtanni-ah an chhuak ang. Inthlan huna bungraw hman turte pawh endik fel vek a ni tawh a, motor tlan tir dan turte chinfel mek niin Counting Hall tur pawh DC Office Complex-ah buatsaih mek a ni bawk.
————-

Tripura-a Bru Refugee camp 6-a postal ballot paper hmanga vote thlak chu vawiin khan chhunzawm leh a ni a, vote neite hi an awmna hmun a darh sarh em avangin an vote thlakna tur leh anmahni awmna Electoral Roll zawn chhung a rei deuh avangin vote thlak a chak mawh hle a, Camp-a vote nei zawng zawng mi 8,373 zinga thahnem takin vote an thlak a, biak pawh a harsat avangin vote tla zat hi tun thlengin hriat fiah theih a la ni rih lo a ni.
———

Mizoram Assembly inthlanna, Demcember ni 2-a neih tur atan campaign chuan a vawrtawp a thleng ta a, vawiin, hun hnuhnung khan candidate leh party mite chuan theihtawp chhuahin an party theuh tan tan an la a ni. Koalsib District-ah chuan vawiin chhun khan UDA chuan Diakkawna inkhawm buatsaihin campaign a khar ta a, hemi hnu vawiin chawhnu dar 1 khan MNF pawhin campaign a khar a ni. Naktuk hi Pathianni a nih avangin party hrang hrang leh candidate-te chuan Pathianni an hman dan pangngai anga hmangin campaign an chawlhsan tawh dawn a, hemi hnu chuan campaign phal tawh loh hunin naktuk tlai dar 4 atangin a nang chho dawn tawh a, campaign boruak a reh zui tawh dawn a ni. Hetih lai hian Aizawl District Election officer chuan naktuk tlai dar 4 atanga campaign theih tawh loh a nih dawn thu hi mipuite leh Political Party-te a hriattir a, cinema leh TV-a inthlan lam thil, campaign-na lam hawi Party-ten an chhuah theih tawh loh thute, concert leh intihhlimna lampang chi reng reng buatsaih phal a nih loh thute thuchhuah siamin mipuite a hriattir a ni. Hetih lai hian Aizawl DC chuan inthlan hma ni, December ni 1 atanga a tuk ni 2 thleng leh vote chhiar ni, December ni 8 chu  zu khap ni, ‘Dry day’-ah a puang a, Cr. PC Section 144-na tlawhchhanin zu hralh chhuah, kawl leh inte a khap a ni.
————

Dampa bial Mizo Zirlai Pawl chuan an pawlin mimal zalenna anga an duh apiang an campaign pui thei ang tih an puan hnuah an pawla mi thenkhat campaign-te chu MNF Party candidate campaign puituten vauin kut an thlak niin an sawi a, hemi chungchanga vawiina Aizawla thuchhuah an siamah Dampa bial MZP member-te chu Police-in an chhan hial ngai khawpin vaubeh leh kut thlak nia sawiin hetiang thil hi thleng tawh lose an duh tih an thuchhuahah chuan an sawi a ni.
———–

Sorkar laipui, Ministry of Commerce hnuaia Gems & Jewellery Export Promotion Council leh Mizoram sorkara Geology & Mining tangkawp buatsaih, lunghlu endik leh bihchianna training, kar khat chhung neih chu vawiin khan khar a ni. Lunghlu zir chianna training-ah hian mi 16 an tel a, an zingah Master Degree nei leh research ti lai mek an tel nual a, a kharna inkhawm-ah hian khuallian, Industries Director Pu Shurbir Singh chuan, zirna hlu tak hlawhtling taka an zo thei chu lawmawm a tih thu sawiin, zirlaite chu an thiamnate hmang tangkai turin a chah a ni. GJEPC Regional Director Pu Santanu Raj Guru pawhin Myanmar rama lunghlute chu Mizoram atangin International market-ah supply theih a nih thu a sawi a, Gemologist Pu Kaushik Chakraborty pawhin, Mizo zirlaite chu zirtir an nawm tuh leh an lakah beiseina sang tak a neih thu a sawi bawk.
————-

Trade & Commerce Department-a Marketing Officer, Pu J. Lalthantlinga chu Criminal Case nei lai mek a nih avang leh a case hi chhui mek a nih avangin a hna atangin chawlhtir a ni. Pu J. Lalthantlinga chawlhtirna thupek hi Trade & Commerce Secretary Pu Vanlalhuma chuan November 27 khan a tichhuak a, Suspend Order-a a lan danin Pu Lalthantlinga hian an Department pawisa cheng nuai 89 chu Chiahpuam-ah a dah a, hei vang hian a lakah Department Director chuan November 17 khan Aizawl Police Station-ah FIR a thehlut a ni. Pu J. Lalthantlinga’n chiahpuama a dah, cheng nuai 89 hi Deparment hian sorkar laipuia Ministry of Commerce atangin ASIDE Fund hmanga Myanmar ramri, Zokhawthar-a Land Custom Stations tihchangtlunna tura a hmuh a ni a, Pu J. Lalthantlinga hi suspend a nih loh chuan, office-a ASIDE Fund leh a kaihhnawih thil pawimawhte a tichingpen thei dawn a, hei vang hian suspend a ni tih Suspension Order-ah chuan a tarlang a ni.
————-

Bungkawn Vengthar YMA Branch chuan an branch-in kum 6 a tlin lawm nan leh tanpui ngaite tanpui nan vawiin khan Aizawl Civil Hospital-ah a mamawh apiangte hman turin thisen an pe. Thisen petute hi mipa 19 leh hmeichhe 1 an ni a, unit 20 an pe a ni.
————–

Vawiin khan Aizawl khawpui chu a lum lai berin celsius degree 26.9 a ni a, a vawh lai berin degree 14.8 a ni. Hemi chhung hian ruah a sur lo a ni.
———-